ਬਾਦਲਾਂ ਦਾ ਮੁਕਾਬਲਾ ਕਰਨ ਦੀ ਜਾਚ ਬਾਦਲ ਵਿਰੋਧੀਆਂ ਨੂੰ ਅਜੇ ਤਕ ਨਹੀਂ ਆਈ
ਨਵੀਂ ਦਿੱਲੀ (ਅਮਨਦੀਪ ਸਿੰਘ) : ਭਾਵੇਂ ਕਿ ਭਾਜਪਾ/ ਆਰ.ਐਸ.ਐਸ. ਨਾਲ ਭਾਈਵਾਲੀ ਪਿਛੋਂ ਬਾਦਲਾਂ ਵਲੋਂ ਅਕਾਲੀ ਦਲ ਦੇ ਪੰਥਕ ਖ਼ਾਸੇ ਨੂੰ ਭਗਵੇਂ ਰੰਗ ਵਿਚ ਰੰਗਣ ਤੇ ਸਿੱਖਾਂ ਵਿਰੁਧ ਭੁਗਤਣ ਕਰ ਕੇ ਪੰਥਕ ਹਲਕਿਆਂ ਵਿਚ ਉਨ੍ਹਾਂ ਵਿਰੁਧ ਰੋਹ ਰਹਿੰਦਾ ਹੈ, ਪਰ ਬਾਦਲਾਂ ਦਾ ਮੁਕਾਬਲਾ ਕਰਨ ਦੀ ਜਾਚ ਬਾਦਲ ਵਿਰੋਧੀਆਂ ਨੂੰ ਅਜੇ ਤਕ ਨਹੀਂ ਆਈ।
BJP-Rss
ਹੁਣ ਦਿੱਲੀ ਵਿਚ ਸਾਰੇ ਬਾਦਲ ਵਿਰੋਧੀ ਬਾਦਲਾਂ ਦਾ ਤਖ਼ਤਾ ਪਲਟ ਕਰ ਕੇ, ਆਪ ਗੁਰਦਵਾਰਾ ਪ੍ਰਬੰਧ 'ਤੇ ਕਾਬਜ਼ ਹੋ ਕੇ, ਦਿੱਲੀ ਦੇ ਸਿੱਖਾਂ ਦੀ ਵਾਗਡੋਰ ਅਪਣੇ ਹੱਥਾਂ ਵਿਚ ਲੈਣ ਲਈ ਕਾਹਲੇ ਹਨ ਪਰ ਸਾਰੇ ਵਿਰੋਧੀਆਂ ਦੀ ਇਕ ਗੱਲ ਸਾਂਝੀ ਹੈ ਕਿ ਨਾ ਤਾਂ ਉਨ੍ਹਾਂ ਕੋਲ ਸਾਂਝੇ ਤੌਰ 'ਤੇ ਸਿੱਖਾਂ ਦੇ ਮਸਲੇ ਹੱਲ ਕਰਨ ਦੀ ਸਮਰੱਥਾ ਹੈ ਅਤੇ ਨਾ ਹੀ ਪਿਛਲੇ 10 ਸਾਲ ਦੌਰਾਨ ਜ਼ਮੀਨੀ ਪੱਧਰ 'ਤੇ ਉਨ੍ਹਾਂ ਦੀ ਕੋਈ ਪ੍ਰਾਪਤੀ ਹੈ।
Shiromani Akali Dal
ਇਥੋਂ ਤੱਕ ਕਿ ਦਿੱਲੀ ਦੇ ਸਰਕਾਰੀ ਸਕੂਲਾਂ ਵਿਚ ਪੰਜਾਬੀ ਤੇ ਹੋਰ ਬੋਲੀਆਂ ਦੇ ਘਾਣ ਬਾਰੇ 26 ਦਸੰਬਰ 2016 ਨੂੰ ਕੇਜਰੀਵਾਲ ਸਰਕਾਰ ਵਲੋਂ ਜਾਰੀ ਕੀਤੇ ਗਏ ਹੁਕਮ ਦੇ ਵਿਰੋਧ ਵਿਚ ਕਿਸੇ ਅਖੌਤੀ ਸਿੱਖ ਪਾਰਟੀ ਨੇ ਇਕ ਅੱਖਰ ਬੋਲਣ ਤਕ ਦੀ ਹਿੰਮਤ ਨਾ ਵਿਖਾਈ। ਉਸੇ ਕੇਜਰੀਵਾਲ ਦੀ ਆਮ ਆਦਮੀ ਪਾਰਟੀ ਨਾਲ ਜੁੜਿਆ ਇਕ ਧੜਾ ਬਾਦਲਾਂ ਦੇ ਪੁਰਾਣੇ ਵਿਰੋਧੀ ਤੇ ਅਕਾਲ ਤਖ਼ਤ ਸਾਹਿਬ ਦੇ ਸਾਬਕਾ ਜਥੇਦਾਰ ਭਾਈ ਰਣਜੀਤ ਸਿੰਘ ਦੇ ਸਹਾਰੇ ਦਿੱਲੀ ਗੁਰਦਵਾਰਾ ਚੋਣਾਂ ਜਿੱਤ ਲੈਣਾ ਚਾਹੁੰਦਾ ਹੈ।
Arvind Kejriwal
ਇਹ ਵੀ ਇਕ ਕੌੜਾ ਸੱਚ ਹੈ ਕਿ ਸਿੱਖ ਧੜੇ ਸਰਕਾਰਾਂ ਦੇ ਸਹਾਰੇ ਹੀ ਗੁਰਦਵਾਰਾ ਚੋਣਾਂ ਜਿੱਤਦੇ ਆ ਰਹੇ ਹਨ ਤੇ ਫਿਰ ਸਰਕਾਰਾਂ ਦੀ ਬੋਲੀ ਬੋਲ ਕੇ, 'ਪੰਥ ਦਾ ਸੰਵਾਦ' ਪਿਛੇ ਛੱਡ ਦਿੰਦੇ ਹਨ। ਫਿਰ ਸਿੱਖ ਕਿਵੇਂ ਯਕੀਨ ਕਰਨ ਕਿ ਮੁੜ ਉਨ੍ਹਾਂ ਨਾਲ ਧੋਖਾ ਨਹੀਂ ਹੋਵੇਗਾ? ਭਾਈ ਰਣਜੀਤ ਸਿੰਘ ਹੁਣ ਪੰਥਕ ਲਹਿਰ ਦੇ ਬੈਨਰ ਹੇਠ ਦਿੱਲੀ ਦੇ ਸਿੱਖਾਂ ਨੂੰ ਇਹ ਸੁਨੇਹਾ ਦੇਣ ਲਈ 24 ਅਕਤੂਬਰ ਨੂੰ ਪੁੱਜ ਰਹੇ ਹਨ ਕਿ ਉਹ ਦਿੱਲੀ ਗੁਰਦਵਾਰਾ ਕਮੇਟੀ ਚੋਣਾਂ ਵਿਚ ਅਪਣਾ ਦਿਲਚਸਪੀ ਲੈਣੀ ਸ਼ੁਰੂ ਕਰ ਦਿਤੀ ਹੈ।
DSGMC
ਪਰ ਦਿੱਲੀ ਦੇ ਸਿੱਖ ਉਨ੍ਹਾਂ ਤੋਂ ਪੁੱਛਣਾ ਚਾਹੁੰਦੇ ਹਨ ਕਿ ਕੀ ਕਾਰਨ ਰਿਹਾ ਕਿ ਪਿਛਲੀਆਂ ਦਿੱਲੀ ਗੁਰਦਵਾਰਾ ਚੋਣਾਂ ਵਿਚ ਉਨ੍ਹਾਂ ਪ੍ਰੈੱਸ ਕਲੱਬ ਵਿਖੇ 1 ਫ਼ਰਵਰੀ 2017 ਨੂੰ ਜ਼ੋਰ ਸ਼ੋਰ ਨਾਲ ਅਪਣੀ ਵੱਖਰੀ ਜਥੇਬੰਦੀ 'ਅਕਾਲ ਸਹਾਏ ਵੈੱਲਫ਼ੇਅਰ ਸੁਸਾਇਟੀ' ਮੈਦਾਨ ਵਿਚ ਉਤਾਰ ਕੇ ਚੋਣਾਂ ਲੜਨ ਦਾ ਐਲਾਨ ਕੀਤਾ ਸੀ। ਉਦੋਂ ਉਨ੍ਹਾਂ ਦੇ 11 'ਚੋਂ 2 ਉਮੀਦਵਾਰ ਹਰਜਿੰਦਰ ਸਿੰਘ ਚੋਣਾਂ ਜਿੱਤਣ ਪਿਛੋਂ ਸ਼੍ਰੋਮਣੀ ਅਕਾਲੀ ਦਲ ਬਾਦਲ ਵਿਚ ਪਲਟੀ ਮਾਰ ਗਏ ਤੇ ਮਨਜੀਤ ਸਿੰਘ ਜੀ ਕੇ ਨੂੰ ਅਪਣਾ ਪ੍ਰਧਾਨ ਪ੍ਰਵਾਨ ਕਿਉਂ ਕਰ ਲਿਆ?
Manjeet Singh GK
ਦਿੱਲੀ ਦੇ ਸਿੱਖਾਂ ਦੇ ਹੋਰ ਮੁੱਦਿਆਂ ਬਾਰੇ ਵੀ ਉਹ ਮੌਨ ਹੀ ਰਹੇ ਤੇ ਹੁਣ ਅਗਲੇ ਸਾਲ 2021 ਵਿਚ ਹੋਣ ਵਾਲੀਆਂ ਦਿੱਲੀ ਗੁਰਦਵਾਰਾ ਚੋਣਾਂ ਤੋਂ 5 ਮਹੀਨੇ ਪਹਿਲਾਂ ਉਹ ਅਜਿਹੀ ਕਿਹੜੀ ਜਾਦੂ ਦੀ ਛੜੀ ਦੇ ਜਾਣਗੇ ਜਿਸ ਸਹਾਰੇ ਉਨ੍ਹਾਂ ਦੇ ਹਮਾਇਤੀ 'ਪੰਥਕ ਸੰਵਾਦ' ਰਚਾ ਕੇ, ਜਿੱਤ ਜਾਣਗੇ?
Sikh
ਰਾਗੀ ਬਲਦੇਵ ਸਿੰਘ ਵਡਾਲਾ ਦੀ ਪਾਰਟੀ ਸਿੱਖ ਸਦਭਾਨਾ ਦਲ ਦੀ ਵੀ ਇਹੀ ਹਾਲਤ ਹੈ। ਇਸ ਤੋਂ ਇਲਾਵਾ ਦਿੱਲੀ ਦੀਆਂ ਹੋਰ ਪਾਰਟੀਆਂ ਤਾਂ ਨਾ ਹੋਇਆਂ ਵਰਗੀਆਂ ਹੀ ਹਨ। ਜਿਨ੍ਹਾਂ ਨੇ ਏ.ਸੀ. ਕਮਰਿਆਂ ਵਿਚ ਬੈਠ ਕੇ ਅਪਣੇ ਏਜੰਡੇ ਚਲਾ ਰਹੀਆਂ ਹਨ ਅਤੇ ਚੋਣਾਂ ਤੋਂ ਪਹਿਲਾਂ ਹੀ ਸਾਰਿਆਂ ਦਾ ਪੰਥ ਪ੍ਰਤੀ ਪਿਆਰ ਡੁੱਲ੍ਹ ਡੁੱਲ ਪੈਂਦਾ ਹੈ।
