ਆਰਐਸਐਸ ਦੇ ਨਾਗਪੁਰ ਵਿਚ ਹੋਣ ਵਾਲੇ ਸਮਾਗਮ ਵਿਚ ਜਾਣ ਨੂੰ ਲੈ ਕੇ ਸਾਬਕਾ ਰਾਸ਼ਟਰਪਤੀ ਪ੍ਰਣਬ ਮੁਖ਼ਰਜੀ ਨੇ ਚੁੱਪੀ ਤੋੜ ਦਿਤੀ.......
ਕੋਲਕੱਤਾ : ਆਰਐਸਐਸ ਦੇ ਨਾਗਪੁਰ ਵਿਚ ਹੋਣ ਵਾਲੇ ਸਮਾਗਮ ਵਿਚ ਜਾਣ ਨੂੰ ਲੈ ਕੇ ਸਾਬਕਾ ਰਾਸ਼ਟਰਪਤੀ ਪ੍ਰਣਬ ਮੁਖ਼ਰਜੀ ਨੇ ਚੁੱਪੀ ਤੋੜ ਦਿਤੀ ਹੈ। ਸਾਬਕਾ ਰਾਸ਼ਟਰਪਤੀ ਨੇ ਕਿਹਾ ਕਿ ਉਹ ਨਾਗਪੁਰ ਵਿਚ ਹੀ ਜਵਾਬ ਦੇਣਗੇ। ਬੰਗਾਲੀ ਅਖ਼ਬਾਰ ਨੂੰ ਦਿਤੀ ਇੰਟਰਵਿਊ ਵਿਚ ਪ੍ਰਣਬ ਮੁਖ਼ਰਜੀ ਨੇ ਕਿਹਾ ਕਿ ਜੋ ਕੁੱਝ ਵੀ ਮੈਂ ਕਹਿਣਾ ਹੈ, ਮੈਂ ਨਾਗਪੁਰ ਵਿਚ ਕਹਾਂਗਾ। ਮੈਨੂੰ ਕਈ ਚਿੱਠੀਆਂ ਆਈਆਂ ਅਤੇ ਕਈ ਲੋਕਾਂ ਨੇ ਫ਼ੋਨ ਕੀਤੇ ਪਰ ਮੈਂ ਕਿਸੇ ਨੂੰ ਕੋਈ ਜਵਾਬ ਨਹੀਂ ਦਿਤਾ ਹੈ।
ਦਸ ਦਈਏ ਕਿ ਜੈਰਾਮ ਰਾਮੇਸ਼ ਅਤੇ ਸੀਕੇ ਜਾਫ਼ਰ ਸ਼ਰੀਫ਼ ਵਰਗੇ ਕਈ ਸੀਨੀਅਰ ਕਾਂਗਰਸੀ ਨੇਤਾਵਾਂ ਨੇ ਪ੍ਰਣਬ ਮੁਖਰਜੀ ਨੂੰ ਚਿੱਠੀ ਲਿਖ ਕੇ ਪ੍ਰੋਗਰਾਮ ਵਿਚ ਜਾਣ ਦੇ ਫ਼ੈਸਲੇ 'ਤੇ ਫਿਰ ਤੋਂ ਵਿਚਾਰ ਕਰਨ ਲਈ ਕਿਹਾ ਹੈ। ਜੈਰਾਮ ਰਮੇਸ਼ ਨੇ ਦਸਿਆ ਕਿ ਉਨ੍ਹਾਂ ਨੇ ਸਾਬਕਾ ਰਾਸ਼ਟਰਪਤੀ ਨੂੰ ਲਿਖਿਆ ਕਿ ਉਨ੍ਹਾਂ ਵਰਗੇ ਵਿਦਵਾਨ ਅਤੇ ਸੈਕੁਲਰ ਵਿਅਕਤੀ ਨੂੰ ਆਰਐਸਐਸ ਦੇ ਨਾਲ ਕਿਸੇ ਤਰ੍ਹਾਂ ਦੀ ਨਜ਼ਦੀਕੀ ਨਹੀਂ ਦਿਖਾਉਣੀ ਚਾਹੀਦੀ। ਆਰਐਸਐਸ ਪ੍ਰੋਗਰਾਮ ਜਾਣ ਨਾਲ ਦੇਸ਼ ਦੇ ਸੈਕੁਲਰ ਮਾਹੌਲ 'ਤੇ ਬਹੁਤ ਗ਼ਲਤ ਅਸਰ ਪਵੇਗਾ।
ਦਸ ਦਈਏ ਕਿ ਸਾਬਕਾ ਰਾਸ਼ਟਰਪਤੀ ਨੇ ਆਰਐਸਐਸ ਦੇ ਮੁੱਖ ਦਫ਼ਤਰ 'ਤੇ ਹੋਣ ਵਾਲੇ ਸਿਖ਼ਲਾਈ ਪ੍ਰੋਗਰਾਮ ਦੇ ਸਮਾਗਮ ਵਿਚ ਮੁੱਖ ਮਹਿਮਾਨ ਦੇ ਤੌਰ 'ਤੇ ਆਉਣ ਦਾ ਸੱਦਾ ਸਵੀਕਾਰ ਕੀਤਾ ਹੈ। ਇਸ ਨੂੰ ਲੈ ਕੇ ਕਈ ਕਾਂਗਰਸੀ ਨੇਤਾ ਵਿਰੋਧ ਕਰ ਰਹੇ ਹਨ। ਉਥੇ ਕੇਂਦਰੀ ਮੰਤਰੀ ਨਿਤਿਨ ਗਡਕਰੀ ਨੇ ਕਿਹਾ ਕਿ ਮੁਖ਼ਰਜੀ ਦਾ ਆਰਐਸਐਸ ਦਾ ਸੱਦਾ ਸਵੀਕਾਰ ਕਰਨਾ ਇਕ ਚੰਗੀ ਪਹਿਲ ਹੈ। ਰਾਜਨੀਤਕ ਛੂਆ ਛੂਤ ਚੰਗੀ ਗੱਲ ਨਹੀਂ ਹੈ।
ਮੁਖ਼ਰਜੀ ਨਾਗਪੁਰ ਵਿਚ 7 ਜੂਨ ਨੂੰ ਆਰਐਸਐਸ ਦੇ ਉਨ੍ਹਾਂ ਸਵੈ ਸੇਵਕਾਂ ਨੂੰ ਸੰਬੋਧਨ ਕਰਨਗੇ, ਜਿਨ੍ਹਾਂ ਨੇ ਸੰਘ ਦੇ ਸਿੱਖਿਆ ਪਾਠਕ੍ਰਮ ਦਾ ਤੀਜਾ ਵਰਗ ਪਾਸ ਕੀਤਾ ਹੈ। ਇਸ ਸਿਖ਼ਲਾਈ ਵਿਚ ਹਿੱਸਾ ਲੈਣ ਵਾਲੇ ਜ਼ਿਆਦਾਤਰ ਵਰਕਰ ਪ੍ਰਚਾਰਕ ਬਣਦੇ ਹਨ। ਸੂਤਰਾਂ ਮੁਤਾਬਕ ਆਰਐਸਐਸ ਦੇ ਸਰਸੰਘਚਾਲਕ ਮੋਹਨ ਭਾਗਵਤ ਨੇ ਮੁਖਰਜੀ ਨੂੰ ਉਦੋਂ ਸੱਦਾ ਦਿਤਾ ਸੀ ਜਦੋਂ ਉਹ ਰਾਸ਼ਟਰਪਤੀ ਸਨ। ਹਾਲਾਂਕਿ ਮੁਖ਼ਰਜੀ ਨੇ ਉਦੋਂ ਇਹ ਕਹਿੰਦੇ ਹੋਏ ਇਨਕਾਰ ਕਰ ਦਿਤਾ ਸੀ ਕਿ ਸੰਵਿਧਾਨਕ ਅਹੁਦੇ 'ਤੇ ਰਹਿੰਦੇ ਹੋਏ ਉਹ ਇਸ ਸਮਾਗਮ ਵਿਚ ਸ਼ਾਮਲ ਨਹੀਂ ਹੋ ਸਕਦੇ।