ਕੇਂਦਰੀ ਹਥਿਆਰਬੰਦ ਪੁਲਿਸ ਬਲਾਂ ਦੇ ਜਵਾਨਾਂ ਲਈ ਕੁਲ 103 ਬਹਾਦਰੀ ਪੁਰਸਕਾਰਾਂ ਦਾ ਐਲਾਨ ਕੀਤਾ
ਨਵੀਂ ਦਿੱਲੀ: ਜੰਮੂ-ਕਸ਼ਮੀਰ ਦੇ ਅਨੰਤਨਾਗ ’ਚ ਪਿਛਲੇ ਸਾਲ ਸਤੰਬਰ ’ਚ ਫਰੰਟਲਾਈਨ ਆਪਰੇਸ਼ਨ ਦੀ ਅਗਵਾਈ ਕਰਦੇ ਹੋਏ ਸ਼ਹੀਦ ਹੋਏ ਕਰਨਲ ਮਨਪ੍ਰੀਤ ਸਿੰਘ ਨੂੰ ਮਰਨ ਉਪਰੰਤ ਸ਼ਾਂਤੀ ਕਾਲ ਦੇ ਦੂਜੇ ਸੱਭ ਤੋਂ ਵੱਡੇ ਬਹਾਦਰੀ ਪੁਰਸਕਾਰ ਕੀਰਤੀ ਚੱਕਰ ਨਾਲ ਸਨਮਾਨਿਤ ਕਰਨ ਦਾ ਫੈਸਲਾ ਕੀਤਾ ਗਿਆ ਹੈ।
ਰਾਈਫਲਮੈਨ ਰਵੀ ਕੁਮਾਰ (ਮਰਨ ਉਪਰੰਤ), ਮੇਜਰ ਐਮ ਰਾਮ ਗੋਪਾਲ ਨਾਇਡੂ ਅਤੇ ਜੰਮੂ-ਕਸ਼ਮੀਰ ਪੁਲਿਸ ਦੇ ਡਿਪਟੀ ਸੁਪਰਡੈਂਟ ਹੁਮਾਯੂੰ ਮੁਜ਼ੰਮਿਲ ਭੱਟ (ਮਰਨ ਉਪਰੰਤ) ਨੂੰ ਵੀ ਕੀਰਤੀ ਚੱਕਰ ਲਈ ਚੁਣਿਆ ਗਿਆ ਹੈ। ਰਾਸ਼ਟਰਪਤੀ ਦ੍ਰੌਪਦੀ ਮੁਰਮੂ ਨੇ ਸੁਤੰਤਰਤਾ ਦਿਵਸ ਦੀ ਪੂਰਵ ਸੰਧਿਆ ’ਤੇ ਹਥਿਆਰਬੰਦ ਬਲਾਂ ਅਤੇ ਕੇਂਦਰੀ ਹਥਿਆਰਬੰਦ ਪੁਲਿਸ ਬਲਾਂ ਦੇ ਜਵਾਨਾਂ ਲਈ ਕੁਲ 103 ਬਹਾਦਰੀ ਪੁਰਸਕਾਰਾਂ ਦਾ ਐਲਾਨ ਕੀਤਾ।
ਚਾਰ ਕੀਰਤੀ ਚੱਕਰਾਂ ਤੋਂ ਇਲਾਵਾ, ਇਨ੍ਹਾਂ ’ਚ 18 ਸ਼ੌਰਿਆ ਚੱਕਰ (ਮਰਨ ਉਪਰੰਤ), 63 ਫ਼ੌਜ ਮੈਡਲ, 11 ਨੇਵੀ ਮੈਡਲ ਅਤੇ ਛੇ ਵਾਯੂ ਫ਼ੌਜ ਮੈਡਲ ਸ਼ਾਮਲ ਹਨ।
ਰਾਸ਼ਟਰਪਤੀ ਨੇ ਵੱਖ-ਵੱਖ ਫੌਜੀ ਮੁਹਿੰਮਾਂ ’ਚ ਮਹੱਤਵਪੂਰਨ ਯੋਗਦਾਨ ਲਈ ਆਰਮੀ ਡੌਗ ਕੈਂਟ (ਮਰਨ ਉਪਰੰਤ) ਸਮੇਤ 39 ‘ਮੈਂਨਸ਼ਨ-ਇਨ-ਡਿਸਪੈਚ’ ਨੂੰ ਵੀ ਪ੍ਰਵਾਨਗੀ ਦਿਤੀ ਹੈ। ਇਨ੍ਹਾਂ ਮੁਹਿੰਮਾਂ ’ਚ ਆਪਰੇਸ਼ਨ ਰੱਖਿਅਕ, ਆਪਰੇਸ਼ਨ ਸਨੋ ਲੇਪਰਡ, ਆਪਰੇਸ਼ਨ ਸਹਾਇਕ, ਆਪਰੇਸ਼ਨ ਹਿਫਾਜ਼ਤ, ਆਪਰੇਸ਼ਨ ਆਰਕਿਡ ਅਤੇ ਆਪਰੇਸ਼ਨ ਕਛਲ ਸ਼ਾਮਲ ਹਨ।
ਸ਼ੌਰਿਆ ਚੱਕਰ ਨਾਲ ਸਨਮਾਨਿਤ ਕੀਤੇ ਗਏ ਜਵਾਨਾਂ ’ਚ ਆਰਮੀ ਏਵੀਏਸ਼ਨ ਸਕੁਐਡਰਨ ਦੇ ਕਰਨਲ ਪਵਨ ਸਿੰਘ, ਪੈਰਾਸ਼ੂਟ ਰੈਜੀਮੈਂਟ (ਸਪੈਸ਼ਲ ਫੋਰਸ) ਦੀ 21ਵੀਂ ਬਟਾਲੀਅਨ ਦੇ ਮੇਜਰ ਸੀ.ਵੀ.ਐਸ. ਨਿਖਿਲ, ਸਿੱਖ ਲਾਈਟ ਇਨਫੈਂਟਰੀ ਦੇ ਮੇਜਰ ਅਸ਼ੀਸ਼ ਧੋਂਕਾਕ (ਮਰਨ ਉਪਰੰਤ), ਮਿਲਟਰੀ ਸਰਵਿਸ ਕੋਰ/ਕੌਮੀ ਰਾਈਫਲਜ਼ ਦੀ 34ਵੀਂ ਬਟਾਲੀਅਨ ਦੇ ਮੇਜਰ ਤ੍ਰਿਪਪ੍ਰੀਤ ਸਿੰਘ ਅਤੇ ਆਰਟੀਲਰੀ/ਕੌਮੀ ਰਾਈਫਲਜ਼ ਰੈਜੀਮੈਂਟ ਦੀ 34ਵੀਂ ਬਟਾਲੀਅਨ ਦੇ ਮੇਜਰ ਸਾਹਿਲ ਰੰਧਾਵਾ ਸ਼ਾਮਲ ਹਨ।
ਜੰਮੂ-ਕਸ਼ਮੀਰ ਰਾਈਫਲਜ਼ ਦੀ 5ਵੀਂ ਬਟਾਲੀਅਨ ਦੇ ਸੂਬੇਦਾਰ ਸੰਜੀਵ ਸਿੰਘ ਜਸਰੋਟੀਆ, ਰੈਜੀਮੈਂਟ ਆਰਟੀਲਰੀ/56ਵੀਂ ਕੌਮੀ ਰਾਈਫਲਜ਼ ਦੇ ਨਾਇਬ ਸੂਬੇਦਾਰ ਪੀ. ਪਾਬਿਨ ਸਿੰਘਾ, ਸਿੱਖ ਲਾਈਟ ਇਨਫੈਂਟਰੀ/ਕੌਮੀ ਰਾਈਫਲਜ਼ (ਮਰਨ ਉਪਰੰਤ) ਦੀ 19ਵੀਂ ਬਟਾਲੀਅਨ ਦੇ ਸਿਪਾਹੀ ਪ੍ਰਦੀਪ ਸਿੰਘ, ਜੰਮੂ-ਕਸ਼ਮੀਰ ਪੁਲਿਸ ਦੇ ਅਬਦੁਲ ਲਤੀਫ ਅਤੇ ਭਾਰਤੀ ਸਮੁੰਦਰੀ ਫ਼ੌਜ ਜਹਾਜ਼ ਕੋਲਕਾਤਾ ਦੇ ਕਮਾਂਡਿੰਗ ਅਫਸਰ ਕੈਪਟਨ ਸ਼ਰਦ ਸਿੰਸੂਨਵਾਲ ਨੂੰ ਵੀ ਸ਼ੌਰਿਆ ਚੱਕਰ ਲਈ ਚੁਣਿਆ ਗਿਆ ਹੈ।
ਸ਼ੌਰਿਆ ਚੱਕਰ ਪੁਰਸਕਾਰ ਪ੍ਰਾਪਤ ਕਰਨ ਵਾਲਿਆਂ ’ਚ ਭਾਰਤੀ ਸਮੁੰਦਰੀ ਫ਼ੌਜ ਦੇ ਲੈਫਟੀਨੈਂਟ ਕਮਾਂਡਰ ਕਪਿਲ ਯਾਦਵ, ਭਾਰਤੀ ਹਵਾਈ ਫ਼ੌਜ ਦੇ ਵਿੰਗ ਕਮਾਂਡਰ ਵਰਨੋਨ ਡੇਸਕਿੰਡ ਕੀਨ, ਹਵਾਈ ਫ਼ੌਜ ਦੇ ਸਕੁਐਡਰਨ ਲੀਡਰ ਦੀਪਕ ਕੁਮਾਰ, ਸੀ.ਆਰ.ਪੀ.ਐਫ. ਦੇ ਪਵਨ ਕੁਮਾਰ (ਮਰਨ ਉਪਰੰਤ) ਅਤੇ ਸੀ.ਆਰ.ਪੀ.ਐਫ. ਦੇ ਦੇਵਨ ਸੀ (ਮਰਨ ਉਪਰੰਤ) ਸ਼ਾਮਲ ਹਨ। ਸੀ.ਆਰ.ਪੀ.ਐਫ. ਦੇ ਡਿਪਟੀ ਕਮਾਂਡੈਂਟ ਲਖਵੀਰ, ਸੀਆਰਪੀਐਫ ਦੇ ਰਾਜੇਸ਼ ਪੰਚਾਲ ਅਤੇ ਸੀ.ਆਰ.ਪੀ.ਐਫ. ਦੇ ਮਲਕੀਤ ਸਿੰਘ ਨੂੰ ਵੀ ਸ਼ੌਰਿਆ ਚੱਕਰ ਲਈ ਚੁਣਿਆ ਗਿਆ ਹੈ।
ਅਸਾਧਾਰਣ ਬਹਾਦਰੀ ਲਈ ਵਿੰਗ ਕਮਾਂਡਰ ਜਸਪ੍ਰੀਤ ਸਿੰਘ ਸੰਧੂ ਨੂੰ ਹਵਾਈ ਫ਼ੌਜ ਦਾ ਬਹਾਦਰੀ ਮੈਡਲ ਸਨਮਾਨ
ਨਵੀਂ ਦਿੱਲੀ: ਰਾਸ਼ਟਰਪਤੀ ਦਰੌਪਦੀ ਮੁਰਮੂ ਨੇ ਵਿੰਗ ਕਮਾਂਡਰ ਜਸਪ੍ਰੀਤ ਸਿੰਘ ਸੰਧੂ ਨੂੰ ਹਵਾਈ ਫ਼ੌਜ ਦੇ ਬਹਾਦਰੀ ਮੈਡਲ ਸਨਮਾਨ ਦੇਣ ਦਾ ਐਲਾਨ ਕੀਤਾ ਹੈ। ਇਸ ਸਾਲ 25 ਜਨਵਰੀ ਨੂੰ ਜਸਪ੍ਰੀਤ ਸਿੰਘ ਨੂੰ ਬਾਈਸਨ ਜਹਾਜ਼ ’ਤੇ ਏਅਰਫਰੇਮ ਅਤੇ ਇੰਜਣ ਚੈੱਕ ਉਡਾਣ ਭਰਨ ਲਈ ਕਿਹਾ ਗਿਆ ਸੀ। ਲੈਂਡਿੰਗ ਤੋਂ ਬਾਅਦ ਜਹਾਜ਼ ’ਚ ਇਕ ਨੁਕਸ ਕਾਰਨ ਵਿਲੱਖਣ ਐਰੋਡਾਇਨਾਮਿਕ ਕੰਟਰੋਲ ਐਮਰਜੈਂਸੀ ਪੈਦਾ ਹੋਈ। ਪਰ ਸ਼ਾਂਤੀ ਬਣਾਈ ਰਖਦੇ ਹੋਏ, ਲੈਂਡਿੰਗ ਰੋਲ ’ਤੇ ਤੇਜ਼ ਰਫਤਾਰ ਦੀ ਨਾਜ਼ੁਕ ਸਥਿਤੀ ਦੇ ਸਮੇਂ, ਉਸ ਨੇ ਫੁਲ ਬ੍ਰੇਕ ਲਗਾਈ ਅਤੇ ਜਹਾਜ਼ ਨੂੰ ਬੰਦ ਕਰ ਦਿਤਾ। ਉਸ ਨੇ ਵ੍ਹੀਲ ਬ੍ਰੇਕਾਂ ਅਤੇ ਟਾਇਰਾਂ ਨੂੰ ਕੋਈ ਨੁਕਸਾਨ ਪਹੁੰਚਾਏ ਬਿਨਾਂ ਰਨਵੇ ਦੀ ਸੱਜੀ ਲੇਨ ’ਤੇ ਜਹਾਜ਼ ਨੂੰ ਸਫਲਤਾਪੂਰਵਕ ਰੋਕ ਦਿਤਾ ਜਿਸ ਨਾਲ ਕਈ ਜਾਨਾਂ ਬਚੀਆਂ।
ਕੇਂਦਰੀ ਅਤੇ ਸੂਬਾ ਫ਼ੋਰਸਾਂ ਲਈ 1,037 ਪੁਲਿਸ ਮੈਡਲ ਦਾ ਐਲਾਨ
ਨਵੀਂ ਦਿੱਲੀ: ਕੇਂਦਰ ਸਰਕਾਰ ਨੇ ਬੁਧਵਾਰ ਨੂੰ ਕੇਂਦਰੀ ਅਤੇ ਸੂਬਾ ਫ਼ੋਰਸਾਂ ਦੇ 1,037 ਪੁਲਿਸ ਮੁਲਾਜ਼ਮਾਂ ਨੂੰ ਸਰਵਿਸ ਮੈਡਲ ਦੇਣ ਦਾ ਐਲਾਨ ਕੀਤਾ ਹੈ। ਕੇਂਦਰੀ ਗ੍ਰਹਿ ਮੰਤਰਾਲੇ ਵਲੋਂ ਜਾਰੀ ਇਕ ਬਿਆਨ ’ਚ ਕਿਹਾ ਗਿਆ ਹੈ ਕਿ 214 ਜਵਾਨਾਂ ਨੂੰ ਬਹਾਦਰੀ ਮੈਡਲ ਨਾਲ ਸਨਮਾਨਿਤ ਕੀਤਾ ਗਿਆ ਹੈ, ਜਿਨ੍ਹਾਂ ’ਚ ਰਾਸ਼ਟਰਪਤੀ ਬਹਾਦਰੀ ਮੈਡਲ (ਪੀ.ਐੱਮ.ਜੀ.) ਅਤੇ 231 ਬਹਾਦਰੀ ਮੈਡਲ (ਜੀ.ਐੱਮ.) ਸ਼ਾਮਲ ਹਨ। ਜੀ.ਐਮ. ’ਚ ਫਾਇਰ ਫਾਈਟਰਾਂ ਲਈ ਚਾਰ ਮੈਡਲ ਅਤੇ ਨਾਗਰਿਕ ਸੁਰੱਖਿਆ ਮੁਲਾਜ਼ਮਾਂ ਲਈ ਇਕ ਮੈਡਲ ਸ਼ਾਮਲ ਹਨ।
ਕੇਂਦਰੀ ਰਿਜ਼ਰਵ ਪੁਲਿਸ ਫੋਰਸ (ਸੀ.ਆਰ.ਪੀ.ਐੱਫ.) ਨੂੰ ਸੱਭ ਤੋਂ ਵੱਧ ਬਹਾਦਰੀ ਮੈਡਲ (52) ਮਿਲਣਗੇ, ਜਦਕਿ ਜੰਮੂ-ਕਸ਼ਮੀਰ ਪੁਲਿਸ ਨੂੰ 31 ਬਹਾਦਰੀ ਮੈਡਲ ਮਿਲਣਗੇ। ਇਨ੍ਹਾਂ ਤੋਂ ਇਲਾਵਾ ਉੱਤਰ ਪ੍ਰਦੇਸ਼ ਅਤੇ ਮਹਾਰਾਸ਼ਟਰ ਦੇ 17-17, ਛੱਤੀਸਗੜ੍ਹ ਦੇ 15 ਅਤੇ ਮੱਧ ਪ੍ਰਦੇਸ਼ ਦੇ 12 ਪੁਲਿਸ ਮੁਲਾਜ਼ਮਾਂ ਨੂੰ ਬਹਾਦਰੀ ਮੈਡਲ ਦਿਤੇ ਗਏ ਹਨ।
ਬਹਾਦਰੀ ਲਈ ਸਰਵਉੱਚ ਪੁਲਿਸ ਪੁਰਸਕਾਰ ਤੇਲੰਗਾਨਾ ਪੁਲਿਸ ਦੇ ਹੈੱਡ ਕਾਂਸਟੇਬਲ ਚਦਾਵੂ ਯੇਦਈਆ ਨੂੰ ਦਿਤਾ ਗਿਆ ਹੈ। ਉਨ੍ਹਾਂ ਨੂੰ ਇਹ ਪੁਰਸਕਾਰ 25 ਜੁਲਾਈ 2022 ਨੂੰ ਦੋ ਬਦਨਾਮ ਚੇਨ ਸਨੈਚਰਾਂ ਅਤੇ ਹਥਿਆਰ ਤਸਕਰਾਂ ਨੂੰ ਫੜਨ ’ਚ ‘ਬੇਮਿਸਾਲ ਬਹਾਦਰੀ’ ਲਈ ਦਿਤਾ ਜਾਵੇਗਾ।
ਗ੍ਰਹਿ ਮੰਤਰਾਲੇ ਨੇ ਇਕ ਬਿਆਨ ’ਚ ਕਿਹਾ ਕਿ ਦੋਹਾਂ ਅਪਰਾਧੀਆਂ ਨੇ ਪੁਲਿਸ ਮੁਲਾਜ਼ਮ ’ਤੇ ਬੇਰਹਿਮੀ ਨਾਲ ਹਮਲਾ ਕੀਤਾ ਅਤੇ ਚਾਕੂ ਨਾਲ ਉਸ ਦੇ ਪੂਰੇ ਸਰੀਰ ’ਤੇ ਵਾਰ-ਵਾਰ ਵਾਰ ਵਾਰ ਕੀਤਾ ਪਰ ਪੁਲਿਸ ਮੁਲਾਜ਼ਮ ਨੇ ਉਨ੍ਹਾਂ ਨੂੰ ਭੱਜਣ ਨਹੀਂ ਦਿਤਾ। ਹਮਲੇ ’ਚ ਪੁਲਿਸ ਮੁਲਾਜ਼ਮ ਗੰਭੀਰ ਰੂਪ ’ਚ ਜ਼ਖਮੀ ਹੋ ਗਿਆ ਸੀ ਅਤੇ ਉਸ ਨੂੰ 17 ਦਿਨਾਂ ਲਈ ਹਸਪਤਾਲ ’ਚ ਦਾਖਲ ਕਰਵਾਉਣਾ ਪਿਆ ਸੀ।
ਹੋਰ ਮੈਡਲਾਂ ’ਚ ਵਿਲੱਖਣ ਸੇਵਾ ਲਈ 94 ਰਾਸ਼ਟਰਪਤੀ ਪੁਲਿਸ ਮੈਡਲ ਅਤੇ ਸ਼ਾਨਦਾਰ ਸੇਵਾ ਲਈ 729 ਮੈਡਲ ਸ਼ਾਮਲ ਹਨ। ਇਨ੍ਹਾਂ ਮੈਡਲਾਂ ਦਾ ਐਲਾਨ ਸਾਲ ’ਚ ਦੋ ਵਾਰ ਕੀਤਾ ਜਾਂਦਾ ਹੈ। ਦੂਜੀ ਵਾਰ ਇਨ੍ਹਾਂ ਪੁਰਸਕਾਰਾਂ ਦਾ ਐਲਾਨ ਗਣਤੰਤਰ ਦਿਵਸ ਦੇ ਮੌਕੇ ’ਤੇ ਕੀਤਾ ਜਾਵੇਗਾ।
ਸੀ.ਆਰ.ਪੀ.ਐਫ. ਨੇ ਸੁਤੰਤਰਤਾ ਦਿਵਸ ’ਤੇ ਸੱਭ ਤੋਂ ਵੱਧ ਬਹਾਦਰੀ ਮੈਡਲ ਜਿੱਤੇ
ਨਵੀਂ ਦਿੱਲੀ: ਕੇਂਦਰੀ ਰਿਜ਼ਰਵ ਪੁਲਿਸ ਫੋਰਸ (ਸੀ.ਆਰ.ਪੀ.ਐੱਫ.) ਨੂੰ 78ਵੇਂ ਸੁਤੰਤਰਤਾ ਦਿਵਸ ਮੌਕੇ ਸੱਭ ਤੋਂ ਵੱਧ 52 ਪੁਲਿਸ ਬਹਾਦਰੀ ਮੈਡਲ ਮਿਲੇ ਹਨ। ਕੇਂਦਰੀ ਗ੍ਰਹਿ ਮੰਤਰਾਲੇ ਨੇ ਬੁਧਵਾਰ ਨੂੰ ਪੁਰਸਕਾਰ ਜੇਤੂਆਂ ਦੇ ਨਾਵਾਂ ਦਾ ਐਲਾਨ ਕੀਤਾ। ਸੀ.ਆਰ.ਪੀ.ਐਫ. ਦੇ ਇਕ ਸੀਨੀਅਰ ਅਧਿਕਾਰੀ ਨੇ ਦਸਿਆ ਕਿ ਕੁਲ ਮੈਡਲਾਂ ਵਿਚੋਂ 25 ਮੈਡਲ ਜੰਮੂ-ਕਸ਼ਮੀਰ ਵਿਚ ਮੁਹਿੰਮਾਂ ਲਈ ਦਿਤੇ ਗਏ ਹਨ ਜਦਕਿ 27 ਮੈਡਲ ਖੱਬੇਪੱਖੀ ਅਤਿਵਾਦ ਪ੍ਰਭਾਵਤ ਸੂਬਿਆਂ ਵਿਚ ਮਾਉਵਾਦੀ ਵਿਰੋਧੀ ਮੁਹਿੰਮਾਂ ਲਈ ਦਿਤੇ ਗਏ ਹਨ।
ਪੁਰਸਕਾਰ ਪ੍ਰਾਪਤ ਕਰਨ ਵਾਲਿਆਂ ਵਿਚ ਸਬ-ਇੰਸਪੈਕਟਰ ਰੋਸ਼ਨ ਕੁਮਾਰ ਵੀ ਸ਼ਾਮਲ ਹਨ, ਜਿਨ੍ਹਾਂ ਨੂੰ ਫ਼ਰਵਰੀ 2019 ਵਿਚ ਬਿਹਾਰ ਵਿਚ ਮਾਉਵਾਦੀਆਂ ਵਿਰੁਧ ਬਹਾਦਰੀ ਲਈ ਮਰਨ ਉਪਰੰਤ ਬਹਾਦਰੀ ਮੈਡਲ ਨਾਲ ਸਨਮਾਨਿਤ ਕੀਤਾ ਗਿਆ ਸੀ। ਅਧਿਕਾਰੀ ਨੇ ਦਸਿਆ ਕਿ ਸਹਾਇਕ ਕਮਾਂਡੈਂਟ ਤੇਜਾ ਰਾਮ ਚੌਧਰੀ ਨੂੰ ਜੰਮੂ-ਕਸ਼ਮੀਰ ’ਚ ਅਤਿਵਾਦੀਆਂ ਵਿਰੁਧ ਵੱਖ-ਵੱਖ ਮੁਹਿੰਮਾਂ ’ਚ ਹਿੰਮਤ ਵਿਖਾ ਉਣ ਲਈ ਇਸ ਵਾਰ ਦੋ ਬਹਾਦਰੀ ਮੈਡਲ ਨਾਲ ਸਨਮਾਨਿਤ ਕੀਤਾ ਗਿਆ ਹੈ।
ਸੀ.ਆਰ.ਪੀ.ਐਫ. ਤੋਂ ਬਾਅਦ ਜੰਮੂ-ਕਸ਼ਮੀਰ ਪੁਲਿਸ ਨੂੰ 31 ਬਹਾਦਰੀ ਮੈਡਲ ਮਿਲੇ ਹਨ, ਜਦਕਿ ਉੱਤਰ ਪ੍ਰਦੇਸ਼ ਅਤੇ ਮਹਾਰਾਸ਼ਟਰ ਦੇ ਪੁਲਿਸ ਅਧਿਕਾਰੀਆਂ ਨੂੰ 17-17 ਮੈਡਲ ਮਿਲੇ ਹਨ।
