ਅਗਲੇ ਕੁੱਝ ਸਾਲਾਂ 'ਚ ਭਾਰਤ ਸਮੇਤ ਵਿਸ਼ਵ ਦੇ ਕਈ ਵੱਡੇ ਦੇਸ਼ਾਂ ਵਿਚ ਪਾਣੀ ਦਾ ਸੰਕਟ ਪੈਦਾ ਹੋ ਸਕਦਾ ਹੈ।
ਨਵੀਂ ਦਿੱਲੀ : ਅਗਲੇ ਕੁੱਝ ਸਾਲਾਂ 'ਚ ਭਾਰਤ ਸਮੇਤ ਵਿਸ਼ਵ ਦੇ ਕਈ ਵੱਡੇ ਦੇਸ਼ਾਂ ਵਿਚ ਪਾਣੀ ਦਾ ਸੰਕਟ ਪੈਦਾ ਹੋ ਸਕਦਾ ਹੈ। ਇਸ ਦਾ ਦਾਅਵਾ ਇਕ ਰਿਪੋਰਟ ਵਿਚ ਕੀਤਾ ਗਿਆ। ਰਿਪੋਰਟ ਅਨੁਸਾਰ ਦੁਨੀਆਂ ਦੇ 500,000 ਡੈਮਾਂ ਲਈ ਸ਼ੁਰੂਆਤੀ ਚਿਤਾਵਨੀ ਉਪਗ੍ਰਹਿ ਪ੍ਰਣਾਲੀ ਬਣਾਉਣ ਵਾਲੇ ਡਿਵੈਲਪਰ ਅਨੁਸਾਰ ਭਾਰਤ, ਮੋਰੱਕੋ, ਇਰਾਕ ਅਤੇ ਸਪੇਨ ਵਿਚ ਜਲ ਸੰਕਟ ‘ਡੇ ਸਿਫ਼ਰ’ ਤਕ ਪਹੁੰਚ ਜਾਵੇਗਾ।
ਭਾਵ ਕਿ ਟਿਊਬਾਂ ਤੋਂ ਪਾਣੀ ਇਕ ਦਮ ਖ਼ਤਮ ਹੋ ਸਕਦਾ ਹੈ। ਖੋਜ ਵਿਚ ਕਿਹਾ ਗਿਆ ਹੈ ਕਿ ਭਾਰਤ ਵਿਚ ਨਰਮਦਾ ਨਦੀ ਨਾਲ ਜੁੜੇ ਦੋ ਜਲ ਡੈਮਾਂ ਵਿਚ ਪਾਣੀ ਦੀ ਮਾਤਰਾ ਤੈਅ ਕਰਨ ਨੂੰ ਲੈ ਕੇ ਸਿੱਧੇ ਤੌਰ 'ਤੇ ਤਣਾਅ ਵਧਿਆ ਹੋਇਆ ਹੈ। ਦਸਣਯੋਗ ਹੈ ਕਿ ਪਿਛਲੇ ਸਾਲ ਘੱਟ ਮੀਂਹ ਪੈਣ ਦੀ ਵਜ੍ਹਾ ਨਾਲ ਮੱਧ ਪ੍ਰਦੇਸ਼ ਦੇ ਡੈਮ ਇੰਦਰਾ ਸਾਗਰ ਦੇ ਉਪਰੀ ਹਿੱਸੇ ਵਿਚ ਪਾਣੀ ਇਸ ਮੌਸਮ ਦੇ ਤੀਸਰੇ ਸੱਭ ਤੋਂ ਹੇਠਲੇ ਪੱਧਰ 'ਤੇ ਪਹੁੰਚ ਗਿਆ। ਜਦੋਂ ਇਸ ਕਮੀ ਨੂੰ ਪੂਰਾ ਕਰਨ ਲਈ ਹੇਠਲੇ ਖੇਤਰ ਵਿਚ ਸਥਿਤ ਸਰਦਾਰ ਸਰੋਵਰ ਡੈਮ ਤੋਂ ਪਾਣੀ ਲਿਆ ਗਿਆ ਤਾਂ ਕਾਫ਼ੀ ਹੰਗਾਮਾ ਹੋਇਆ ਕਿਉਂਕਿ ਸਰਦਾਰ ਸਰੋਵਰ ਡੈਮ ਵਿਚ 30 ਕਰੋੜ ਲੋਕਾਂ ਲਈ ਪੀਣ ਵਾਲਾ ਪਾਣੀ ਹੈ। ਦਸ ਦਈਏ ਕਿ ਪਿਛਲੇ ਮਹੀਨੇ ਹੀ ਗੁਜਰਾਤ ਸਰਕਾਰ ਨੇ ਸਿੰਚਾਈ ਰੋਕਦੇ ਹੋਏ ਕਿਸਾਨਾਂ ਨੂੰ ਫ਼ਸਲ ਨਾ ਉਗਾਉਣ ਦੀ ਅਪੀਲ ਕੀਤੀ ਸੀ।