ਅੱਜ ਸੁਸ਼ਾਂਤ ਨੂੰ ਹੀਰੋ ਬਣਾ ਕੇ ਉਸ ਦੇ ਜੀਵਨ ਸਾਥੀ ਨੂੰ ਬਣਾਇਆ ਜਾ ਰਿਹਾ ਮਾੜਾ
ਪਿਛਲੇ ਦੋ ਮਹੀਨੇ ਤੋਂ ਸੁਸ਼ਾਂਤ ਰਾਜਪੂਤ ਦਾ ਨਾਮ ਸੁਰਖ਼ੀਆਂ ਤੋਂ ਹੇਠਾਂ ਨਹੀਂ ਲਹਿ ਰਿਹਾ। ਅੱਜ ਹਰ ਕਿਸੇ ਦੀ ਜ਼ਬਾਨ 'ਤੇ ਸੁਸ਼ਾਂਤ ਦੀ ਮੌਤ ਨਾਲ ਜੁੜੇ, ਹੈਰਾਨ ਕਰ ਦੇਣ ਵਾਲੇ ਭੇਤ-ਪ੍ਰਗਟਾਵੇ ਹੀ ਚੜ੍ਹੇ ਨਜ਼ਰ ਆਉਂਦੇ ਹਨ। ਇਸੇ ਤਰ੍ਹਾਂ ਚਲਦਾ ਰਿਹਾ ਤਾਂ ਉਹ ਦਿਨ ਦੂਰ ਨਹੀਂ ਜਦ ਸਾਡੇ ਇਤਿਹਾਸ ਦੀਆਂ ਕਿਤਾਬਾਂ ਵਿਚ ਵੀ ਸੁਸ਼ਾਂਤ ਦਾ ਪਾਠ ਪੜ੍ਹਾਇਆ ਜਾਣਾ ਸ਼ੁਰੂ ਹੋ ਜਾਵੇਗਾ ਅਤੇ ਇਮਤਿਹਾਨਾਂ ਵਿਚ ਸਵਾਲ ਪੁਛਿਆ ਜਾਇਆ ਕਰੇਗਾ ਕਿ ਖ਼ੁਦਕੁਸ਼ੀ ਤੋਂ ਪਹਿਲਾਂ ਸੁਸ਼ਾਂਤ ਸਿੰਘ ਰਾਜਪੂਤ ਨੇ ਕਿਹੜੇ ਜੂਸ ਦਾ ਗਲਾਸ ਪੀਤਾ ਸੀ।
Sushant rajput and Rhea chakraborty
ਸਾਡਾ ਰਵਾਇਤੀ ਮੀਡੀਆ ਇਸ ਖ਼ਬਰ ਨੂੰ ਛੱਡਣ ਦਾ ਨਾਮ ਹੀ ਨਹੀਂ ਲੈ ਰਿਹਾ। ਹਾਲਤ ਇਸ ਤਰ੍ਹਾਂ ਦੀ ਹੋ ਗਈ ਹੈ ਕਿ ਹੁਣ ਜਦੋਂ ਖ਼ਬਰਾਂ ਦਾ ਕੇਂਦਰ-ਬਿੰਦੂ ਇਹ ਹੋਣਾ ਚਾਹੀਦਾ ਹੈ ਕਿ ਦੇਸ਼ ਨੂੰ 30 ਲੱਖ ਕਰੋੜ ਦਾ ਝਟਕਾ ਲੱਗ ਰਿਹਾ ਹੈ, ਸਾਡੇ ਅਖ਼ਬਾਰ ਅਤੇ ਟੀਵੀ ਚੈਨਲ ਇਸ ਗੱਲ ਨੂੰ ਲੈ ਕੇ ਦਹਾੜ ਰਹੇ ਹੁੰਦੇ ਹਨ ਕਿ ਦੀਪਿਕਾ ਪਾਦੂਕੋਣ ਨੇ 2017 ਵਿਚ ਅਫ਼ੀਮ ਮੰਗੀ ਸੀ ਜਾਂ ਚਿੱਟਾ?
Deepika Padukone
ਜਿਸ ਸੁਸ਼ਾਂਤ ਸਿੰਘ ਰਾਜਪੂਤ ਵਾਸਤੇ ਨਿਆਂ ਦੀ ਆਸ ਲੈ ਕੇ ਸਾਰਾ ਦੇਸ਼ ਟੈਲੀਵਿਜ਼ਨ ਅੱਗੇ ਬੈਠਾ ਹੋਇਆ ਹੈ, ਕੀ ਉਹ ਦੀਪਿਕਾ ਦੇ ਨਸ਼ੇ ਦੀ ਆਦਤ ਨਾਲ ਸਬੰਧਤ ਹੈ? ਸੁਸ਼ਾਂਤ ਨੂੰ ਮਾਨਸਕ ਉਦਾਸੀ ਦੀ ਬੀਮਾਰੀ ਸੀ, ਰੀਆ ਵੀ ਮਾਨਸਕ ਬਿਮਾਰੀ ਦੀ ਸ਼ਿਕਾਰ ਹੈ, ਦੀਪਿਕਾ ਪਾਦੂਕੋਣ ਵੀ ਮਾਨਸਕ ਉਦਾਸੀ ਤੋਂ ਪ੍ਰੇਸ਼ਾਨ ਰਹਿੰਦੀ ਹੈ ਅਤੇ ਤਿੰਨਾਂ ਨੇ ਨਸ਼ੇ ਲਏ ਹਨ ਪਰ ਮਾੜੀਆਂ ਦੀਪਿਕਾ ਅਤੇ ਰੀਆ ਹੀ ਕਿਉਂ ਹਨ? ਕੰਗਨਾ ਰਣੌਤ ਦੀ ਮਾਨਸਕ ਜਾਂਚ ਹੋਵੇ ਤਾਂ ਉਸ ਨੂੰ ਵੀ ਬੜੀਆਂ ਮਾਨਸਕ ਪ੍ਰੇਸ਼ਾਨੀਆਂ ਹੋਣਗੀਆਂ ਤੇ ਨਸ਼ਾ ਉਸ ਨੇ ਵੀ ਕੀਤਾ ਹੋਵੇਗਾ, ਤਾਂ ਫਿਰ ਉਹ ਨਿਸ਼ਾਨੇ 'ਤੇ ਕਿਉਂ ਨਹੀਂ? ਜੇ ਜਿਸਮ ਦੀ ਪ੍ਰਦਰਸ਼ਨੀ ਨਾਲ ਗੀਤ ਦੀਪਿਕਾ ਦੇ ਆਏ ਹਨ ਤਾਂ ਕੰਗਨਾ, ਸੁਸ਼ਾਂਤ, ਰਿਤਿਕ ਰੌਸ਼ਨ, ਸ਼ਾਹਰੁਖ਼ ਖ਼ਾਨ ਦੇ ਵੀ ਆਏ ਹਨ। ਸਾਰੇ ਮਾੜੇ ਕਿਉਂ ਨਹੀਂ?
Sushant Singh Rajput and Kangana Ranaut
ਅੱਜ ਸੁਸ਼ਾਂਤ ਨੂੰ ਹੀਰੋ ਬਣਾ ਕੇ ਉਸ ਦੇ ਜੀਵਨ ਸਾਥੀ ਨੂੰ ਮਾੜਾ ਬਣਾਇਆ ਜਾ ਰਿਹਾ ਹੈ। ਨਾ ਕੋਈ ਕਤਲ ਦਾ ਸਬੂਤ, ਨਾ ਕੋਈ ਪੈਸੇ ਚੋਰੀ ਹੋਣ ਦਾ ਸਬੂਤ ਅਤੇ ਕਹਾਣੀ ਉਹੀ ਹੈ ਜੋ ਹਰ ਘਰ ਵਿਚ ਹੁੰਦੀ ਹੈ। ਜੇ ਪਤੀ ਮਰ ਜਾਵੇ ਤਾਂ ਉਹ ਪਤਨੀ ਦੀ ਗ਼ਲਤੀ ਹੈ, ਉਸ ਦੇ ਕਰਮ ਮਾੜੇ ਸਨ ਅਤੇ ਜੇ ਪਤਨੀ ਮਰ ਜਾਵੇ ਤਾਂ ਅਗਲੀ ਜੋੜੀ ਤਿਆਰ ਕਰਨੀ ਸ਼ੁਰੂ ਕਰ ਦਿਤੀ ਜਾਂਦੀ ਹੈ।
Sushant Singh Rajput
ਜੇ ਲੜਕੀਆਂ ਸੋਹਣੀਆਂ ਹਨ, ਕਾਮਯਾਬ ਹਨ ਤਾਂ ਉਨ੍ਹਾਂ ਨੂੰ ਬਦਨਾਮ ਕਰ ਕੇ ਭਾਰਤੀ ਸਮਾਜ ਨੂੰ ਬੜਾ ਸਵਾਦ ਆਉਂਦਾ ਹੈ। ਇਸ ਮਾਨਸਿਕਤਾ ਨੂੰ ਸਮਝਦੇ ਹੋਏ, ਦੀਪਿਕਾ ਦੇ ਨਸ਼ੇ ਨੂੰ ਲੈ ਕੇ ਅਸਲ ਮੁੱਦੇ ਤੋਂ ਭਟਕਾਉਣ ਵਾਸਤੇ ਵਰਤਿਆ ਜਾ ਰਿਹਾ ਹੈ। ਜੇ ਕਿਸੇ ਨੂੰ ਬਾਲੀਵੁੱਡ ਵਿਚ ਨਸ਼ੇ ਦੀ ਵਰਤੋਂ 'ਤੇ ਹੈਰਾਨੀ ਹੋ ਰਹੀ ਹੈ ਤਾਂ ਉਹ ਸੰਜੇ ਦੱਤ ਦੀ ਕਹਾਣੀ ਨੂੰ ਯਾਦ ਕਰ ਲਵੇ। ਸੰਜੇ ਦੱਤ ਨੇ ਕਈ ਭੇਤ ਪ੍ਰਗਟ ਕੀਤੇ ਸਨ ਪਰ ਉਹ ਮਰਦ ਹੈ, ਸੋ ਉਸ ਦੀ ਕਾਮਯਾਬੀ ਤੋਂ ਈਰਖਾ ਨਹੀਂ ਹੁੰਦੀ ਅਤੇ ਪੂਰਾ ਭਾਰਤ ਭੁੱਲ ਵੀ ਗਿਆ ਹੈ ਅਤੇ ਉਸ ਨੂੰ ਮਾਫ਼ ਵੀ ਕਰ ਦਿਤਾ ਹੈ।
Sanje Dutt
ਭਾਰਤ ਵਿਚ ਔਰਤਾਂ ਪ੍ਰਤੀ ਇਕ ਛੋਟੀ ਸੋਚ ਹੈ ਜੋ ਔਰਤ ਨੂੰ ਪੱਥਰ ਮਾਰ ਕੇ ਬੜੀ ਖ਼ੁਸ਼ ਹੁੰਦੀ ਹੈ। ਇਹ ਸੋਚ ਸਿਰਫ਼ ਮਰਦਾਂ ਦੀ ਹੀ ਨਹੀਂ ਬਲਕਿ ਔਰਤਾਂ ਦੀ ਅਪਣੀ ਵੀ ਹੈ ਜੋ ਆਪ ਵੀ ਸਫ਼ਲ ਔਰਤਾਂ ਨੂੰ ਡਿਗਦਾ ਵੇਖ ਕੇ ਬਹੁਤ ਸਕੂਨ ਮਹਿਸੂਸ ਕਰਦੀਆਂ ਹਨ। ਭਾਰਤ ਦੀ ਇਸ ਮਾਨਸਿਕਤਾ ਨੂੰ ਸਮਝਦੇ ਹੋਏ ਆਮ ਭਾਰਤੀ ਦਾ ਧਿਆਨ ਅਸਲ ਮੁੱਦਿਆਂ ਵਲੋਂ ਭਟਕਾਇਆ ਜਾ ਰਿਹਾ ਹੈ।
Deepika Padukone
ਅੱਜ ਜਦ ਦੀਪਿਕਾ ਦੀ ਗੱਲ ਹੋਵੇਗੀ ਜਾਂ ਕਿਸੇ ਵੀ ਹੋਰ ਸਿਤਾਰੇ ਦੀ ਤਾਂ ਅਪਣੇ ਆਪ ਨੂੰ ਪੁੱਛੋ ਕਿ ਉਹ ਤਾਂ ਨਸ਼ੇ ਦੇ ਆਦੀ ਹਨ ਪਰ ਉਸ ਨਸ਼ੇ (ਚਿੱਟੇ) ਨੂੰ ਤੁਹਾਡੇ ਦੇਸ਼ ਵਿਚ ਲੈ ਕੇ ਕੌਣ ਆਉਂਦਾ ਹੈ? ਤੁਹਾਡੇ ਵਾਸਤੇ ਦੀਪਿਕਾ ਪਾਦੂਕੋਣ ਦਾ ਚਰਿੱਤਰ ਜ਼ਿਆਦਾ ਜ਼ਰੂਰੀ ਹੈ ਜਾਂ ਉਸ ਸਿਆਸਤਦਾਨ ਦਾ ਜਿਸ ਨੇ ਤੁਹਾਡੇ ਦੇਸ਼ ਨੂੰ ਚਲਾਉਣਾ ਹੈ। ਅੱਜ ਦੇ 33 ਫ਼ੀ ਸਦੀ ਐਮ.ਪੀ. ਕਾਤਲ, ਬਲਾਤਕਾਰੀ, ਚੋਰ ਅਤੇ ਡਕੈਤ ਹਨ ਤੇ ਤੁਸੀ ਦੀਪਿਕਾ ਪਾਦੂਕੋਣ ਦੀ ਨਸ਼ੇ ਦੀ ਆਦਤ ਨੂੰ ਦੇਸ਼ ਵਾਸਤੇ ਖ਼ਤਰਾ ਮੰਨ ਰਹੇ ਹੋ।
Deepika Padukone
ਇਸੇ ਤਰ੍ਹਾਂ ਭਟਕਦੇ ਗਏ ਤਾਂ ਨਾ ਸੁਸ਼ਾਂਤ ਨੂੰ ਨਿਆਂ ਮਿਲੇਗਾ ਅਤੇ ਨਾ ਤੁਹਾਨੂੰ ਚੰਗਾ ਸ਼ਾਸਨ। ਕੰਗਣਾ ਰਣੌਤ ਮੀਡੀਆ ਨਾਲ ਜੁੜ ਕੇ ਤੁਹਾਨੂੰ ਅਸਲ ਮੁੱਦਿਆਂ ਤੋਂ ਭਟਕਾ ਰਹੀ ਹੈ। ਕੀ ਤੁਸੀ ਕਠਪੁਤਲੀ ਬਣੇ ਰਹਿਣ ਵਾਸਤੇ ਤਿਆਰ ਹੋ? ਨਿਮਰਤ ਕੌਰ
