ਕਰੀਬ ਢਾਈ ਏਕੜ ਜ਼ਮੀਨ ਲਈ ਪਿਛਲੇ 4 ਸਾਲ ਤੋਂ ਲਗਾ ਰਿਹਾ ਹੈ ਸਰਕਾਰੀ ਦਫ਼ਤਰਾਂ ਦੇ ਚੱਕਰ
ਕਿਹਾ - ਕਬਜ਼ਾ ਨਾ ਮਿਲਿਆ ਤਾਂ ਇਸ ਤਰ੍ਹਾਂ ਹੀ ਜਾਰੀ ਰੱਖਾਂਗਾ ਪ੍ਰਦਰਸ਼ਨ
ਔਰੰਗਾਬਾਦ : ਮਹਾਰਾਸ਼ਟਰ ਤੋਂ ਵਿਰੋਧ ਦੀ ਇੱਕ ਅਜੀਬ ਘਟਨਾ ਸਾਹਮਣੇ ਆ ਰਹੀ ਹੈ। ਔਰੰਗਾਬਾਦ ਡਿਵੀਜ਼ਨ ਦੇ ਜਾਲਨਾ ਜ਼ਿਲ੍ਹੇ ਦੀ ਮੰਥਾ ਤਹਿਸੀਲ ਦੇ ਹੇਲਸ ਪਿੰਡ ਦੇ ਇੱਕ ਕਿਸਾਨ, ਜੋ ਕਰਮਵੀਰ ਦਾਦਾ ਸਾਹਿਬ ਗਾਇਕਵਾੜ ਸਬਲੀਕਰਨ ਸਵਾਭਿਮਾਨ ਯੋਜਨਾ ਤੋਂ ਐਕੁਆਇਰ ਕੀਤੀ ਜ਼ਮੀਨ ਦਾ ਕਬਜ਼ਾ ਸੌਂਪਣ ਦੀ ਮੰਗ ਕਰ ਰਿਹਾ ਸੀ, ਨੇ ਖੁਦ ਨੂੰ ਜ਼ਮੀਨ ਵਿੱਚ ਦੱਬ ਲਿਆ। ਇਸ ਘਟਨਾ ਤੋਂ ਬਾਅਦ ਉਹ ਇਲਾਕੇ ਵਿੱਚ ਚਰਚਾ ਦਾ ਵਿਸ਼ਾ ਬਣ ਗਿਆ ਹੈ।
ਕਿਸਾਨ ਸੁਨੀਲ ਜਾਧਵ ਦੀ ਮਾਂ ਅਤੇ ਉਸ ਦੀ ਮਾਸੀ ਨੂੰ ਕਰਮਵੀਰ ਦਾਦਾ ਸਾਹਿਬ ਗਾਇਕਵਾੜ ਸਬਲੀਕਰਨ ਸਵਾਭਿਮਾਨ ਯੋਜਨਾ ਦੇ ਤਹਿਤ 1 ਹੈਕਟੇਅਰ 35 ਆਰ ( 2.4711 ਏਕੜ) ਜ਼ਮੀਨ ਮਿਲੀ ਸੀ। ਇਸ ਜ਼ਮੀਨ ਨੂੰ ਹਾਸਲ ਕਰਨ ਲਈ ਉਸ ਨੇ ਵਿਰੋਧ ਦਾ ਅਨੋਖਾ ਤਰੀਕਾ ਅਪਣਾਇਆ। ਦਰਅਸਲ ਸੁਨੀਲ ਜਾਧਵ ਸਰਕਾਰੀ ਦਫਤਰਾਂ ਦੇ ਚੱਕਰ ਲਗਾ ਕੇ ਥੱਕ ਗਏ ਸਨ। ਇਸ ਤੋਂ ਦੁਖੀ ਹੋ ਕੇ ਉਸ ਨੇ ਆਪਣੇ ਆਪ ਨੂੰ ਜ਼ਮੀਨ ਵਿੱਚ ਦੱਬ ਲਿਆ।
ਇਹ ਹੈ ਪੂਰਾ ਮਾਮਲਾ..
ਸੁਨੀਲ ਜਾਧਵ ਨੇ ਦੱਸਿਆ ਕਿ ਉਸ ਦੀ ਮਾਂ ਕੌਸ਼ੱਲਿਆਬਾਈ ਪਾਂਡੁਰੰਗ ਜਾਧਵ ਅਤੇ ਮਾਸੀ ਨੰਦਾਬਾਈ ਕਿਸ਼ਨ ਸਦਾਵਰਤੇ ਨੇ ਕਰਮਵੀਰ ਦਾਦਾ ਸਾਹਿਬ ਗਾਇਕਵਾੜ ਸਬਲੀਕਰਨ ਸਵਾਭਿਮਾਨ ਯੋਜਨਾ ਤਹਿਤ ਸਾਲ 2019 ਵਿੱਚ 1 ਹੈਕਟੇਅਰ 35 ਆਰ ਜ਼ਮੀਨ ਪ੍ਰਾਪਤ ਕੀਤੀ ਸੀ। ਪਿਛਲੇ 4 ਸਾਲਾਂ ਤੋਂ ਕਿਸਾਨ ਸੁਨੀਲ ਜਾਧਵ ਜ਼ਮੀਨ ਦਾ ਕਬਜ਼ਾ ਲੈਣ ਲਈ ਤਹਿਸੀਲ ਅਤੇ ਸਬੰਧਤ ਸਰਕਾਰੀ ਦਫ਼ਤਰ ਦੇ ਗੇੜੇ ਮਾਰ ਰਿਹਾ ਹੈ।
ਹਾਲਾਂਕਿ ਇਸ ਤੋਂ ਬਾਅਦ ਵੀ ਉਸ ਨੂੰ ਇਨਸਾਫ਼ ਨਹੀਂ ਮਿਲ ਸਕਿਆ। ਇਸ ਤੋਂ ਤੰਗ ਆ ਕੇ ਕਿਸਾਨ ਸੁਨੀਲ ਜਾਧਵ ਨੇ ਖੁਦ ਨੂੰ ਜ਼ਮੀਨ 'ਚ ਦੱਬ ਲਿਆ। ਉਨ੍ਹਾਂ ਪ੍ਰਸ਼ਾਸਨ ਨੂੰ ਚਿਤਾਵਨੀ ਦਿੱਤੀ ਕਿ ਜਦੋਂ ਤੱਕ ਉਨ੍ਹਾਂ ਨੂੰ ਕਰਮਵੀਰ ਦਾਦਾ ਸਾਹਿਬ ਗਾਇਕਵਾੜ ਸਬਲੀਕਰਨ ਸਵਾਭਿਮਾਨ ਯੋਜਨਾ ਤਹਿਤ ਦਿੱਤੀ ਜ਼ਮੀਨ ਦਾ ਕਬਜ਼ਾ ਨਹੀਂ ਮਿਲ ਜਾਂਦਾ, ਉਦੋਂ ਤੱਕ ਉਹ ਜ਼ਮੀਨ ਵਿੱਚ ਹੀ ਦੱਬੇ ਰਹਿਣਗੇ।
