ਡਰਾਈਵਰਾਂ ਨੇ ਪੁਲਿਸ ਕੋਲ ਸ਼ਿਕਾਇਤ ਦਰਜ ਕਰਵਾਈ, ਸੀ.ਸੀ.ਟੀ.ਵੀ. ’ਚ ਕੈਦ ਹੋਈ ਘਟਨਾ
ਇੰਦੌਰ (ਮੱਧ ਪ੍ਰਦੇਸ਼): ਇੰਦੌਰ ਨਗਰ ਨਿਗਮ ਕਮਿਸ਼ਨਰ ਹਰਸ਼ਿਕਾ ਸਿੰਘ ਦੀ ਕਾਰ ਅੱਗੇ ਕਥਿਤ ਤੌਰ ’ਤੇ ਕੱਟਿਆ ਹੋਇਆ ਨਿੰਬੂ ਸੁੱਟਣ ਦੀ ਘਟਨਾ ਤੋਂ ਬਾਅਦ ਬੁਧਵਾਰ ਨੂੰ ਇਸ ਨਗਰ ਨਿਗਮ ਦੇ ਇਕ ਅਧਿਕਾਰੀ ਦੀ ਬਦਲੀ ਕਰ ਦਿਤੀ। ਇਸ ਅਧਿਕਾਰੀ ਵਿਰੁਧ ਥਾਣੇ ’ਚ ਸ਼ਿਕਾਇਤ ਵੀ ਦਰਜ ਕਰਵਾਈ ਗਈ ਹੈ। ਅਧਿਕਾਰੀਆਂ ਨੇ ਇਹ ਜਾਣਕਾਰੀ ਦਿਤੀ।
ਅਧਿਕਾਰੀਆਂ ਨੇ ਦਸਿਆ ਕਿ ਕੱਟੇ ਹੋਏ ਨਿੰਬੂ ਨੂੰ ਸੁੱਟਣ ਦੀ ਘਟਨਾ ਜਾਦੂ-ਟੂਣੇ ਨਾਲ ਜੁੜੀ ਹੋ ਸਕਦੀ ਹੈ। ਅਧਿਕਾਰੀਆਂ ਨੇ ਦਸਿਆ ਕਿ ਸਿਟੀ ਮਿਸ਼ਨ ਮੈਨੇਜਰ ਦੇ ਅਹੁਦੇ ’ਤੇ ਕੰਮ ਕਰ ਰਹੇ ਨਿਖਿਲ ਕੁਲਮੀ ’ਤੇ ਸੋਮਵਾਰ ਨੂੰ ਗੀਤਾ ਭਵਨ ਇਲਾਕੇ ’ਚ ਸਰਕਾਰੀ ਦਫਤਰ ’ਚ ਨਿਗਮ ਕਮਿਸ਼ਨਰ ਹਰਸ਼ਿਕਾ ਸਿੰਘ ਦੀ ਕਾਰ ਅੱਗੇ ਕੱਟਿਆ ਹੋਇਆ ਨਿੰਬੂ ਸੁੱਟਣ ਦਾ ਦੋਸ਼ ਹੈ। ਅਧਿਕਾਰੀਆਂ ਮੁਤਾਬਕ ਇਹ ਘਟਨਾ ਦਫ਼ਤਰ ’ਚ ਲੱਗੇ ਸੀ.ਸੀ.ਟੀ.ਵੀ. ਕੈਮਰਿਆਂ ’ਚ ਕੈਦ ਹੋ ਗਈ ਹੈ।
ਉਨ੍ਹਾਂ ਕਿਹਾ ਕਿ ਨਿਗਮ ਦੇ ਇਕ ਸੁਰੱਖਿਆ ਕਰਮਚਾਰੀ ਅਤੇ ਪੰਜ ਕਾਰ ਡਰਾਈਵਰਾਂ ਨੇ ਇਸ ਘਟਨਾ ਸਬੰਧੀ ਸੰਯੋਗਿਤਾਗੰਜ ਥਾਣੇ ’ਚ ਸ਼ਿਕਾਇਤ ਦਰਜ ਕਰਵਾਈ ਹੈ, ਜਿਸ ’ਚ ਕੁਲਮੀ ਵਿਰੁਧ ਕਾਨੂੰਨੀ ਕਾਰਵਾਈ ਦੀ ਮੰਗ ਕੀਤੀ ਗਈ ਹੈ। ਅਧਿਕਾਰੀਆਂ ਨੇ ਦਸਿਆ ਕਿ ਨਿਗਮ ਕਮਿਸ਼ਨਰ ਨੇ ਕੁਲਮੀ ਨੂੰ ਇਸ ਬਾਡੀ ਦੇ ਕੰਟਰੋਲ ਰੂਮ ’ਚ ਤਬਦੀਲ ਕਰ ਦਿਤਾ ਹੈ। ਅਧਿਕਾਰੀਆਂ ਅਨੁਸਾਰ ਬਦਲੀ ਦੇ ਹੁਕਮਾਂ ’ਚ ਕਮਿਸ਼ਨਰ ਨੇ ਕੰਟਰੋਲ ਰੂਮ ਦੇ ਇੰਚਾਰਜ ਨੂੰ ਕੁਲਮੀ ਦੇ ਕੰਮ ਦੀ ‘ਨਿਯਮਿਤ ਨਿਗਰਾਨੀ’ ਰੱਖਣ ਦੇ ਵੀ ਹੁਕਮ ਦਿਤੇ ਹਨ।
ਸੂਬੇ ’ਚ 17 ਨਵੰਬਰ ਦੀਆਂ ਵਿਧਾਨ ਸਭਾ ਚੋਣਾਂ ਲਈ ਆਦਰਸ਼ ਚੋਣ ਜ਼ਾਬਤਾ ਲਾਗੂ ਹੋਣ ਤਕ ਕੁਲਮੀ ਮੇਅਰ ਪੁਸ਼ਿਆਮਿਤਰਾ ਭਾਰਗਵ ਦੇ ‘ਓ.ਐਸ.ਡੀ.’ ਵਜੋਂ ਕੰਮ ਕਰ ਰਹੇ ਸਨ। ਭਾਰਗਵ ਨੇ ਕਿਹਾ, ‘‘ਮੈਨੂੰ ਕੁਲਮੀ ਵਿਰੁਧ ਸ਼ਿਕਾਇਤ ਦੀ ਜਾਣਕਾਰੀ ਮਿਲੀ ਹੈ। ਇਹ ਘਟਨਾ ਪਹਿਲੀ ਨਜ਼ਰੇ ਨਿੰਦਣਯੋਗ ਹੈ। ਸਾਰੇ ਤੱਥਾਂ ਦੀ ਜਾਂਚ ਹੋਣੀ ਚਾਹੀਦੀ ਹੈ ਅਤੇ ਨਿਯਮਾਂ ਅਨੁਸਾਰ ਕਦਮ ਚੁੱਕੇ ਜਾਣੇ ਚਾਹੀਦੇ ਹਨ।’’
