ਕਠੂਆ ਬਲਾਤਕਾਰ ਕੇਸ ਤੋਂ ਬਾਅਦ ਦੇਸ਼ ਭਰ ਵਿਚ ਦੋਸ਼ੀਆਂ ਨੂੰ ਸਖ਼ਤ ਸਜ਼ਾ ਦੇਣ ਦੀ ਮੰਗ ਨੂੰ ਲੈ ਕੇ ਹੋ ਰਹੇ ਪ੍ਰਦਰਸ਼ਨ ਵਿਚਕਾਰ ਮਹਿਲਾ ਅਤੇ ...
ਨਵੀਂ ਦਿੱਲੀ : ਕਠੂਆ ਬਲਾਤਕਾਰ ਕੇਸ ਤੋਂ ਬਾਅਦ ਦੇਸ਼ ਭਰ ਵਿਚ ਦੋਸ਼ੀਆਂ ਨੂੰ ਸਖ਼ਤ ਸਜ਼ਾ ਦੇਣ ਦੀ ਮੰਗ ਨੂੰ ਲੈ ਕੇ ਹੋ ਰਹੇ ਪ੍ਰਦਰਸ਼ਨ ਵਿਚਕਾਰ ਮਹਿਲਾ ਅਤੇ ਬਾਲ ਵਿਕਾਸ ਮੰਤਰੀ ਮੇਨਕਾ ਗਾਂਧੀ ਦਾ ਕਹਿਣਾ ਹੈ ਕਿ ਸਰਕਾਰ ਪੋਕਸੋ ਐਕਟ ਵਿਚ ਸੋਧ ਕਰੇਗੀ।
ਇਸ ਸੋਧ ਮੁਤਾਬਕ 12 ਸਾਲ ਤੋਂ ਘੱਟ ਉਮਰ ਦੀ ਬੱਚੀ ਨਾਲ ਰੇਪ ਦੇ ਮਾਮਲੇ ਵਿਚ ਮੌਤ ਦੀ ਸਜ਼ਾ ਦੀ ਵਿਵਸਥਾ ਕੀਤੀ ਜਾਵੇਗੀ। ਅਜੇ ਤਕ ਪੋਕਸੋ ਐਕਟ ਦੇ ਸੈਕਸ਼ਨ 3,4 ਅਤੇ 6 ਮੁਤਾਬਕ ਰੇਪ 'ਤੇ 10 ਤੋਂ ਲੈ ਕੇ ਉਮਰ ਕੈਦ ਦੀ ਸਜ਼ਾ ਦੀ ਵਿਵਸਥਾ ਹੈ।
ਕਠੂਆ ਵਿਚ ਅੱਠ ਸਾਲ ਦੀ ਬੱਚੀ ਨੂੰ 10 ਜਨਵਰੀ ਨੂੰ ਉਸ ਦੇ ਪਿੰਡ ਨੇੜੇ ਤੋਂ ਅਗਵਾ ਕਰ ਲਿਆ ਗਿਆ ਸੀ, ਉਸ ਨੂੰ ਨਸ਼ੇ ਵਿਚ ਰਖਿਆ ਗਿਆ ਅਤੇ ਕਈ ਦਿਨ ਤਕ ਉਸ ਨਾਲ ਕਈ ਲੋਕਾਂ ਵਲੋਂ ਸਮੂਹਕ ਬਲਾਤਕਾਰ ਕੀਤਾ ਗਿਆ। ਇਨ੍ਹਾਂ ਵਿਚ ਪੁਲਿਸ ਅਧਿਕਾਰੀ ਅਤੇ ਇਕ ਨਾਬਾਲਗ ਵੀ ਸ਼ਾਮਲ ਸੀ ਅਤੇ ਆਖ਼ਰਕਾਰ ਉਸ ਬੱਚੀ ਨੂੰ ਮਾਰ ਦਿਤਾ ਗਿਆ।
ਚਾਰਜਸ਼ੀਟ ਮੁਤਾਬਕ ਉਸ ਦਾ ਸਿਰ ਪੱਥਰ ਨਾਲ ਭੰਨਣ ਤੋਂ ਪਹਿਲਾਂ ਪੁਲਿਸ ਅਧਿਕਾਰੀਆਂ ਵਿਚੋਂ ਇਕ ਕਾਤਲ ਨੇ ਕੁੱਝ ਦੇਰ ਰੁਕਣ ਲਈ ਕਿਹਾ ਤਾਕਿ ਉਹ ਇਕ ਵਾਰ ਹੋਰ ਬੱਚੀ ਨਾਲ ਬਲਾਤਕਾਰ ਕਰ ਸਕੇ।
ਬਲਾਤਕਾਰੀਆਂ ਵਿਚੋਂ ਇਕ ਨੂੰ ਉੱਤਰ ਪ੍ਰਦੇਸ਼ ਦੇ ਮੇਰਠ ਤੋਂ ਖ਼ਾਸ ਤੌਰ 'ਤੇ ਬੁਲਾਇਆ ਗਿਆ ਸੀ ਤਾਕਿ ਉਹ ਅਪਣੀ ਹਵਸ ਪੂਰੀ ਕਰ ਸਕੇ। ਬੱਚੀ ਦੀ ਲਾਸ਼ 17 ਜਨਵਰੀ ਨੂੰ ਜੰਗਲਾਂ ਵਿਚੋਂ ਬਰਾਮਦ ਹੋਈ। ਜਦੋਂ ਉਸ ਦੀ ਬਿਰਾਦਰੀ ਅਤੇ ਸਥਾਨਕ ਲੋਕਾਂ ਨੇ ਵਿਰੋਧ ਕੀਤਾ, ਦੋ ਪੁਲਿਸ ਵਾਲਿਆਂ ਨੇ ਸਬੂਤਾਂ ਨਾਲ ਛੇੜਛਾੜ ਕਰ ਕੇ ਦੋਸ਼ੀ ਦੀ ਮਦਦ ਕਰਨ ਦੀ ਕੋਸ਼ਿਸ਼ ਕੀਤੀ। ਇਸ ਮਾਮਲੇ ਵਿਚ ਛੇ ਲੋਕਾਂ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਹੈ।
ਮੁੱਖ ਦੋਸ਼ੀ ਸਾਂਜੀਰਾਮ ਨੇ ਇਸ ਅਪਰਾਧ ਦੀ ਸਾਜਿਸ਼ ਰਚੀ ਸੀ ਤਾਕਿ ਬਖ਼ੇਰਵਾਲ ਬੰਜਾਰਾ ਸਮਾਜ ਦੇ ਲੋਕਾਂ ਵਿਚ ਡਰ ਪੈਦਾ ਕੀਤਾ ਜਾ ਸਕੇ ਅਤੇ ਉਨ੍ਹਾਂ ਨੂੰ ਰਸਾਨਾ ਖੇਤਰ ਤੋਂ ਖਦੇੜਿਆ ਜਾ ਸਕੇ। ਹੋਰ ਦੋਸ਼ੀਆਂ ਵਿਚ ਸਪੈਸ਼ਲ ਪੁਲਿਸ ਅਫ਼ਸਰ ਦੀਪਕ ਖ਼ਜੂਰੀਆ, ਸਰੇਂਦਰ ਸ਼ਰਮਾ ਅਤੇ ਪ੍ਰਵੇਸ਼ ਕੁਮਾਰੂ ਤੋਂ ਇਲਾਵਾ ਸਾਂਜੀਰਾਮ ਦਾ ਨਾਬਾਲਗ ਭਤੀਜਾ ਅਤੇ ਸਾਂਜੀਰਾਮ ਦਾ ਬੇਟਾ ਵਿਸ਼ਾਲ ਜੰਗੋਤਰਾ ਸ਼ਾਮਲ ਹਨ।