'ਜੈ ਸ੍ਰੀ ਰਾਮ, ਵੰਦੇ ਮਾਤਰਮ' ਦੇ ਨਾਹਰੇ ਲਾਏ
ਨਵੀਂ ਦਿੱਲੀ : ਸ਼ਾਹੀਨ ਬਾਗ਼ ਵਿਖੇ ਚੱਲ ਰਹੇ ਧਰਨੇ ਤੋਂ ਪ੍ਰੇਸ਼ਾਨ ਸਥਾਨਕ ਲੋਕ ਵੀ ਲਾਮਬੰਦ ਹੋਣੇ ਸ਼ੁਰੂ ਹੋ ਗਏ ਹਨ। ਨੋਇਡਾ ਨੂੰ ਕਾਲਿੰਦੀ ਕੁੰਜ ਨਾਲ ਜੋੜਨ ਵਾਲੀ ਸੜਕ ਤੋਂ ਬੈਰੀਕੇਡ ਹਟਾਉਣ ਦੀ ਮੰਗ ਸਬੰਧੀ ਦਿੱਲੀ ਦੇ ਸ਼ਾਹੀਨਬਾਗ਼ ਵਿਚ ਨਾਗਰਿਕਤਾ ਵਿਰੋਧੀ ਧਰਨਾ ਸਥਾਨ ਲਾਗੇ ਐਤਵਾਰ ਨੂੰ ਸਥਾਨਕ ਲੋਕਾਂ ਵਲੋਂ ਪ੍ਰਦਰਸ਼ਨ ਕੀਤਾ ਗਿਆ। ਪੁਲਿਸ ਨੇ ਦਸਿਆ ਕਿ ਪ੍ਰਦਰਸ਼ਨਕਾਰੀਆਂ ਨੇ ਮੰਗ ਕੀਤੀ ਕਿ ਸੋਧੇ ਹੋਏ ਨਾਗਰਿਕਤਾ ਕਾਨੂੰਨ ਵਿਰੁਧ ਇਕ ਮਹੀਨੇ ਤੋਂ ਜ਼ਿਆਦਾ ਸਮੇਂ ਤੋਂ ਧਰਨੇ 'ਤੇ ਬੈਠੇ ਲੋਕਾਂ ਨੂੰ ਥਾਂ ਖ਼ਾਲੀ ਕਰ ਦੇਣੀ ਚਾਹੀਦੀ ਹੈ ਕਿਉਂÎਕਿ ਯਾਤਰੀਆਂ ਨੂੰ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ।
Photo
ਪੁਲਿਸ ਅਧਿਕਾਰੀ ਦੇਵੇਸ਼ ਸ੍ਰੀਵਾਸਤਵ ਅਤੇ ਚਿਨਮਯ ਬਿਸਵਾਲ ਇਹ ਯਕੀਨੀ ਕਰਨ ਲਈ ਮੌਕੇ 'ਤੇ ਮੌਜੂਦ ਸਨ ਕਿ ਕੋਈ ਅਣਸੁਖਾਵੀਂ ਘਟਨਾ ਨਾ ਵਾਪਰੇ। ਇਨ੍ਹਾਂ ਪ੍ਰਦਰਸ਼ਨਕਾਰੀਆਂ ਵਿਚ ਔਰਤਾਂ ਵੀ ਸ਼ਾਮਲ ਸਨ। ਲੋਕਾਂ ਨੇ ਮੌਕੇ 'ਤੇ ਜ਼ੋਰਦਾਰ ਨਾਹਰੇਬਾਜ਼ੀ ਕੀਤੀ ਅਤੇ 'ਜੈ ਸ੍ਰੀ ਰਾਮ, ਵੰਦੇ ਮਾਤਰਮ ਤੇ ਖ਼ਾਲੀ ਕਰਾਉ ਸ਼ਾਹੀਨ ਬਾਗ਼ ਜਿਹੇ ਨਾਹਰੇ ਲਾਏ।
Photo
ਜਸੋਲਾ ਦੀ ਰਹਿਣ ਵਾਲੀ ਰੇਖਾ ਦੇਵੀ ਨੇ ਕਿਹਾ, 'ਅਸੀਂ ਚਾਹੁੰਦੇ ਹਾਂ ਕਿ ਸੜਕ ਖ਼ਾਲੀ ਹੋਵੇ। ਉਹ ਪਿਛਲੇ 50 ਦਿਨਾਂ ਤੋਂ ਧਰਨੇ 'ਤੇ ਬੈਠੇ ਹਨ ਜਿਸ ਕਾਰਨ ਲੋਕਾਂ ਨੂੰ ਮੁਸ਼ਕਲ ਹੋ ਰਹੀ ਹੈ। ਸਾਡੇ ਬੱਚੇ ਸਕੂਲ ਜਾਣ ਦੀ ਹਾਲਤ ਵਿਚ ਨਹੀਂ ਹਨ ਕਿਉਂਕਿ ਸੜਕਾਂ ਬੰਦ ਹਨ। ਪੁਲਿਸ ਨੇ ਦਸਿਆ ਕਿ ਲਗਭਗ 52 ਜਣਿਆਂ ਨੂੰ ਹਿਰਾਸਤ ਵਿਚ ਲੈ ਲਿਆ ਗਿਆ ਹੈ ਅਤੇ ਉਨ੍ਹਾਂ ਨੂੰ ਛੇਤੀ ਹੀ ਰਿਹਾਅ ਕਰ ਦਿਤਾ ਜਾਵੇਗਾ।
Photo
ਦੀਪਕ ਪਟੇਲ ਨੇ ਕਿਹਾ ਕਿ ਕਿਸੇ ਤਰ੍ਹਾਂ ਇਲਾਕੇ ਨੂੰ ਪਾਰ ਕਰ ਕੇ ਕੰਮ 'ਤੇ ਜਾਣ ਵਿਚ ਉਹ ਸਫ਼ਲ ਰਹੇ ਹਨ। ਪਟੇਲ ਨੇ ਦਸਿਆ, 'ਭਾਰੀ ਰੋਕਾਂ ਕਾਰਨ ਪੁਲਿਸ ਸਾਨੂੰ ਧਰਨੇ ਵਾਲੀ ਥਾਂ 'ਤੇ ਜਾਣ ਦੀ ਇਜਾਜ਼ਤ ਨਹੀਂ ਦਿੰਦੀ ਜਿਥੇ ਇਕ ਮਹੀਨੇ ਤੋਂ ਵੱਧ ਸਮੇਂ ਤੋਂ ਔਰਤਾਂ ਧਰਨਾ ਦੇ ਰਹੀਆਂ ਹਨ। ਮੈਂ ਕਿਸੇ ਤਰ੍ਹਾਂ ਇਸ ਇਲਾਕੇ ਨੂੰ ਪਾਰ ਕਰ ਕੇ ਕੰਮ 'ਤੇ ਜਾਣ ਵਿਚ ਸਫ਼ਲ ਹੋਇਆ ਹਾਂ ਪਰ ਕਲ ਤੋਂ ਸਖ਼ਤ ਜਾਂਚ ਜਾਰੀ ਹੈ ਅਤੇ ਸਾਨੂੰ ਪਛਾਣ ਪੱਤਰ ਵਿਖਾ ਕੇ ਹੀ ਉਸ ਖੇਤਰ ਵਿਚੋਂ ਜਾਣ ਦੀ ਇਜਾਜ਼ਤ ਦਿਤੀ ਜਾ ਰਹੀ ਹੈ।'
Photo
ਸ਼ਾਹੀਨਬਾਗ਼ ਵਿਚ ਸਨਿਚਰਵਾਰ ਨੂੰ 25 ਸਾਲ ਦੇ ਨੌਜਵਾਨ ਨੇ ਹਵਾ ਵਿਚ ਦੋ ਗੋਲੀਆਂ ਚਲਾਈਆਂ ਸਨ ਜਿਸ ਮਗਰੋਂ ਉਸ ਨੂੰ ਹਿਰਾਸਤ ਵਿਚ ਲੈ ਲਿਆ ਗਿਆ। ਪ੍ਰਦਰਸ਼ਨਕਾਰੀ ਰੇਖਾ ਖੰਨਾ ਨੇ ਕਿਹਾ ਕਿ ਉਹ ਚਾਹੁੰਦੀ ਹੈ ਕਿ ਛੇਤੀ ਸੜਕ ਖ਼ਾਲੀ ਕਰਾਈ ਜਾਵੇ। ਉਸ ਨੇ ਕਿਹਾ, 'ਹੁਣ 50 ਦਿਨ ਹੋ ਗਏ ਹਨ। ਮੇਰੇ ਪਤੀ ਨੋਇਡਾ ਵਿਚ ਕੰਮ ਕਰਦੇ ਹਨ ਅਤੇ ਸਾਡੇ ਬੱਚੇ ਇਸੇ ਰਾਹ ਤੋਂ ਸਕੂਲ ਜਾਂਦੇ ਹਨ। ਮੈਂ ਸਿਰਫ਼ ਇਕ ਦਿਨ ਦਾ ਵਿਰੋਧ ਪ੍ਰਦਰਸ਼ਨ ਕਰਨ ਆਈ ਹਾਂ ਅਤੇ ਸਾਨੂੰ ਇਥੋਂ ਚਲੇ ਜਾਣ ਲਈ ਕਿਹਾ ਜਾ ਰਿਹਾ ਹੈ।'
