ਮੱਧ ਪ੍ਰਦੇਸ਼, 20 ਨਵੰਬਰ: ਫ਼ਿਲਮ ਨਿਰਮਾਤਾ ਸੰਜੇ ਲੀਲਾ ਭੰਸਾਲੀ ਦੀ ਰਿਲੀਜ਼ ਹੋਣ ਤੋਂ ਪਹਿਲਾਂ ਹੀ ਵਿਵਾਦਾਂ 'ਚ ਘਿਰੀ ਫ਼ਿਲਮ ਪਦਮਾਵਤੀ ਦਾ ਟ੍ਰੇਲਰ ਐਤਵਾਰ ਰਾਤ ਮੱਧ ਪ੍ਰਦੇਸ਼ ਦੇ ਬਡਵਾਨੀ ਜ਼ਿਲ੍ਹੇ ਦੇ ਅੰਜੜ ਕਸਬੇ ਦੇ ਇਕ ਸਿਨੇਮਾਘਰ 'ਚ ਦਿਖਾਏ ਜਾਣ ਤੋਂ ਭੜਕੇ ਕਰਣੀ ਸੈਨਾ ਦੇ ਮੈਂਬਰਾਂ ਨੇ ਹੰਗਾਮਾ ਕੀਤਾ।ਅੰਜੜ ਦੀ ਵੀਰੇਂਦਰ ਟਾਕੀਜ ਦੇ ਸੰਚਾਲਕ ਧਰਮਿੰਦਰ ਜੈਨ ਨੇ ਅੱਜ ਦਸਿਆ ਕਿ ਸੈਟੇਲਾਈਨ ਵਲੋਂ ਇਕ ਫ਼ਿਲਮ ਦੇ ਪ੍ਰਦਰਸ਼ਨ ਦੌਰਾਨ ਵਿਚਕਾਰ ਜਿਹੇ 'ਪਦਮਾਵਤੀ' ਫ਼ਿਲਮ ਦਾ ਟ੍ਰੇਲਰ ਦਿਖਾਏ ਜਾਣ ਦੇ ਚਲਦਿਆਂ ਕਰਣੀ ਸੈਨਾ ਦੇ ਲੋਕਾਂ ਨੇ ਸਿਨੇਮਾ ਘਰ ਪਹੁੰਚ ਕੇ ਹੰਗਾਮਾ ਕੀਤਾ। ਉਨ੍ਹਾਂ ਦਸਿਆ ਕਿ ਹੰਗਾਮਾ ਕਰਨ ਵਾਲਿਆਂ 'ਚ ਆਸ-ਪਾਸ ਦੇ ਪਿੰਡਾਂ ਦੇ ਲੋਕ ਵੀ ਸ਼ਾਮਲ ਸਨ। ਉਨ੍ਹਾਂ ਦਸਿਆ ਕਿ ਪ੍ਰਦਰਸ਼ਨਕਾਰੀਆਂ ਨੇ ਇਕ ਟਿਊਬਲਾਈਟ ਵੀ ਤੋੜ ਦਿਤੀ।  ਜੈਨ ਨੇ ਦਸਿਆ ਕਿ ਉਹ ਵਿਵਸਥਾ ਕਰ ਰਹੇ ਹਨ ਕਿ ਕਿਸੇ ਵੀ ਫ਼ਿਲਮ ਦੇ ਪ੍ਰਦਰਸ਼ਨ ਦੌਰਾਨ ਆਉਣ ਵਾਲੀ ਫ਼ਿਲਮ ਪਦਮਾਵਤੀ ਦਾ ਟ੍ਰੇਲਰ ਨਾ ਦਿਖਾਇਆ ਜਾਵੇ।

ਸਥਾਨਕ ਇੰਸਪੈਕਟਰ ਆਰ.ਆਰ ਚੌਹਾਨ ਨੇ ਦਸਿਆ ਕਿ ਕਰਣੀ ਸੈਨਾ ਨੇ ਇਕ ਮਹੀਨੇ ਪਹਿਲਾਂ ਅੰਜੜ ਦੇ ਤਹਿਸੀਲਦਾਰ ਨੂੰ ਰਾਜਪਾਲ ਦੇ ਨਾਮ ਮੰਗ ਪੱਤਰ ਦੇ ਕੇ ਪਦਮਾਵਤੀ ਫ਼ਿਲਮ ਦੇ ਪ੍ਰਦਰਸ਼ਨ ਤੇ ਉਸ ਦੇ ਟ੍ਰੇਲਰ ਦੇ ਪ੍ਰਦਰਸ਼ਨ 'ਤੇ ਰੋਕ ਲਗਾਉਣ ਦੀ ਮੰਗ ਕੀਤੀ ਸੀ। ਉਨ੍ਹਾਂ ਦਸਿਆ ਕਿ ਪ੍ਰਦਰਸ਼ਨਕਾਰੀਆਂ ਨੇ ਸਿਨੇਮਾ ਘਰ 'ਚ ਹੰਗਾਮਾ ਕੀਤਾ ਪਰ ਮੌਕੇ 'ਤੇ ਪੁਲਿਸ ਦੇ ਪਹੁੰਚ ਜਾਣ 'ਤੇ ਸਥਿਤੀ 'ਤੇ ਕਾਬੂ ਪਾ ਲਿਆ ਗਿਆ।ਉਨ੍ਹਾਂ ਕਿਹਾ ਕਿ ਸਿਨੇਮਾ ਘਰ ਸੰਚਾਲਕ ਨੂੰ ਹਦਾਇਤ ਦਿਤੀ ਗਈ ਹੈ ਕਿ ਜਦੋਂ ਤਕ ਫ਼ਿਲਮ ਰਿਲੀਜ਼ ਕਰਨ ਦੀ ਆਗਿਆ ਨਹੀਂ ਮਿਲ ਜਾਂਦੀ, ਉਦੋਂ ਤਕ ਉਸ ਨਾਲ ਜੁੜੇ ਕਿਸੇ ਵੀ ਅੰਸ਼ ਦਾ ਪ੍ਰਦਰਸ਼ਨ ਨਾ ਹੋਣਾ ਸੁਨਿਸ਼ਚਿਤ ਬਣਾਉਣ। ਉਨ੍ਹਾਂ ਦਸਿਆ ਕਿ ਇਸ ਸਬੰਧੀ ਫ਼ਿਲਹਾਲ ਕੋਈ ਐਫ਼.ਆਈ.ਆਰ. ਦਰਜ ਨਹੀਂ ਕੀਤੀ ਗਈ ਹੈ।    (ਪੀਟੀਆਈ)