ਕੋਰੋਨਾ ਮਹਾਂਮਾਰੀ ਬਿਨਾਂ ਸ਼ੱਕ ਸਾਡੇ ਸਮਿਆਂ ਦਾ ਸੱਭ ਤੋਂ ਖ਼ਤਰਨਾਕ ਸੱਚ ਹੋ ਨਿਬੜਿਆ ਹੈ।
ਕੋਰੋਨਾ ਮਹਾਂਮਾਰੀ ਬਿਨਾਂ ਸ਼ੱਕ ਸਾਡੇ ਸਮਿਆਂ ਦਾ ਸੱਭ ਤੋਂ ਖ਼ਤਰਨਾਕ ਸੱਚ ਹੋ ਨਿਬੜਿਆ ਹੈ। ਅੱਜ ਇਸ ਨੇ ਪੂਰੇ ਸੰਸਾਰ ਨੂੰ ਅਪਣੀ ਲਪੇਟ ਵਿਚ ਲੈ ਲਿਆ ਹੈ। ਚੀਨ ਦੇ ਵੁਹਾਨ ਸ਼ਹਿਰ ਤੋਂ ਸ਼ੁਰੂ ਹੋਇਆ ਪੂਰੇ ਸੰਸਾਰ ਵਿਚ ਫੈਲ ਗਿਆ ਹੈ। ਵਰਤਮਾਨ ਸਮੇਂ ਵਿਚ ਭਾਰਤ ਦੇ ਤਕਰੀਬਨ 23 ਸੂਬਿਆਂ ਨੂੰ ਅਪਣੀ ਗ੍ਰਿਫ਼ਤ ਵਿਚ ਲੈ ਚੁੱਕਾ ਹੈ। ਬੇਸ਼ਕ ਵਿਸ਼ਵ ਦੇ ਬਾਕੀ ਦੇਸ਼ਾਂ ਦੇ ਹੁਕਮਰਾਨਾਂ ਵਾਂਗ ਭਾਰਤ ਦੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਸਮਾਂ ਰਹਿੰਦੇ ਪੂਰੇ ਦੇਸ਼ ਵਿਚ ਤਕਰੀਬਨ ਦੋ ਮਹੀਨਿਆਂ ਲਈ ਤਾਲਾਬੰਦੀ ਕਰਵਾ ਕੇ ਤੇ ਲੋਕਾਂ ਨੂੰ ਘਰਾਂ ਵਿਚ ਰਹਿਣ ਦੀ ਹਦਾਇਤ ਜਾਰੀ ਕਰ ਕੇ ਇਸ ਬੀਮਾਰੀ ਨੂੰ ਵਿਕਰਾਲ ਰੂਪ ਧਾਰਨ ਤੋਂ ਰੋਕਣ ਲਈ ਹੰਭਲਾ ਮਾਰਿਆ ਹੈ,
Lockdown
ਪਰ ਤਾਲਾਬੰਦੀ ਦੇ ਬਾਵਜੂਦ ਅਪਣੇ ਧਾਰਮਕ ਅਕੀਦਿਆਂ ਨੂੰ ਪ੍ਰਣਾਏ ਕੁੱਝ ਸ਼ਰਧਾਵਾਨਾਂ ਵਲੋਂ ਤਾਲਾਬੰਦੀ ਦੇ ਨਿਯਮਾਂ ਨੂੰ ਅੱਖੋ ਪਰੋਖੇ ਕਰ ਕੇ ਅਪਣੇ ਧਾਰਮਕ ਇਕੱਠ ਕਰਨ ਕਾਰਨ ਤੇ ਬਾਅਦ ਵਿਚ ਸਰਕਾਰਾਂ ਵਲੋਂ ਇਸ ਦੇ ਪਸਾਰੇ ਨੂੰ ਰੋਕਣ ਲਈ ਢੁਕਵੀਂ ਰਣਨੀਤੀ ਨਾ ਤਿਆਰ ਕਰਨ ਕਾਰਨ ਕੋਰੋਨਾ ਪ੍ਰਭਾਵਤ ਮਰੀਜ਼ਾਂ ਦੀ ਗਿਣਤੀ ਵਿਚ ਜੋ ਵਾਧਾ ਹੋਇਆ, ਉਸ ਨੇ ਇਸ ਬੀਮਾਰੀ ਦੀ ਰੋਕਥਾਮ ਲਈ ਕੀਤੇ ਜਾ ਰਹੇ ਕਾਰਜਾਂ ਉਤੇ ਪਾਣੀ ਫੇਰਨ ਵਿਚ ਕੋਈ ਕਸਰ ਨਹੀਂ ਛੱਡੀ ਜਿਸ ਦੇ ਚਲਦਿਆਂ ਅੱਜ ਹਰ ਭਾਰਤੀ ਡਰ ਦੇ ਪ੍ਰਛਾਵੇਂ ਹੇਠ ਦਿਨ ਟਪਾਉਣ ਲਈ ਮਜਬੂਰ ਹੋ ਗਿਆ ਹੈ।
Corona virus
ਕੋਰੋਨਾ ਬਾਬਤ ਵਿਚਾਰ ਕਰਦਿਆਂ ਦੋ ਸਵਾਲ ਜ਼ਿਹਨ ਵਿਚ ਆਉਂਦੇ ਹਨ। ਪਹਿਲਾ ਇਹ ਕਿ ਕੀ ਹੈ ਕੋਰੋਨਾ? ਤੇ ਦੂਜਾ ਕਿ ਅਚਾਨਕ ਕਿਥੋਂ ਆ ਗਿਆ ਕੋਰੋਨਾ?
ਪਹਿਲੇ ਸਵਾਲ ਦੇ ਜਵਾਬ ਨੂੰ ਜੇ ਸੌਖੇ ਸ਼ਬਦਾਂ ਵਿਚ ਸਮਝਣਾ ਹੋਵੇ ਤਾਂ ਕੋਰੋਨਾ ਵਿਸ਼ਾਣੂ, ਕੋਰੋਨਾ ਪ੍ਰਜਾਤੀ ਦਾ ਉਹ ਖ਼ਤਰਨਾਕ ਵਿਸ਼ਾਣੂ ਹੈ ਜਿਹੜਾ ਆਮ ਲੋਕਾਂ ਵਿਚ ਸਾਹ ਨਾਲੀ ਨਾਲ ਸਬੰਧਤ ਬੀਮਾਰੀਆਂ ਜਾਂ ਲੱਛਣਾਂ ਜਿਵੇਂ ਖੰਘ, ਬੁਖ਼ਾਰ , ਜ਼ੁਕਾਮ, ਸ੍ਰੀਰਕ ਟੁੱਟ-ਭੱਜ ਆਦਿ ਨੂੰ ਜਨਮ ਦਿੰਦਾ ਹੈ।
Corona Virus
ਦਰਅਸਲ ਬਣਤਰ ਪੱਖੋਂ ਮੌਜੂਦਾ ਕੋਰੋਨਾ ਵਿਸ਼ਾਣੂ ਕਈ ਸਾਲ ਪਹਿਲਾਂ ਸਾਰਸ 1 (ਸਵੀਅਰ ਐਕਿਊਟ ਰੈਸਪੀਰੇਟਰੀ ਸਿਨਡਰਮ) ਰੋਗ ਸਮੂਹ ਉਪਜਾਉਣ ਵਾਲੇ ਕੋਰੋਨਾ ਵਿਸ਼ਾਣੂ ਜਿਹਾ ਹੀ ਹੈ। ਇਸੇ ਕਾਰਨ ਵਰਤਮਾਨ ਕੋਰੋਨਾ ਵਿਸ਼ਾਣੂ ਨੂੰ ਕੋਰੋਨਾ ਦੀ ਸ਼੍ਰੇਣੀ ਵਿਚ ਰਖਿਆ ਗਿਆ ਹੈ। ਸਾਰਸ-1 ਜਹੇ ਹੀ ਖ਼ਤਰਨਾਕ ਲੱਛਣਾਂ ਨੂੰ ਉਪਜਾਉਣ ਵਾਲੇ ਮੌਜੂਦਾ ਕੋਰੋਨਾ ਰੋਗਾਣੂ ਤੋਂ ਪੈਦਾ ਹੋਣ ਵਾਲੇ ਰੋਗ ਨੂੰ ਵਿਗਿਆਨੀਆਂ ਨੇ ਅੰਗਰੇਜ਼ੀ ਭਾਸ਼ਾ ਵਿਚ ਕੋਵਿਡ-19 ਦਾ ਨਾਂ ਦਿਤਾ ਜਿਸ ਵਿਚ 'ਕੋ' ਸ਼ਬਦ ਕੋਰੋਨਾ ਲਈ, 'ਵਿ' ਸ਼ਬਦ ਵਾਇਰਸ ਲਈ, 'ਡੀ' ਸ਼ਬਦ ਡਿਜ਼ੀਜ਼ ਲਈ ਤੇ 19 ਅੱਖਰ, 2019 ਸੰਨ ਨੂੰ ਦਿਤਾ ਗਿਆ ਹੈ।
Corona virus
ਜੇ ਕੋਰੋਨਾ ਤੋਂ ਪ੍ਰਭਾਵਤ ਹੋਣ ਵਾਲੇ ਵਿਅਕਤੀਆਂ ਦੀ ਗੱਲ ਕਰੀਏ ਤਾਂ ਜਿਨ੍ਹਾਂ ਵਿਅਕਤੀਆਂ ਦੀ ਰੋਗਾਂ ਨਾਲ ਲੜਨ ਦੀ ਕੁਦਰਤੀ ਸ਼ਕਤੀ ਘੱਟ ਹੁੰਦੀ ਹੈ ਜਾਂ ਕਿਸੇ ਹੋਰ ਰੋਗ ਨਾਲ ਪੀੜਤ ਹੁੰਦੇ ਹਨ। ਉਹ ਦੂਜੇ ਲੋਕਾਂ ਦੇ ਮੁਕਾਬਲੇ ਇਸ ਵਿਸ਼ਾਣੂ ਨਾਲ ਵੱਧ ਪ੍ਰਭਾਵਤ ਹੁੰਦੇ ਹਨ। ਇਸ ਕੋਰੋਨਾ ਵਾਇਰਸ (ਜੋ ਕਿ ਮਨੁੱਖੀ ਸੈੱਲ ਦੀ ਆਰ.ਐਨ.ਏ ਇਕਾਈ ਦੀ ਸ਼ੇਣੀ ਵਿਚ ਆਉਂਦਾ ਹੈ) ਦਾ ਜ਼ਿਕਰ ਡਾਕਟਰੀ ਵਿਗਿਆਨ ਦੀਆਂ ਵਿਸ਼ਾਣੂਆਂ, ਰੋਗਾਣੂਆਂ ਤੇ ਜੀਵਾਣੂਆਂ ਨਾਲ ਸਬੰਧਤ ਤਕਰੀਬਨ ਸਾਰੀਆਂ ਹੀ ਕਿਤਾਬਾਂ ਵਿਚ ਮਿਲਦਾ ਹੈ।
China
ਜਿਥੋਂ ਤਕ ਦੂਜੇ ਪ੍ਰਸ਼ਨ ਦੇ ਉੱਤਰ ਦੀ ਗੱਲ ਹੈ ਤਾਂ ਉਸ ਦਾ ਜਵਾਬ ਕੋਰੋਨਾ ਦੀ ਵਰਤਮਾਨ ਕਿਸਮ ਨੋਵੇਲ ਕੋਰੋਨਾ ਜਾਂ ਕੋਵਿਡ-19 ਕੋਰੋਨਾ ਵਾਇਰਸ ਨਾਲ ਸਬੰਧਤ ਹੈ, ਜੋ ਕਿ ਕੋਰੋਨਾ ਵਾਇਰਸ ਦੀ ਉੱਪ ਜਾਤੀ ਗਿਣੀ ਗਈ ਹੈ। ਅਸਲ ਵਿਚ ਇਹ ਕੋਵਿਡ-19 ਹੀ ਸਾਰੇ ਪੁਆੜੇ ਦੀ ਜੜ੍ਹ ਹੈ ਜਿਸ ਨੇ ਸਾਰੇ ਵਿਸ਼ਵ ਵਿਚ ਭੜਥੂ ਪਾਇਆ ਹੋਇਆ ਹੈ। ਲੇਖ ਲਿਖੇ ਜਾਣ ਤਕ ਪੂਰੇ ਸੰਸਾਰ ਵਿਚ ਤਕਰੀਬਨ 37 ਲੱਖ 9 ਹਜ਼ਾਰ ਲੋਕ ਇਸ ਵਾਇਰਸ ਦੀ ਗ੍ਰਿਫ਼ਤ ਵਿਚ ਆ ਚੁੱਕੇ ਸਨ, ਜਿਨ੍ਹਾਂ ਵਿਚੋਂ ਤਕਰੀਬਨ 3,50,000 ਮਰੀਜ਼ਾਂ ਦੀ ਅਣਿਆਈ ਮੌਤ ਦਾ ਕਾਰਨ ਇਹ ਕੋਵਿਡ-19 ਰੋਗਾਣੂ ਬਣਿਆ ਹੈ।
Covid-19
ਕੁੱਲ ਦੁਨੀਆਂ ਦੇ ਤਕਰੀਬਨ 200 ਦੇਸ਼ਾਂ ਵਿਚ ਫੈਲ ਚੁੱਕੇ ਇਸ ਕੋਵਿਡ-19 ਕੋਰੋਨਾ ਵਾਇਰਸ ਨੇ ਭਾਰਤ ਵਿਚ ਵੀ ਦਸਤਕ ਦੇ ਕੇ ਤਕਰੀਬਨ 47,000 ਲੋਕਾਂ ਨੂੰ ਅਪਣੀ ਲਪੇਟ ਵਿਚ ਲੈ ਲਿਆ ਹੈ ਤੇ ਤਕਰੀਬਨ 1450 ਮਰੀਜ਼ਾਂ ਨੂੰ ਮੌਤ ਦੀ ਗਹਿਰੀ ਨੀਂਦਰ ਸੁਆ ਦਿਤਾ ਹੈ। ਹੁਣ ਸਵਾਲ ਇਹ ਹੈ ਕਿ ਇਹ ਕੋਵਿਡ-19 ਆਇਆ ਕਿਥੋਂ? ਇਸ ਸਵਾਲ ਦਾ ਜਵਾਬ ਡਾਕਟਰੀ ਪੱਖ ਦੇ ਨਾਲ-ਨਾਲ ਇਸ ਬੀਮਾਰੀ ਦੇ ਪਸਾਰ ਨਾਲ ਸਬੰਧਤ ਸਰਮਾਏਦਰਾਨਾ ਪੱਖਾਂ ਨੂੰ ਵਿਚਾਰਣ ਤੋਂ ਬਾਅਦ ਹੀ ਲਭਦਾ ਪ੍ਰਤੀਤ ਹੁੰਦਾ ਹੈ।
Corona Virus
ਇਨ੍ਹਾਂ ਸਰਮਾਏਦਾਰਾਨਾ ਪੱਖਾਂ ਵਿਚ ਜਿਥੇ ਮੰਡੀਕਰਨ ਦੀ ਦੌੜ ਦੇ ਚਲਦਿਆਂ ਮਨੁੱਖੀ ਹਵਸ ਦੀ ਕਹਾਣੀ ਲੁਕੀ ਹੋਈ ਹੈ, ਉੱਥੇ ਮਨੁੱਖ ਵਲੋਂ ਕੁਦਰਤ ਨਾਲ ਕੀਤਾ ਜਾ ਰਿਹਾ ਖਿਲਵਾੜ ਭਿਆਨਕ ਰੂਪ ਵਿਚ ਦ੍ਰਿਸ਼ਟੀ ਗੋਚਰ ਪ੍ਰਤੀਤ ਹੁੰਦਾ ਹੈ। ਡਾਕਟਰੀ ਪੱਖੋਂ ਕੋਰੋਨਾ ਦੀ ਪੈਦਾਇਸ਼ ਦੀ ਤੈਅ ਤਕ ਜਾਂਦਿਆਂ ਤੇ ਹੁਣ ਤਕ ਦੀ ਜਾਂਚ ਤੋਂ ਬਾਅਦ ਜੋ ਨਤੀਜੇ ਸਾਹਮਣੇ ਆਏ ਹਨ, ਉਨ੍ਹਾਂ ਅਨੁਸਾਰ ਮੌਜੂਦਾ ਕੋਰੋਨਾ ਵਾਇਰਸ, ਚਮਗਾਦੜ੍ਹ ਜਹੇ ਜੀਵ ਤੋਂ ਪੈਦਾ ਹੋ ਕੇ ਜੀਨਜ਼ ਬਦਲ ਮਨੁੱਖਾਂ ਤਕ ਅੱਪੜਨ ਤੋਂ ਬਾਅਦ ਪੀੜਤ ਮਰੀਜ਼ ਦੀ ਛਿੱਕ ਕਾਰਨ ਉਪਜੇ ਕਣਾਂ ਕਾਰਨ ਇਕ ਤੋਂ ਦੂਜੇ ਮਰੀਜ਼ ਤਕ ਪੁੱਜਣ ਵਾਲਾ ਰੋਗ ਹੈ, ਜੋ ਮਨੁੱਖੀ ਸਾਹ ਪ੍ਰਣਾਲੀ ਉੱਤੇ ਮਾਰੂ ਅਸਰ ਪਾਉਂਦਾ ਹੈ। ਇਹ ਔਰਤਾਂ ਦੇ ਮੁਕਾਬਲੇ ਮਰਦ ਇਸ ਰੋਗ ਨਾਲ ਜ਼ਿਆਦਾ ਪ੍ਰਭਾਵਤ ਹੋ ਰਹੇ ਹਨ।
America
ਹੁਣ ਗੱਲ ਕਰਦੇ ਹਾਂ ਇਸ ਵਿਸ਼ਾਣੂ ਦੇ ਮਹਾਂਮਾਰੀ ਬਣ ਕੇ ਉਭਰਨ ਤੇ ਇਸ ਬੀਮਾਰੀ ਦੇ ਫੈਲਣ ਦੇ ਹੋਰ ਪੱਖਾਂ ਨੂੰ ਵਿਚਾਰਣ ਦੀ। ਇਸ ਬੀਮਾਰੀ ਦੇ ਫ਼ੈਲਣ ਵਿਚ ਮਨੁੱਖ ਦਾ ਅਪਣਾ ਲੋਭ ਹੀ ਸਾਹਮਣੇ ਆਉਂਦਾ ਪ੍ਰਤੀਤ ਹੁੰਦਾ ਹੈ। ਦੇਸ਼ ਚੀਨ ਉਤੇ ਵੁਹਾਨ ਸਥਿਤ ਅਪਣੀ ਰਸਾਇਣਿਕ ਪ੍ਰਯੋਗ ਸ਼ਾਲਾ ਰਾਹੀਂ ਕੋਰੋਨਾ ਦੇ ਪੈਦਾਵਾਰ ਦੇ ਦੋਸ਼ ਲੱਗ ਰਹੇ ਹਨ। ਡੋਨਾਲਡ ਟਰੰਪ ਨੇ ਇਸ ਵਿਸ਼ਾਣੂ ਦੇ ਪ੍ਰਸਾਰ ਲਈ ਸ਼ਰ੍ਹੇਆਮ ਚੀਨ ਨੂੰ ਦੋਸ਼ੀ ਠਹਿਰਾਉਂਦਿਆਂ ਡਬਲਿਊ.ਐਚ.ਓ ਦੀ ਭਰੋਸੇਯੋਗਤਾ ਉਤੇ ਵੀ ਸਵਾਲ ਚੁੱਕੇ ਸਨ। ਇਸ ਸੰਦਰਭ ਵਿਚ ਬੁਧੀਜੀਵੀ ਇਸ ਮਹਾਂਮਾਰੀ ਦੇ ਫੈਲਾਅ ਨੂੰ ਅਮਰੀਕਾ ਤੇ ਚੀਨ ਦੋ ਮਹਾਂਸ਼ਕਤੀਆਂ ਦੀ ਹਊਮੇ ਦੇ ਟਕਰਾਅ ਵਜੋਂ ਵੀ ਵੇਖ ਰਹੇ ਹਨ।
China
ਪਰ ਇਸ ਸਾਰੇ ਬਿਰਤਾਂਤ ਦਾ ਦੁਖਾਂਤਕ ਪਹਿਲੂ ਇਹ ਹੈ ਕਿ ਕੋਵਿਡ-19 ਰੋਗਾਣੂ ਪੂਰੇ ਵਿਸ਼ਵ ਦੇ ਲੱਖਾਂ ਲੋਕਾਂ ਨੂੰ ਬੀਮਾਰ ਕਰਨ ਤੇ ਹਜ਼ਾਰਾਂ ਬੇਗੁਨਾਹਾਂ ਨੂੰ ਅਣਆਈ ਮੌਤ ਦੇਣ ਦਾ ਕਾਰਨ ਬਣਨ ਦੇ ਨਾਲ ਪੂਰੇ ਵਿਸ਼ਵ ਦੇ ਸਿਹਤ ਤੰਤਰ ਤੇ ਆਰਥਕਤਾ ਲਈ ਵੱਡੀ ਚੁਨੌਤੀ ਬਣ ਗਿਆ ਹੈ ਜਿਸ ਤੋਂ ਉੱਭਰ ਪਾਉਣਾ, ਹਾਲ ਦੀ ਘੜੀ ਸੰਭਵ ਨਹੀਂ ਜਾਪ ਰਿਹਾ। ਇਸ ਵਿਸ਼ਾਣੂ ਨੂੰ ਰਸਾਇਣਿਕ ਹਥਿਆਰ ਵਜੋਂ ਪਰਖਣ ਦੀ ਕਨਸੋਅ ਤਾਂ ਹੋਰ ਵੀ ਡਰਾਉਣਾ ਅਹਿਸਾਸ ਕਰਵਾਉਂਦੀ ਹੈ ਕਿਉਂਕਿ ਜੇਕਰ ਵਰਤਮਾਨ ਕੋਰੋਨਾ ਕੁਦਰਤੀ ਜੀਵ ਨਾ ਹੋ ਕੇ ਪ੍ਰਯੋਗਸ਼ਾਲਾ ਵਿਚ ਉਪਜਿਆ ਜੀਵ ਹੈ ਤਾਂ ਭਵਿੱਖ ਵਿਚ ਇਸ ਕਿਸਮ ਦੇ ਰਸਾਇਣਿਕ ਜੀਵਾਂ ਦੀ ਹੌਂਦ ਤੋਂ ਇਨਕਾਰ ਨਹੀਂ ਕੀਤਾ ਜਾ ਸਕਦਾ ਜੋ ਮਨੁੱਖਤਾ ਦੇ ਵਿਨਾਸ਼ ਦਾ ਕਾਰਨ ਬਣ ਸਕਦੇ ਹਨ।
Corona Virus
ਇਤਿਹਾਸ ਗਵਾਹ ਹੈ ਕਿ ਦੂਜੀ ਸੰਸਾਰ ਜੰਗ ਸਮੇਂ ਜਾਪਾਨ ਦੇ ਹੀਰੋਸ਼ੀਮਾ ਤੇ ਨਾਗਾਸਾਕੀ ਸ਼ਹਿਰਾਂ ਉਤੇ ਡਿੱਗੇ ਅਮਰੀਕੀ ਪ੍ਰਮਾਣੂ ਬੰਬਾਂ ਦੀ ਤਬਾਹੀ ਉਸ ਸਮੇਂ ਦੀ ਸੱਭ ਤੋਂ ਖ਼ੌਫ਼ਨਾਕ ਸੱਚਾਈ ਸੀ ਜਿਸ ਦੀ ਚੀਸ ਤਕਰੀਬਨ ਇਕ ਸਦੀ ਬੀਤਣ ਤੋਂ ਬਾਅਦ ਵੀ ਲੋਕਾਂ ਦੇ ਜ਼ਿਹਨ ਵਿਚ ਸਨਸਨੀ ਉਪਜਾ ਦਿੰਦੀ ਹੈ। ਉਹ ਤਾਂ ਬੰਬ ਸਨ, ਜਿਨ੍ਹਾਂ ਦਾ ਪ੍ਰਭਾਵ ਇਕ ਖ਼ਿੱਤੇ ਤਕ ਸੀਮਤ ਸੀ ਪਰ ਰਸਾਇਣਕ ਹਥਿਆਰ ਤਾਂ ਹਵਾ ਰਾਹੀਂ ਦੇਸ਼ ਦੇਸ਼ਾਂਤਰ ਤਕ ਮਾਰੂ ਪ੍ਰਭਾਵ ਪੈਦਾ ਕਰਨ ਦੇ ਸਮਰੱਥ ਹਨ ਜਿਨ੍ਹਾਂ ਦਾ ਮਾਰੂ ਪ੍ਰਭਾਵ ਅਪਣੀ ਕਹਾਣੀ ਖ਼ੁਦ ਹੀ ਦੱਸ ਰਿਹਾ। ਉਂਜ ਵੀ ਜੇਕਰ ਕੋਈ ਇਕ ਦੇਸ਼ ਰਸਾਇਣਕ ਹਥਿਆਰ ਵਿਕਸਤ ਕਰ ਸਕਦਾ ਹੈ ਤਾਂ ਉਸੇ ਜਾਂ ਕਿਸੇ ਦੂਜੇ ਦੇਸ਼ ਵਲੋਂ ਹੋਰ ਰਸਾਇਣਕ ਹਥਿਆਰ ਉਪਜਾਉਣ ਤੋਂ ਇਨਕਾਰ ਨਹੀਂ ਕੀਤਾ ਜਾ ਸਕਦਾ।
Corona Virus
ਇਸ ਸੂਰਤ ਵਿਚ ਰਸਾਇਣਕ ਹਥਿਆਰਾਂ ਨਾਲ ਲੈਸ ਇਹ ਦੇਸ਼ ਜਾਂ ਲੋਕ ਕਿਸ ਕਦਰ ਮਨੁੱਖਤਾ ਦਾ ਘਾਣ ਕਰ ਸਕਦੇ ਹਨ, ਇਹ ਸੋਚ ਕੇ ਹੀ ਰੌਂਗਟੇ ਖੜੇ ਹੋ ਜਾਂਦੇ ਹਨ। ਰਸਾਇਣਕ ਹਥਿਆਰਾਂ ਦੇ ਬੇਬੁਨਿਆਦ ਇਲਜ਼ਾਮ ਹੇਠ ਅਮਰੀਕਾ ਵਲੋਂ ਸਾਲ 2003 ਵਿਚ ਇਰਾਕ ਦੇ ਸੱਦਾਮ ਹੁਸੈਨ ਨੂੰ ਗੱਦੀਉਂ ਲਾਹ ਕੇ ਫਾਂਸੀ ਉਤੇ ਲਟਕਾ ਦਿਤਾ ਸੀ। ਇਸ ਲਈ ਇਸ ਕਿਸਮ ਦੇ ਜੰਤੂਆਂ ਨੂੰ ਰਸਾਇਣਿਕ ਹਥਿਆਰ ਵਜੋਂ ਵਰਤਣਾ ਦੁਨੀਆਂ ਦੀ ਤਬਾਹੀ ਦਾ ਹੀ ਸੰਕੇਤ ਹੈ। ਇਹ ਗੱਲ ਜਿੰਨੀ ਛੇਤੀ ਹੁਕਮਰਾਨਾਂ, ਤਾਨਾਸ਼ਾਹਾਂ ਅਤੇ ਆਮ ਲੋਕਾਂ ਨੂੰ ਸਮਝ ਆ ਜਾਵੇ ਉਨਾ ਹੀ ਚੰਗਾ ਹੈ।
Vaccine
ਦੂਜੇ ਪਾਸੇ ਜੇ ਵਰਤਮਾਨ ਸਮੇਂ ਦੀ ਕੋਰੋਨਾ ਮਹਾਂਮਾਰੀ ਦੋ ਮਹਾਂਸ਼ਕਤੀਆਂ ਅਮਰੀਕਾ ਤੇ ਚੀਨ ਦੇ ਆਪਸੀ ਟਕਰਾਅ ਤੇ ਭਵਿੱਖ ਲਈ ਵੈਕਸੀਨ ਨਿਰਮਾਣ ਦੀ ਮੁਨਾਫ਼ੇਖੋਰੀ ਸੋਚ ਨਾਲ ਜੁੜੀ ਹੈ ਤਾਂ ਵੀ ਮਨੁੱਖਤਾ ਲਈ ਘਾਤਕ ਵਰਤਾਰਾ ਹੈ ਕਿਉਂਕਿ ਇਸ ਤਰ੍ਹਾਂ ਇਨ੍ਹਾਂ ਸ਼ਕਤੀਆਂ ਲਈ ਮਨੁੱਖ ਇਕ ਪ੍ਰੀਖਣ ਵਸਤੂ ਹੀ ਸਾਬਤ ਹੁੰਦਾ ਹੈ ਜੋ ਕਿ ਮਨੁੱਖਤਾ ਲਈ ਸ਼ਰਮਨਾਕ ਵੀ ਹੈ ਵਿਸ਼ਵ ਲਈ ਤਬਾਹਕੁਨ ਸੋਚ ਹੈ। ਇਸ ਲਈ ਉਪਰੋਕਤ ਮਹਾਂਮਾਰੀ ਦੇ ਕਾਰਨਾਂ ਨੂੰ ਇਮਾਨਦਾਰੀ ਅਤੇ ਨਿਰਪੱਖਤਾ ਨਾਲ ਜਾਂਚਣ ਦੀ ਜ਼ਰੂਰਤ ਹੈ। ਚਾਹੀਦਾ ਤਾਂ ਇਹ ਹੈ ਕਿ ਜੇਕਰ ਕੋਈ ਦੇਸ਼ ਕਿਸੇ ਸੂਰਤ ਵਿਚ ਗੁਨਾਹਗਾਰ ਸਾਬਤ ਹੁੰਦਾ ਹੈ ਤਾਂ ਵਕਤ ਰਹਿੰਦੇ ਉਸ ਦੀ ਜ਼ਿੰਮੇਵਾਰੀ ਲਾਜ਼ਮੀ ਤੈਅ ਕਰਨੀ ਚਾਹੀਦੀ ਹੈ ਤਾਕਿ ਅਜਿਹੇ ਦੇਸ਼ ਭਵਿੱਖ ਵਿਚ ਅਜਿਹੇ ਗੁਨਾਹ ਕਰਨ ਤੋਂ ਗ਼ੁਰੇਜ਼ ਕਰਨ। ਇਹੀ ਮਨੁੱਖ ਦੇ ਜਿਊਂਦੇ ਰਹਿਣ ਦੀ ਕਸੌਟੀ ਹੈ, ਇਹੀ ਮਨੁੱਖਤਾ ਦੇ ਜਿਊਂਦੇ ਰਹਿਣ ਦਾ ਸੰਕਲਪ ਹੈ।
ਸੰਪਰਕ : 94173-58393
