ਲਖਨਊ, 7 ਅਗੱਸਤ : ਉੱਤਰ ਪ੍ਰਦੇਸ਼ ਸੁੰਨੀ ਸੈਂਟਰਲ ਵਕਫ਼ ਬੋਰਡ ਅਯੁੱਧਿਆ 'ਚ 5 ਏਕੜ 'ਚ ਮਸਜਿਦ ਨਿਰਮਾਣ ਦੇ ਸੰਬੰਧ 'ਚ ਗਠਿਤ ਟਰੱਸਟ ਦੇ ਕੰਮ ਧੰਦੇ ਲਈ ਰਾਜਧਾਨੀ 'ਚ ਇਕ ਦਫ਼ਤਰ ਬਣਾਉਣ ਦੀ ਪ੍ਰਕਿਰਿਆ 'ਚ ਲੱਗਾ ਹੈ। ਟਰੱਸਟ ਦੇ ਇਕ ਅਧਿਕਾਰੀ ਨੇ ਦਸਿਆ ਕਿ ਇੰਡੋ ਇਸਲਾਮਿਕ ਕਲਚਰਲ ਫ਼ਾਊਂਡੇਸ਼ਨ ਟਰੱਸਟ ਦਾ ਦਫ਼ਤਰ 10 ਤੋਂ 12 ਦਿਨ 'ਚ ਕੰਮ ਕਰਨ ਲੱਗੇਗਾ। ਆਈ.ਆਈ.ਸੀ.ਐਫ਼. ਦੇ ਸਕੱਤਰ ਅਤਹਰ ਹੁਸੈਨ ਨੇ ਦਸਿਆ ਕਿ ਟਰੱਸਟ ਦਾ ਗਠਨ ਹੋ ਗਿਆ ਹੈ, ਨਿਯਮਾਂ ਦੇ ਅਨੁਸਾਰ ਅਸੀਂ ਪੈਨ ਕਾਰਡ ਲਈ ਅਰਜ਼ੀ ਦਿਤੀ ਹੈ ਅਤੇ ਉਸ ਦੇ ਆਉਣ ਦਾ ਇੰਤਜ਼ਾਰ ਕਰ ਰਹੇ ਹਾਂ।
File Photo
ਇਸ ਤੋਂ ਬਾਅਦ ਅਸੀਂ ਆਨਲਾਈਨ ਬੈਠਕ ਕਰ ਬੈਂਕ ਖਾਤਾ ਖੋਲ੍ਹਣ ਲਈ ਪ੍ਰਸਤਾਵ ਪਾਸ ਕਰਾਂਗੇ। ਸੂਬਾ ਸਰਕਾਰ ਨੇ ਸੁਪਰੀਮ ਕੋਰਟ ਦੇ ਨਿਰਦੇਸ਼ 'ਤੇ ਮਸਜਿਦ ਨਿਰਮਾਣ ਲਈ 5 ਏਕੜ ਜ਼ਮੀਨ ਅਯੁੱਧਿਆ ਦੇ ਧੰਨੀਪੁਰ ਪਿੰਡ 'ਚ ਅਲਾਟ ਕੀਤੀ ਹੈ। ਆਈ.ਆਈ.ਸੀ.ਐਫ਼., ਮਸਜਿਦ ਨਿਰਮਾਣ, ਇੰਡੋ ਇਸਲਾਮਿਕ ਸੈਂਟਰ, ਲਾਇਬ੍ਰੇਰੀ ਅਤੇ ਹਸਪਤਾਲ ਬਣਾਉਣ 'ਚ ਇਸ ਜ਼ਮੀਨ ਦਾ ਇਸਤੇਮਾਲ ਕਰੇਗਾ। ਟਰੱਸਟ ਦੇ ਇਕ ਮੈਂਬਰ ਨੇ ਦਸਿਆ ਕਿ ਅਯੁੱਧਿਆ ਦੇ ਜ਼ਿਲ੍ਹਾ ਅਧਿਕਾਰੀ ਅਨੁਜ ਕੁਮਾਰ ਝਾ ਨੇ ਮਸਜਿਦ ਲਈ ਟਰੱਸਟ ਦੇ ਮੈਬਰਾਂ ਨੂੰ ਜ਼ਮੀਨ ਦਾ ਕਬਜ਼ਾ ਦੇ ਦਿਤਾ ਹੈ। ਸਾਨੂੰ ਜ਼ਮੀਨ ਦੇ ਮਾਲ ਰਿਕਾਰਡ ਦੀ ਪ੍ਰਮਾਣਿਤ ਨਕਲ ਮਿਲ ਗਈ ਹੈ। ਧੰਨੀਪੁਰ ਪਿੰਡ ਦੇ ਨਿਵਾਸੀ ਮਸਜਿਦ ਬਣਨ ਦਾ ਬੇਸਬਰੀ ਨਾਲ ਇੰਤਜ਼ਾਰ ਕਰ ਰਹੇ ਹਨ।
ਪਿੰਡ ਦੇ ਮੁਹੰਮਦ ਇਜ਼ਹਾਰ ਨੇ ਕਿਹਾ ਕਿ ਇਹ ਚੰਗੀ ਗੱਲ ਹੈ ਕਿ ਜ਼ਮੀਨ ਇਥੇ ਮਿਲੀ ਹੈ। ਅਸੀਂ ਬਹੁਤ ਖ਼ੁਸ਼ ਹਾਂ ਅਤੇ ਉਮੀਦ ਕਰਦੇ ਹਾਂ ਕਿ ਕੰਮ ਛੇਤੀ ਸ਼ੁਰੂ ਹੋਵੇਗਾ। ਸਾਨੂੰ ਉਮੀਦ ਹੈ ਕਿ ਹੁਣ ਸਾਡੇ ਪਿੰਡ ਦਾ ਵਿਕਾਸ ਹੋਵੇਗਾ। ਪਿੰਡ ਦੇ ਰਹਿਣ ਵਾਲੇ ਮੁਹੰਮਦ ਇਮਰਾਨ ਨੇ ਵੀ ਅਪਣੀ ਖੁਸ਼ੀ ਕੁੱਝ ਇਸੇ ਤਰ੍ਹਾਂ ਸਪੱਸ਼ਟ ਕੀਤੀ।
ਇਸ ਟਰੱਸਟ 'ਚ 15 ਮੈਂਬਰ ਹੋਣਗੇ, ਜਿਸ 'ਚ 9 ਦੇ ਨਾਵਾਂ ਦਾ ਐਲਾਨ ਹੋ ਗਿਆ ਹੈ, ਬਾਕੀ ਨਾਵਾਂ ਦਾ ਵੀ ਐਲਾਨ ਛੇਤੀ ਹੋ ਜਾਵੇਗਾ। ਟਰੱਸਟ ਦੇ ਇਕ ਮੈਂਬਰ ਨੇ ਦਸਿਆ ਕਿ ਛੇਤੀ ਹੀ ਟਰੱਸਟ ਦੇ 6 ਹੋਰ ਮੈਬਰਾਂ ਦੀ ਚੋਣ ਕੀਤੀ ਜਾਵੇਗੀ। ਟਰੱਸਟ ਦਾ ਸਕੱਤਰ ਹੀ ਇਸ ਦਾ ਅਧਿਕਾਰਕ ਬੁਲਾਰਾ ਹੋਵੇਗਾ।
