ਰਾਸ਼ਟਰੀ ਯੋਗਤਾ ਅਤੇ ਦਾਖਲਾ ਪ੍ਰੀਖਿਆ (NEET 2020) ਤੋਂ ਠੀਕ ਇਕ ਦਿਨ ਪਹਿਲਾਂ 19 ਸਾਲਾ ਵਿਦਿਆਰਥਣ ਜੋਤੀ ਸ਼੍ਰੀ ਦੁਰਗਾ ਨੇ ਸ਼ਨੀਵਾਰ ਸਵੇਰੇ ਆਤਮ ਹੱਤਿਆ ਕਰ ਲਈ।
ਨਵੀਂ ਦਿੱਲੀ: ਰਾਸ਼ਟਰੀ ਯੋਗਤਾ ਅਤੇ ਦਾਖਲਾ ਪ੍ਰੀਖਿਆ (NEET 2020) ਤੋਂ ਠੀਕ ਇਕ ਦਿਨ ਪਹਿਲਾਂ 19 ਸਾਲਾ ਵਿਦਿਆਰਥਣ ਜੋਤੀ ਸ਼੍ਰੀ ਦੁਰਗਾ ਨੇ ਸ਼ਨੀਵਾਰ ਸਵੇਰੇ ਆਤਮ ਹੱਤਿਆ ਕਰ ਲਈ। ਦਰਅਸਲ ਪਿਛਲੇ ਕੁਝ ਦਿਨਾਂ ਤੋਂ ਵਿਦਿਆਰਥਣ ਮੈਡੀਕਲ ਕਾਲਜ ਵਿਚ ਦਾਖਲੇ ਨੂੰ ਲੈ ਕੇ ਤਣਾਅ ਵਿਚ ਸੀ। ਤਮਿਲਨਾਡੂ ਵਿਚ ਦੋ ਦਿਨਾਂ ਵਿਚਕਾਰ ਇਹ ਦੂਜੀ ਅਜਿਹੀ ਮੌਤ ਹੈ।
NEET 2020
ਪੁਲਿਸ ਮੁਤਾਬਕ ਜੋਤੀ ਨੀਟ ਪ੍ਰੀਖਿਆ ਦੀ ਤਿਆਰੀ ਲਈ ਪਹਿਲਾਂ ਕੋਚਿੰਗ ਕਲਾਸ ਲਗਾਉਂਦੀ ਸੀ। ਉਹ ਮੈਡੀਕਲ ਕਾਲਜ ਵਿਚ ਦਾਖਲੇ ਨੂੰ ਲੈ ਕੇ ਕਾਫ਼ੀ ਦਿਨਾਂ ਤੋਂ ਪਰੇਸ਼ਾਨ ਸੀ। ਜੋਤੀ ਨੇ ਇਸ ਤੋਂ ਪਹਿਲਾਂ ਵੀ ਨੀਟ ਪ੍ਰੀਖਿਆ ਦਿੱਤੀ ਸੀ ਪਰ ਉਸ ਵਿਚ ਉਸ ਦੀ ਚੋਣ ਨਹੀਂ ਹੋ ਸਕੀ ਸੀ।
NEET 2020
ਅਪਣੇ ਸੁਸਾਈਡ ਨੋਟ ਵਿਚ ਜੋਤੀ ਨੇ ਲਿਖਿਆ ਹੈ ਕਿ ‘ਮੈਂ ਚੰਗੀ ਤਰ੍ਹਾਂ ਪੜ੍ਹਾਈ ਕੀਤੀ ਹੈ ਪਰ ਮੈਨੂੰ ਡਰ ਹੈ, ਜੇਕਰ ਕਿਸੇ ਮੈਡੀਕਲ ਕਾਲਜ ਵਿਚ ਮੇਰੀ ਚੋਣ ਨਹੀਂ ਹੋਈ ਤਾਂ ਸਾਰੇ ਨਿਰਾਸ਼ ਹੋਣਗੇ’। ਉਸ ਨੇ ਅੱਗੇ ਲਿਖਿਆ ਕਿ ਜੇਕਰ ਉਹ ਮੈਡੀਕਲ ਕਾਲਜ ਵਿਚ ਸੀਟ ਲੈਣ ਵਿਚ ਅਸਫਲ ਰਹਿੰਦੀ ਹੈ ਤਾਂ ਉਸ ਦੇ ਪਰਿਵਾਰ ਦੀ ਸਾਰੀ ਮਿਹਨਤ ਬੇਕਾਰ ਚਲੀ ਜਾਵੇਗੀ। ਉਸ ਨੇ ਅਪਣੇ ਪਰਿਵਾਰ ਲਈ ਆਡੀਓ ਵੀ ਰਿਕਾਰਡ ਕੀਤਾ ਅਤੇ ਅਪਣੇ ਜੀਵਨ ਨੂੰ ਸਪਾਮਤ ਕਰਨ ਦੇ ਕਦਮ ਚੁੱਕਣ ਲਈ ਉਹਨਾਂ ਕੋਲੋਂ ਮਾਫ਼ੀ ਮੰਗੀ।
NEET Students
ਤਮਿਲਨਾਡੂ ਦੇ ਵਿਰੋਧੀ ਨੇਤਾ ਐਮਕੇ ਸਟਾਲਿਨ ਨੇ ਜੋਤੀ ਦੀ ਮੌਤ ‘ਤੇ ਪ੍ਰਤੀਕਿਰਿਆ ਦਿੰਦੇ ਹੋਏ ਵਿਦਿਆਰਥਣ ਨੂੰ ਸਲਾਹ ਦਿੱਤੀ ਸੀ ਕਿ ਆਤਮਹੱਤਿਆ ਕੋਈ ਹੱਲ ਨਹੀਂ ਹੈ। ਦੱਸ ਦਈਏ ਕਿ ਤਮਿਲਨਾਡੂ ਵਿਚ ਇਸ ਤੋਂ ਪਹਿਲਾਂ ਵੀਰਵਾਰ ਨੂੰ 19 ਸਾਲ ਦੇ ਵੀ. ਵਿਗਨੇਸ਼ ਨੇ ਆਤਮ ਹੱਤਿਆ ਕਰ ਲਈ ਸੀ। ਉਸ ਨੇ ਇਸ ਤੋਂ ਪਹਿਲਾਂ ਦੋ ਵਾਰ ਨੀਟ ਪ੍ਰੀਖਿਆ ਦਿੱਤੀ ਸੀ।
