ਡਾਢੇ ਦਾ ਸੱਤੀਂ ਵੀਹੀਂ ਸੌ
ਅੱਜ ਭਾਰਤ ਵਿਚ ਦੋ ਵਿਰੋਧ ਚੱਲ ਰਹੇ ਹਨ। ਇਕ ਵਿਰੋਧ ਚੀਨ ਦਾ ਚੱਲ ਰਿਹਾ ਹੈ ਤੇ ਦੂਜਾ ਕਰਨ ਜੌਹਰ, ਸਲਮਾਨ ਖ਼ਾਨ ਆਦਿ ਵਰਗਿਆਂ ਦਾ। ਦੋਵੇਂ ਹੀ ਲਹਿਰਾਂ 'ਬਾਏ ਆਊਟ' ਦੀ ਪੁਕਾਰ ਲੈ ਕੇ ਆ ਰਹੀਆਂ ਹਨ। ਪਹਿਲਾਂ ਚੀਨ ਦੀ ਗੱਲ ਕਰੀਏ ਤਾਂ ਚੀਨ ਨੇ ਸਾਡੀ ਧਰਤੀ ਉਤੇ ਹਮਲਾ ਕਰ ਕੇ ਸਾਡੇ ਹੀ ਫ਼ੌਜੀਆਂ ਨੂੰ ਸ਼ਹੀਦ ਕੀਤਾ।
Salman Khan
ਕੁੱਝ ਅਪਣੇ ਆਪ ਨੂੰ ਮਾਹਰ ਅਖਵਾਉਣ ਵਾਲੇ ਸੁਰੱਖਿਆ ਮਾਹਰ ਹੁਣ ਇਹ ਆਖ ਰਹੇ ਹਨ ਕਿ ਚੀਨ ਨੇ ਇਹ ਭਾਰਤ ਦੀ 'ਆਤਮ ਨਿਰਭਰ' ਮੁਹਿੰਮ ਤੋਂ ਘਬਰਾ ਕੇ ਕੀਤਾ ਕਿਉਂਕਿ ਭਾਰਤ ਸਰਕਾਰ ਨੇ ਅਪਣੇ ਟੈਂਡਰ ਵਿਚ ਕੁੱਝ ਹਿੱਸਾ ਭਾਰਤੀ ਉਦਯੋਗਾਂ ਵਾਸਤੇ ਰੱਖ ਲਿਆ ਸੀ। ਚੀਨ ਡਰ ਗਿਆ ਕਿ ਹੁਣ ਉਸ ਦੀ ਅਰਥ ਵਿਵਸਥਾ ਨੂੰ ਖ਼ਤਰਾ ਪੈਦਾ ਹੋ ਜਾਏਗਾ। ਚੀਨ ਵਿਚ ਬੇਰੁਜ਼ਗਾਰੀ ਦਾ ਅੰਕੜਾ ਵੱਧ ਰਿਹਾ ਸੀ।
karan johar
ਸੋ ਉਨ੍ਹਾਂ ਨੇ ਅਪਣੇ ਨਾਗਰਿਕਾਂ ਨੂੰ ਬਹਿਲਾਉਣ ਲਈ ਇਹ ਕਾਂਡ ਰਚਾਇਆ। ਦੂਜੇ ਪਾਸੇ ਕਿਹਾ ਜਾ ਰਿਹਾ ਹੈ ਕਿ ਸੁਸ਼ਾਂਤ ਦੀ ਮੌਤ ਨਹੀਂ ਹੋਈ, ਉਹ ਹਤਿਆ ਸੀ ਤੇ ਇਹ ਸਾਰਾ ਕਾਂਡ ਏਕਤਾ ਕਪੂਰ, ਕਰਨ ਜੌਹਰ ਦਾ ਸੀ। ਉਨ੍ਹਾਂ ਨੇ ਸੁਸ਼ਾਂਤ ਨੂੰ ਖ਼ੁਦਕੁਸ਼ੀ ਲਈ ਮਜਬੂਰ ਕਰ ਦਿਤਾ ਕਿਉਂਕਿ ਉਸ ਦੀਆਂ ਸੱਤ ਫ਼ਿਲਮਾਂ ਰੱਦ ਕਰ ਦਿਤੀਆਂ ਗਈਆਂ ਸਨ।
China
ਹੁਣ ਪੂਰੀ ਤਸਵੀਰ ਦੀ ਗੱਲ ਕਰੀਏ ਤਾਂ ਚੀਨ ਦੀ ਕੁਲ ਐਕਸਪੋਰਟ ਵਿਚ ਭਾਰਤ ਵਲ ਆਉਂਦਾ ਹਿੱਸਾ 2 ਫ਼ੀ ਸਦੀ (16.7 ਬਿਲੀਅਨ) ਹੈ ਤੇ ਜੇਕਰ ਭਾਰਤ ਅੱਜ ਤੋਂ ਚੀਨ ਦਾ ਸਮਾਨ ਲੈਣਾ ਬੰਦ ਕਰ ਦੇਵੇ ਤਾਂ ਨੁਕਸਾਨ ਚੀਨ ਨੂੰ ਇਕ ਆਮ ਮੱਛਰ ਦੇ ਡੰਗ ਜਿੰਨਾ ਹੀ ਹੋਵੇਗਾ, ਵੱਧ ਨਹੀਂ ਹੋਵੇਗਾ। ਦੂਜੇ ਪਾਸੇ ਭਾਰਤ ਚੀਨ 70.3 ਬਿਲੀਅਨ ਦਾ ਸਮਾਨ ਆਯਾਤ ਕਰਦਾ ਹੈ।
Chinas goods
ਚੀਨ ਤੇ ਭਾਰਤ ਦੀ ਨਿਰਭਰਤਾ ਇਲੈਕਟਰਾਨਿਕ ਤੇ ਇਲੈਕਟ੍ਰੀਕਲ ਸਮਾਨ ਦੀ ਹੀ ਤਕਰੀਬਨ 70 ਫ਼ੀ ਸਦੀ ਹੈ। ਵੀਵੋ, ਰੈੱਡ-ਮੀ ਜਹੀਆਂ ਹੋਰ ਵੀ ਕਈ ਕੰਪਨੀਆਂ ਦੇ ਫ਼ੋਨ ਚੀਨ ਤੋਂ ਆਉਂਦੇ ਹਨ। ਭਾਰਤ ਦਾ ਸਾਈਕਲ ਉਦਯੋਗ ਚੀਨ ਸਦਕੇ ਬੰਦ ਹੋ ਰਿਹਾ ਹੈ ਜਿਵੇਂ ਕਿ ਐਟਲਸ ਦੀ ਤਾਜ਼ਾ ਮਿਸਾਲ ਹੈ। ਤੁਹਾਡਾ ਅਪਣਾ ਘਰ ਵੀ ਸਜਾਵਟ, ਕਪੜੇ ਅਤੇ ਖਾਣ ਪੀਣ ਦੀਆਂ ਚੀਜ਼ਾਂ ਲਈ ਚੀਨ ਉਤੇ ਨਿਰਭਰ ਹੈ, ਚਾਹੇ ਘਰ ਵਿਚ ਝਾਤ ਮਾਰ ਕੇ ਵੇਖ ਲਉ, ਤਸਵੀਰ ਸਾਫ਼ ਹੋ ਜਾਵੇਗੀ।
TB
ਇਹੀ ਨਹੀਂ ਟੀ.ਬੀ., ਲੈਪਰੋਸੀ (ਕੋਹੜ) ਆਦਿ ਬੀਮਾਰੀਆਂ ਦੀਆਂ ਦਵਾਈਆਂ ਚੀਨ ਤੋਂ ਹੀ ਆਉਂਦੀਆਂ ਹਨ। ਜਿਹੜੀ ਮਲੇਰੀਆ ਦੀ ਦਵਾਈ ਭਾਰਤ ਤੋਂ ਮੰਗੀ ਜਾ ਰਹੀ ਹੈ, ਉਹ ਵੀ ਚੀਨ ਤੋਂ ਆਉਂਦੀ ਇਕ ਮੁੱਖ ਸਮੱਗਰੀ ਬਿਨਾਂ ਨਹੀਂ ਬਣ ਸਕਦੀ। ਫਿਰ ਅਪਣੇ ਵੱਡੇ ਉਦਯੋਗ ਵਲ ਆਈਏ, ਬਾਏਯੂ, ਫ਼ਲਿੱਪ ਕਾਰਟ, ਹਾਈਕ, ਓਲਾ, ਸਵਿੱਗੀ ਵਿਚ ਚੀਨ ਦੇ ਉਦਯੋਗਾਂ ਦਾ ਵੱਡਾ ਪੈਸਾ ਲੱਗਾ ਹੋਇਆ ਹੈ।
BCCI
ਇਹੀ ਨਹੀਂ ਬੀ.ਸੀ.ਸੀ.ਆਈ, ਰੀਪਬਲਿਕ ਟੀ.ਵੀ. ਵਿਚ ਵੀ ਇਹੀ ਕੰਪਨੀਆਂ ਪੈਸਾ ਲਗਾਉਂਦੀਆਂ ਹਨ। ਸੋ ਕੀ ਸਾਰਾ ਭਾਰਤ ਅੱਜ ਅਪਣੇ ਸਮਾਰਟ ਫ਼ੋਨ ਤੋਂ ਲੈ ਕੇ ਕ੍ਰਿਕਟ ਦਾ ਬਾਈਕਾਟ ਕਰਨ ਤਕ ਲਈ ਤਿਆਰ ਹੈ? ਇਸੇ ਤਰ੍ਹਾਂ ਬਾਲੀਵੁੱਡ ਵਲ ਆਈਏ। ਏਕਤਾ ਕਪੂਰ ਦੇ ਮੁਕਾਬਲੇ, ਹਲਕੇ ਸੀਰੀਅਲ ਕੋਈ ਨਹੀਂ ਬਣਾ ਸਕਦਾ। ਕਰਨ ਜੌਹਰ ਦੀਆਂ ਫ਼ਿਲਮਾਂ ਵਿਚ ਦਿਮਾਗ਼ ਦਾ ਨਹੀਂ, ਬਰੈਂਡ ਦਾ ਪ੍ਰਚਾਰ ਹੁੰਦਾ ਹੈ।
Sushant Singh Rajput
ਕਰਨ ਜੌਹਰ ਹਰ ਇਕ ਨੂੰ ਅਪਣੇ ਟੀ.ਵੀ. ਸ਼ੋਅ ਉਤੇ ਬੁਲਾ ਕੇ ਸੁਸ਼ਾਂਤ ਕੁਮਾਰ ਵਰਗਿਆਂ ਦੀ ਬੇਇਜ਼ਤੀ ਕਰਦਾ ਹੈ। ਸਲਮਾਨ ਖ਼ਾਨ ਇਕ 50 ਸਾਲ ਦਾ ਮਰਦ ਹੈ ਜਿਸ ਨੂੰ ਸ਼ਬਾਬ ਤੇ ਬੱਚੀਆਂ ਚੰਗੀਆਂ ਲਗਦੀਆਂ ਹਨ। ਉਸ ਨੂੰ ਹੀਰੋ ਭਾਰਤ ਦੀ ਜਨਤਾ ਨੇ ਬਣਾਇਆ ਹੈ। ਭਾਰਤ ਇਨ੍ਹਾਂ ਸਾਰੀਆਂ ਕਚਰਾ ਟੀ.ਵੀ. ਫ਼ਿਲਮਾਂ ਨੂੰ ਛੱਡ ਕੇ ਕੀ ਹਰ ਚੰਗੇ ਅਦਾਕਾਰ ਨੂੰ ਬਰਾਬਰ ਦਾ ਮੌਕਾ ਦੇਣ ਲਈ ਤਿਆਰ ਹੈ? ਕੀ ਭਾਰਤ ਸਸਤੇ ਪਰ ਹਲਕੇ ਸਮਾਨ ਨੂੰ ਛੱਡ ਕੇ ਮਹਿੰਗੇ ਅਤੇ ਚੰਗੇ ਮਾਲ ਦੀ ਆਦਤ ਪਾਉਣ ਨੂੰ ਤਿਆਰ ਹੈ?
Reliance Jio
ਇਹ ਲਲਕਾਰਦੀਆਂ ਗੱਲਾਂ ਉਨੀਆਂ ਹੀ ਸੱਚੀਆਂ ਹਨ ਜਿੰਨੇ ਇਸ ਚਰਚਾ ਪਿੱਛੇ ਦੇ ਜਜ਼ਬਾਤ। ਜਿਨ੍ਹਾਂ ਨੂੰ ਦੇਸ਼ ਦੇ ਵਧੀਆ ਕਲਾਕਾਰਾਂ, ਫ਼ੌਜੀਆਂ, ਨੌਜੁਆਨਾਂ ਦੀ ਫ਼ਿਕਰ ਹੈ, ਉਹ ਪਹਿਲਾਂ ਹੀ ਦੇਸੀ ਖਾਂਦੇ ਤੇ ਇਸਤੇਮਾਲ ਕਰਦੇ ਹਨ ਤੇ ਅਪਣੇ ਦਿਮਾਗ਼ ਦੀ ਖ਼ੁਰਾਕ ਵੀ ਨਿਰਪੱਖ ਰਖਦੇ ਹਨ। ਜਿਹੜੇ ਲੋਕ ਸਵਾਲ ਚੁੱਕ ਰਹੇ ਹਨ, ਉਨ੍ਹਾਂ ਨੂੰ ਅੱਜ ਪੁੱਛੋ ਕਿ ਕੀ ਉਹ ਵੱਡਾ ਚੀਨੀ ਪੈਸਾ ਤੇ ਇਸ਼ਤਿਹਾਰ ਬੰਦ ਕਰ ਦੇਣਗੇ? ਕੀ ਜੀਓ ਵਾਲੇ ਚੀਨੀ ਫ਼ੋਨ ਬੰਦ ਕਰ ਦੇਣਗੇ? -ਨਿਮਰਤ ਕੌਰ
