ਦਿੱਲੀ ਸਰਕਾਰ ਇਸ ਨੂੰ 2 ਮਹੀਨਿਆਂ ਵਿਚ ਲਾਗੂ ਕਰਨਾ ਚਾਹੁੰਦੀ ਹੈ
ਨਵੀਂ ਦਿੱਲੀ- ਮੈਟਰੋ ਵਿਚ ਔਰਤਾਂ ਨੂੰ ਮੁਫ਼ਤ ਸਫ਼ਰ ਦੇ ਲਈ ਦਿੱਲੀ ਸਰਕਾਰ ਦੀ ਯੋਜਨਾ ਨੂੰ ਲੈ ਕੇ ਡੀਐਮਆਰਸੀ ਪੂਰੀ ਤਿਆਰੀ ਵਿਚ ਜੁਟ ਗਈ ਹੈ। ਡੀਐਮਆਰਸੀ ਇਸ ਨੂੰ ਲੈ ਕੇ ਦੋ ਤਿੰਨ ਯੋਜਨਾਵਾਂ ਤੇ ਕੰਮ ਕਰ ਰਹੀ ਹੈ। ਇਸ ਵਿਚ ਔਰਤਾਂ ਦੇ ਲਈ ਸਟੇਸ਼ਨ ਤੇ ਇਕ ਅਲੱਗ ਤੋਂ ਕਾਊਂਟਰ ਬਣਾ ਕੇ ਉਹਨਾਂ ਦੇ ਲਈ ਗੁਲਾਬੀ ਟੋਕਨ ਜਾਰੀ ਕਰਨ ਦੇ ਨਾਲ ਨਾਲ ਹੋਰ ਵੀ ਸਹੂਲਤਾਂ ਸ਼ਾਮਿਲ ਹਨ। ਸੂਤਰਾਂ ਦੇ ਅਨੁਸਾਰ ਮੈਟਰੋ ਵਿਚ ਮੁਫ਼ਤ ਸਫ਼ਰ ਦੀ ਯੋਜਨਾ ਦਾ ਫਿਲਹਾਲ ਟ੍ਰਾਇਲ ਹੀ ਲਾਗੂ ਹੋਵੇਗਾ।
ਸਰਕਾਰ ਜੋ ਹੁਣ ਮੁਫਤ ਸਫ਼ਰ ਦਾ ਐਲਾਨ ਕਰੇਗੀ ਉਹ ਅਗਲੇ ਚਾਰ ਤੋਂ ਛੇ ਮਹੀਨਿਆਂ ਦੇ ਲਈ ਹੀ ਹੋਵੇਗੀ। ਡੀਐਮਆਰਸੀ ਸੂਤਰਾਂ ਦੇ ਮੁਤਾਬਕ ਉਹਨਾਂ ਨੂੰ ਇਸ ਕੰਮ ਨੂੰ ਬੇਹਤਰ ਬਣਾਉਣ ਲਈ 10 ਤੋਂ 12 ਮਹੀਨਿਆਂ ਦਾ ਸਮਾਂ ਚਾਹੀਦਾ ਹੈ। ਓਧਰ ਦਿੱਲੀ ਸਰਕਾਰ ਇਸ ਨੂੰ 2 ਮਹੀਨਿਆਂ ਵਿਚ ਲਾਗੂ ਕਰਨਾ ਚਾਹੁੰਦੀ ਹੈ। ਸਰਕਾਰ ਦੀ ਜ਼ਲਦਬਾਜੀ ਨੂੰ ਦੇਖਦੇ ਡੀਐਮਆਰਸੀ ਟ੍ਰਾਇਲ ਪਲੈਨ ਦੇ ਤੌਰ ਤੇ ਦੋ, ਤਿੰਨ ਯੋਜਨਾਵਾਂ ਤੇ ਕੰਮ ਕਰ ਰਹੀ ਹੈ ਜਿਸ ਦੀ ਰਿਪੋਰਟ ਉਹ ਅਗਲੇ ਹਫ਼ਤੇ ਮੰਗਲਵਾਰ ਨੂੰ ਸਰਕਾਰ ਦੇ ਸਾਹਮਣੇ ਰੱਖੇਗੀ।
ਇਸ ਯੋਜਨਾ ਵਿਚ ਔਰਤਾਂ ਦੇ ਲਈ ਇਕ ਅਲੱਗ ਕਾਊਂਟਰ ਬਣਾਇਆ ਜਾਵੇਗਾ ਜਿੱਥੇ ਉਹਨਾਂ ਤੋਂ ਉਹਨਾਂ ਦੀ ਮੰਜ਼ਿਲ ਪੁੱਛ ਕੇ ਟੋਕਨ ਦਿੱਤਾ ਜਾਵੇਗਾ। ਅਜਿਹੀ ਸਥਿਤੀ ਵਿਚ ਮੈਟਰੋ ਸਟੇਸ਼ਨਾਂ ਤੇ ਭੀੜ ਵਧਣ ਦਾ ਡਰ ਰਹੇਗਾ ਇਸ ਦੇ ਲਈ ਸਟੇਸ਼ਨ ਤੇ ਸੁਰੱਖਿਆ ਕਰਮਚਾਰੀਆਂ ਦੇ ਇਲਾਵਾ ਵਲੰਟੀਅਰਸ ਨੂੰ ਵੀ ਤੈਨਾਤ ਕੀਤਾ ਜਾਵੇਗਾ। ਸਰਕਾਰ ਇਸ ਦੇ ਲਈ ਸਿਵਲ ਡਿਫੈਂਸ ਕਰਮਚਾਰੀਆਂ ਨੂੰ ਤੈਨਾਤ ਕਰੇਗੀ।
ਡੀਐਮਆਰਸੀ ਸੂਤਰਾਂ ਦੇ ਮੁਤਾਬਕ ਭਵਿੱਖ ਵਿਚ ਮੈਟਰੋ ਦੀ ਲੰਮੀ ਮਿਆਦ ਲਈ ਮੁਫ਼ਤ ਸਫ਼ਰ ਯੋਜਨਾ ਨੂੰ ਲਾਗੂ ਕਰਨ ਲਈ ਔਰਤ ਮੁਸਾਫਰਾਂ ਦੇ ਪੰਜੀਕਰਣ ਦਾ ਅਭਿਆਨ ਵੀ ਚਲਾਵੇਗੀ। ਇਹ ਪੰਜੀਕਰਣ ਅਭਿਆਨ ਭਵਿੱਖ ਵਿਚ ਪਿੰਕ ਸਮਾਰਟ ਕਾਰਡ ਜਾਰੀ ਕਰਨ ਲਈ ਕੀਤਾ ਜਾਵੇਗਾ, ਜਿਸ ਦੇ ਨਾਲ ਭਵਿੱਖ ਵਿਚ ਪਿੰਕ ਟੋਕਨ ਦੀ ਵਿਵਸਥਾ ਖਤਮ ਕੀਤੀ ਜਾ ਸਕੇ।