ਸਰਕਾਰ ਕਈ ਉਤਪਾਦਾਂ 'ਤੇ ਉੱਚਾ ਟੈਕਸ ਲਗਾਉਣ ਦਾ ਨੋਟਿਸ ਜਾਰੀ ਕਰੇਗੀ
ਨਵੀਂ ਦਿੱਲੀ : ਸਰਕਾਰ ਨੇ ਬਾਦਾਮ, ਅਖ਼ਰੋਟ ਅਤੇ ਦਾਲਾਂ ਸਮੇਤ 29 ਅਮਰੀਕੀ ਉਤਪਾਦਾਂ 'ਤੇ ਜਵਾਬੀ ਦਰਾਮਦ ਟੈਕਸ ਲਗਾਉਣ ਦੇ ਫ਼ੈਸਲੇ 'ਤੇ ਅੱਗੇ ਵੱਧਣ ਦਾ ਫ਼ੈਸਲਾ ਕੀਤਾ ਹੈ। ਇਸ ਤੋਂ ਪਹਿਲਾਂ ਸਰਕਾਰ ਇਸ ਨੂੰ ਲਾਗੂ ਕਰਨ ਦੀ ਸਮਾਂ ਹੱਦ ਕਈ ਵਾਰ ਵਧਾ ਚੁੱਕੀ ਹੈ। ਸੂਤਰਾਂ ਨੇ ਸ਼ੁਕਰਵਾਰ ਦਸਿਆ ਕਿ ਵਿੱਤ ਮੰਤਰਾਲਾ ਬਹੁਤ ਜਲਦੀ ਇਸ ਬਾਰੇ ਨੋਟੀਫ਼ੀਕੇਸ਼ਨ ਜਾਰੀ ਕਰੇਗਾ।
ਪਿਛਲੇ ਸਾਲ ਮਈ ਵਿਚ ਮੰਤਰਾਲਾ ਨੇ ਇਨ੍ਹਾਂ ਅਮਰੀਕੀ ਵਸਤੂਆਂ 'ਤੇ ਉੱਚਾ ਟੈਕਸ ਲਗਾਉਣ ਦੀ ਸਮਾਂ ਹੱਦ ਵਧਾ ਕੇ 16 ਜੂਨ ਕਰ ਦਿਤੀ ਸੀ। ਜੂਨ 2018 ਤੋਂ ਬਾਅਦ ਇਸ ਸਮਾਂ ਹੱਦ ਨੂੰ ਕਈ ਵਾਰ ਅੱਗੇ ਖਿਸਕਾਇਆ ਜਾ ਚੁੱਕਾ ਹੈ। ਭਾਤਰ ਨੇ ਜਵਾਬੀ ਕਾਰਵਾਈ ਕਰਦੇ ਹੋਏ ਅਮਰੀਕੀ ਉਤਪਾਦਾਂ 'ਤੇ ਟੈਕਸ ਵਧਾਉਣ ਦਾ ਫ਼ੈਸਲਾ ਕੀਤਾ ਹੈ। ਅਮਰੀਕਾ ਨੇ ਭਾਰਤ ਤੋਂ ਦਰਾਮਦ ਕੀਤੇ ਜਾਣ ਵਾਲੇ ਕੁਝ ਇਸਪਾਤ ਅਤੇ ਅਲੂਮੀਨੀਅਮ ਉਤਪਾਦਾਂ 'ਤੇ ਟੈਕਸ ਵਧਾ ਦਿਤਾ ਸੀ।
ਸਰਕਾਰ ਕਈ ਉਤਪਾਦਾਂ 'ਤੇ ਉੱਚਾ ਟੈਕਸ ਲਗਾਉਣ ਦਾ ਨੋਟਿਸ ਜਾਰੀ ਕਰੇਗੀ। ਇਸ ਵਿਚ ਅਖ਼ਰੋਟ 'ਤੇ ਦਰਾਮਦ ਟੈਕਸ 30 ਤੋਂ ਵਧਾ ਕੇ 120 ਫ਼ੀ ਸਦੀ ਕੀਤਾ ਜਾਣਾ ਹੈ। ਇਸੇ ਤਰ੍ਹਾਂ ਕਾਬੁਲੀ ਛੋਲੇ, ਛੋਲੇ ਅਤੇ ਮਸਰ ਦਾਲ 'ਤੇ ਟੈਕਸ 70 ਫ਼ੀ ਸਦੀ ਕੀਤਾ ਜਾਣਾ ਹੈ ਜੋ ਹਾਲੇ 30 ਫ਼ੀ ਸਦੀ ਹੈ। ਹੋਰ ਦਾਲਾਂ 'ਤੇ ਟੈਕਸ ਨੂੰ 40 ਫ਼ੀ ਸਦੀ ਕੀਤਾ ਜਾਣਾ ਹੈ। ਵਿੱਤੀ ਸਾਲ 2017-18 ਵਿਚ ਭਾਰਤ ਦਾ ਅਮਰੀਕਾ ਨੂੰ ਦਰਾਮਦ 47.9 ਅਰਬ ਡਾਲਰ ਸੀ ਜਦੋਂਕਿ ਆਯਾਤ 26.7 ਅਰਬ ਡਾਲਰ ਦਾ ਹੋਇਆ ਸੀ। ਇਸ ਤਰ੍ਹਾਂ ਵਪਾਰਕ ਸੰਤੁਲਨ ਭਾਰਤ ਦੇ ਹੱਕ ਵਿਚ ਰਿਹਾ ਸੀ।