ਪਿਛਲੀ ਹਾਰ ਤੋਂ ਬਾਹਰ ਆਉਣ ਦੀ ਹੋਵੇਗੀ ਕੋਸ਼ਿਸ਼
ਨਵੀਂ ਦਿੱਲੀ : ਹਾਰਦਿਕ ਪੰਡਿਆ ਦੀ ਆਲਮੀ ਕ੍ਰਿਕਟ ਵਿਚ ਵਾਪਸੀ ਨਾਲ ਸੰਤੁਲਤ ਹੋਈ ਭਾਰਤੀ ਕ੍ਰਿਕਟ ਟੀਮ ਵੀਰਵਾਰ ਭਾਵ ਅੱਜ ਦਖਣੀ ਅਫ਼ਰੀਕਾ ਵਿਰੁਧ ਸ਼ੁਰੂ ਹੋ ਰਹੀ ਤਿੰਨ ਮੈਚਾਂ ਦੀ ਇਕ ਰੋਜ਼ਾ ਲੜੀ ਵਿਚ ਨਿਊਜ਼ੀਲੈਂਡ ਦੌਰੇ ਦੀ ਨਿਰਾਸ਼ਾ ਤੋਂ ਪਿੱਛਾ ਛੁਡਾਉਣਾ ਚਾਹੇਗੀ ਜਿਥੇ ਇਸ ਰੂਪ ਵਿਚ ਉਸ ਨੂੰ ਹੂੰਝਾਫੇਰ ਦਾ ਸਾਹਮਣਾ ਕਰਨਾ ਪਿਆ ਸੀ। ਕੋਰੋਨਾਵਾਇਰਸ ਵੱਧ ਰਹੇ ਖ਼ਤਰੇ ਅਤੇ ਮੀਂਹ ਦੇ ਖਦਸ਼ੇ ਵਿਚਾਲੇ ਸ਼ੁਰੂ ਹੋ ਰਹੀ ਇਸ ਲੜੀ ਲਈ ਭਾਰਤੀ ਟੀਮ ਵਿਚ ਪੰਡਿਆ ਦੀ ਵਾਪਸੀ ਨਾਲ ਵਿਰਾਟ ਕੋਹਲੀ ਨੂੰ ਚੰਗਾ ਵਿਕਲਪ ਮਿਲੇਗਾ। ਭਾਰਤੀ ਟੀਮ ਪਿਛਲੀ ਲੜੀ ਵਿਚ ਨਿਊਜ਼ੀਲੈਂਡ ਵਿਰੁਧ 0-3 ਦੀ ਕਰਾਰੀ ਹਾਰ ਦੀ ਨਿਰਾਸ਼ਾ ਤੋਂ ਬਾਹਰ ਆਉਣ ਦੀ ਕੋਸ਼ਿਸ਼ ਵੀ ਕਰੇਗੀ।
ਪੰਡਿਆ ਨੇ ਪਿਛਲਾ ਇਕ ਰੋਜ਼ਾ ਆਲਮੀ ਮੈਚ ਮੈਨਚੇਸਟਰ ਵਿਚ ਨਿਊਜ਼ੀਲੈਂਡ ਵਿਰੁਧ ਵਿਸ਼ਵ ਕੱਪ ਸੈਮੀਫ਼ਾਈਨਲ ਦੇ ਰੂਪ ਵਿਚ ਖੇਡਿਆ ਸੀ ਅਤੇ ਉਸ ਦਾ ਪਿਛਲਾ ਆਲਮੀ ਮੈਚ ਪਿਛਲੇ ਸਾਲ ਸਤੰਬਰ ਵਿਚ ਬੰਗਲੁਰੂ ਵਿਚ ਦਖਣੀ ਅਫ਼ਰੀਕਾ ਵਿਰੁਧ ਟੀ-20 ਮੁਕਾਬਲਾ ਸੀ। ਪੰਡਿਆ ਨੇ ਡੀ ਵਾਈ ਪਾਟਲ ਕਾਰਪੋਰੇਟ ਕੱਪ ਵਿਚ ਗੇਂਦ ਅਤੇ ਬੱਲੇ ਨਾਲ ਸ਼ਾਨਦਾਰ ਪ੍ਰਦਰਸ਼ਨ ਕਰਦੇ ਹੋਏ ਰਾਸ਼ਟਰੀ ਟੀਮ ਵਿਚ ਵਾਪਸੀ ਕੀਤੀ ਹੈ।
ਕਪਤਾਨ ਕੋਹਲੀ ਅਤੇ ਕੋਚ ਰਵੀ ਸ਼ਾਸਤਰੀ ਸਪੱਸ਼ਟ ਕਰ ਚੁੱਕੇ ਹਨ ਕਿ ਇਸ ਸਾਲ ਹੋਣ ਵਾਲੇ ਟੀ-20 ਵਿਸ਼ਵ ਕੱਪ ਨੂੰ ਦੇਖਦੇ ਹੋਏ ਇਕ ਰੋਜ਼ਾ ਅੰਤਰਰਾਸ਼ਟਰੀ ਮੁਕਾਬਲੇ ਉਨ੍ਹਾਂ ਦੀ ਪਹਿਲ ਨਹੀਂ ਹਨ ਪਰ ਟੀਮ ਇੰਡੀਆ ਦਖਣੀ ਅਫ਼ਰੀਕਾ ਦੀ ਗੈਰਤਜ਼ਰੇਕਾਰ ਟੀਮ ਵਿਰੁਧ ਇਕ ਹੋਰ ਲੜੀ ਗਵਾਉਣ ਦੀ ਸਥਿਤੀ ਵਿਚ ਨਹੀਂ ਹੈ ਜਿਸ ਨੇ ਦੇਸ਼ ਵਿਚ ਆਸਟ੍ਰੇਲੀਆ ਨੂੰ 3-0 ਨਾਲ ਹਰਾਇਆ।
ਭਾਰਤੀ ਟੀਮ ਲਗਾਤਾਰ ਪੰਜ ਅੰਤਰਰਾਸ਼ਟਰੀ ਮੈਚ (ਦੋ ਟੈਸਟ ਵੀ ਸ਼ਾਮਲ) ਹਾਰ ਚੁੱਕੀ ਹੈ ਅਤੇ ਕਪਤਾਨ ਕੋਹਲੀ ਵੀ ਖ਼ਰਾਬ ਫ਼ਾਰਮ ਨਾਲ ਜੂਝ ਰਹੇ ਹਨ। ਕੋਹਲੀ ਨਿਊਜ਼ੀਲੈਂਡ ਵਿਰੁਧ ਸਿਰਫ 75 ਦੌੜਾਂ ਹੀ ਬਣਾ ਸਕੇ ਸਨ ਅਤੇ ਅਪਣੇ ਅਲੋਚਕਾਂ ਨੂੰ ਜਵਾਬ ਦੇਣ ਲਈ ਬੇਤਾਬ ਹੋਣਗੇ ਜੋ ਮੌਜੂਦਾ ਸਾਲ ਵਿਚ ਇਕ ਰੋਜ਼ਾ ਆਲਮੀ ਕ੍ਰਿਕਟ ਦੀ ਜ਼ਿਆਦਾ ਅਹਿਮੀਅਤ ਨਹੀਂ ਹੋਣ ਦੇ ਉਨ੍ਹਾਂ ਦੇ ਬਿਆਨ 'ਤੇ ਸਵਾਲ ਚੁੱਕ ਰਹੇ ਹਨ।
ਧਵਨ, ਭੁਵਨੇਸ਼ਵਰ ਅਤੇ ਪੰਡਿਆ ਦਾ ਆਖ਼ਰੀ 10 ਵਿਚ ਖੇਡਣਾ ਲਗਭਗ ਤੈਅ ਹੈ ਪਰ ਕੇਦਾਰ ਯਾਦਵ ਦੇ ਬਾਹਰ ਹੋਣ ਨਾਲ ਮਨੀਸ਼ ਪਾਂਡੇ ਨੂੰ ਛੇਵੇਂ ਨੰਬਰ 'ਤੇ ਜ਼ਿਆਦਾ ਮੌਕੇ ਮਿਲ ਸਕਦੇ ਹਨ। ਰੋਹਿਤ ਪਿੰਜਣੀ ਦੀ ਸੱਟ ਕਾਰਨ ਬਾਹਰ ਹਨ ਅਤੇ ਧਵਨ ਦੀ ਵਾਪਸੀ ਨਾਲ ਚੋਟੀ ਕ੍ਰਮ ਨੂੰ ਜ਼ਰੂਰੀ ਤਜ਼ਰਬਾ ਮਿਲੇਗਾ।
ਭੁਨੇਸ਼ਵਰ ਦੀ ਵਾਪਸੀ ਨਾਲ ਭਾਰਤ ਦੀ ਗੇਂਦਬਾਜ਼ੀ ਮਜ਼ਬੂਤ ਹੋਵੇਗੀ ਜਿਥੇ ਸ਼ਾਰਦੁਲ ਠਾਕੁਰ ਬਿਲਕੁਲ ਵੀ ਪ੍ਰਭਾਵ ਨਹੀਂ ਛੱਡ ਸਕੇ। ਧਰਮਸ਼ਾਲਾ ਦੀ ਤੇਜ਼ ਗੇਂਦਬਾਜ਼ੀ ਲਈ ਯੋਗ ਪਿੱਚ 'ਤੇ ਰਵਿੰਦਰ ਜਡੇਜਾ ਟੀਮ ਵਿਚ ਰਵਿੰਦਰ ਜਡੇਜਾ ਕੇਵਲ ਇਕ ਸਪਿਨਰ ਹੋ ਸਕਦੇ ਹਨ। ਦਖਣੀ ਅਫ਼ਰੀਕਾ ਦੀ ਟੀਮ ਤਿੰਨ ਮੈਚਾਂ ਦੀ ਇਕ ਰੋਜ਼ਾ ਲੜੀ ਵਿਚ ਆਸਟ੍ਰੇਲੀਆ ਦਾ ਹੂੰਝਾਫੇਰਨ ਤੋਂ ਬਾਅਦ ਇਥੇ ਆਈ ਹੈ।