ਸੱਚ ਇਹ ਹੈ ਕਿ ਅੱਜ ਸਿੱਖਾਂ ਨੂੰ ਖ਼ਤਰਾ ਅਪਣੇ ਆਗੂਆਂ ਤੋਂ ਹੈ ਕਿਉਂਕਿ ਉਹ ਜਦ ਪਹਿਰੇਦਾਰੀ ਕਰਦੇ ਹਨ ਤਾਂ ਸਿੱਖ ਫ਼ਲਸਫ਼ੇ ਦੀ ਜਾਂ ਆਮ ਸਿੱਖ ਦੀ ਨਹੀਂ ਬਲਕਿ ਅਪਣੀ ਕਰਦੇ ਹਨ।
ਸੱਚ ਇਹ ਹੈ ਕਿ ਅੱਜ ਸਿੱਖਾਂ ਨੂੰ ਖ਼ਤਰਾ ਅਪਣੇ ਆਗੂਆਂ ਤੋਂ ਹੈ ਕਿਉਂਕਿ ਉਹ ਜਦ ਪਹਿਰੇਦਾਰੀ ਕਰਦੇ ਹਨ ਤਾਂ ਸਿੱਖ ਫ਼ਲਸਫ਼ੇ ਦੀ ਜਾਂ ਆਮ ਸਿੱਖ ਦੀ ਨਹੀਂ ਕਰਦੇ ਬਲਕਿ ਅਪਣੀ ਕਰਦੇ ਹਨ। ਜਦ ਬਿਕਰਮ ਸਿੰਘ ਮਜੀਠੀਆ ਜੇਲ ਵਿਚੋਂ ਬਾਹਰ ਆਏ ਤਾਂ ਮੀਡੀਆ ਵਿਚ ਇਕ ਮਜ਼ਾਕ ਚਲ ਪਿਆ ਕਿ ‘ਚਲੋ ਇਕ ਬੰਦੀ ਸਿੱਖ ਤਾਂ ਰਿਹਾਅ ਹੋ ਗਿਆ’ ਅਤੇ ਅਕਾਲੀ ਦਲ ਦੀ ਮੁਹਿੰਮ ਸਫ਼ਲ ਹੋਈ! ਪਰ ਇਸ ਮਜ਼ਾਕ ਵਿਚ ਕੌੜਾ ਸੱਚ ਵੀ ਹੈ ਕਿ ਅੱਜ ਤਕ ਅਕਾਲੀ ਦਲ ਨੇ ਕਦੇ ਕਿਸੇ ਬੰਦੀ ਸਿੱਖ ਨੂੰ ਰਿਹਾਅ ਨਹੀਂ ਕਰਵਾਇਆ। ਸੱਤਾ ਵਿਚ ਰਹਿੰਦਿਆਂ ਸਿੱਖ ਬੰਦੀਆਂ ਲਈ ਕੱਖ ਭੰਨ ਕੇ ਦੋਹਰਾ ਨਹੀਂ ਕੀਤਾ।
ਅਕਾਲ ਤਖ਼ਤ ਤੋਂ ਗਿਆਨੀ ਹਰਪ੍ਰੀਤ ਸਿੰਘ ਨੇ ਸਿੱਖਾਂ ਵਾਸਤੇ ਖ਼ਤਰੇ ਦੀ ਘੰਟੀ ਵਜਾ ਦਿਤੀ ਹੈ ਅਤੇ ਆਖਿਆ ਹੈ ਕਿ ਹੁਣ ਸਿੱਖਾਂ ਅੰਦਰ ਮੁਕੰਮਲ ਏਕਤਾ ਪੈਦਾ ਕਰਨ ਦਾ ਸਮਾਂ ਹੈ। ਪੰਜਾਬ ਵਿਚ ਤਿਰੰਗਾ ਲਹਿਰਾਉਣ ਤੇ 15 ਅਗੱਸਤ ਨੂੰ ਕਈ ਥਾਵਾਂ ਤੇ ਰੋਸ ਦੇਖਿਆ ਗਿਆ। ਬੰਦਾ ਸਿੰਘ ਬਹਾਦਰ ਯਾਦਗਾਰ ਚਪੜਚਿੜੀ ਨੂੰ ਤਿਰੰਗੇ ਦੇ ਰੰਗਾਂ ਵਿਚ ਰੰਗ ਕੇ ਪੇਸ਼ ਕਰਨ ਦਾ ਵੀ ਤੇ ਤਿਰੰਗੇ ਦੇ ਰੰਗਾਂ ਦੀਆਂ ਲਾਈਟਾਂ ਤੇ ਸ਼੍ਰੋਮਣੀ ਕਮੇਟੀ ਵਲੋਂ ਵੀ ਰੋਸ ਪ੍ਰਗਟਾਇਆ ਗਿਆ।
Giani Harpreet Singh
ਵਿਰੋਧ ਕਰਨ ਵਾਲਿਆਂ ਦਾ ਕਹਿਣਾ ਸੀ ਕਿ ਜੇ ਸਾਡੇ ਨਿਸ਼ਾਨ ਸਾਹਿਬ ਨੂੰ ਲਾਲ ਕਿਲ੍ਹੇ ਤੇ ਨਾ ਲਹਿਰਾਇਆ ਗਿਆ ਤਾਂ ਅਸੀ ਤਿਰੰਗਾ ਨਹੀਂ ਲਹਿਰਾਉਣ ਦੇਵਾਂਗੇ। ਪਰ ਇਹ ਘਟਨਾਵਾਂ ਤੇ ਬਿਆਨ ਇਕ ਛੋਟੇ ਜਹੇ ਹਿੱਸੇ ਨਾਲ ਹੀ ਸਬੰਧਤ ਸਨ ਕਿਉਂਕਿ ਵੱਡਾ ਤਬਕਾ ਤਾਂ ਅੱਜ ਵੀ ਅਪਣੇ ਆਪ ਨੂੰ ਹਿੰਦੁਸਤਾਨ ਦਾ ਹਿੱਸਾ ਮੰਨਦਾ ਹੈ ਤੇ ਕਈ ਸਾਰੀਆਂ ਨਾਰਾਜ਼ਗੀਆਂ ਤੇ ਸ਼ਿਕਾਇਤਾਂ ਦੇ ਬਾਵਜੂਦ ਇਸ ਦੇਸ਼ ਤੋਂ ਹੀ ਅਪਣੇ ਹੱਕ ਮੰਗਦਾ ਹੈ।
Bargadi incidence
ਅੱਜ ਜੇ ਬਰਗਾੜੀ ਦਾ ਅਸਲ ਇਨਸਾਫ਼ ਲੈਣ ਲਈ ਮੋਰਚਾ ਡਟਿਆ ਹੋਇਆ ਹੈ ਤਾਂ ਉਹ ਵੀ ਇਸੇ ਦੇਸ਼ ਦੀ ਨਿਆਂਪਾਲਿਕਾ ਤੋਂ ਹੀ ਆਸ ਰਖਦਾ ਹੈ। ਜੇ ਕਿਸੇ ਲੋਕ ਫ਼ਤਵੇ ਦੀ ਗੱਲ ਹੋਵੇ ਤਾਂ ਉਹ ਚੋਣਾਂ ਦੇ ਨਤੀਜਿਆਂ ਨੇ ਸੁਣਾ ਹੀ ਦਿਤਾ ਹੈ। ਜਿਨ੍ਹਾਂ ਅਕਾਲੀ ਆਗੂਆਂ ਨੂੰ ਲੋਕ ਬਰਗਾੜੀ ਤੇ ਬਹਿਬਲ ਕਲਾਂ ਕਾਂਡਾਂ ਦੇ ਜ਼ਿੰਮੇਵਾਰ ਮੰਨਦੇ ਹਨ, ਉਨ੍ਹਾਂ ਨੂੰ ਸਿੱਖ ਵੋਟਰਾਂ ਨੇ ਸਿਆਸੀ ਤੌਰ ਤੇ ਸਿਫ਼ਰ ਬਣਾ ਹੀ ਦਿਤਾ ਹੈ।
Giani Harpreet Singh
ਪੰਜਾਬ ਵਿਚ ਏਕਤਾ ਤਾਂ ਹੈ ਤੇ ਉਹ ਵੀ ਬੜੀ ਮਜ਼ਬੂਤ ਪਰ ਜਿਸ ਏਕਤਾ ਦੀ ਦੁਹਾਈ ਗਿ. ਹਰਪ੍ਰੀਤ ਸਿੰਘ ਦੇ ਰਹੇ ਹਨ, ਉਹ ਅਕਾਲੀ ਦਲ ਦੇ ਮਾਲਕਾਂ ਅਥਵਾ ਬਾਦਲਾਂ ਨਾਲ ਬਣਾਈ ਰੱਖਣ ਵਾਲੀ ਏਕਤਾ ਦੀ ਗੱਲ ਹੁੰਦੀ ਹੈ ਤੇ ਉਹ ਚਾਹੁੰਦੇ ਹਨ ਕਿ ਸਾਰੇ ‘ਅਕਾਲੀ’ ਬਾਦਲਾਂ ਦੀ ਉਂਗਲ ਸਦਾ ਲਈ ਫੜੀ ਰੱਖਣ--ਬਾਦਲ ਭਾਵੇਂ ਪੰਥਕ ਗੱਡੀ ਦਾ ਕਾਂਟਾ ਜਦੋਂ ਮਰਜ਼ੀ ਬਦਲ ਲੈਣ। ਸੱਚ ਇਹ ਹੈ ਕਿ ਅੱਜ ਸਿੱਖਾਂ ਨੂੰ ਖ਼ਤਰਾ ਅਪਣੇ ਆਗੂਆਂ ਤੋਂ ਹੈ ਕਿਉਂਕਿ ਉਹ ਜਦ ਪਹਿਰੇਦਾਰੀ ਕਰਦੇ ਹਨ, ਉਹ ਸਿੱਖ ਫ਼ਲਸਫ਼ੇ ਦੀ ਨਹੀਂ ਜਾਂ ਆਮ ਸਿੱਖ ਦੀ ਨਹੀਂ ਬਲਕਿ ਅਪਣੀ ਹੀ ਕਰਦੇ ਹਨ।
Bikram Majithia
ਜਦ ਬਿਕਰਮ ਸਿੰਘ ਮਜੀਠੀਆ ਜੇਲ ਵਿਚੋਂ ਬਾਹਰ ਆਏ ਤਾਂ ਮੀਡੀਆ ਵਿਚ ਇਕ ਮਜ਼ਾਕ ਚਲ ਪਿਆ ਕਿ ‘ਚਲੋ ਇਕ ਬੰਦੀ ਸਿੱਖ ਤਾਂ ਰਿਹਾਅ ਹੋ ਗਿਆ’ ਅਤੇ ਅਕਾਲੀ ਦਲ ਦੀ ਮੁਹਿੰਮ ਸਫ਼ਲ ਹੋਈ। ਪਰ ਇਸ ਮਜ਼ਾਕ ਵਿਚ ਕੌੜਾ ਸੱਚ ਵੀ ਹੈ ਕਿ ਅੱਜ ਤਕ ਅਕਾਲੀ ਦਲ ਨੇ ਕਦੇ ਕਿਸੇ ਬੰਦੀ ਸਿੱਖ ਨੂੰ ਰਿਹਾਅ ਨਹੀਂ ਕਰਵਾਇਆ। ਸੱਤਾ ਵਿਚ ਰਹਿੰਦਿਆਂ ਸਿੱਖ ਬੰਦੀਆਂ ਲਈ ਕੱਖ ਭੰਨ ਕੇ ਦੋਹਰਾ ਨਾ ਕੀਤਾ। ਰਿਹਾਈ ਕਾਂਗਰਸੀ ਆਗੂ ਸੁਖਜਿੰਦਰ ਸਿੰਘ ਰੰਧਾਵਾ ਨੇ ਕਰਵਾਈ। ਅਕਾਲੀ ਦਲ ਦੀ ਮੁਹਿੰਮ ਸਿਰਫ਼ ਭਾਜਪਾ ਨੂੰ ਅਪਣੀ ਤਾਕਤ ਦਾ ਅਹਿਸਾਸ ਕਰਵਾਉਣਾ ਸੀ ਤੇ ਰਾਸ਼ਟਰਪਤੀ ਚੋਣਾਂ ਵਿਚ ਸਮਰਥਨ ਦੇਣ ਮਗਰੋਂ ਘਰ ਵਿਚ ਸ਼ਾਂਤੀ ਹੈ ਤੇ ਜਿਸ ਨੇ ਬਾਹਰ ਆਉਣਾ ਸੀ, ਉਹ ਆ ਗਿਆ ਹੈ।
Punjab and Haryana High Court
ਅੱਜ ਪੰਜਾਬ ਹਰਿਆਣਾ ਹਾਈ ਕੋਰਟ ਦੇ 10 ਨਵੇਂ ਜੱਜਾਂ ਵਿਚੋਂ ਇਕ ਵੀ ਸਿੱਖ ਨੂੰ ਜੱਜ ਨਹੀਂ ਬਣਾਇਆ ਗਿਆ। ਅੱਜ ਪੰਜਾਬ ਦੀ ਨੁਮਾਇੰਦਗੀ ਕਰਨ ਵਾਲੀਆਂ ਕੁਰਸੀਆਂ ਤੇ ਸਿੱਖ ਕੋਈ ਵੀ ਨਹੀਂ ਦਿਸਦਾ। ਇਸ ਦਾ ਇਹ ਮਤਲਬ ਨਹੀਂ ਕਿ ਇਹ ਲੋਕ ਪੰਜਾਬ ਜਾਂ ਸਿੱਖਾਂ ਵਿਰੁਧ ਹਨ ਸਗੋਂ ਇਹ ਤਾਂ ਸਿੱਖਾਂ ਦੇ ਇਤਿਹਾਸ ਤੋਂ ਜਾਣੂੰ ਹੀ ਨਹੀਂ। ਇਨ੍ਹਾਂ ਨੇ 47 ਤੇ 84 ਦਾ ਸੰਤਾਪ ਨਹੀਂ ਹੰਢਾਇਆ।
Akal Takhat Sahib
ਇਹ ਬਾਬੇ ਨਾਨਕ ਦੀ ਸੋਚ ਨਾਲ ਨਹੀਂ ਜੁੜੇ ਜਿਸ ਕਰ ਕੇ ਇਹ ਲੋਕਾਂ ਦੀ ਮਾਨਸਕਤਾ ਨੂੰ ਸਮਝ ਨਹੀਂ ਪਾਉਣਗੇ ਤੇ ਲੋਕਾਂ ਅਤੇ ਸਿਸਟਮ ਵਿਚ ਦੂਰੀਆਂ ਵਧਦੀਆਂ ਜਾਣਗੀਆਂ। ਪਰ ਇਹ ਸੱਭ ਅੱਜ ਸਾਡੇ ਅਖੌਤੀ ਸਿੱਖ ਲੀਡਰਾਂ ਦੀ ਕਮਜ਼ੋਰੀ ਕਾਰਨ ਹੋ ਰਿਹਾ ਹੈ ਕਿ ਪੰਜਾਬ ਵਿਚ ਆਮ ਲੋਕਾਂ ਦੇ ਮਸਲੇ ਹੱਲ ਨਹੀਂ ਹੁੰਦੇ। ਅੱਜ ਸ਼੍ਰੋਮਣੀ ਕਮੇਟੀ ਦੀਆਂ ਚੋਣਾਂ ਕਰਵਾਉਣ ਦੀ ਨਹੀਂ, ਰੁਕਵਾਉਣ ਦੀਆਂ ਤਰਕੀਬਾਂ ਬਣਾਈਆਂ ਜਾ ਰਹੀਆਂ ਹਨ ਕਿਉਂਕਿ ਸੱਭ ਜਾਣਦੇ ਹਨ ਕਿ ਜਿਸ ਤਰ੍ਹਾਂ ਅਸੈਂਬਲੀ ਚੋਣਾਂ ਵਿਚ ਨਕਲੀ ਸਿਆਸਤਦਾਨਾਂ ਦਾ ਸਫ਼ਾਇਆ ਹੋ ਗਿਆ ਹੈ, ਉਸੇ ਤਰ੍ਹਾਂ ਸ਼੍ਰੋਮਣੀ ਕਮੇਟੀ ਵਿਚੋਂ ਵੀ ਸਫ਼ਾਇਆ ਹੋ ਸਕਦਾ ਹੈ।
ਸੋ ਇਕ ਮਾਹੌਲ ਬਣਾਇਆ ਜਾ ਰਿਹਾ ਹੈ ਜਿਸ ਵਿਚ ਸਿੱਖਾਂ ਨੂੰ ‘ਏਕਤਾ’ ਦੇ ਨਾਂ ਤੇ, ਕਿਸੇ ਅਗਿਆਤ ਖ਼ਤਰੇ ਬਾਰੇ ਬੋਲ ਕੇ ਡਰਾਇਆ ਜਾ ਰਿਹਾ ਹੈ ਜਦਕਿ ਅਸਲ ਖ਼ਤਰਾ ਇਨ੍ਹਾਂ ਆਗੂਆਂ ਦੀ ਨਿਜੀ ਦੌਲਤ ਅਤੇ ਤਾਕਤ ਹੈ। ਅਕਾਲ ਤਖ਼ਤ ਵਾਲੇ ਹੀ ਦੱਸਣ, ਜਿਨ੍ਹਾਂ ਲੀਡਰਾਂ ਪਿੱਛੇ ਲੱਗਣ ਨੂੰ ਉਹ ‘ਏਕਤਾ’ ਦਸ ਰਹੇ ਹਨ, ਉਨ੍ਹਾਂ ਨੇ ਸਿੱਖ ਪੰਥ ਲਈ ਅਪਣੇ ਸ਼ਾਸਨ ਕਾਲ ਦੌਰਾਨ ਕੋਈ ਇਕ ਵੀ ਪ੍ਰਾਪਤੀ ਕਰ ਵਿਖਾਈ ਸੀ?
-ਨਿਮਰਤ ਕੌਰ
