ਕੋਰੋਨਾ ਸੰਕਟ ਅਤੇ ਤਾਲਾਬੰਦੀ ਵਿਚਾਲੇ ਚੀਨ ਨੇ ਭਾਰਤੀ ਸਰਹੱਦ 'ਤੇ ਹਲਚਲ ਵਧਾ ਦਿਤੀ ਹੈ।
ਨਵੀਂ ਦਿੱਲੀ, 12 ਮਈ: ਕੋਰੋਨਾ ਸੰਕਟ ਅਤੇ ਤਾਲਾਬੰਦੀ ਵਿਚਾਲੇ ਚੀਨ ਨੇ ਭਾਰਤੀ ਸਰਹੱਦ 'ਤੇ ਹਲਚਲ ਵਧਾ ਦਿਤੀ ਹੈ। ਉਧਰ, ਭਾਰਤ ਨੇ ਵੀ ਚੀਨ ਨੂੰ ਕਰਾਰਾ ਜਵਾਬ ਦੇਣ ਲਈ ਲਦਾਖ਼ ਵਿਚ ਲੜਾਕੂ ਜਹਾਜ਼ਾਂ ਦੀ ਤੈਨਾਤੀ ਕਰ ਦਿਤੀ ਹੈ। ਦਰਅਸਲ, ਪਿਛਲੇ ਦਿਨੀਂ ਭਾਰਤੀ ਖੇਤਰ ਲਾਗੇ ਚੀਨੀ ਫ਼ੌਜੀ ਹੈਲੀਕਾਪਟਰ ਉਡਾਨ ਭਰਦੇ ਵਿਖਾਈ ਦਿਤੇ ਸਨ ਅਤੇ ਉਹ ਭਾਰਤੀ ਹਵਾਈ ਖੇਤਰ ਦੀ ਉਲੰਘਣਾ ਕਰ ਸਕਦੇ ਸਨ।
ਸਰਕਾਰੀ ਸੂਤਰਾਂ ਨੇ ਦਸਆਿ ਕਿ ਜਿਉਂ ਹੀ ਚੀਨੀ ਹੈਲੀਕਾਪਟਰਾਂ ਦੀ ਆਵਾਜਾਈ ਸ਼ੁਰੂ ਹੋਈ, ਭਾਰਤੀ ਲੜਾਕੂ ਜਹਾਜ਼ਾਂ ਨੂੰ ਲਦਾਖ਼ ਸੈਕਟਰ ਵਿਚ ਸਰਹੱਦੀ ਖੇਤਰਾਂ ਵਿਚ ਲਿਜਾਇਆ ਗਿਆ। ਭਾਰਤੀ ਹਵਾਈ ਫ਼ੌਜ ਦੇ ਲੜਾਕੂ ਜਹਾਜ਼ ਨੇ ਲਾਗਲੇ ਬੇਸ ਕੈਂਪ ਤੋਂ ਉਡਾਨ ਭਰੀ ਸੀ। ਫ਼ਿਲਹਾਲ, ਚੀਨੀ ਹੈਲੀਕਾਪਟਰਾਂ ਨੇ ਭਾਰਤੀ ਹਵਾਈ ਖੇਤਰ ਦੀ ਉਲੰਘਣਾ ਨਹੀਂ ਕੀਤੀ। ਇਹ ਘਟਨਾ ਪਿਛਲੇ ਹਫ਼ਤੇ ਦੀ ਹੈ ਜਦ ਭਾਰਤੀ ਅਤੇ ਚੀਨ ਫ਼ੌਜੀ ਇਕ ਦੂਜੇ ਨਾਲ ਉਲਝ ਗਏ ਸਨ। ਫਿਰ 150 ਤੋਂ ਵੱਧ ਚੀਨੀ ਫ਼ੌਜੀ ਨੇ ਭਾਰਤੀ ਖੇਤਰ ਵਿਚ ਘੁਸਪੈਠ ਦੀ ਕੋਸ਼ਿਸ਼ ਕੀਤੀ ਸੀ।
ਸੂਤਰਾਂ ਨੇ ਕਿਹਾ ਕਿ ਇਹ ਪਹਿਲੀ ਵਾਰ ਹੈ ਜਦ ਕਈ ਸਾਲਾਂ ਵਿਚ ਭਾਰਤ ਨੇ ਲੜਾਕੂ ਜਹਾਜ਼ਾਂ ਨੂੰ ਤੈਨਾਤ ਕਰ ਕੇ ਹਵਾਈ ਖੇਤਰਾਂ ਦੀ ਉਲੰਘਣਾ ਕਰਨ ਦੇ ਚੀਨੀ ਯਤਨਾਂ ਦਾ ਜਵਾਬ ਦਿਤਾ ਹੈ। ਪਿਛਲੇ ਇਕ ਹਫ਼ਤੇ ਵਿਚ ਦੋਹਾਂ ਦੇਸ਼ਾਂ ਦੀਆਂ ਫ਼ੌਜਾਂ ਦਾ ਕਈ ਵਾਰ ਆਹਮਣਾ-ਸਾਹਮਣਾ ਹੋਇਆ ਹੈ। ਚੀਨ ਵਾਂਗ ਹੀ ਪਾਕਿਸਤਾਨ ਦੇ ਲੜਾਕੂ ਜਹਾਜ਼ ਵੀ ਲਗਾਤਾਰ ਸਰਹੱਦੀ ਇਲਾਕਿਆਂ ਵਿਚ ਉਡਾਨ ਭਰ ਰਹੇ ਹਨ। ਪਾਕਿਸਤਾਨੀ ਹਵਾਈ ਫ਼ੌਜ ਦੇ ਜਹਾਜ਼ ਸਰਹੱਦੀ ਇਲਾਕੇ ਵਿਚ ਗਸ਼ਤ ਕਰ ਰਹੇ ਹਨ। ਦਰਅਸਲ, ਪਾਕਿਸਤਾਨ ਹੰਦਵਾੜਾ ਹਮਲੇ ਦੇ ਬਾਅਦ ਭਾਰਤ ਦੇ ਪਲਟਵਾਰ ਤੋਂ ਚੌਕਸ ਹੈ। ਉਧਰ, ਭਾਰਤੀ ਹਵਾਈ ਫ਼ੌਜ ਪਲ-ਪਲ ਪਾਕਿਸਤਾਨ ਦੀਆਂ ਹਰਕਤਾਂ 'ਤੇ ਨਜ਼ਰ ਰੱਖ ਰਹੀ ਹੈ। (ਏਜੰਸੀ)