ਜਦਕਿ ਇਕ ਸਾਲ ਪਹਿਲਾਂ 2021 'ਚ ਉਨ੍ਹਾਂ ਦੀ ਗਿਣਤੀ 'ਚ 9.3 ਫੀਸਦੀ ਦਾ ਵਾਧਾ ਹੋਇਆ ਸੀ
ਨਵੀਂ ਦਿੱਲੀ : ਭਾਰਤ ਵਿਚ ਅਤਿਅੰਤ ਅਮੀਰ ਲੋਕਾਂ ਦੀ ਗਿਣਤੀ ਪਿਛਲੇ ਸਾਲ 7.5 ਪ੍ਰਤੀਸ਼ਤ ਘਟ ਕੇ 12,069 ਰਹਿ ਗਈ ਸੀ, ਪਰ ਅਗਲੇ ਪੰਜ ਸਾਲਾਂ ਵਿਚ ਮੁੜ ਤੋਂ ਵਧ ਕੇ 19,119 ਹੋਣ ਦੀ ਉਮੀਦ ਹੈ। ਇਹ ਉਮੀਦ ਇੱਕ ਰਿਪੋਰਟ ਵਿਚ ਪ੍ਰਗਟਾਈ ਗਈ ਹੈ।
ਵੈਲਥ ਐਡਵਾਈਜ਼ਰੀ ਫਰਮ ਨਾਈਟ ਫਰੈਂਕ ਨੇ ਬੁੱਧਵਾਰ ਨੂੰ ਜਾਰੀ ਕੀਤੀ ਇੱਕ ਰਿਪੋਰਟ ਵਿਚ ਕਿਹਾ ਕਿ 30 ਮਿਲੀਅਨ ਡਾਲਰ ਤੋਂ ਵੱਧ ਦੀ ਜਾਇਦਾਦ ਵਾਲੇ ਅਤਿ-ਅਮੀਰ ਭਾਰਤੀਆਂ ਦੀ ਸੰਖਿਆ 2022 ਵਿੱਚ 12,069 ਤੱਕ ਪਹੁੰਚਣ ਦੀ ਉਮੀਦ ਹੈ। ਇਹ ਸਾਲ 2021 ਦੇ ਮੁਕਾਬਲੇ 7.5 ਫੀਸਦੀ ਦੀ ਗਿਰਾਵਟ ਨੂੰ ਦਰਸਾਉਂਦਾ ਹੈ। ਹਾਲਾਂਕਿ ਸਲਾਹਕਾਰ ਫਰਮ ਨੇ 'ਦ ਵੈਲਥ ਰਿਪੋਰਟ 2023' 'ਚ ਕਿਹਾ ਹੈ ਕਿ 2027 ਤੱਕ ਦੇਸ਼ 'ਚ ਬੇਹੱਦ ਅਮੀਰ ਲੋਕਾਂ ਦੀ ਗਿਣਤੀ ਵਧ ਕੇ 19,119 ਹੋ ਜਾਣ ਦੀ ਉਮੀਦ ਹੈ।
ਇਸ ਦੇ ਨਾਲ ਹੀ ਅਗਲੇ ਪੰਜ ਸਾਲਾਂ ਤੱਕ ਦੇਸ਼ ਵਿਚ ਅਰਬਪਤੀਆਂ ਦੀ ਗਿਣਤੀ 195 ਤੱਕ ਪਹੁੰਚਣ ਦੀ ਉਮੀਦ ਹੈ। ਸਾਲ 2022 'ਚ ਅਰਬਪਤੀਆਂ ਦੀ ਗਿਣਤੀ ਵਧ ਕੇ 161 ਹੋ ਗਈ, ਜਦਕਿ 2021 'ਚ ਉਨ੍ਹਾਂ ਦੀ ਗਿਣਤੀ 145 ਹੋ ਗਈ।
ਰਿਪੋਰਟ ਮੁਤਾਬਕ ਦੇਸ਼ 'ਚ 1 ਮਿਲੀਅਨ ਡਾਲਰ ਤੋਂ ਜ਼ਿਆਦਾ ਦੀ ਜਾਇਦਾਦ ਵਾਲੇ ਅਮੀਰ ਲੋਕਾਂ ਦੀ ਗਿਣਤੀ ਪਿਛਲੇ ਸਾਲ ਵਧ ਕੇ 7,97,714 ਹੋ ਗਈ, ਜਦਕਿ 2021 'ਚ ਇਨ੍ਹਾਂ ਦੀ ਗਿਣਤੀ 7,63,674 ਸੀ। ਅਗਲੇ ਪੰਜ ਸਾਲਾਂ ਵਿਚ ਇਹ ਗਿਣਤੀ ਵਧ ਕੇ 16,57,272 ਹੋਣ ਦੀ ਸੰਭਾਵਨਾ ਹੈ।
ਰਿਪੋਰਟ 'ਚ ਕਿਹਾ ਗਿਆ ਹੈ ਕਿ ਸਾਲ 2022 'ਚ ਵਿਸ਼ਵ ਪੱਧਰ 'ਤੇ ਬੇਹੱਦ ਅਮੀਰ ਲੋਕਾਂ ਦੀ ਗਿਣਤੀ 'ਚ 3.8 ਫੀਸਦੀ ਦੀ ਗਿਰਾਵਟ ਦਰਜ ਕੀਤੀ ਗਈ ਸੀ, ਜਦਕਿ ਇਕ ਸਾਲ ਪਹਿਲਾਂ 2021 'ਚ ਉਨ੍ਹਾਂ ਦੀ ਗਿਣਤੀ 'ਚ 9.3 ਫੀਸਦੀ ਦਾ ਵਾਧਾ ਹੋਇਆ ਸੀ।
ਪਿਛਲੇ ਸਾਲ, ਭੂ-ਰਾਜਨੀਤਿਕ ਅਨਿਸ਼ਚਿਤਤਾ ਅਤੇ ਆਰਥਿਕ ਮੰਦੀ ਦੇ ਮਾੜੇ ਪ੍ਰਭਾਵਾਂ ਨੇ ਅਤਿ-ਅਮੀਰਾਂ ਲਈ ਦੌਲਤ ਸਿਰਜਣ ਦੇ ਮੌਕਿਆਂ ਨੂੰ ਪ੍ਰਭਾਵਿਤ ਕੀਤਾ। ਭਾਰਤ ਵਿਚ ਵੀ ਇਨ੍ਹਾਂ ਕਾਰਨਾਂ ਕਰ ਕੇ ਅਮੀਰਾਂ ਦੀ ਦੌਲਤ ਪ੍ਰਭਾਵਿਤ ਹੋਈ ਅਤੇ ਉਨ੍ਹਾਂ ਦੀ ਸੰਖਿਆ ਸਾਲਾਨਾ ਆਧਾਰ 'ਤੇ 7.5 ਫੀਸਦੀ ਘੱਟ ਗਈ।
ਵਿਆਜ ਦਰਾਂ ਵਿੱਚ ਵਾਧੇ ਅਤੇ ਰੁਪਏ ਦੇ ਮੁਕਾਬਲੇ ਡਾਲਰ ਦੇ ਮਜ਼ਬੂਤ ਹੋਣ ਨਾਲ ਅਤਿ-ਅਮੀਰ ਭਾਰਤੀਆਂ ਦੀ ਦੌਲਤ ਵੀ ਪ੍ਰਭਾਵਿਤ ਹੋਈ। ਨਾਈਟ ਫਰੈਂਕ ਇੰਡੀਆ ਦੇ ਚੇਅਰਮੈਨ ਅਤੇ ਮੈਨੇਜਿੰਗ ਡਾਇਰੈਕਟਰ ਸ਼ਿਸ਼ਿਰ ਬੈਜਲ ਨੇ ਕਿਹਾ ਕਿ ਭਾਰਤ ਦੇ ਆਰਥਿਕ ਵਿਕਾਸ ਨੇ ਹਾਲ ਹੀ ਦੇ ਸਮੇਂ ਵਿਚ ਕੋਰ ਅਤੇ ਗੈਰ-ਕੋਰ ਸੈਕਟਰਾਂ ਵਿਚ ਮਜ਼ਬੂਤ ਗਤੀਵਿਧੀ ਦੇ ਕਾਰਨ ਗਤੀ ਫੜੀ ਹੈ। ਇਸ ਤੋਂ ਇਲਾਵਾ ਭਾਰਤ ਦੇ ਗਲੋਬਲ ਸਟਾਰਟਅੱਪ ਹੱਬ ਬਣਨ ਨਾਲ ਨਵੀਂ ਦੌਲਤ ਵੀ ਪੈਦਾ ਹੋ ਰਹੀ ਹੈ।
