ਭਾਜਪਾ ਆਗੂ ਆਰਪੀ ਸਿੰਘ ਨੇ ਨੈੱਟਫਲਿਕਸ ਸੀਰੀਜ਼ ਦਾ ਹਵਾਲਾ ਦਿੰਦਿਆਂ ਸਰਕਾਰ ਤੋਂ ਕੀਤੀ ਜਾਂਚ ਦੀ ਮੰਗ
ਨਵੀਂ ਦਿੱਲੀ: ਭਾਜਪਾ ਦੇ ਕੌਮੀ ਬੁਲਾਰੇ ਆਰਪੀ ਸਿੰਘ ਨੇ ਨੈੱਟਫਲਿਕਸ ਸੀਰੀਜ਼ ‘ਕੈਟ’ ਦਾ ਹਵਾਲਾ ਦਿੰਦਿਆਂ 80 ਦੇ ਦੌਰ ਦੇ ਪੰਜਾਬ ਪੁਲਿਸ ਦੇ ਅਫ਼ਸਰਾਂ ’ਤੇ ਗੰਭੀਰ ਸਵਾਲ ਚੁੱਕੇ ਹਨ। ਉਹਨਾਂ ਟਵੀਟ ਕਰਕੇ ਕਿਹਾ, "ਨੈੱਟਫਲਿਕਸ 'ਤੇ ਕੈਟ ਦੇਖਣ ਵਾਲਿਆਂ ਨੂੰ ਪਤਾ ਹੋਣਾ ਚਾਹੀਦਾ ਹੈ ਕਿ ਪੰਜਾਬ ਦੀਆਂ ਮਾਵਾਂ ਅਜੇ ਵੀ 80 ਦੇ ਦੌਰ ’ਚ ਲਾਪਤਾ ਹੋਏ (ਗੈਰ-ਕਾਨੂੰਨੀ ਢੰਗ ਨਾਲ ਮਾਰੇ ਗਏ) 25 ਹਜ਼ਾਰ ਨੌਜਵਾਨਾਂ ਦੀ ਉਡੀਕ ਕਰ ਰਹੀਆਂ ਹਨ। ਉਮਰਾਨੰਗਲ ਵੱਲੋਂ 1994 ਵਿਚ ਮਾਰਿਆ ਗਿਆ ਖਾੜਕੂ ਅਜੇ ਵੀ ਜ਼ਿੰਦਾ ਹੈ, ਪੁਲਿਸ ਜਵਾਬ ਨਹੀਂ ਦੇ ਸਕੀ ਕਿ ਉਹ ਕਿਸ ਦੀ ਲਾਸ਼ ਲੈ ਕੇ ਆਇਆ ਸੀ।"
ਰੋਜ਼ਾਨਾ ਸਪੋਕਸਮੈਨ ਨਾਲ ਗੱਲ ਕਰਦਿਆਂ ਉਹਨਾਂ ਕਿਹਾ ਕਿ ਇਸ ਸੀਰੀਜ਼ ਵਿਚ ਦਰਸਾਇਆ ਗਿਆ ਕਿ ਕਿਵੇਂ 80 ਦੇ ਦੌਰ ਵਿਚ ਪੁਲਿਸ ਨੇ ਪੰਜਾਬ ਦੇ ਮੁੰਡਿਆਂ ਨੂੰ ਆਪਣੇ ਮੰਤਵਾਂ ਲਈ ਵਰਤਿਆ ਅਤੇ ਕਈ ਮੁੰਡੇ ਗਾਇਬ ਹੋਏ, ਜਿਨ੍ਹਾਂ ਦੇ ਪਰਿਵਾਰ ਅੱਜ ਵੀ ਉਹਨਾਂ ਦੀ ਉਡੀਕ ਵਿਚ ਹਨ। ਸ਼ਹੀਦ ਜਸਵੰਤ ਸਿੰਘ ਖਾਲੜਾ ਦੀ ਰਿਪੋਰਟ ਮੁਤਾਬਕ ਪੰਜਾਬ ਦਾ 25 ਹਜ਼ਾਰ ਨੌਜਵਾਨ ਗਾਇਬ ਹੋ ਗਿਆ ਜਾਂ ਮਾਰਿਆ ਗਿਆ।
ਆਰਪੀ ਸਿੰਘ ਨੇ ਕਿਹਾ ਕਿ ਜਿੱਥੇ ਪੰਜਾਬ ਪੁਲਿਸ ਨੇ ਅਤਿਵਾਦ ਨੂੰ ਕਾਬੂ ਕੀਤਾ, ਉੱਥੇ ਕੁਝ ਜ਼ਿਆਦਤੀਆਂ ਵੀ ਹੋਈਆਂ, ਇਸ ਦਾ ਪਤਾ ਲੱਗਣਾ ਚਾਹੀਦਾ ਹੈ। ਉਸ ਦੌਰ ਦੇ ਜ਼ਖਮ ਅੱਜ ਵੀ ਹਰੇ ਨੇ, ਇਹਨਾਂ ਉੱਤੇ ਮੱਲ੍ਹਮ ਲੱਗਣੀ ਚਾਹੀਦੀ ਹੈ। ਸਰਕਾਰ ਨੂੰ ਉਹਨਾਂ 25 ਹਜ਼ਾਰ ਨੌਜਵਾਨਾਂ ਦੀ ਜਾਣਕਾਰੀ ਕੱਢਣੀ ਚਾਹੀਦੀ ਹੈ। ਇਹਨਾਂ ਮਾਮਲਿਆਂ ਵਿਚ ਸ਼ਾਮਲ ਅਫ਼ਸਰਾਂ ਖ਼ਿਲਾਫ ਕਾਰਵਾਈ ਕੀਤੀ ਜਾਣੀ ਚਾਹੀਦੀ ਹੈ।
ਆਪਣੇ ਟਵੀਟ ਨਾਲ ਆਰਪੀ ਸਿੰਘ ਨੇ ਸਾਲ 2019 ਦੀ ਇਕ ਖ਼ਬਰ ਵੀ ਸਾਂਝੀ ਕੀਤੀ। ਇਸ ਖ਼ਬਰ ਅਨੁਸਾਰ ਸਾਲ 1994 ਵਿਚ ਪਰਮਰਾਜ ਸਿੰਘ ਉਮਰਾਨੰਗਲ ਵੱਲੋਂ ਐਨਕਾਊਂਟਰ ਦੌਰਾਨ ਇਕ ਵਿਅਕਤੀ ਮਾਰਿਆ ਗਿਆ ਸੀ। ਪੁਲਿਸ ਰਿਕਾਰਡ ਵਿਚ ਮਾਰੇ ਗਏ ਵਿਅਕਤੀ ਦੀ ਪਛਾਣ ਲੋੜੀਂਦੇ ਖਾੜਕੂ ਗੁਰਨਾਮ ਸਿੰਘ ਬੰਡਾਲਾ ਵਜੋਂ ਹੋਈ ਸੀ। ਹਾਲਾਂਕਿ ਘਟਨਾ ਤੋਂ ਚਾਰ ਸਾਲ ਬਾਅਦ ਬੰਡਾਲਾ ਨੂੰ ਪੁਲਿਸ ਨੇ ਜਿਉਂਦਾ ਲੱਭ ਲਿਆ ਸੀ। ਹੁਣ ਤੱਕ ਇਹ ਪਤਾ ਨਹੀਂ ਚੱਲ ਸਕਿਆ ਕਿ ਪੁਲਿਸ ਨੇ ਕਿਸ ਦੀ ਲਾਸ਼ ਨੂੰ ਗੁਰਨਾਮ ਸਿੰਘ ਦੀ ਲਾਸ਼ ਦੱਸਿਆ ਸੀ।
