ਸੰਸਦ ਭਵਨ ਵਿੱਚ ਹੁਣ ਕੋਈ ਤਖ਼ਤੀਆਂ, ਪੋਸਟਰ ਜਾਂ ਏ.ਆਈ. ਨਾਲ ਤਿਆਰ ਤਸਵੀਰਾਂ ਨਹੀਂ ਲਹਿਰਾਈਆਂ ਜਾਣਗੀਆਂ: ਸਪੀਕਰ ਓਮ ਬਿਰਲਾ
ਨਵੀਂ ਦਿੱਲੀ: ਲੋਕ ਸਭਾ ਨੇ ਮੰਗਲਵਾਰ ਨੂੰ ਤੁਰੰਤ ਪ੍ਰਭਾਵ ਨਾਲ ਅੱਠ ਵਿਰੋਧੀ ਮੈਂਬਰਾਂ ਦੀ ਮੁਅੱਤਲੀ ਰੱਦ ਕਰ ਦਿੱਤੀ, ਜਿਨ੍ਹਾਂ ਨੂੰ 3 ਫਰਵਰੀ ਨੂੰ ‘ਅਸ਼ਿਸ਼ਟ’ ਸਲੂਕ ਕਾਰਨ ਬਾਹਰ ਕੀਤਾ ਗਿਆ ਸੀ। ਸਪੀਕਰ ਓਮ ਬਿਰਲਾ ਨੇ ਸਪੱਸ਼ਟ ਕੀਤਾ ਕਿ ਸੰਸਦ ਭਵਨ ਵਿੱਚ ਹੁਣ ਕੋਈ ਤਖ਼ਤੀਆਂ, ਪੋਸਟਰ ਜਾਂ ਏ.ਆਈ. ਨਾਲ ਤਿਆਰ ਤਸਵੀਰਾਂ ਨਹੀਂ ਲਹਿਰਾਈਆਂ ਜਾਣਗੀਆਂ।
ਕਾਂਗਰਸ ਮੈਂਬਰ ਕੇ. ਸੁਰੇਸ਼ ਨੇ ਕਿਹਾ, ‘‘ਜੋ ਕੁਝ ਹੋਇਆ ਉਹ ਅਫਸੋਸਜਨਕ ਸੀ। ਅਸੀਂ ਸਦਨ ਦੀ ਕਾਰਵਾਈ ਸੁਚਾਰੂ ਬਣਾਉਣ ਲਈ ਪੂਰੀ ਤਰ੍ਹਾਂ ਸਹਿਯੋਗ ਦੇਣ ਲਈ ਤਿਆਰ ਹਾਂ।’’ ਇਸ ਤੋਂ ਬਾਅਦ ਸੰਸਦੀ ਮਾਮਲਿਆਂ ਦੇ ਮੰਤਰੀ ਕਿਰਨ ਰਿਜਿਜੂ ਨੇ ਜ਼ੋਰ ਦਿੱਤਾ ਕਿ ਸਦਨ ਦੀ ਕਾਰਵਾਈ ਲਈ ਇੱਕ ‘ਲਕਸ਼ਮਣ ਰੇਖਾ’ ਖਿੱਚਣੀ ਲਾਜ਼ਮੀ ਹੈ।
ਸਮਾਜਵਾਦੀ ਪਾਰਟੀ ਦੇ ਧਰਮਿੰਦਰ ਯਾਦਵ ਨੇ ਭਰੋਸਾ ਦਿਵਾਇਆ, ‘‘ਅਸੀਂ ਸਦਨ ਦੀ ਇੱਜ਼ਤ ਨੂੰ ਢਾਹ ਲਾਉਣ ਵਾਲਾ ਕੋਈ ਕੰਮ ਨਹੀਂ ਕਰਾਂਗੇ। ਪਰ ਸੱਤਾ ਪੱਖ ਵੀ ਸਹੀ ਤਰੀਕੇ ਨਾਲ ਵਿਹਾਰ ਕਰੇ।’’ ਇਸ ’ਤੇ ਭਾਜਪਾ ਦੇ ਨਿਸ਼ਿਕਾਂਤ ਦੁਬੇ ਨੇ ਤੁਰੰਤ ਜਵਾਬ ਦਿੱਤਾ ਕਿ ਉਨ੍ਹਾਂ ਨੇ ਕਦੇ ਸੰਸਦ ਦੇ ਮਾਣ ਨੂੰ ਢਾਹ ਨਹੀਂ ਲਾਈ।
ਐਨ.ਸੀ.ਪੀ. ਨੇਤਾ ਸੁਪ੍ਰਿਆ ਸੁਲੇ ਨੇ ਕਿਹਾ, ‘‘ਦੋਵੇਂ ਪੱਖਾਂ ਨੂੰ ਇਕ-ਦੂਜੇ ਦੀ ਇੱਜ਼ਤ ਕਰਨੀ ਚਾਹੀਦੀ ਹੈ। ਕੋਈ ਵੀ ਨਿੱਜੀ ਟਿੱਪਣੀ ਨਹੀਂ ਹੋਣੀ ਚਾਹੀਦੀ।’’
ਇਸ ਮਤੇ ਨੂੰ ਜ਼ੁਬਾਨੀ ਵੋਟ ਰਾਹੀਂ ਪਾਸ ਕਰ ਕੇ ਸੱਤ ਕਾਂਗਰਸ ਅਤੇ ਇੱਕ ਸੀ.ਪੀ.ਆਈ.(ਐਮ) ਮੈਂਬਰ ਦੀ ਮੁਅੱਤਲੀ ਰੱਦ ਕਰ ਦਿੱਤੀ ਗਈ। ਸਪੀਕਰ ਬਿੜਲਾ ਨੇ ਕਿਹਾ ਕਿ ਸੰਸਾਰ ਦੀ ਸਭ ਤੋਂ ਵੱਡੀ ਲੋਕਤੰਤਰਿਕ ਸੰਸਦ ਦੀ ਕਾਰਵਾਈ ਸੁਚਾਰੂ ਹੋਣੀ ਚਾਹੀਦੀ ਹੈ ਅਤੇ ਸਭ ਨੂੰ ਸਹਿਯੋਗ ਦੇਣਾ ਚਾਹੀਦਾ ਹੈ।
