ਡਾਲਰ ਦੇ ਮੁਕਾਬਲੇ ਰੁਪਏ ਦੇ ਟੁੱਟ ਕੇ ਨਵੇਂ ਰੀਕਾਰਡ ਹੇਠਲੇ ਪੱਧਰ 'ਤੇ ਆਉਣ ਨਾਲ ਪਟਰੌਲ ਤੇ ਡੀਜ਼ਲ ਦੀਆਂ ਕੀਮਤਾਂ ਮੰਗਲਵਾਰ ਨੂੰ ਨਵੀਂ ਰੀਕਾਰਡ ਉਚਾਈ 'ਤੇ ਪਹੁੰਚ ਗਈਆਂ....
ਨਵੀਂ ਦਿੱਲੀ : ਡਾਲਰ ਦੇ ਮੁਕਾਬਲੇ ਰੁਪਏ ਦੇ ਟੁੱਟ ਕੇ ਨਵੇਂ ਰੀਕਾਰਡ ਹੇਠਲੇ ਪੱਧਰ 'ਤੇ ਆਉਣ ਨਾਲ ਪਟਰੌਲ ਤੇ ਡੀਜ਼ਲ ਦੀਆਂ ਕੀਮਤਾਂ ਮੰਗਲਵਾਰ ਨੂੰ ਨਵੀਂ ਰੀਕਾਰਡ ਉਚਾਈ 'ਤੇ ਪਹੁੰਚ ਗਈਆਂ। ਰੁਪਏ ਵਿਚ ਕਮਜ਼ੋਰੀ ਨਾਲ ਦਰਾਮਦ ਮਹਿੰਗੀ ਹੋਈ ਹੈ ਜਿਸ ਨਾਲ ਤੇਲ ਕੀਮਤਾਂ ਵਿਚ ਵਾਧਾ ਜਾਰੀ ਹੈ। ਜਨਤਕ ਖੇਤਰ ਦੀਆਂ ਪਟਰੌਲੀਅਮ ਕੰਪਨੀਆਂ ਦੇ ਨੋਟੀਫ਼ੀਕੇਸ਼ਨ ਮੁਤਾਬਕ ਪਟਰੌਲ ਅਤੇ ਡੀਜ਼ਲ ਦੀਆਂ ਕੀਮਤਾਂ ਵਿਚ 14-14 ਪੈਸੇ ਪ੍ਰਤੀ ਲਿਟਰ ਦਾ ਵਾਧਾ ਕੀਤਾ ਗਿਆ ਹੈ। ਦਿੱਲੀ ਵਿਚ ਪਟਰੌਲ ਹੁਣ 80.87 ਰੁਪਏ ਪ੍ਰਤੀ ਲਿਟਰ ਅਤੇ ਮੁੰਬਈ ਵਿਚ ਇਹ 88.26 ਰੁਪਏ ਲਿਟਰ ਹੋ ਗਿਆ ਹੈ।
ਦਿੱਲੀ ਵਿਚ ਡੀਜ਼ਲ 72.97 ਅਤੇ ਮੁੰਬਈ ਵਿਚ 77.47 ਲਿਟਰ 'ਤੇ ਪਹੁੰਚ ਗਿਆ ਹੈ। ਮਹਾਨਗਰਾਂ ਵਿਚ ਦਿੱਲੀ ਵਿਚ ਪਟਰੌਲ ਦੀ ਕੀਮਤ ਸੱਭ ਤੋਂ ਘੱਟ ਹੈ ਕਿਉਂਕਿ ਇਥੇ ਟੈਕਸ ਘੱਟ ਹੈ। ਮੁੰਬਈ ਵਿਚ ਕੀਮਤ ਸੱਭ ਤੋਂ ਜ਼ਿਆਦਾ ਹੈ ਕਿਉਂਕਿ ਇਥੇ ਵੈਟ ਦੀ ਦਰ ਜ਼ਿਆਦਾ ਹੇ। ਚੇਨਈ ਵਿਚ ਪਟਰੌਲ ਦੀ ਕੀਮਤ 84.07 ਰੁਪਏ ਲਿਟਰ ਹੋ ਗਈ ਹੈ ਜਦਕਿ ਕੋਲਕਾਤਾ ਵਿਚ ਇਹ ਅੰਕੜਾ 83.75 ਹੈ।
ਚੇਨਈ ਵਿਚ ਡੀਜ਼ਲ 77.15 ਅਤੇ ਕੋਲਕਾਤਾ ਵਿਚ 75.82 ਰੁਪਏ ਲਿਟਰ ਹੈ। ਪਟਰੌਲੀਅਮ ਕੰਪਨੀਆਂ ਦਾ ਕਹਿਣਾ ਹੈ ਕਿ ਕੇਂਦਰ ਜਾਂ ਰਾਜ ਦੇ ਕਰ ਤੇ ਡੀਲਰ ਦੇ ਕਮਿਸ਼ਨ ਨੂੰ ਵੱਖ ਕਰ ਕੇ ਪਟਰੌਲ ਦੀ ਰੀਫ਼ਾਇਨਰੀ ਗੇਟ 'ਤੇ ਕੀਮਤ 40.45 ਰੁਪਏ ਲਿਟਰ ਪੈਂਦੀ ਹੈ। ਡੀਜ਼ਲ ਦੇ ਮਾਮਲੇ ਵਿਚ ਇਹ 44.28 ਰੁਪਏ ਲਿਟਰ ਹੈ। (ਏਜੰਸੀ)