13 ਮਹੀਨਿਆਂ 'ਚ ਲੈ ਚੁੱਕੀ ਸੀ 1 ਕਰੋੜ ਰੁਪਏ ਦੀ ਤਨਖ਼ਾਹ
ਕਾਸ਼ਗੰਜ: ਫ਼ਰਜ਼ੀਵਾੜੇ ਦੇ ਕੇਸ ਤਾਂ ਤੁਸੀਂ ਬਥੇਰੇ ਦੇਖੇ ਅਤੇ ਸੁਣੇ ਹੋਣਗੇ ਪਰ ਯੂਪੀ ਵਿਚ ਹੋਏ ਇਕ ਫਰਜ਼ੀਵਾੜੇ ਨੇ ਸਰਕਾਰ ਦੇ ਹੋਸ਼ ਉਡਾ ਕੇ ਰੱਖ ਦਿੱਤੇ ਹਨ। ਜੀ ਹਾਂ, ਯੂਪੀ ਦੇ ਕਾਸ਼ਗੰਜ ਵਿਚ ਇਕ ਅਜਿਹੀ ਟੀਚਰ ਨੂੰ ਗ੍ਰਿਫ਼ਤਾਰ ਕੀਤਾ ਗਿਐ ਜੋ ਫ਼ਰਜ਼ੀ ਪ੍ਰਮਾਣ ਪੱਤਰਾਂ ਦੇ ਆਧਾਰ 'ਤੇ 25 ਜ਼ਿਲ੍ਹਿਆਂ ਦੇ ਵੱਖ-ਵੱਖ 25 ਸਕੂਲਾਂ ਵਿਚ ਨੌਕਰੀ ਕਰਦੀ ਸੀ।
Anamika
ਇਸ ਦੌਰਾਨ ਅਨਾਮਿਕਾ ਨਾਂਅ ਦੀ ਇਸ ਟੀਚਰ ਨੇ ਮਹਿਜ਼ 13 ਮਹੀਨੇ ਵਿਚ ਹੀ ਕਰੀਬ ਇਕ ਕਰੋੜ ਰੁਪਏ ਦੀ ਤਨਖ਼ਾਹ ਸਰਕਾਰ ਪਾਸੋਂ ਲੈ ਲਈ। ਆਓ ਤੁਹਾਨੂੰ ਦੱਸਦੇ ਆਂ ਕਿ ਕਿਵੇਂ ਕੀਤਾ ਅਨਾਮਿਕਾ ਨੇ ਇਹ ਫ਼ਰਜ਼ੀਵਾੜਾ ਅਤੇ ਕਿਵੇਂ ਹੋਇਆ ਇਸ ਦਾ ਖ਼ੁਲਾਸਾ? ਦਰਅਸਲ ਕਸਤੂਰਬਾ ਗਾਂਧੀ ਰਿਹਾਇਸ਼ੀ ਸਕੂਲਾਂ ਵਿਚ ਠੇਕੇ 'ਤੇ ਲੱਗਣ ਵਾਲੀ ਨੌਕਰੀ ਵਿਚ ਦਸਤਾਵੇਜ਼ਾਂ ਦੀ ਜਾਂਚ ਨਹੀਂ ਹੁੰਦੀ, ਇੰਟਰਵਿਊ ਦੌਰਾਨ ਹੀ ਅਸਲੀ ਦਸਤਾਵੇਜ਼ ਦੇਖੇ ਜਾਂਦੇ ਹਨ।
Teacher and Police
ਚੋਣ ਮੈਰਿਟ ਦੇ ਆਧਾਰ 'ਤੇ ਹੁੰਦੀ ਹੈ। ਅਜਿਹੇ ਵਿਚ ਅਨਾਮਿਕਾ ਦੇ ਦਸਤਾਵੇਜ਼ਾਂ ਨੂੰ ਆਧਾਰ ਬਣਾਇਆ ਗਿਆ ਕਿਉਂਕਿ ਇਸ ਵਿਚ ਗ੍ਰੈਜੂਏਸ਼ਨ ਨੂੰ ਛੱਡ ਕੇ ਹਾਈ ਸਕੂਲ ਤੋਂ ਇੰਟਰ ਤਕ 76 ਫ਼ੀਸਦੀ ਤੋਂ ਜ਼ਿਆਦਾ ਅੰਕ ਹਨ। ਅਨਾਮਿਕਾ ਦਾ ਕਹਿਣਾ ਹੈ ਕਿ ਮੈਨਪੁਰੀ ਦੇ ਰਹਿਣ ਵਾਲੇ ਰਾਜ ਨਾਂਅ ਦੇ ਵਿਅਕਤੀ ਨੇ ਉਸ ਨੂੰ ਇਕ ਲੱਖ ਰੁਪਏ ਵਿਚ ਦਸਤਾਵੇਜ਼ਾਂ 'ਤੇ ਨੌਕਰੀ ਲਗਵਾਉਣ ਦਾ ਵਾਅਦਾ ਕੀਤਾ ਸੀ ਅਤੇ ਅਗਸਤ 2018 ਵਿਚ ਹੀ ਉਸ ਨੇ ਨਿਯੁਕਤੀ ਪੱਤਰ ਵੀ ਦਿਵਾ ਦਿੱਤਾ ਸੀ।
Anamika and Anjali Agarwal
ਅਨਾਮਿਕਾ ਨੇ ਦਸਿਆ ਕਿ ਉਸ ਨੂੰ ਨੌਕਰੀ ਕਰਦਿਆਂ ਡੇਢ ਸਾਲ ਹੋ ਗਿਆ ਹੈ। ਦਰਅਸਲ ਅਨਾਮਿਕਾ ਦਾ ਇਹ ਫ਼ਰਜ਼ੀਵਾੜਾ ਉਸ ਸਮੇਂ ਸਾਹਮਣੇ ਆਇਆ ਜਦੋਂ ਬੇਸਿਕ ਸਿੱਖਿਆ ਵਿਭਾਗ ਵੱਲੋਂ ਡਿਜ਼ੀਟਲ ਡਾਟਾਬੇਸ ਤਿਆਰ ਕੀਤਾ ਜਾ ਰਿਹਾ ਸੀ। ਇਸ ਦੌਰਾਨ ਇਹ ਗੱਲ ਸਾਹਮਣੇ ਆਈ ਕਿ ਅਨਾਮਿਕਾ ਸ਼ੁਕਲਾ ਨਾਂਅ ਦੀ ਇਕ ਟੀਚਰ ਸੂਬੇ ਦੇ ਕਈ ਜ਼ਿਲ੍ਹਿਆਂ ਵਿਚ ਕੰਮ ਕਰ ਰਹੀ ਹੈ।
People
ਇਸ ਤੋਂ ਬਾਅਦ ਉਸ ਨੂੰ ਨੋਟਿਸ ਭੇਜਿਆ ਗਿਆ, ਜਿਸ 'ਤੇ ਉਹ ਜਦੋਂ ਅਸਤੀਫ਼ਾ ਦੇਣ ਕਾਸ਼ਗੰਜ ਪੁੱਜੀ ਤਾਂ ਫਰਜ਼ੀਵਾੜਾ ਅਤੇ ਤਨਖ਼ਾਹ ਲੈਣ ਦੇ ਦੋਸ਼ ਵਿਚ ਉਸ ਨੂੰ ਗ੍ਰਿਫ਼ਤਾਰ ਕਰ ਲਿਆ ਗਿਆ। ਬੇਸਿਕ ਸਿੱਖਿਆ ਅਧਿਕਾਰੀ ਅੰਜਲੀ ਅਗਰਵਾਲ ਨੇ ਕਿਹਾ ਕਿ ਅਨਾਮਿਕਾ ਸ਼ੁਕਲਾ ਪਿਛਲੇ ਡੇਢ ਸਾਲ ਤੋਂ ਫ਼ਰਜ਼ੀਵਾੜੇ ਤਹਿਤ ਨੌਕਰੀ ਕਰਦੀ ਆ ਰਹੀ ਸੀ, ਜਿਸ ਨੂੰ ਹੁਣ ਗ੍ਰਿਫ਼ਤਾਰ ਕਰ ਲਿਆ ਗਿਆ ਹੈ।
Anjali Agarwal
ਅੰਜਲੀ ਅਗਰਵਾਲ ਨੇ ਦਸਿਆ ਕਿ ਉਹ ਲਗਭਗ ਡੇਢ ਸਾਲ ਤੋਂ ਨੌਕਰੀ ਕਰ ਰਹੀ ਹੈ। ਉਸ ਨੇ ਫਰਜ਼ੀਵਾੜੇ ਦੇ ਆਧਾਰ ਤੇ ਨੌਕਰੀ ਕੀਤੀ ਹੈ। ਫਿਲਹਾਲ ਕਾਸ਼ਗੰਜ ਦੀ ਪੁਲਿਸ ਨੇ ਅੰਜਲੀ ਅਗਰਵਾਲ ਦੇ ਬਿਆਨਾਂ 'ਤੇ ਅਨਾਮਿਕਾ ਵਿਰੁੱਧ ਧੋਖਾਧੜੀ ਅਤੇ ਜਾਅਲੀ ਦਸਤਾਵੇਜ਼ ਤਿਆਰ ਕਰਨ ਦੇ ਮਾਮਲੇ ਵਿਚ ਧਾਰਾ 420, 467 ਅਤੇ 468 ਦੇ ਤਹਿਤ ਮੁਕੱਦਮਾ ਦਰਜ ਕਰ ਲਿਆ ਹੈ। ਪੁਲਿਸ ਇਸ ਮਾਮਲੇ ਵਿਚ ਡੂੰਘਾਈ ਨਾਲ ਜਾਂਚ ਪੜਤਾਲ ਕਰਨ ਵਿਚ ਜੁਟ ਗਈ ਐ, ਜਿਸ ਦੌਰਾਨ ਹੋਰ ਵੱਡੇ ਖ਼ੁਲਾਸੇ ਹੋਣ ਦੀ ਉਮੀਦ ਜਤਾਈ ਜਾ ਰਹੀ ਹੈ।
Punjabi News ਨਾਲ ਜੁੜੀ ਹੋਰ ਅਪਡੇਟ ਲਗਾਤਾਰ ਹਾਸਲ ਕਰਨ ਲਈ ਸਾਨੂੰ Facebook ਤੇ ਲਾਈਕ Twitter ਤੇ follow ਕਰੋ।
