ਲੌਕਡਾਊਨ ਦੌਰਾਨ 'ਰਾਮਾਇਣ' ਅਤੇ 'ਮਹਾਂਭਾਰਤ' ਵਰਗੇ ਪੁਰਾਣੇ ਸੀਰੀਅਲਾਂ ਦੇ ਪ੍ਰਸਾਰਣ ਨੇ ਦੂਰਦਰਸ਼ਨ ਦੇ ਦਰਸ਼ਕਾਂ ਵਿਚ ਭਾਰੀ ਵਾਧਾ ਕੀਤਾ ਹੈ।
ਮੁੰਬਈ: ਲੌਕਡਾਊਨ ਦੌਰਾਨ 'ਰਾਮਾਇਣ' ਅਤੇ 'ਮਹਾਂਭਾਰਤ' ਵਰਗੇ ਪੁਰਾਣੇ ਸੀਰੀਅਲਾਂ ਦੇ ਪ੍ਰਸਾਰਣ ਨੇ ਦੂਰਦਰਸ਼ਨ ਦੇ ਦਰਸ਼ਕਾਂ ਵਿਚ ਭਾਰੀ ਵਾਧਾ ਕੀਤਾ ਹੈ। ਬ੍ਰੌਡਕਾਸਟ ਆਡੀਅੰਸ ਰਿਸਰਚ ਕੌਂਸਲ (ਬੀਏਆਰਸੀ) ਦੀ ਰਿਪੋਰਟ ਅਨੁਸਾਰ, ਦੂਰਦਰਸ਼ਨ ਸਾਰੇ ਮਨੋਰੰਜਨ ਚੈਨਲਾਂ ਨੂੰ ਪਛਾੜਦੇ ਹੋਏ ਪਹਿਲੇ ਸਥਾਨ ‘ਤੇ ਪਹੁੰਚ ਗਿਆ ਹੈ।
ਦੂਰਦਰਸ਼ਨ ਇਸ ਸਾਲ ਬੀਏਆਰਸੀ ਦੀ 13 ਵੀਂ ਹਫ਼ਤੇ ਦੀ ਰਿਪੋਰਟ ਵਿਚ 15,96,923 ਇੰਪਰੈਸ਼ਨਸ ਦੇ ਨਾਲ ਪਹਿਲੇ ਨੰਬਰ 'ਤੇ ਹੈ। ਇਸ ਦੇ ਨਾਲ ਹੀ ਇਹ ਹਿੰਦੀ ਦੇ ਆਮ ਮਨੋਰੰਜਨ ਚੈਨਲਾਂ ਦੀ ਸੂਚੀ ਵਿਚ ਵੀ 15,64,867 ਨਾਲ ਪਹਿਲੇ ਸਥਾਨ 'ਤੇ ਹੈ। ਪ੍ਰਸਾਰ ਭਾਰਤੀ ਨੇ ਆਪਣੇ ਅਧਿਕਾਰਤ ਟਵਿੱਟਰ ਹੈਂਡਲ ਜ਼ਰੀਏ ਦਾਅਵਾ ਕੀਤਾ ਹੈ ਕਿ ਦੂਰਦਰਸ਼ਨ ਦੇ ਦਰਸ਼ਕ ਇਕ ਹਫਤੇ ਦੇ ਅੰਦਰ 650 ਪ੍ਰਤੀਸ਼ਤ ਵੱਧ ਗਏ ਹਨ।
ਜਦਕਿ ਚੈਨਲ ਦੇ ਦਰਸ਼ਕ 12 ਵੇਂ ਹਫ਼ਤੇ ਵਿਚ 267 ਮਿਲੀਅਨ ਤੋਂ ਵੱਧ ਸੀ, ਇਹ 13 ਵੇਂ ਹਫ਼ਤੇ ਵਿਚ 2109 ਮਿਲੀਅਨ ਤੋਂ ਵੱਧ ਹੋ ਗਏ ਹਨ। ਖ਼ਾਸ ਗੱਲ ਇਹ ਹੈ ਕਿ ਦੂਰਦਰਸ਼ਨ ਦੇ ਦਰਸ਼ਕ ਗ੍ਰਾਮੀਣ ਖੇਤਰ ਤੋਂ ਜ਼ਿਆਦਾ ਸ਼ਹਿਰੀ ਖੇਤਰ ਵਿਚ ਹਨ। ਅਰਬਨ ਖੇਤਰ ਵਿਚ ਜਿੱਥੇ 9,10,973 ਇੰਪਰੈਸ਼ਨਸ ਮਿਲੇ, ਤਾਂ ਪੇਂਡੂ ਖੇਤਰ ਵਿਚ ਇਸ ਨੂੰ 6,53,894 ਇੰਪਰੈਸ਼ਨਸ ਮਿਲੇ ਤੇ ਇੱਥੇ ਇਹ ਦੂਜੇ ਸਥਾਨ ‘ਤੇ ਹੈ।
ਬੀਏਆਰਸੀ ਇੰਡੀਆ ਦੀ ਰਿਪੋਰਟ ਅਨੁਸਾਰ ਲੌਕਡਾਊਨ ਦੌਰਾਨ ਪੁਰਾਣੇ ਪ੍ਰੋਗਰਾਮਾਂ ਦਾ ਦੁਬਾਰਾ ਪ੍ਰਸਾਰਣ ਕਰਨ ਦਾ ਫੈਸਲਾ ਦੂਰਦਰਸ਼ਨ ਲਈ ਲਾਭਕਾਰੀ ਸੌਦਾ ਸਾਬਤ ਹੋਇਆ।
ਇਸ ਕਾਰਨ ਸਵੇਰ ਅਤੇ ਸ਼ਾਮ ਦੇ ਬੈਂਡ ਵਿਚ ਇਸ ਦੀ ਵਿਊਅਰਸ਼ਿਪ 40 ਹਜ਼ਾਰ ਪ੍ਰਤੀਸ਼ਤ ਵਧੀ ਹੈ। ਸਿਰਫ 'ਰਾਮਾਇਣ' ਅਤੇ 'ਮਹਾਂਭਾਰਤ' ਹੀ ਨਹੀਂ, ਦੂਰਦਰਸ਼ਨ ਨੇ ਆਪਣੇ ਦੋ ਚੈਨਲਾਂ (ਡੀਡੀ ਨੈਸ਼ਨਲ ਅਤੇ ਡੀਡੀ ਭਾਰਤੀ) 'ਤੇ 80 ਅਤੇ 90 ਦੇ ਦਹਾਕੇ ਦੇ ਕਈ ਸੀਰੀਅਲ ਦੁਬਾਰਾ ਪ੍ਰਸਾਰਿਤ ਕੀਤੇ ਹਨ। ਇਨ੍ਹਾਂ ਵਿਚ 'ਚਾਣਕਿਆ', 'ਬੁਨੀਆਦ', 'ਉਪਨਿਸ਼ਦ ਗੰਗਾ', 'ਅਲੀਫ ਲੈਲਾ' ਅਤੇ 'ਸ਼ਕਤੀਮਾਨ' ਵਰਗੇ ਪ੍ਰਸਿੱਧ ਸ਼ੋਅ ਸ਼ਾਮਲ ਹਨ।