ਪਿਛਲੇ 12 ਸਾਲਾਂ ਤੋਂ ਫੜਦੀ ਆ ਰਹੀ ਹੈ ਖ਼ਤਰਨਾਕ ਸੱਪ
ਨਵੀਂ ਦਿੱਲੀ: ਅੱਜ ਵਿਸ਼ਵ ਭਰ ਵਿਚ ਮਹਿਲਾ ਦਿਵਸ ਮਨਾਇਆ ਜਾ ਰਿਹਾ ਹੈ। ਇਸ ਮੌਕੇ ਅਜਿਹੀਆਂ ਔਰਤਾਂ ਦੀ ਗੱਲ ਕੀਤੀ ਜਾਂਦੀ ਹੈ ਜੋ ਦਲੇਰੀ ਅਤੇ ਹੌਂਸਲੇ ਦੀ ਮਿਸਾਲ ਹਨ। ਅਜਿਹੀ ਹੀ ਦਲੇਰੀ ਦੀ ਮਿਸਾਲ ਬਣੀ ਹੋਈ ਹੈ ਕਰਨਾਟਕ ਦੀ ਰਹਿਣ ਵਾਲੀ ਨਿਰਜਰਾ ਚਿੱਟੀ। ਜੀ ਹਾਂ ਇਹ ਉਹੀ ਨਿਰਜਰਾ ਚਿੱਟੀ ਹੈ, ਜਿਸ ਦੇ ਖ਼ਤਰਨਾਕ ਕਾਰਨਾਮਿਆਂ ਦੇ ਵੀਡੀਓਜ਼ ਤੁਸੀਂ ਆਮ ਹੀ ਦੇਖੇ ਹੋਣਗੇ।
Nirzara Chitti
ਪਿਛਲੇ 12 ਸਾਲਾਂ ਤੋਂ ਨਿਰਜਰਾ ਕਰਨਾਟਕ ਦੇ ਬੇਲਗਾਵੀ ਵਿਚ ਇਕ ਅਜਿਹਾ ਕੰਮ ਕਰਦੀ ਆ ਰਹੀ ਹੈ, ਜਿਸ ਨੂੰ ਦੇਖ ਕੇ ਲੋਕ ਹੈਰਾਨ ਰਹਿ ਜਾਂਦੇ ਹਨ, ਨਿਰਜਰਾ ਤੇਜ਼ੀ ਨਾਲ ਰੇਂਗਦੇ ਹੋਏ ਸੱਪ ਨੂੰ ਬਿਜਲੀ ਦੀ ਤੇਜ਼ੀ ਨਾਲ ਦੌੜ ਕੇ ਫੜ ਲੈਂਦੀ ਹੈ। ਇਸ ਦੌਰਾਨ ਉਸ ਦੇ ਚਿਹਰੇ 'ਤੇ ਨਾ ਕੋਈ ਡਰ ਹੁੰਦਾ ਹੈ ਅਤੇ ਨਾ ਹੀ ਕੋਈ ਝਿਜਕ।
Nirzara Chitti
ਹਾਂ ਦੇਖਣ ਵਾਲਿਆਂ ਦੇ ਮੂੰਹ ਜ਼ਰੂਰ ਅੱਡੇ ਰਹਿ ਜਾਂਦੇ ਹਨ। ਨਿਰਜਰਾ ਨੇ ਸੱਪ ਫੜਨ ਦੀ ਟ੍ਰੇਨਿੰਗ ਅਪਣੇ ਪਤੀ ਤੋਂ ਹਾਸਲ ਕੀਤੀ ਐ। ਪੰਜ ਸਾਲਾਂ ਦੀ ਸਿਖ਼ਲਾਈ ਮਗਰੋਂ ਉਸ ਦਾ ਡਰ ਖ਼ਤਮ ਹੋ ਗਿਆ ਅਤੇ ਅੱਜ ਉਹ ਇੰਨੀ ਪ੍ਰਪੱਕ ਹੋ ਚੁੱਕੀ ਹੈ ਕਿ ਇਕੱਲੇ ਹੀ ਨਿਕਲ ਪੈਂਦੀ ਹੈ ਲੋਕਾਂ ਨੂੰ ਖ਼ਤਰਨਾਕ ਸੱਪਾਂ ਤੋਂ ਬਚਾਉਣ ਲਈ।
Nirzara Chitti
ਨਿਰਜਰਾ ਮੁਤਾਬਕ ਹਾਲੇ ਕੁੱਝ ਦਿਨ ਪਹਿਲਾਂ ਹੀ ਉਨ੍ਹਾਂ ਨੇ ਅਪਣੇ ਪਤੀ ਨਾਲ ਮਿਲ ਕੇ 12 ਸੱਪ ਫੜੇ ਸਨ। ਭਾਵੇਂ ਕਿ ਨਿਰਜਰਾ ਨੂੰ ਇਹ ਕੰਮ ਕਰਦੇ ਹੋਏ ਲੰਬਾ ਸਮਾਂ ਹੋ ਚੁੱਕਿਆ ਹੈ ਪਰ ਅਜੇ ਵੀ ਬਹੁਤ ਸਾਰੇ ਲੋਕਾਂ ਦਾ ਔਰਤਾਂ ਪ੍ਰਤੀ ਨਜ਼ਰੀਆ ਨਹੀਂ ਬਦਲਿਆ, ਔਰਤਾਂ ਜਦੋਂ ਵੀ ਕੁੱਝ ਵੱਖਰਾ ਕਰਦੀਆਂ ਹਨ ਜਾਂ ਕੋਈ ਰਿਸਕ ਵਾਲਾ ਕੰਮ ਕਰਦੀਆਂ ਹਨ ਤਾਂ ਲੋਕ ਕਹਿੰਦੇ ਹਨ ਕਿ ਤੁਹਾਡੇ ਵੱਸ ਦੀ ਗੱਲ ਨਹੀਂ ਪਰ ਇਹ ਸਭ ਤਾਅਨੇ ਨਿਰਜਰਾ ਦੇ ਹੌਂਸਲਿਆਂ ਨੂੰ ਪਸਤ ਨਹੀਂ ਕਰ ਸਕੇ।
Nirzara Chitti
ਨਿਰਜਰਾ ਦਾ ਕਹਿਣਾ ਹੈ ਕਿ ਜੇਕਰ ਕੋਈ ਲੜਕੀ ਅਪਣੇ ਪਰਿਵਾਰ ਨੂੰ ਅਪਣੇ ਸੁਪਨੇ ਦੱਸਦੀ ਹੈ ਤਾਂ ਘਰ ਵਾਲਿਆਂ ਨੂੰ ਉਸ ਦਾ ਪੂਰਾ ਸਮਰਥਨ ਕਰਨਾ ਚਾਹੀਦਾ ਹੈ। ਨਿਰਜਰਾ ਅੱਜ ਦੀਆਂ ਔਰਤਾਂ ਲਈ ਇਕ ਮਿਸਾਲ ਹੈ, ਉਸ ਦੀ ਕਹਾਣੀ ਸਾਬਤ ਕਰਦੀ ਹੈ ਕਿ ਜੇਕਰ ਹੌਂਸਲੇ ਮਜਬੂਤ ਹੋਣ ਤਾਂ ਇਨਸਾਨ ਅਪਣੇ ਦਿਲ ਦੀ ਸੁਣ ਕੇ ਅਪਣੇ ਸੁਪਨੇ ਨੂੰ ਸਾਕਾਰ ਕਰ ਸਕਦਾ ਹੈ। ਫਿਰ ਸਮਾਜਿਕ ਬੇੜੀਆਂ ਵੀ ਉਸ ਦੇ ਕਦਮਾਂ ਨੂੰ ਨਹੀਂ ਰੋਕ ਸਕਦੀਆਂ।
Punjabi News ਨਾਲ ਜੁੜੀ ਹੋਰ ਅਪਡੇਟ ਲਗਾਤਾਰ ਹਾਸਲ ਕਰਨ ਲਈ ਸਾਨੂੰ Facebook ਤੇ ਲਾਈਕ Twitter ਤੇ follow ਕਰੋ।
