ਤਖ਼ਤ ਸ੍ਰੀ ਹਰਿਮੰਦਰ ਜੀ ਪਟਨਾ ਸਾਹਿਬ ਦੇ ਪ੍ਰਧਾਨ ਜਥੇਦਾਰ ਅਵਤਾਰ ਸਿੰਘ ਹਿਤ ਅਤੇ ਜਰਨਲ ਸਕੱਤਰ ਮੁਹਿੰਦਰ ਸਿੰਘ ਢਿਲੋਂ ਵਿਚਾਲੇ ਟਕਰਾਅ ਦੀ ਇਕ ਹੋਰ ਮਿਸਾਲ ਦੇਖਣ.......
ਅੰਮ੍ਰਿਤਸਰ : ਤਖ਼ਤ ਸ੍ਰੀ ਹਰਿਮੰਦਰ ਜੀ ਪਟਨਾ ਸਾਹਿਬ ਦੇ ਪ੍ਰਧਾਨ ਜਥੇਦਾਰ ਅਵਤਾਰ ਸਿੰਘ ਹਿਤ ਅਤੇ ਜਰਨਲ ਸਕੱਤਰ ਮੁਹਿੰਦਰ ਸਿੰਘ ਢਿਲੋਂ ਵਿਚਾਲੇ ਟਕਰਾਅ ਦੀ ਇਕ ਹੋਰ ਮਿਸਾਲ ਦੇਖਣ ਨੂੰ ਮਿਲੀ ਹੈ। ਸ. ਹਿਤ ਨੇ ਬੋਰਡ ਦੀ ਇਕ ਹੰਗਾਮੀ ਮੀਟਿੰਗ 5 ਮਾਰਚ ਨੂੰ ਬੁਲਾ ਲਈ ਹੈ, ਜਦਕਿ ਸ. ਢਿਲੋਂ ਨੇ ਬਰਾਬਰ ਤੇ ਇਕ ਮੀਟਿੰਗ 14 ਮਾਰਚ ਨੂੰ ਸੱਦ ਲਈ ਹੈ। ਅੱਜ ਜਾਣਕਾਰੀ ਦਿੰਦੇ ਸ. ਹਿਤ ਨੇ ਦਸਿਆ ਕਿ ਇਸ ਸਬੰਧੀ ਪੱਤਰ ਪੀ ਆਰ 01/2019 ਅਨੁਸਾਰ 5 ਮਾਰਚ ਨੂੰ ਇਹ ਮੀਟਿੰਗ ਹੋਵੇਗੀ। ਤਖ਼ਤ ਬੋਰਡ ਦੇ ਸੰਵਿਧਾਨ ਦੀ ਧਾਰਾ 22 ਮੁਤਾਬਕ ਇਹ ਮੀਟਿੰਗ ਬੁਲਾਈ ਜਾ ਰਹੀ ਹੈ।
ਬੋਰਡ ਦੇ ਪ੍ਰਧਾਨ ਵਲੋਂ ਜਾਰੀ ਪੱਤਰ ਵਿਚ ਕਿਹਾ ਗਿਆ ਹੈ ਕਿ ਬੋਰਡ ਦੇ ਜਰਨਲ ਸਕੱਤਰ ਅਤੇ ਸਕੱਤਰ ਵਲੋਂ ਬੋਰਡ ਦੀ ਬੈਠਕ ਬੁਲਾਏ ਜਾਣ 'ਤੇ ਇਨਕਾਰ ਕੀਤੇ ਜਾਣ ਤੋਂ ਬਾਅਦ ਇਹ ਹੰਗਾਮੀ ਮੀਟਿੰਗ ਵਿਧਾਨ ਦੀ ਧਾਰਾ 21 ਤਹਿਤ ਬੁਲਾ ਰਹੇ ਹਨ। ਮੀਟਿੰਗ ਵਿਚ ਕੁੱਝ ਮੈਂਬਰਾਂ ਨਾਲ ਜੁੜੇ ਮਾਮਲੇ ਵਿਚਾਰੇ ਜਾਣਗੇ। ਦੋਸ਼ੀ ਮੈਂਬਰਾਂ ਤੇ ਕਰਮਚਾਰੀਆਂ ਵਿਰੁਧ ਵਿਧਾਨ ਅਤੇ ਕਾਨੂੰਨ ਮੁਤਾਬਕ ਕਾਰਵਾਈ ਕੀਤੀ ਜਾਵੇਗੀ। ਸਕੱਤਰ ਮਹਿੰਦਰ ਸਿੰਘ ਛਾਬੜਾ ਵਲੋਂ ਮੀਟਿੰਗ ਬੁਲਾਏ ਜਾਣ 'ਤੇ ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਦੀ ਪ੍ਰਧਾਨ ਵਲੋਂ ਮੀਟਿੰਗ ਬੁਲਾਉਣ ਬਾਰੇ ਕੋਈ ਗੱਲ ਨਹੀਂ ਹੋਈ।
ਪ੍ਰਧਾਨ ਹਿਤ ਨੇ ਮੀਟਿੰਗ ਬੁਲਾਏ ਜਾਣ ਦੀ ਸੂਚਨਾ ਜ਼ਿਲ੍ਹਾ ਸੈਸ਼ਨ ਜੱਜ ਅਤੇ ਤਖ਼ਤ ਪਟਨਾ ਸਾਹਿਬ ਦੇ ਕਸਟੋਡੀਅਨ ਅਤੇ ਮੈਂਬਰਾਂ ਨੂੰ ਭੇਜ ਦਿਤੀ ਹੈ। ਉਧਰ ਜਰਨਲ ਸਕੱਤਰ ਮੁਹਿੰਦਰ ਸਿੰਘ ਢਿਲੋਂ ਨੇ ਕਮੇਟੀ ਦੀ ਮੀਟਿੰਗ 14 ਮਾਰਚ ਨੂੰ ਬੁਲਾਏ ਜਾਣ ਦੀ ਗੱਲ ਕਹੀ ਹੈ। ਉਨ੍ਹਾਂ ਇਸ ਬਾਰੇ ਪੱਤਰ 3/3089/2019 ਵਿਚ ਕਿਹਾ ਹੈ ਕਿ ਪ੍ਰਧਾਨ ਦੇ ਹੁਕਮਾਂ ਅਨੁਸਾਰ ਪ੍ਰਬੰਧਕ ਬੋਰਡ ਦੀ ਮੀਟਿੰਗ ਵਿਧਾਨ ਅਤੇ ਉਪ ਨਿਯਮ ਦੇ ਧਾਰਾ 51 ਮੁਤਾਬਕ 14 ਮਾਰਚ ਨੂੰ ਮੀਟਿੰਗ ਹਾਲ ਵਿਚ ਰੱਖੀ ਗਈ ਹੈ। ਇਸ ਵਿਚ ਪਿਛਲੀ ਬੈਠਕ 18 ਨਵੰਬਰ 2018 ਦੀ ਪੁਸ਼ਟੀ ਅਤੇ ਬੋਰਡ ਦੇ ਬਜਟ 2019-20 ਦੀ ਜਾਣਕਾਰੀ ਤੇ ਵਿਚਾਰ ਕੀਤੀ ਜਾਵੇਗੀ।
