ਮੰਤਰੀ ਜੀ ਲਈ ਖ਼ਰੀਦੀ ਜਾ ਰਹੀ ਨਵੀਂ ਫ਼ਾਰਚੂਨਰ ਕਾਰ।
ਸਿਰਸਾ (ਸੁਰਿੰਦਰ ਪਾਲ ਸਿੰਘ) : ਹਰਿਆਣਾ ਮੰਤਰੀ ਮੰਡਲ ਦੀ ਮੀਟਿੰਗ ਵਿੱਚ ਸਰਕਾਰ ਨੇ ਸੈਕੜੇ ਰੋਡਵੇਜ਼ ਕਰਮਚਾਰੀਆਂ ਦਾ ਰੋਜ਼ਗਾਰ ਖੋਹਕੇ ਆਪਣੇ ਮੰਤਰੀਆਂ ਨੂੰ ਨਵੀਆਂ ਲਗਜ਼ਰੀ ਕਾਰਾਂ ਵਿੱਚ ਝੂਟੇ ਦੇਣ ਦਾ ਫੈਸਲਾ ਕੀਤਾ ਹੈ। ਪਹਿਲਾਂ ਤੋਂ ਹੀ ਲਗਜ਼ਰੀ ਜ਼ਿੰਦਗੀ ਹੰਢਾ ਰਹੇ ਹਰਿਆਣਾ ਸਰਕਾਰ ਦੇ ਮੰਤਰੀਆਂ ਤੇ ਹੁਣ ਦੇ ਜਜਪਾ-ਭਾਜਪਾ ਸਰਕਾਰ ਨੇ ਹੋਰ ਮੇਹਰਬਾਨੀਆਂ ਦੀ ਵਾਛੜ ਕਰ ਦਿੱਤੀ ਹੈ।
ਇਨ੍ਹਾਂ ਮੰਤਰੀਆਂ ਲਈ ਸਰਕਾਰ ਨੇ ਹੁਣ ਨਵੀਆਂ ਲਗਜ਼ਰੀ ਕਾਰਾਂ ਦੀ ਖ੍ਰੀਦ ਨੂੰ ਹਰੀ ਝੰਡੀਂ ਦੇ ਦਿੱਤੀ ਹੈ। ਇਨ੍ਹਾਂ ਚਮਚਮਾਉਦੀਆਂ ਕਾਰਾਂ ਵਿੱਚ ਹਰਿਆਣਾ ਦੇ ਮੰਤਰੀ ਜਲਦੀ ਹੀ ਝੂਟੇ ਲੈਣਗੇ। ਇਨ੍ਹਾਂ ਮੰਤਰੀਆਂ ਦੇ ਦਰਵਾਜ਼ੇ ਤੇ ਹੁਣ ਨਵੀਆਂ ਨਕੋਰ ਫਾਰਚੂਨਰ ਕਾਰਾਂ ਖੜੀਆਂ ਹੋਣਗੀਆਂ। ਇਨ੍ਹਾਂ ਨਵੀਆਂ ਗੱਡੀਆਂ ਦੀ ਖ੍ਰੀਦ ਸਬੰਧੀ ਮੰਤਰੀ ਮੰਡਲ ਦੀ ਹਾਈ ਪਾਵਰ ਪਰਚੇਜ਼ ਕਮੇਟੀ ਦੀ ਮੋਹਰ ਲੱਗ ਗਈ ਹੈ।
ਯਾਦ ਰਹੇ ਕਿ ਪਿਛਲੀ ਵਾਰ ਵੀ ਭਾਜਪਾ ਸਰਕਾਰ ਬਣਨ ਸਮੇਂ ਕਈ ਨਵੀਆਂ ਕਾਰਾਂ ਦੀ ਖਰੀਦ ਕੀਤੀ ਗਈ ਸੀ। ਹੁਣ ਇੱਕ ਵਾਰ ਹੋਰ 7 ਲਗਜ਼ਰੀ ਕਾਰਾਂ ਖਰੀਦੀਆਂ ਜਾ ਰਹੀਆਂ ਹਨ। ਸਰਕਾਰੀ ਖਜ਼ਾਨੇ ਵਿੱਚੋ ਖ੍ਰੀਦੀਆਂ ਇਨ੍ਹਾਂ ਨਵੀਆਂ ਫਾਰਚੂਨਰ ਕਾਰਾ ਦੀ ਕੀਮਤ 38 ਲੱਖ ਤੋਂ ਉੱਪਰ ਹੈ ਭਾਵ 2 ਕਰੋੜ 4 ਲੱਖ ਰੁਪਏ ਦੀਆਂ ਨਵੀਆਂ ਚਮਚਮਾਂਉਦੀਆਂ ਕਾਰਾਂ ਵਿੱਚ ਮੰਤਰੀ ਜੀ ਜਲਦੀ ਹੀ ਝੂਟੇ ਲੈਣਗੇ।
ਇਸੇ ਮੰਤਰੀ ਮੰਡਲ ਦੀ ਮੀਟਿੰਗ ਵਿਚ ਸਰਕਾਰ ਲਈ ਮੁਨਾਫਾ ਕਮਾ ਰਹੀ ਹਰਿਆਣਾ ਰੋਡਵੇਜ਼ ਅਤੇ ਉਸਦੇ ਕਰਮਚਾਰੀਆਂ ਦੇ ਭਾਰੀ ਵਿਰੋਧ ਦੇ ਚਲਦੇ ਹੀ ਹਰਿਆਣਾ ਰੋਡਵੇਜ਼ ਦੇ ਨਿੱਜੀਕਰਨ ਨੂੰ ਹਰੀ ਝੰਡੀ ਦੇ ਦਿੱਤੀ ਗਈ। ਮੰਤਰੀ ਮੰਡਲ ਕਮੇਟੀ ਨੇ ਕਿਲੋਮੀਟਰ ਸਕੀਮ ਦੇ ਤਹਿਤ 510 ਬੱਸਾਂ ਨੂੰ ਸੜਕਾਂ ਤੇ ਦੌੜਨ ਦੀ ਮਨਜ਼ੂਰੀ ਦੇ ਦਿੱਤੀ ਹੈ ਹੁਣ ਇਨ੍ਹਾਂ ਕਿਲੋਮੀਟਰ ਸਕੀਮ ਵਾਲੀਆਂ 510 ਬੱਸਾਂ ਸਬੰਧੀ ਪ੍ਰਾਈਵੇਟ ਅਪਰੇਟਰਾਂ ਨੇ ਨਿਰਣਾ ਲੈਣਾ ਹੈ ਕਿ ਉਹ ਕਿਹੜੇ ਚੁਣਵੇਂ ਲਾਭਕਾਰੀ ਰੂਟਾਂ ਤੇ ਬੱਸਾਂ ਚਲਾਉਣਗੇ।