ਚੰਡੀਗੜ੍ਹ, 30 ਅਕਤੂਬਰ (ਸਰਬਜੀਤ ਢਿੱਲੋਂ) : ਮਿਊਂਸਪਲ ਕਾਰਪੋਰੇਸਸ਼ਨ ਚੰਡੀਗੜ੍ਹ ਦੇ ਜਨਰਲ ਹਾਊਸ ਦੀ ਮੀਟਿੰਗ ਮੇਅਰ ਆਸ਼ਾ ਕੁਮਾਰੀ ਜੈਸਵਾਲ ਦੀ ਅਗਵਾਈ 'ਚ ਸਵੇਰੇ 11 ਵਜੇ ਸ਼ੁਰੂ ਹੋਈ। ਮੀਟਿੰਗ ਦੌਰਾਨ ਨਗਰ ਨਿਗਮ ਵਲੋਂ ਸ਼ਹਿਰ ਦੇ ਦਖਣੀ ਸੈਕਟਰਾਂ 'ਚ ਸਫਾਈ ਦਾ ਕੰਮ ਠੇਕੇ 'ਤੇ ਲੈਣ ਵਾਲੀ ਕੰਪਨੀ ਲਾਇਨਜ਼ ਸਰਵਿਸ ਲਿਮ. ਦੇ ਮੁਲਾਜ਼ਮਾਂ ਨੂੰ ਸੈਕਟਰ 46-47 'ਚ ਜੰਗਲਾਤ ਵਿਭਾਗ ਦੀ ਜ਼ਮੀਨ 'ਤੇ ਮਲਬਾ ਸੁੱਟਦੇ ਹੋਏ ਫੜਨ ਅਤੇ 5500 ਰੁਪਏ ਜੁਰਮਾਨਾ ਤੇ ਥਾਣੇ 'ਚ ਡੀ.ਡੀ.ਆਰ. ਦਰਜ ਕਰਵਾਉਣ ਦਾ ਮਾਮਲਾ ਭਾਜਪਾ ਅਤੇ ਵਿਰੋਧੀ ਧਿਰ ਵਲੋਂ ਜ਼ੋਰਦਾਰ ਢੰਗ ਨਾਲ ਉਠਾਇਆ ਗਿਆ।
ਕਾਂਗਰਸ ਦੇ ਵਿਰੋਧੀ ਧਿਰ ਦੇ ਆਗੂ ਦਵਿੰਦਰ ਸਿੰਘ ਬਬਲਾ ਤੇ ਭਾਜਪਾ ਕੌਂਸਲਰਾਂ ਵਲੋਂ ਮੇਅਰ ਅਤੇ ਕਮਿਸ਼ਨਰ ਨੂੰ ਅਜਿਹੀ ਕੰਪਨੀ ਵਿਰੁਧ ਸਖ਼ਤ ਤੋਂ ਸਖ਼ਤ ਕਾਰਵਾਈ ਕਰਨ ਲਈ ਜ਼ੋਰ ਦਿਤਾ। ਇਸ ਤਰ੍ਹਾਂ ਜਨਰਲ ਹਾਊਸ ਦੀ ਮੀਟਿੰਗ 'ਚ ਦੁਪਹਿਰ ਇਕ ਵਜੇ ਭਾਰੀ ਸ਼ੋਰ ਸ਼ਰਾਬਾ ਹੁੰਦਾ ਰਿਹਾ ਅਤੇ ਕਈ ਹੋਰ ਵਿਕਾਸ ਏਜੰਡੇ 'ਤੇ ਕੋਈ ਚਰਚਾ ਨਹੀਂ ਹੋ ਸਕੀ। ਮੇਅਰ ਨੇ ਹਾਊਸ ਨੂੰ ਭਰੋਸਾ ਦਿਤਾ ਕਿ ਕੰਪਨੀ ਵਿਰੁਧ ਸਖ਼ਤ ਕਾਰਵਾਈ ਕਰਨ ਲਈ ਪੁਲਿਸ ਅਧਿਕਾਰੀਆਂ ਨੂੰ ਲਿਖਿਆ ਜਾਵੇਗਾ, ਜਿਸ ਤੋਂ ਬਾਅਦ ਹਾਊਸ 'ਚ ਸ਼ਾਂਤੀ ਕਾਇਮ ਹੋਈ

ਬਾਅਦ ਦੁਪਹਿਰ ਨਗਰ ਨਿਗਮ ਵਲੋਂ ਸ਼ਹਿਰ ਦੇ ਵਿਕਾਸ ਲਈ ਅਤੇ ਸਕਿਉਰਟੀ ਗਾਰਡ ਭਰਤੀ ਕਰਨ ਅਤੇ ਸ਼ਹਿਰ 'ਚ ਕੂੜਾ ਕਰਕਟ ਚੁਕਣ ਲਈ 8 ਟਰੈਕਟਰ ਟਰਾਲੀਆਂ ਕਿਰਾਏ 'ਤੇ ਲੈਣ ਅਤੇ ਗਊਸ਼ਾਲਾ 'ਚ ਪਸ਼ੂਆਂ ਲਈ ਹਰੇ ਪੱਠਿਆਂ ਦੀ ਸਪਲਾਈ ਕਰਨ ਵਾਲੀ ਸੰਸਥਾ ਦਾ ਠੇਕਾ ਹੋਰ ਵਧਾਉਣ ਲਈ ਮਤਾ ਪਾਸ ਕੀਤਾ।ਇਥੇ ਦਸਣਾ ਬਣਦਾ ਹੈ ਕਿ ਚੰਡੀਗੜ੍ਹ ਮਿਊਂਸਪਲ ਕਾਰਪੋਰੇਸ਼ਨ ਵਲੋਂ ਲਾਇਨਜ਼ ਸਰਵਿਸਿਜ਼ ਪ੍ਰਾ. ਲਿਮ. ਨੂੰ ਸ਼ਹਿਰ ਦੇ ਦਖਣੀ ਸੈਕਟਰਾਂ 'ਚ ਸਾਲਾਨਾ 60 ਕਰੋੜ ਰੁਪਏ ਦਾ ਠੇਕਾ ਦਿਤਾ ਹੈ। ਇਸ ਕੰਪਨੀ ਨੂੰ ਮਹੀਨੇ ਦੇ ਲਗਭਗ 5 ਕਰੋੜ ਰੁਪਏ ਨਿਗਮ ਦਿੰਦਾ ਹੈ। ਕੰਪਨੀ ਦੇ 1200 ਸਫ਼ਾਈ ਮੁਲਾਜ਼ਮ ਹਨ ਅਤੇ ਕੰਪਨੀ ਕੋਲ ਸੈਕਟਰਾਂ 'ਚ ਰੋਜ਼ਾਨਾ ਬਾਹਰੀ ਤੇ ਅੰਦਰੂਨੀ ਸੜਕਾਂ ਦੀ ਸਫ਼ਾਈ ਕਰਨਾ, ਸੜਕਾਂ 'ਤੇ ਜੰਮੀ ਮਿੱਟੀ ਨੂੰ ਸਵੀਪਿੰਗ ਮਸ਼ੀਨਾਂ ਰਾਹੀਂ ਹਟਾਉਣਾ, ਥਾਂ-ਥਾਂ ਖਿਲਰੇ ਹਾਰਟੀਕਲਚਰਲ ਵੇਸਟ ਮਲਬੇ ਆਦਿ ਨੂੰ ਫਿਕਸ ਥਾਵਾਂ 'ਤੇ ਟਰੱਕਾਂ 'ਚ ਪਾ ਕੇ ਸੁੱਟਣਾ ਆਦਿ ਸ਼ਾਮਲ ਹੈ ਪਰੰਤੂ ਜ਼ਿਆਦਾਤਰ ਕੌਂਸਲਰਾਂ ਤੇ ਸ਼ਹਿਰ ਵਾਸੀਆਂ ਦੀਆਂ ਸ਼ਿਕਾਇਤਾਂ ਨਗਰ ਨਿਗਮ ਦੇ ਮੋਬਾਈਲ ਐਪ 'ਤੇ ਲੋਕ ਥਾਂ-ਥਾਂ ਪਏ ਕੂੜੇ ਤੇ ਗੰਦਗੀ ਦੀਆਂ ਫੋਟੋ ਪਾ ਕੇ ਕੌਂਸਲਰਾਂ ਤੇ ਅਫ਼ਸਰਾਂ ਨੂੰ ਭੇਜਦੇ ਹਨ।