ਪਿਆਜ਼ 40 ਫ਼ੀ ਸਦੀ ਅਤੇ ਟਮਾਟਰ 31 ਫ਼ੀ ਸਦੀ ਮਹਿੰਗਾ ਹੋਇਆ ਹੈ।
Heatwave Affect Inflation: ਉੱਤਰੀ ਅਤੇ ਮੱਧ ਭਾਰਤ ਦੇ ਕੁੱਝ ਹਿੱਸਿਆਂ ਵਿਚ ਗਰਮੀ ਦੇ ਕਹਿਰ ਕਾਰਨ ਸਬਜ਼ੀਆਂ ਅਤੇ ਦਾਲਾਂ ਦੀ ਮੌਜੂਦਾ ਮਹਿੰਗਾਈ ਅਗਲੇ ਮਹੀਨੇ ਵੀ ਜਾਰੀ ਰਹਿਣ ਦੀ ਸੰਭਾਵਨਾ ਹੈ। ਖਾਸ ਕਰਕੇ ਆਲੂ, ਟਮਾਟਰ ਅਤੇ ਪਿਆਜ਼ ਦੀਆਂ ਕੀਮਤਾਂ ਵਧਣ ਕਾਰਨ ਘਰੇਲੂ ਖਾਣ-ਪੀਣ ਦੇ ਖਰਚੇ ਵਧ ਗਏ ਹਨ। ਅਪ੍ਰੈਲ 'ਚ ਸਬਜ਼ੀਆਂ ਦੀਆਂ ਕੀਮਤਾਂ ਪਿਛਲੇ ਸਾਲ ਨਾਲੋਂ ਔਸਤਨ 27.8 ਫ਼ੀ ਸਦੀ ਵੱਧ ਸਨ।
ਪਿਛਲੇ ਮਹੀਨੇ ਆਲੂ ਦੀ ਪ੍ਰਚੂਨ ਕੀਮਤ ਸਾਲਾਨਾ ਆਧਾਰ 'ਤੇ 53 ਫ਼ੀ ਸਦੀ ਵਧੀ ਹੈ। ਪ੍ਰਚੂਨ ਮਹਿੰਗਾਈ ਦੀ ਗਣਨਾ ਕਰਨ ਵਾਲੇ ਖਪਤਕਾਰ ਮੁੱਲ ਸੂਚਕ ਅੰਕ (ਸੀਪੀਆਈ) ਵਿਚ ਸਬਜ਼ੀਆਂ ਦਾ ਭਾਰ ਲਗਭਗ 7.46% ਹੈ। ਸਬਜ਼ੀਆਂ, ਦਾਲਾਂ ਅਤੇ ਅਨਾਜ ਦੀਆਂ ਵਧਦੀਆਂ ਕੀਮਤਾਂ ਕਾਰਨ ਖੁਰਾਕ ਮਹਿੰਗਾਈ ਮਾਰਚ ਵਿਚ 8.52% ਤੋਂ ਵਧ ਕੇ ਅਪ੍ਰੈਲ 2024 ਵਿਚ 8.7% ਹੋ ਗਈ। ਖਪਤਕਾਰ ਮਾਮਲਿਆਂ ਦੇ ਮੰਤਰਾਲੇ ਦੇ ਅੰਕੜਿਆਂ ਮੁਤਾਬਕ ਮਈ 'ਚ ਆਲੂ ਪਿਛਲੇ ਸਾਲ ਦੇ ਮੁਕਾਬਲੇ 42 ਫ਼ੀ ਸਦੀ ਮਹਿੰਗੇ ਹੋ ਰਹੇ ਹਨ।
ਪਿਆਜ਼ 40 ਫ਼ੀ ਸਦੀ ਅਤੇ ਟਮਾਟਰ 31 ਫ਼ੀ ਸਦੀ ਮਹਿੰਗਾ ਹੋਇਆ ਹੈ। ਦੇਸ਼ 'ਚ ਮੁੱਖ ਤੌਰ 'ਤੇ ਖਾਧੀ ਜਾਣ ਵਾਲੀ ਤੁਅਰ ਅਤੇ ਮੂੰਗੀ ਦੀ ਦਾਲ ਦੀਆਂ ਕੀਮਤਾਂ 'ਚ ਵੀ ਪਿਛਲੇ ਸਾਲ ਮਈ ਦੇ ਮੁਕਾਬਲੇ ਇਸ ਸਾਲ ਕ੍ਰਮਵਾਰ 30 ਫ਼ੀ ਸਦੀ ਅਤੇ 9 ਫ਼ੀ ਸਦੀ ਦਾ ਵਾਧਾ ਹੋਇਆ ਹੈ। ਆਰਬੀਆਈ ਗਵਰਨਰ ਨੇ ਇਹ ਵੀ ਕਿਹਾ ਕਿ ਗਰਮੀਆਂ ਕਾਰਨ ਸਬਜ਼ੀਆਂ ਦੀਆਂ ਕੀਮਤਾਂ ਵਧ ਸਕਦੀਆਂ ਹਨ ਅਤੇ ਮਹਿੰਗਾਈ ਦੇ ਅੰਕੜਿਆਂ ਨੂੰ ਪ੍ਰਭਾਵਿਤ ਕਰ ਸਕਦੀਆਂ ਹਨ। ਆਰਬੀਆਈ ਨੇ ਅਪ੍ਰੈਲ-ਜੂਨ ਤਿਮਾਹੀ ਲਈ ਮਹਿੰਗਾਈ ਦਰ 4.99% ਅਤੇ ਸਤੰਬਰ ਤਿਮਾਹੀ ਲਈ 3.8% ਰਹਿਣ ਦਾ ਅਨੁਮਾਨ ਲਗਾਇਆ ਹੈ।
ਉਧਰ ਰੇਟਿੰਗ ਏਜੰਸੀ ਏਕਰਾ ਦੀ ਮੁੱਖ ਅਰਥ ਸ਼ਾਸਤਰੀ ਅਦਿਤੀ ਨਾਇਰ ਦੇ ਅਨੁਸਾਰ ਮਈ-ਜੂਨ ਵਿਚ ਵੀ ਖੁਰਾਕੀ ਮਹਿੰਗਾਈ ਚਿੰਤਾ ਦਾ ਵਿਸ਼ਾ ਰਹੇਗੀ, ਕਿਉਂਕਿ ਗਰਮੀ ਦੀ ਲਹਿਰ ਕਾਰਨ ਜਲਦੀ ਖ਼ਰਾਬ ਹੋਣ ਵਾਲੀਆਂ ਵਸਤੂਆਂ ਦੀਆਂ ਕੀਮਤਾਂ ਵਧਣ ਦੀ ਸੰਭਾਵਨਾ ਹੈ। ਨਾਇਰ ਨੇ ਕਿਹਾ ਕਿ ਜੁਲਾਈ-ਅਗਸਤ 'ਚ ਮਹਿੰਗਾਈ 'ਚ ਕੁੱਝ ਕਮੀ ਦੇਖਣ ਨੂੰ ਮਿਲ ਸਕਦੀ ਹੈ।
(For more Punjabi news apart from Vegetable Price Increases due to heat wave, stay tuned to Rozana Spokesman)
