ਆਈਪੀਐਲ ਵਿਚ ਵੱਡਾ ਬਦਲਾਅ ਕਰਨ ਬਾਰੇ ਸੋਚ ਰਹੀ ਹੈ ਬੀਸੀਸੀਆਈ
ਨਵੀਂ ਦਿੱਲੀ : ਪਿਛਲੇ ਕਈ ਵਿਵਾਦਤ ਫੈਸਲਿਆਂ ਦੇ ਕਾਰਨ ਭਾਰਤੀ ਮੈਚ ਅਧਿਕਾਰੀਆਂ ਦੇ ਪੱਧਰ 'ਤੇ ਕਈ ਸਵਾਲ ਖੜੇ ਹੋਏ ਹਨ। ਇਹੋ ਜਿਹੇ ਵਿਚ ਆਈਪੀਐਲ ਗਵਰਨਿੰਗ ਕੌਂਸਲ ਪਹਿਲੀ ਵਾਰ ਨੋ ਬਾਲ ਦੇ ਲਈ ਵੱਖਰਾ ਅੰਪਾਇਰ ਰੱਖਣ ਬਾਰੇ ਸੋਚ ਰਹੀ ਹੈ।
ਗਵਰਨਿੰਗ ਕੌਸਲ ਦੇ ਇਕ ਮੈਂਬਰ ਨੇ ਕਿਹਾ ਕਿ ਜੇਕਰ ਸੱਭ ਕੁੱਝ ਠੀਕ ਰਿਹਾ ਤਾਂ ਅਗਲੇ ਆਈਪੀਐਲ਼ ਵਿਚ ਨਿਯਮਤ ਅੰਪਾਇਰ ਤੋਂ ਇਲਾਵਾ ਨੋ ਬਾਲ ਦੇ ਲਈ ਇਕ ਅਲੱਗ ਅੰਪਾਇਰ ਹੋਵੇਗਾ। ਆਈਪੀਐਲ ਗਵਰਨਿੰਗ ਕੌਸਲ ਦੀ ਬੈਠਕ ਵਿਚ ਇਸ 'ਤੇ ਗੱਲ ਹੋਈ ਹੈ।
ਪਿਛਲੇ ਆਈਪੀਐਲ ਵਿਚ ਨੋ ਬਾਲ ਦੇ ਕਈ ਫੈਸਲਿਆਂ ਉੱਤੇ ਵਿਵਾਦ ਹੋਇਆ ਸੀ। ਭਾਰਤੀ ਕਪਤਾਨ ਵਿਰਾਟ ਕੋਹਲੀ ਦੀ ਭਾਰਤੀ ਅੰਪਾਇਰ ਐਸ. ਰਵੀ ਦੇ ਨਾਲ ਬਹਿਸਬਾਜੀ ਵੀ ਹੋ ਗਈ ਸੀ ਜੋ ਇਕ ਆਈਪੀਐਲ ਮੈਚ ਦੇ ਦੌਰਾਨ ਮੁੰਬਈ ਇੰਡੀਅਨਸ ਦੇ ਲਸਿਥ ਮਲਿੰਗਾ ਦੀ ਨੋ ਬਾਲ ਨਹੀਂ ਫੜ ਸਕੇ ਸਨ, ਜਿਸ ਕਾਰਨ ਰਾਇਲ ਚੈਲੇਜਰ ਬੰਗਲੁਰੂ ਉਹ ਮੈਚ ਹਾਰ ਗਈ ਸੀ।
ਮੰਨਿਆ ਜਾ ਰਿਹਾ ਹੈ ਕਿ ਬੀਸੀਸੀਆਈ ਆਈਪੀਐਲ ਵਿਚ ਵੱਡਾ ਬਦਲਾਅ ਕਰਨ ਬਾਰੇ ਸੋਚ ਰਹੀ ਹੈ। ਇਸ ਦੇ ਤਹਿਤ ਲੜੀ ਵਿਚ ਅਗਲੀ ਵਾਰ ਪਾਵਰ ਪਲੇਅਰ ਦਾ ਨਿਯਮ ਲਿਆਉਣ 'ਤੇ ਵਿਚਾਰ ਕੀਤਾ ਜਾਵੇਗਾ। ਇਸ ਨਿਯਮ ਦੇ ਤਹਿਤ ਮੈਚ ਵਿਚ ਕਦੇ ਵੀ ਵਿਕਟ ਡਿੱਗਣ ਤੋਂ ਬਾਅਦ ਜਾਂ ਓਵਰ ਖਤਮ ਹੋਣ ਤੋਂ ਬਾਅਦ ਖਿਡਾਰੀ ਬਦਲੇ ਜਾ ਸਕਦੇ ਹਨ।