ਵਾਸ਼ਿੰਗਟਨ, 3 ਜਨਵਰੀ : ਇਸ ਮਹੀਨੇ ਦੀ 31 ਤਰੀਕ ਨੂੰ ਦੁਰਲੱਭ ਪੂਰਾ ਚੰਨ ਗ੍ਰਹਿਣ ਹੋਵੇਗਾ ਜਿਸ ਵਿਚ ਮਹੀਨੇ ਵਿਚ ਦੂਜੀ ਵਾਰ ਪੁੰਨਿਆਂ ਹੋਵੇਗੀ। 'ਬਲੂ ਮੂਨ' ਯਾਨੀ 'ਨੀਲਾ ਚੰਨ' ਅਖਵਾਉਣ ਵਾਲਾ ਇਹ ਨਜ਼ਾਰਾ 150 ਸਾਲ ਤੋਂ ਜ਼ਿਆਦਾ ਸਮੇਂ ਬਾਅਦ ਨਜ਼ਰ ਪਵੇਗਾ। ਇਹ 2018 ਦਾ ਪਹਿਲਾ ਗ੍ਰਹਿਣ ਹੋਵੇਗਾ। ਭਾਰਤੀ ਉਪ-ਮਹਾਂਦੀਪ, ਪਛਮੀ ਏਸ਼ੀਆ ਅਤੇ ਪੂਰਬੀ ਯੂਰਪ ਵਿਚ ਚੰਨ ਦੇ ਉਦੇ ਦੌਰਾਨ ਪਹਿਲਾਂ ਹੀ ਗ੍ਰਹਿਣ ਲੱਗਾ ਹੋਵੇਗਾ। ਉਸ ਸਮੇਂ ਪ੍ਰਸ਼ਾਂਤ ਮਹਾਂਸਾਗਰ ਚੰਨ ਦੀ ਸੇਧ ਵਿਚ ਹੋਵੇਗਾ ਅਤੇ
ਗ੍ਰਹਿਣ ਅੱਧੀ ਰਾਤ ਨੂੰ ਲੱਗੇਗਾ। ਮੱਧ ਅਤੇ ਪੂਰਬੀ ਏਸ਼ੀਆ, ਇੰਡੋਨੇਸ਼ੀਆ, ਨਿਊਜ਼ੀਲੈਂਡ ਅਤੇ ਆਸਟਰੇਲੀਆ ਦੇ ਬਹੁਤੇ ਹਿੱਸਿਆਂ ਵਿਚ ਸ਼ਾਮ ਨੂੰ ਆਸਮਾਨ ਵਿਚ ਚੰਨ ਗ੍ਰਹਿਣ ਦਾ ਨਜ਼ਾਰਾ ਸਾਫ਼-ਸਾਫ਼ ਦਿਸੇਗਾ। ਪੂਰਾ ਚੰਨ ਗ੍ਰਹਿਣ 77 ਮਿੰਟ ਤਕ ਰਹੇਗਾ। ਅਮਰੀਕਾ ਦੇ ਅਲਾਸਕਾ ਅਤੇ ਹਵਾਈ ਅਤੇ ਕੈਨੇਡਾ ਦਾ ਉਤਰ-ਪਛਮੀ ਹਿੱਸੇ ਵਿਚ ਗ੍ਰਹਿਣ ਸ਼ੁਰੂ ਤੋਂ ਅੰਤ ਤਕ ਦਿਸੇਗਾ। ਇਸ ਸਾਲ ਮਗਰੋਂ ਅਗਲੀ ਵਾਰ ਨੀਲਾ ਚੰਨ 31 ਦਸੰਬਰ, 2028 ਨੂੰ ਫਿਰ 31 ਜਨਵਰੀ, 2037 ਨੂੰ ਦਿਸੇਗਾ। ਦੋਵੇਂ ਵਾਰ ਪੂਰਾ ਚੰਨ ਗ੍ਰਹਿਣ ਹੋਵੇਗਾ। (ਏਜੰਸੀ)
