ਗੁਰਬਾਣੀ ਗਿਆਨ ਦਾ ਵੱਡਾ ਖ਼ਜ਼ਾਨਾ ਸਾਡੇ ਕੋਲ ਹੋਣ ਦੇ ਬਾਵਜੂਦ ਸਿੱਖ ਅਗਿਆਨਤਾ ਵਾਲੇ ਕੰਮ ਕਰ ਰਹੇ ਹਨ
ਗੁਰਬਾਣੀ ਗਿਆਨ ਦਾ ਵੱਡਾ ਖ਼ਜ਼ਾਨਾ ਸਾਡੇ ਕੋਲ ਹੋਣ ਦੇ ਬਾਵਜੂਦ ਸਿੱਖ ਅਗਿਆਨਤਾ ਵਾਲੇ ਕੰਮ ਕਰ ਰਹੇ ਹਨ। ਜਦੋਂ ਅਸੀ ਮੱਥਾ ਟੇਕ ਕੇ ਵਾਪਸ ਮੁੜਦੇ ਹਾਂ ਤਾਂ ਧਿਆਨ ਰਖਦੇ ਹਾਂ ਕਿ ਗੁਰੂ ਸਾਹਿਬ ਵਲ ਪਿੱਠ ਨਾ ਹੋ ਜਾਵੇ।
ਅਸਲ ਵਿਚ ਸਾਡੀ ਪਿੱਠ ਗੁਰੂ ਸਾਹਿਬ ਵਲ ਉਦੋਂ ਹੁੰਦੀ ਹੈ ਜਦੋਂ ਅਸੀ ਗੁਰਬਾਣੀ ਦੇ ਉਲਟ ਕੰਮ ਕਰਦੇ ਹਾਂ। ਅਸੀ ਇਤਿਹਾਸ ਵਿਚ ਪੁਰਾਤਨ ਗੁਰਸਿੱਖਾਂ ਦਾ ਜੀਵਨ ਵੇਖਦੇ ਹਾਂ ਕਿ ਉਨ੍ਹਾਂ ਗੁਰਸਿੱਖਾਂ ਦਾ ਜੀਵਨ ਕਿੰਨਾ ਉੱਚਾ, ਸੁੱਚਾ ਸੀ, ਕੋਈ ਜਾਤ-ਪਾਤ ਨਹੀਂ, ਕੋਈ ਵਖਰੀ ਮਰਿਆਦਾ ਨਹੀਂ, ਕੋਈ ਕਰਮ ਕਾਂਡ ਨਹੀਂ।
ਇਸ ਦੇ ਉਲਟ ਅੱਜ ਦੇ ਸਿੱਖਾਂ ਵਿਚ ਜਾਤ-ਪਾਤ, ਕਰਮ-ਕਾਂਡ ਵਖਰੇ-ਵਖਰੇ ਗੁਰਦਵਾਰਿਆਂ, ਡੇਰਿਆਂ, ਟਕਸਾਲਾਂ, ਸੰਪਰਦਾਵਾਂ ਵਿਚ ਪ੍ਰਚਲਤ ਹਨ। ਹਰ ਪਿੰਡ ਵਿਚ ਦੋ-ਦੋ ਗੁਰਦਵਾਰੇ ਅਤੇ ਕਈ ਪਿੰਡਾਂ ਵਿਚ ਪੰਜ-ਪੰਜ ਗੁਰਦਵਾਰੇ ਹਨ।
ਸਾਡੀ ਮਰਿਆਦਾ ਇਕ ਨਹੀਂ। ਉਂਜ ਅਸੀ ਸਿੱਖ ਧਰਮ ਨੂੰ ਵਿਗਿਆਨਕ ਧਰਮ ਦਸਦੇ ਹਾਂ ਪਰ ਸਿੱਖ ਬੀਬੀਆਂ ਨੂੰ ਦਰਬਾਰ ਸਾਹਿਬ ਵਿਚ ਕੀਰਤਨ ਕਰਨ ਦੀ ਆਗਿਆ ਨਹੀਂ। ਸੰਤ ਬਾਬਿਆਂ ਨੇ ਨਾਨਕਸ਼ਾਹੀ ਕੈਲੰਡਰ ਦਾ ਕਤਲ ਕਰਵਾ ਦਿਤਾ।
ਕਈਆਂ ਨੂੰ ਸਪੋਕਸਮੈਨ ਅਜੇ ਵੀ ਅਛੂਤ ਲਗਦਾ ਹੈ। ਜਥੇਦਾਰ ਸਿਆਸਤਦਾਨਾਂ ਦੇ ਗ਼ੁਲਾਮ ਹਨ। ਗੁਰਦਵਾਰੇ ਪੂਜਾ ਦਾ ਸਥਾਨ ਬਣ ਚੁਕੇ ਹਨ। ਅਸੀ ਕਹਿੰਦੇ ਹਾਂ ਕਿ ਗੁਰਬਾਣੀ ਸਾਡਾ ਗੁਰੂ ਹੈ ਪਰ ਮੰਨਦੇ ਨਹੀਂ ਹਾਂ।
-ਅਵਤਾਰ ਸਿੰਘ, ਸੰਪਰਕ : 99881-01676
ਸਪੋਕਸਮੈਨ ਮਾਛੀਵਾੜੇ ਵਲ ਵੀ ਧਿਆਨ ਦੇਵੇ
ਦਸੰਬਰ ਦੇ ਮਹੀਨੇ ਸਿੰਘ ਸਭਾ ਸ਼ਹੀਦੀ ਜੋੜ ਮੇਲ ਮੌਕੇ ਗੁਰੂ ਜੀ ਨਾਲ ਸਬੰਧਤ ਸਥਾਨਾਂ ਤੇ ਜਾਣ ਦਾ ਮੌਕਾ ਮਿਲਿਆ। ਚਮਕੌਰ ਸਾਹਿਬ ਤੇ ਮਾਛੀਵਾੜਾ ਦੀ ਧਰਤੀ ਤੇ ਗੁਰੂ ਜੀ ਨਾਲ ਸਬੰਧਤ ਸਥਾਨਾਂ ਦੇ ਦਰਸ਼ਨ ਕੀਤੇ। ਧਾਰਮਕ ਪੱਧਰ ਤੇ ਕਈ ਬੇਨਿਯਮੀਆਂ ਤੱਕੀਆਂ ਤੇ ਮਨ ਦੁਖੀ ਹੋਇਆ।
ਸਪੋਕਸਮੈਨ ਇਨ੍ਹਾਂ ਚੀਜ਼ਾਂ ਤੇ ਸਖ਼ਤ ਪਹਿਰਾ ਦੇ ਰਿਹਾ ਹੈ। ਮੈਂ ਇਨ੍ਹਾਂ ਖ਼ਾਮੀਆਂ ਨੂੰ ਜਨਤਾ ਤਕ ਲਿਆਉਣ ਲਈ ਮਾਛੀਵਾੜਾ ਵਿਚ ਸਪੋਕਸਮੈਨ ਦਾ ਪੱਤਰਕਾਰ ਲਭਿਆ ਪਰ ਪਤਾ ਲੱਗਾ ਕਿ ਪਿਛਲੇ ਡੇਢ ਸਾਲ ਤੋਂ ਮਾਛੀਵਾੜੇ ਵਿਚ ਸਪੋਕਸਮੈਨ ਦਾ ਪੱਤਰਕਾਰ ਹੀ ਕੋਈ ਨਹੀਂ।
ਬਹੁਤ ਹੈਰਾਨੀ ਹੋਈ ਕਿ ਇੰਨਾ ਵਧੀਆ ਅਖ਼ਬਾਰ ਜੋ ਬਹੁਤ ਸੇਵਾ ਕਰ ਰਿਹਾ ਹੋਵੇ, ਉਸ ਦਾ ਮਾਛੀਵਾੜੇ ਵਿਚ ਪੱਤਰਕਾਰ ਹੀ ਨਾ ਹੋਵੇ। ਮੈਨੂੰ ਬਹੁਤ ਨਿਰਾਸ਼ਾ ਹੋਈ ਕਿਉਂਕਿ ਮੈਂ ਲੰਮੇਂ ਸਮੇਂ ਤੋਂ ਸਪੋਕਸਮੈਨ ਨਾਲ ਜੁੜਿਆ ਹੋਇਆ ਹਾਂ।
ਅਦਾਰੇ ਨੂੰ ਬੇਨਤੀ ਹੈ ਕਿ ਗੁਰੂ ਨਗਰੀ ਤੋਂ ਜ਼ਰੂਰ ਹੀ ਪੱਤਰਕਾਰ ਜੋੜੇ ਜਾਣ ਤਾਕਿ ਧਾਰਮਕ ਸਚਾਈਆਂ ਸੱਭ ਦੇ ਸਾਹਮਣੇ ਆ ਸਕਣ।
-ਨਿਰਮਲ ਸਿੰਘ (ਬੱਧਨੀ ਵਾਲੇ) ਬਾਈਪਾਸ ਮੋਗਾ