ਵਿਚਾਰ   ਸੰਪਾਦਕੀ  20 Nov 2020  ਕਿਸਾਨ ਵੀ ਨਿਰਾਸ਼, ਪੰਜਾਬ ਸਰਕਾਰ ਵੀ ਨਿਰਾਸ਼, ਪੰਜਾਬ ਦਾ ਵਪਾਰੀ ਵੀ ਨਿਰਾਸ਼ ਪਰ ਕੇਂਦਰ ਬਹੁਤ ਖ਼ੁਸ਼ ਹੈ...

ਕਿਸਾਨ ਵੀ ਨਿਰਾਸ਼, ਪੰਜਾਬ ਸਰਕਾਰ ਵੀ ਨਿਰਾਸ਼, ਪੰਜਾਬ ਦਾ ਵਪਾਰੀ ਵੀ ਨਿਰਾਸ਼ ਪਰ ਕੇਂਦਰ ਬਹੁਤ ਖ਼ੁਸ਼ ਹੈ...

ਸਪੋਕਸਮੈਨ ਸਮਾਚਾਰ ਸੇਵਾ | ਨਿਮਰਤ ਕੌਰ
Published Nov 20, 2020, 7:28 am IST
Updated Nov 20, 2020, 7:28 am IST
ਕਿਸਾਨ ਵੀ ਅਪਣੀ ਗੱਲ 'ਤੇ ਠੀਕ ਹਨ ਪਰ ਨਾਲ ਹੀ ਪੰਜਾਬ ਸਰਕਾਰ ਦਾ ਡਰ ਵੀ ਠੀਕ ਹੈ ਕਿ ਇਹ ਰਸਤਾ ਗਵਰਨਰੀ ਰਾਜ ਵਲ ਲੈ ਜਾਏਗਾ।
Captain Amarinder Singh- Farmer- PM Modi
 Captain Amarinder Singh- Farmer- PM Modi

ਕਿਸਾਨਾਂ ਦੀ ਆਵਾਜ਼ ਕੇਂਦਰ ਨੂੰ ਸੁਣਾਈ ਨਹੀਂ ਦੇ ਰਹੀ ਜਿਸ ਕਾਰਨ ਕਿਸਾਨ ਦਿੱਲੀ ਤੋਂ ਵੀ ਨਿਰਾਸ਼ ਹੋ ਕੇ ਵਾਪਸ ਆਏ ਸਨ ਅਤੇ ਹੁਣ ਉਹ ਪੰਜਾਬ ਸਰਕਾਰ ਤੋਂ ਵੀ ਰੁਸਦੇ ਨਜ਼ਰ ਆ ਰਹੇ ਹਨ। ਕਿਸਾਨਾਂ ਦਾ ਕਹਿਣਾ ਇਹ ਹੈ ਕਿ ਜੇ ਇਹ ਖੇਤੀ ਕਾਨੂੰਨ ਲਾਗੂ ਹੋ ਗਏ ਤਾਂ ਉਨ੍ਹਾਂ ਦਾ ਭਵਿੱਖ ਖ਼ਤਰੇ ਵਿਚ ਪੈ ਜਾਵੇਗਾ।

farmerFarmer

ਉਹ ਵਾਰ ਵਾਰ ਆਖ ਰਹੇ ਹਨ ਕਿ ਜੇ ਅਸੀ ਮਰਨਾ ਹੀ ਹੈ ਤਾਂ ਅਸੀ ਅਪਣੇ ਹੱਕਾਂ ਲਈ ਲੜ ਕੇ ਮਰਾਂਗੇ ਪਰ ਅਪਣੇ ਹੀ ਖੇਤਾਂ ਵਿਚ ਕਾਰਪੋਰੇਟ ਘਰਾਣਿਆਂ ਦੀ ਗੁਲਾਮੀ ਕਰ ਕੇ ਨਹੀਂ ਮਰਾਂਗੇ। ਦੂਜੇ ਪਾਸੇ ਕੇਂਦਰ ਨੂੰ ਜਾਪਦਾ ਹੈ ਕਿ ਖੇਤੀ ਕਾਨੂੰਨ ਪਾਸ ਕਰਨ ਦਾ ਉਸ ਦਾ ਫ਼ੈਸਲਾ ਸਹੀ ਹੈ ਅਤੇ ਇਸ ਵਿਰੁਧ ਕਿਸਾਨ ਨਹੀਂ ਬਲਕਿ 'ਦਲਾਲ' ਅੰਦੋਲਨ ਚਲਾ ਰਹੇ ਹਨ।

PM ModiPM Modi

ਕੇਂਦਰ ਸਰਕਾਰ ਵੀ ਅਪਣੀ ਗੱਲ 'ਤੇ ਅੜੀ ਬੈਠੀ ਹੈ। ਉਨ੍ਹਾਂ ਦੀ ਸ਼ਾਂਤਾ ਕੁਮਾਰ ਰੀਪੋਰਟ ਮੁਤਾਬਕ ਇਹ ਰਸਤਾ, ਕਿਸਾਨਾਂ ਦੀ ਆਮਦਨ ਦੁਗਣੀ ਕਰਦਾ ਹੈ। ਸਿਆਣੇ ਹੁੰਦੇ ਤਾਂ ਸ਼ਾਂਤਾ ਕੁਮਾਰ ਫ਼ਾਰਮੂਲਾ ਬਿਹਾਰ ਅਤੇ ਗੁਜਰਾਤ ਵਿਚ ਸਫ਼ਲਤਾ ਨਾਲ ਲਾਗੂ ਕਰ ਕੇ ਵਿਖਾ ਦਿੰਦੇ ਤਾਂ ਅੱਜ ਪੰਜਾਬ ਦੇ ਕਿਸਾਨ ਸੜਕਾਂ 'ਤੇ ਨਾ ਹੁੰਦੇ। ਪਰ ਕੇਂਦਰ ਨੂੰ ਅਪਣੀ ਮਨਮਰਜ਼ੀ ਕਰਨ ਦੀ ਆਦਤ ਪੈ ਗਈ ਹੈ ਅਤੇ ਉਨ੍ਹਾਂ ਨੂੰ ਜੋ ਵੋਟਰਾਂ (ਜਾਂ ਈ ਵੀ ਐਮ ਮਸ਼ੀਨਾਂ?) ਤੋਂ ਸਮਰਥਨ ਮਿਲ ਰਿਹਾ ਹੈ, ਉਹ ਉਨ੍ਹਾਂ ਨੂੰ ਹੋਰ ਵੀ ਕਠੋਰ ਬਣਾ ਰਿਹਾ ਹੈ।

EVMEVM

ਕੇਂਦਰ ਵਲੋਂ ਪਹਿਲੀ ਵਾਰ ਜਦ ਜ਼ਮੀਨ ਅਧਿਕਰਨ ਕਾਨੂੰਨ ਵਿਚ ਸੋਧ ਕੀਤੀ ਗਈ ਸੀ ਤਾਂ ਕਿਸਾਨਾਂ ਵਲੋਂ ਇਸ ਦਾ ਵਿਰੋਧ ਕਰਨ ਤੇ, ਸਰਕਾਰ ਪਿਛੇ ਹਟ ਗਈ ਸੀ। ਪਰ ਫਿਰ ਕੇਂਦਰ ਨੇ ਨੋਟਬੰਦੀ, ਜੀ.ਐਸ.ਟੀ., ਧਾਰਾ 370 ਸੋਧ ਸਮੇਂ ਅਪਣੀ ਮਰਜ਼ੀ ਚਲਾਈ ਕਿਉਂਕਿ ਉਨ੍ਹਾਂ ਨੇ ਜਨਤਾ ਦੇ ਸਿਰਾਂ ਅੰਦਰ ਪਹਿਲਾਂ ਇਹ ਵਿਚਾਰ ਪੱਕਾ ਕਰ ਕੇ ਬਿਠਾ ਦਿਤਾ ਸੀ ਕਿ ਇਹ ਸਰਕਾਰ ਸਖ਼ਤ ਕਦਮ ਉਠਾਏਗੀ ਤਾਂ ਉਸ ਦਾ ਲਾਭ ਦੇਸ਼ ਨੂੰ ਤੇ ਆਮ ਭਾਰਤੀ ਨੂੰ ਬਹੁਤ ਹੋਵੇਗਾ।

GST CollectionsGST 

ਨੋਟਬੰਦੀ ਨੂੰ ਕਾਲਾ ਧਨ ਤੇ ਭ੍ਰਿਸ਼ਟਾਚਾਰ ਵਿਰੁਧ ਜੰਗ ਦਸਿਆ ਗਿਆ ਜਿਸ ਵਿਚ ਆਮ ਭਾਰਤੀ ਦੇਸ਼ ਦਾ ਸਿਪਾਹੀ ਸੀ, ਜੋ ਅਮੀਰਾਂ ਵਿਰੁਧ ਜੰਗ ਲੜ ਰਿਹਾ ਸੀ। ਨੋਟਬੰਦੀ ਕਰਨ ਦਾ ਕੋਈ ਫ਼ਾਇਦਾ ਨਾ ਹੋਇਆ ਸਗੋਂ ਦੇਸ਼ ਦਾ ਵੱਡਾ ਨੁਕਸਾਨ ਕਰ ਗਈ। ਦੇਸ਼ ਵਿਚ ਨੋਟਬੰਦੀ ਕਾਰਨ ਗ਼ਰੀਬੀ ਵਧ ਗਈ ਪਰ ਚਮਤਕਾਰ ਢੂੰਡਦੀ ਜੰਤਾ ਨੇ ਸੱਭ ਕੁੱਝ ਸਹਿ ਕੇ ਵੀ ਉਫ਼ ਤਕ ਨਾ ਕੀਤੀ।

PovertyPoverty

ਫਿਰ ਜੀ.ਐਸ.ਟੀ., ਧਾਰਾ 370, ਚੋਣਾਂ ਸੱਭ ਪਾਸੇ ਦਲੀਲ ਅਤੇ ਤੱਥ ਹਾਰਦੇ ਗਏ। ਅੱਜ ਸਾਡੇ ਵਿਚਕਾਰ ਕੋਈ ਵੀ ਗੱਲ ਤੱਥਾਂ 'ਤੇ ਆਧਾਰਤ ਨਹੀਂ ਹੁੰਦੀ। ਬਸ ਇਕ ਵੱਡਾ ਚਮਤਕਾਰ ਹੋਣ ਵਾਲਾ ਹੈ, ਕਹਿ ਕੇ ਲੋਕਾਂ ਨੂੰ ਪਿਛਲਾ ਸੱਭ ਕੁੱਝ ਭੁੱਲ ਜਾਣ ਲਈ ਤਿਆਰ ਕਰ ਦਿਤਾ ਜਾਂਦਾ ਹੈ ਤੇ ਦੁਨੀਆਂ ਫਿਰ ਪਿਛੇ ਲੱਗ ਜਾਂਦੀ ਹੈ।

PM ModiPM Modi

ਬਿਹਾਰ ਚੋਣਾਂ ਵਿਚ ਕਿਸੇ ਨੇ ਨਾ ਪੁਛਿਆ ਕਿ ਜਿਹੜੀ ਸਰਕਾਰ 15 ਸਾਲਾਂ ਵਿਚ 19 ਲੱਖ ਨੌਕਰੀਆਂ ਨਹੀਂ ਦੇ ਸਕੀ, ਉਹ ਅਗਲੇ ਪੰਜ ਸਾਲਾਂ ਵਿਚ ਇਹ ਨੌਕਰੀਆਂ ਕਿਸ ਤਰ੍ਹਾਂ ਦੇ ਦੇਵੇਗੀ? ਬਸ ਮੋਦੀ ਜੀ ਨੇ ਆਖਿਆ ਤੇ ਕਮਲ ਦਾ ਬਟਨ ਦਬਦਾ ਗਿਆ। ਪੰਜਾਬ ਵਿਚ ਵੀ ਦਲੀਲ ਅਤੇ ਤੱਥ ਪਿਛੇ ਪਾਏ ਜਾ ਰਹੇ ਹਨ ਤੇ ਜ਼ੋਰ ਕੇਵਲ ਇਹ ਦੱਸਣ ਤੇ ਦਿਤਾ ਜਾ ਰਿਹਾ ਹੈ ਕਿ ਕਿਸਾਨ ਅਪਣੀ ਜ਼ਿੱਦ 'ਤੇ ਅੜੇ ਹੋਏ ਹਨ ਅਤੇ ਇਨ੍ਹਾਂ ਨੂੰ ਭੜਕਾਇਆ ਜਾ ਰਿਹਾ ਹੈ।

TrainsTrains

ਪੰਜਾਬ ਦੇ ਲੋਕਾਂ ਨੂੰ ਹੁਣ ਅਪਣੇ ਹੀ ਕਿਸਾਨਾਂ ਵਿਰੁਧ ਲਾਮਬੰਦ ਕਰਨ ਦੇ ਯਤਨ ਕੀਤੇ ਜਾ ਰਹੇ ਹਨ। ਮਾਲ ਗੱਡੀਆਂ ਚਲਾ ਕੇ ਉਦਯੋਗ ਦਾ ਨੁਕਸਾਨ ਹੋਣੋ ਰੋਕ ਲਿਆ ਜਾਂਦਾ ਤਾਂ ਕੇਂਦਰ ਨੂੰ ਕੀ ਫ਼ਰਕ ਪੈ ਜਾਣਾ ਸੀ? ਜੇ ਪੰਜਾਬ ਵਿਚ ਕੋਲਾ ਤੇ ਯੂਰੀਆ ਆ ਜਾਂਦਾ ਤਾਂ ਕੇਂਦਰ ਦਾ ਨੁਕਸਾਨ ਤਾਂ ਕੋਈ ਨਹੀਂ ਸੀ ਹੋ ਜਾਣਾ। ਪਰ ਕੇਂਦਰ ਛੋਟੀ ਚਾਲ ਨਹੀਂ ਚਲਦਾ, ਉਹ ਪੰਜਾਬ ਦੀ ਆਮਦਨ ਹਰ ਪਾਸਿਉਂ ਰੋਕਣ ਦੀ ਕੋਸ਼ਿਸ਼ ਵਿਚ ਹੈ। ਕਿਸਾਨਾਂ ਦਾ ਕਹਿਣਾ ਠੀਕ ਹੈ ਕਿ ਜੇ ਗੁੱਜਰ ਰੇਲ ਰੋਕਦੇ ਹਨ ਤਾਂ ਕੇਂਦਰ ਉਨ੍ਹਾਂ ਦੀ ਗੱਲ ਝੱਟ ਮੰਨ ਲੈਂਦਾ ਹੈ ਪਰ ਜੇ ਪੰਜਾਬ ਦੇ ਕਿਸਾਨ ਰਸਤਾ ਰੋਕਦੇ ਹਨ ਤਾਂ ਕੇਂਦਰ ਪੰਜਾਬ ਨੂੰ ਦੇਸ਼ ਤੋਂ ਕੱਟ ਦੇਂਦਾ ਹੈ।

BJPBJP

ਕੇਂਦਰ ਉਦਯੋਗਪਤੀਆਂ (ਵਪਾਰੀਆਂ) ਅਤੇ ਕਿਸਾਨਾਂ ਵਿਚ ਫੁੱਟ ਪਾ ਕੇ ਪੰਜਾਬ ਵਿਚ ਭਾਜਪਾ ਦੇ ਦਫ਼ਤਰਾਂ ਦੇ ਨੀਂਹ ਪੱਥਰ ਰੱਖਣ ਦੀ ਤਿਆਰੀ ਕਰ ਰਿਹਾ ਹੈ। ਯਾਨੀ ਉਸ ਨੂੰ ਯਕੀਨ ਹੈ ਕਿ ਜੋ ਫ਼ਰਜ਼ੀ ਮਾਹੌਲ ਉਹ ਸਿਰਜ ਰਿਹਾ ਹੈ, ਉਸ ਨਾਲ ਉਸ ਨੂੰ 2022 ਦੀਆਂ ਚੋਣਾਂ ਵਿਚ ਸਫ਼ਲਤਾ ਮਿਲ ਸਕਦੀ ਹੈ। ਇਹ ਸਮਾਂ ਬੜਾ ਸੋਚ ਸਮਝ ਕੇ ਫ਼ੈਸਲਾ ਲੈਣ ਦਾ ਹੈ।

Punjab GovtPunjab Govt

ਕਿਸਾਨ ਵੀ ਅਪਣੀ ਗੱਲ 'ਤੇ ਠੀਕ ਹਨ ਪਰ ਨਾਲ ਹੀ ਪੰਜਾਬ ਸਰਕਾਰ ਦਾ ਡਰ ਵੀ ਠੀਕ ਹੈ ਕਿ ਇਹ ਰਸਤਾ ਗਵਰਨਰੀ ਰਾਜ ਵਲ ਲੈ ਜਾਏਗਾ। ਜੇ ਗਵਰਨਰੀ ਰਾਜ ਆ ਗਿਆ ਤਾਂ ਕਿਸਾਨਾਂ ਨੂੰ ਵਿਰੋਧ ਕਰਨ ਦੀ ਆਜ਼ਾਦੀ ਵੀ ਨਹੀਂ ਮਿਲੇਗੀ। ਇਹ ਗੱਲ ਕਿਸਾਨਾਂ ਦੇ ਹੱਕ ਵਿਚ ਜਾਂਦੀ ਹੈ ਕਿ ਪੰਜਾਬ ਵਿਚ ਐਸੀ ਸਰਕਾਰ ਰਹੇ, ਜੋ ਕੇਂਦਰ ਦਾ ਵਿਰੋਧ ਤਾਂ ਕਰਦੀ ਹੋਵੇ ਅਤੇ ਉਸ ਦੀ ਹੋਂਦ ਵੀ ਖ਼ਤਰੇ ਵਿਚ ਨਾ ਪੈ ਜਾਵੇ। ਹੁਣ ਲੰਮੀ ਸੋਚ ਤੇ ਰਣਨੀਤੀ ਘੜਨ ਦੀ ਲੋੜ ਹੈ।

Captain Amarinder Singh Captain Amarinder Singh

ਰੇਲ ਰੋਕਣ ਜਾਂ ਅੰਬਾਨੀ ਤੇ ਅਡਾਨੀ ਦੇ ਘਰਾਂ ਨੂੰ ਘੇਰਨ ਦੀ ਬਜਾਏ, ਭਾਜਪਾ ਦੇ ਦਫ਼ਤਰਾਂ ਦੇ ਬਾਹਰ ਘਿਰਾਉ ਕਰਨਾ ਬੇਹਤਰ ਸਾਬਤ ਹੋ ਸਕਦਾ ਹੈ। ਭਾਜਪਾ ਤੇ ਆਰ.ਐਸ.ਐਸ. ਦੇ ਆਗੂ ਹੀ ਕੇਂਦਰ ਵਿਚ ਕਿਸਾਨ ਦੀ ਗੱਲ ਸੁਣਾ ਸਕਦੇ ਹਨ। ਜੇ ਦਿੱਲੀ ਜਾ ਕੇ ਅਪਣੀ ਗੱਲ ਕਰਨੀ ਹੈ ਤਾਂ ਮਹਾਰਾਸ਼ਟਰ ਦੇ ਕਿਸਾਨਾਂ ਦੇ ਸ਼ਾਂਤੀ ਪੂਰਵਕ ਮਾਰਚ ਵਾਂਗ ਅੱਗੇ ਵਧੋ। ਉਸ ਮਾਰਚ ਨੇ ਦੇਸ਼ ਨੂੰ ਹਿਲਾ ਦਿਤਾ ਸੀ। ਟਰੈਕਟਰਾਂ ਤੇ ਸ਼ੋਰ ਮਚਾਉਣ ਵਾਲੀ ਸੋਚ ਇਸ ਸੰਜੀਦਾ ਮੁੱਦੇ ਨੂੰ ਦੇਸ਼ ਦੇ ਬਾਕੀ ਲੋਕਾਂ ਦੇ ਨੇੜੇ ਨਹੀਂ ਲਿਜਾਏਗੀ।

farmer protestFarmer protest

ਜਥੇਬੰਦੀਆਂ ਦੇ ਵੱਡੇ ਆਗੂ ਦੇਸ਼ ਦੀਆਂ ਸਾਰੀਆਂ ਕਿਸਾਨ ਜਥੇਬੰਦੀਆਂ ਨਾਲ ਮਿਲਣ ਤੇ ਦੇਸ਼ ਦੇ ਕੋਨੇ ਕੋਨੇ ਤੋਂ ਦਿੱਲੀ ਵਲ ਨੂੰ ਸ਼ਾਂਤੀ ਪੂਰਵਕ ਮਾਰਚ ਸ਼ੁਰੂ ਕਰਵਾਇਆ ਜਾਵੇ। ਸੁਪਰੀਮ ਕੋਰਟ ਨੂੰ ਹਿਲਾਉ ਤਾਕਿ ਉਹ ਸਰਕਾਰ ਦੀ ਜਵਾਬਦੇਹੀ ਕਰੇ। ਸਿਰਫ਼ ਪੰਜਾਬ ਵਿਚ ਵਿਰੋਧ ਕਰਨ ਨਾਲ ਪੰਜਾਬ ਜਾਂ ਕਿਸਾਨਾਂ ਦਾ ਅਪਣਾ ਹੀ ਨੁਕਸਾਨ ਹੋਣਾ ਹੈ। ਇਸ ਵਿਚ ਅਮਰੀਕਾ ਦੇ ਕਿਸਾਨ ਸੰਗਠਨਾਂ ਦੀ ਮਦਦ ਵੀ ਲਈ ਜਾ ਸਕਦੀ ਹੈ ਕਿਉਂਕਿ ਅੱਜ ਕੇਂਦਰ ਅਮਰੀਕਾ ਦੀ ਸੁਣਦਾ ਹੈ। ਵੱਡੀ ਸੋਚ ਹੀ ਵੱਡੀ ਤਬਦੀਲੀ ਲਿਆ ਸਕਦੀ ਹੈ।                 -ਨਿਮਰਤ ਕੌਰ

Advertisement