ਸਪੋਕਸਮੈਨ ਨੇ ਪੜਤਾਲ ਵਿਚ ਪਾਇਆ ਕਿ ਮਮਤਾ ਬੈਨਰਜੀ ਦੀ ਤਸਵੀਰ ਨੂੰ ਫਲਿੱਪ ਕੀਤਾ ਗਿਆ ਹੈ ਜਿਸ ਕਰ ਕੇ ਪਲਾਸਟਰ ਉਹਨਾਂ ਦੇ ਸੱਜੇ ਪੈਰ 'ਤੇ ਦਿਖ ਰਿਹਾ ਹੈ।
ਰੋਜ਼ਾਨਾ ਸਪੋਕਸਮੈਨ (ਮੋਹਾਲੀ ਟੀਮ) - ਪੱਛਮੀ ਬੰਗਾਲ ਦੀਆਂ ਵਿਧਾਨ ਸਭਾ ਚੋਣਾਂ ਨੂੰ ਲੈ ਕੇ ਬੰਗਾਲ ਦੇ ਨੰਦੀਗ੍ਰਾਮ ਵਿਚ 10 ਮਾਰਚ ਨੂੰ ਹੋਏ ਚੋਣ ਪ੍ਰਚਾਰ ਦੌਰਾਨ ਸੂਬੇ ਦੀ ਮੁੱਖ ਮੰਤਰੀ ਮਮਤਾ ਬੈਨਰਜੀ ਭੇਦਭਰੀ ਹਾਲਤ ਵਿਚ ਜ਼ਖ਼ਮੀ ਹੋ ਗਈ ਸੀ, ਜਿਸ ਦੌਰਾਨ ਉਹਨਾਂ ਦਾ ਇਕ ਪੈਰ ਜ਼ਖ਼ਮੀ ਹੋ ਗਿਆ ਸੀ ਅਤੇ ਉਹਨਾਂ ਨੂੰ ਹਸਪਤਾਲ ਵਿਚ ਦਾਖਲ ਕਰਵਾਇਆ ਗਿਆ ਪਰ 48 ਘੰਟਿਆਂ ਬਾਅਦ ਉਹਨਾਂ ਨੂੰ ਹਸਪਤਾਲ ਤੋਂ ਛੁੱਟੀ ਮਿਲ ਗਈ ਸੀ। ਇਸ ਤੋਂ ਬਾਅਦ ਮਮਤਾ ਬੈਨਰਜੀ ਨੂੰ ਵੀਲ੍ਹਚੇਅਰ ਦਾ ਸਹਾਰਾ ਲੈਣਾ ਪਿਆ ਅਤੇ ਉਹਨਾਂ ਨੇ ਵੀਲ੍ਹਚੇਅਰ 'ਤੇ ਹੀ ਬੈਠ ਕੇ 14 ਮਾਰਚ ਨੂੰ ਅਪਣੀ ਪਾਰਟੀ ਦੇ ਰੋਡ ਸ਼ੋਅ ਦੀ ਅਗਵਾਈ ਕੀਤੀ। ਇਸੇ ਦੇ ਚਲਦਿਆਂ ਹੁਣ ਮਮਤਾ ਬੈਨਰਜੀ ਦੀਆਂ ਜਖ਼ਮੀ ਹਾਲਤ ਵਿਚ ਦੋ ਤਸਵੀਰਾਂ ਦਾ ਕੋਲਾਜ ਵਾਇਰਲ ਹੋ ਰਿਹਾ ਹੈ। ਪਹਿਲੀ ਤਸਵੀਰ ਵਿਚ ਉਹ ਬੈੱਡ 'ਤੇ ਲੇਟੀ ਹੋਈ ਦਿਖਾਈ ਦੇ ਰਹੀ ਹੈ ਅਤੇ ਉਹਨਾਂ ਦੇ ਖੱਬੇ ਪੈਰ 'ਤੇ ਪਲਾਸਟਰ ਲੱਗਾ ਹੋਇਆ ਹੈ। ਦੂਜੀ ਤਸਵੀਰ ਵਿਚ ਉਹ ਵੀਲ੍ਹਚੇਅਰ 'ਤੇ ਬੈਠੀ ਹੋਈ ਹੈ ਪਰ ਉਹਨਾਂ ਦੇ ਸੱਜੇ ਪੈਰ 'ਤੇ ਪਲਾਸਟਰ ਲੱਗਾ ਦੇਖਿਆ ਜਾ ਸਕਦਾ ਹੈ। ਦਾਅਵਾ ਕੀਤਾ ਜਾ ਰਿਹਾ ਹੈ ਕਿ ਮਮਤਾ ਬੈਨਰਜੀ ਜਖ਼ਮੀ ਹੋਣ ਦਾ ਨਾਟਕ ਕਰ ਰਹੀ ਹੈ ਤੇ ਦੋ ਦਿਨ ਵਿਚ ਹੀ ਖੱਬੇ ਪੈਰ 'ਤੇ ਲੱਗਾ ਪਲਾਸਟਰ ਸੱਜੇ 'ਤੇ ਲੱਗ ਗਿਆ।
ਸਪੋਕਸਮੈਨ ਨੇ ਆਪਣੀ ਪੜਤਾਲ ਵਿਚ ਵਾਇਰਲ ਦਾਅਵਾ ਗਲਤ ਪਾਇਆ ਹੈ। ਮਮਤਾ ਬੈਨਰਜੀ ਦੀ ਵੀਲ੍ਹਚੇਅਰ 'ਤੇ ਬੈਠਿਆਂ ਦੀ ਤਸਵੀਰ ਨੂੰ ਫਲਿੱਪ ਕੀਤਾ ਗਿਆ ਹੈ ਜਿਸ ਕਰ ਕੇ ਪਲਾਸਟਰ ਉਹਨਾਂ ਦੇ ਸੱਜੇ ਪੈਰ 'ਤੇ ਦਿਖ ਰਿਹਾ ਹੈ।
ਵਾਇਰਲ ਪੋਸਟ
ਟਵਿੱਟਰ ਯੂਜ਼ਰ Mahesh Chawan ਨੇ 18 ਮਾਰਚ ਨੂੰ ਵਾਇਰਲ ਤਸਵੀਰਾਂ ਨੂੰ ਸ਼ੇਅਰ ਕੀਤਾ ਅਤੇ ਕੈਪਸ਼ਨ ਲਿਖਿਆ, "In two days bandage dressing changed from left to right leg, see the Bengal nautanki ! #MamataBanerjee #BengalElections2021 #BattleForBengal @AmitShah @narendramodi @JPNadda @JagratiGupta3 @AARathod10007@Samrat___ashok @AdiAfzalpurkar @gauri45 #RSS #rssಕಾರ್ಯಕರ್ತ @BYVijayendra''
ਵਾਇਰਲ ਪੋਸਟ ਦਾ ਅਰਕਾਇਵਰਡ ਲਿੰਕ
ਪੜਤਾਲ
ਪੜਤਾਲ ਸ਼ੁਰੂ ਕਰਦੇ ਹੋਏ ਅਸੀਂ ਪਹਿਲਾਂ ਪਹਿਲੀ ਤਸਵੀਰ ਨੂੰ ਗੂਗਲ ਰਿਵਰਸ ਇਮੇਜ ਕੀਤਾ। ਸਰਚ ਦੌਰਾਨ ਸਾਨੂੰ ਇਹ ਤਸਵੀਰ ਕਈ ਮੀਡੀਆ ਰਿਪੋਰਟਸ ਵਿਚ 11 ਮਾਰਚ ਨੂੰ ਅਪਲੋਡ ਕੀਤੀ ਮਿਲੀ। ਅਪਲੋਡ ਕੀਤੀ ਤਸਵੀਰ ਵਿਚ ਸਾਫ਼ ਦੇਖਿਆ ਜਾ ਸਕਦਾ ਹੈ ਕਿ ਪਲਾਸਟਰ ਮਮਤਾ ਬੈਨਰਜੀ ਦੇ ਖੱਬੇ ਪੈਰ 'ਤੇ ਲੱਗਾ ਹੋਇਆ ਹੈ।
ਇਸ ਤੋਂ ਬਾਅਦ ਅਸੀਂ ਦੂਜੀ ਤਸਵੀਰ ਨੂੰ ਰਿਵਰਸ ਇਮੇਜ ਕੀਤਾ। ਸਰਚ ਦੌਰਾਨ ਸਾਨੂੰ ਇਹ ਤਸਵੀਰ ਵੀ ਕਈ ਮੀਡੀਆ ਰਿਪੋਰਟਸ ਵਿਚ ਅਪਲੋਡ ਕੀਤੀ ਮਿਲੀ।
ਸਾਨੂੰ swarajyamag.com ਦੀ ਰਿਪੋਰਟ ਮਿਲੀ ਜਿਸ ਵਿਚ ਤਸਵੀਰ ਅਪਲੋਡ ਕੀਤੀ ਗਈ ਸੀ। ਤਸਵੀਰ ਵਿਚ ਦੇਖਿਆ ਜਾ ਸਕਦਾ ਹੈ ਕਿ ਪਲਾਸਟਰ ਮਮਤਾ ਬੈਨਰਜੀ ਦੇ ਖੱਬੇ ਪੈਰ 'ਤੇ ਹੀ ਲੱਗਾ ਹੋਇਆ ਹੈ। ਤਸਵੀਰ ਨੂੰ ਦੇਠਾਂ ਦੇਖਿਆ ਜਾ ਸਕਦਾ ਹੈ।
ਸਾਨੂੰ ਇਹ ਤਸਵੀਰ Banglar Gorbo Mamata ਦੇ ਅਧਿਕਾਰਕ ਟਵਿੱਟਰ ਹੈਂਡਲ 'ਤੇ 12 ਮਾਰਚ ਨੂੰ ਅਪਲੋਡ ਕੀਤੀ ਮਿਲੀ।
ਮਤਲਬ ਸਾਫ਼ ਹੈ ਕਿ ਮਮਤਾ ਬੈਨਰਜੀ ਦੇ ਖੱਬੇ ਪੈਰ 'ਤੇ ਹੀ ਪਲਾਸਟਰ ਲੱਗਾ ਹੋਇਆ ਹੈ। ਤਸਵੀਰ ਨੂੰ ਫਲਿੱਪ ਕੀਤਾ ਗਿਆ ਹੈ ਇਸ ਲਈ ਪਲਾਸਟਰ ਸੱਜੇ ਪੈਰ 'ਤੇ ਲੱਗਾ ਦਿਖਾਈ ਦੇ ਰਿਹਾ ਹੈ।
ਵਾਇਰਲ ਤਸਵੀਰ ਤੇ ਅਸਲ ਤਸਵੀਰ ਨੂੰ ਹੇਠਾਂ ਦੇਖਿਆ ਜਾ ਸਕਦਾ ਹੈ।
ਇਸ ਦੇ ਨਾਲ ਹੀ ਮਮਤਾ ਬੈਨਰਜੀ ਵੱਲੋਂ ਵੀਲ੍ਹਚੇਅਰ 'ਤੇ ਕੱਢੀ ਗਈ ਚੁਣਾਵੀ ਰੈਲੀ ਦਾ ਵੀਡੀਓ ਵੀ ਹੇਠਾਂ ਦੇਖਿਆ ਜਾ ਸਕਦਾ ਹੈ। ਵੀਡੀਓ ਵਿਚ ਵੀ ਸਾਫ਼ ਦੇਖਿਆ ਜਾ ਸਕਦਾ ਹੈ ਕਿ ਪਲਾਸਟਰ ਉਹਨਾਂ ਦੇ ਖੱਬੇ ਪੈਰ 'ਤੇ ਹੀ ਹੈ।
ਦੱਸ ਦਈਏ ਕਿ ਇਸ ਤੋਂ ਪਹਿਲਾਂ ਵੀ ਮਮਤਾ ਬੈਨਰਜੀ ਦੇ ਜਖ਼ਮੀ ਹੋਣ ਨੂੰ ਲੈ ਕੇ ਦਾਅਵਾ ਵਾਇਰਲ ਹੋ ਚੁੱਕਾ ਹੈ ਕਿ ਮਮਤਾ ਬੈਨਰਜੀ ਜਖ਼ਮੀ ਹੋਣ ਦਾ ਨਾਟਕ ਕਰ ਰਹੀ ਹੈ ਅਤੇ ਬਿਨ੍ਹਾ ਕਿਸੇ ਸਹਾਰੇ ਦੇ ਵੀਲ੍ਹਚੇਅਰ ਤੋਂ ਉੱਠ ਕੇ ਚੱਲਣ ਲੱਗ ਪਈ ਹੈ। ਇਸ ਦਾਅਵੇ ਨੂੰ ਲੈ ਸਪੋਕਸਮੈਨ ਨੇ ਫੈਕਟ ਚੈੱਕ ਵੀ ਕੀਤਾ ਸੀ ਜਿਸ ਨੂੰ ਇੱਥੇ ਕਲਿੱਕ ਕਰ ਕੇ ਪੜ੍ਹਿਆ ਜਾ ਸਕਦਾ ਹੈ।
ਨਤੀਜਾ - ਸਪੋਕਸਮੈਨ ਨੇ ਆਪਣੀ ਪੜਤਾਲ ਵਿਚ ਵਾਇਰਲ ਦਾਅਵੇ ਨੂੰ ਫਰਜ਼ੀ ਪਾਇਆ ਹੈ। ਵਾਇਰਲ ਤਸਵੀਰ ਨੂੰ ਫਲਿੱਪ ਕੀਤਾ ਗਿਆ ਹੈ ਜਿਸ ਕਰ ਕੇ ਪਲਾਸਟਰ ਉਹਨਾਂ ਦੇ ਸੱਜੇ ਪੈਰ 'ਤੇ ਦਿਖ ਰਿਹਾ ਹੈ।
Claim: ਮਮਤਾ ਬੈਨਰਜੀ ਜਖ਼ਮੀ ਹੋਣ ਦਾ ਕਰ ਰਹੀ ਹੈ ਨਾਟਕ
Claimed By: Mahesh Chawan
Fact Check: ਫਰਜ਼ੀ
