ਮਾਫ਼ੀਆ ਖਾਨ ਕਈ ਕੇਸਾਂ ਦੇ ਸਿਲਸਿਲੇ ਵਿਚ ਲੰਬੇ ਸਮੇਂ ਤੋਂ ਹਰਦੋਈ ਜੇਲ੍ਹ ਵਿਚ ਨਜ਼ਰਬੰਦ ਸੀ
ਕਰਨਾਲ - ਹਰਦੋਈ ਜੇਲ੍ਹ ਵਿਚ ਬੰਦ ਮਾਫ਼ੀਆ ਖਾਨ ਮੁਬਾਰਕ ਦੀ ਮੌਤ ਹੋ ਗਈ ਹੈ। ਇਸ ਦੇ ਨਾਲ ਹੀ ਯੂਪੀ ਵਿਚ ਇੱਕ ਹੋਰ ਹਿਸਟਰੀ ਸ਼ੀਟਰ ਦੇ ਖ਼ਤਮ ਹੋਣ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਬਦਨਾਮ ਖਾਨ ਮੁਬਾਰਕ ਦੀ ਮੌਤ ਨੇ ਹਲਚਲ ਮਚਾ ਦਿੱਤੀ ਹੈ। ਖ਼ਾਨ ਮੁਬਾਰਕ ਲੰਬੇ ਸਮੇਂ ਤੋਂ ਹਰਦੋਈ ਜੇਲ੍ਹ ਵਿਚ ਬੰਦ ਸੀ। ਹਾਲਤ ਵਿਗੜਨ 'ਤੇ ਉਸ ਨੂੰ ਹਸਪਤਾਲ 'ਚ ਭਰਤੀ ਕਰਵਾਇਆ ਗਿਆ ਸੀ।
ਉਹ ਕਈ ਕੇਸਾਂ ਦੇ ਸਿਲਸਿਲੇ ਵਿਚ ਲੰਬੇ ਸਮੇਂ ਤੋਂ ਹਰਦੋਈ ਜੇਲ੍ਹ ਵਿਚ ਨਜ਼ਰਬੰਦ ਸੀ। ਇਸ ਘਟਨਾ ਦੀ ਸੂਚਨਾ ਮਿਲਣ ਤੋਂ ਬਾਅਦ ਜੇਲ੍ਹ ਦੇ ਅੰਦਰ ਅਤੇ ਆਲੇ-ਦੁਆਲੇ ਵੱਡੀ ਗਿਣਤੀ ਵਿਚ ਪੁਲਿਸ ਬਲ ਤਾਇਨਾਤ ਕਰ ਦਿੱਤਾ ਗਿਆ ਹੈ। ਸਿਹਤ ਵਿਗੜਨ ਤੋਂ ਬਾਅਦ ਮੁਬਾਰਕ ਨੂੰ ਹਰਦੋਈ ਜ਼ਿਲ੍ਹਾ ਹਸਪਤਾਲ ਲਿਜਾਇਆ ਗਿਆ ਪਰ ਉੱਥੇ ਉਸ ਦੀ ਮੌਤ ਹੋ ਗਈ।
ਖ਼ਾਨ ਮੁਬਾਰਕ 'ਤੇ ਉੱਤਰ ਪ੍ਰਦੇਸ਼ ਦੇ ਵੱਖ-ਵੱਖ ਜ਼ਿਲ੍ਹਿਆਂ ਦੇ ਥਾਣਿਆਂ 'ਚ ਕਤਲ, ਕਤਲ ਦੀ ਕੋਸ਼ਿਸ਼, ਡਕੈਤੀ, ਫਿਰੌਤੀ ਅਤੇ ਗੈਂਗਸਟਰ ਸਮੇਤ ਕਈ ਗੰਭੀਰ ਧਾਰਾਵਾਂ ਤਹਿਤ 44 ਮਾਮਲੇ ਦਰਜ ਸਨ। ਸਭ ਤੋਂ ਮਸ਼ਹੂਰ ਮਾਮਲਾ ਇਹ ਸੀ ਕਿ ਕ੍ਰਿਕਟ ਮੈਚ ਦੌਰਾਨ ਜਦੋਂ ਅੰਪਾਇਰ ਨੇ ਉਸ ਨੂੰ ਆਊਟ ਕਰਾਰ ਦਿੱਤਾ ਤਾਂ ਉਸ ਨੇ ਅੰਪਾਇਰ ਨੂੰ ਗੋਲੀ ਮਾਰ ਦਿੱਤੀ।
ਸਾਲ 2012 ਵਿਚ ਮਹਾਰਾਜਗੰਜ ਦੀ ਟਾਂਡਾ ਤਹਿਸੀਲ ਦੇ ਇੱਕ ਮਸ਼ਹੂਰ ਭੱਠਾ ਕਾਰੋਬਾਰੀ ਅਤੇ ਟਰਾਂਸਪੋਰਟਰ ਕਾਰੋਬਾਰੀ ਦੀ ਹੱਤਿਆ ਕਰਕੇ ਮਾਫ਼ੀਆ ਖਾਨ ਮੁਬਾਰਕ ਚਰਚਾ ਵਿਚ ਆਇਆ ਸੀ। ਮਾਫੀਆ ਖਾਨ ਮੁਬਾਰਕ ਆਪਣੇ ਵੱਡੇ ਭਰਾ ਵਾਂਗ ਅੰਬੇਡਕਰ ਨਗਰ ਵਿਚ ਅਪਰਾਧ ਦੀ ਦੁਨੀਆ ਵਿਚ ਆਇਆ ਸੀ। ਅੰਡਰਵਰਲਡ ਡਾਨ ਖਾਨ ਜ਼ਫਰ ਦੇ ਭਰਾ ਖਾਨ ਮੁਬਾਰਕ ਨੇ ਫਿਰੌਤੀ ਲਈ ਡਾਕਟਰਾਂ ਅਤੇ ਕਾਰੋਬਾਰੀਆਂ ਨੂੰ ਨਿਸ਼ਾਨਾ ਬਣਾਇਆ।
ਖਾਨ ਮੁਬਾਰਕ ਮੁੰਬਈ ਵਿਚ ਕਾਲਾ ਘੋੜਾ ਕਤਲੇਆਮ ਤੋਂ ਬਾਅਦ ਸੁਰਖੀਆਂ ਵਿਚ ਆਇਆ ਸੀ, ਜਦੋਂ ਕੈਦੀਆਂ ਨੂੰ ਲਿਜਾ ਰਹੀ ਇੱਕ ਵੈਨ ਵਿਚ ਦੋ ਕੈਦੀਆਂ ਨੂੰ ਗੋਲੀ ਮਾਰ ਦਿੱਤੀ ਗਈ ਸੀ। ਇਸ ਵਿਚ ਖਾਨ ਮੁਬਾਰਕ ਦਾ ਨਾਂ ਆਇਆ। 2006 'ਚ ਉਸ ਨੇ ਬਸਪਾ ਨੇਤਾ 'ਤੇ ਜਾਨਲੇਵਾ ਹਮਲਾ ਕੀਤਾ, ਉਹ 6 ਗੋਲੀਆਂ ਲੱਗਣ ਦੇ ਬਾਵਜੂਦ ਬਚ ਗਿਆ, ਫਿਰ 2008 'ਚ ਉਸ ਨੇ ਫਿਰ ਹਮਲਾ ਕੀਤਾ, ਜਿਸ 'ਚ ਨੇਤਾ ਦੀ ਮੌਤ ਹੋ ਗਈ। ਰੇਲਵੇ ਸਕਰੈਪ ਨੂੰ ਲੈ ਕੇ ਉਸ ਦੀ ਮੁੰਨਾ ਬਜਰੰਗੀ ਨਾਲ ਦੁਸ਼ਮਣੀ ਚੱਲ ਰਹੀ ਸੀ। ਦੱਸਿਆ ਜਾਂਦਾ ਹੈ ਕਿ ਮਾਫੀਆ ਡਾਨ ਮੁਖਤਾਰ ਅੰਸਾਰੀ ਨੇ ਦੋਵਾਂ ਵਿਚਾਲੇ ਸਮਝੌਤਾ ਕੀਤਾ ਸੀ।
