ਉਤਰਾਖੰਡ ਦੇ ਇਸ ਜ਼ਿਲ੍ਹੇ ਦੇ ਸਹਸਪੁਰ ਇਲਾਕੇ ਵਿਚ ਨਿਜੀ ਰੈਜ਼ੀਡੈਂਸ਼ਲ ਸਕੂਲ ਵਿਚ ਚਾਰ ਵਿਦਿਆਰਥੀਆਂ ਦੁਆਰਾ ਨਾਬਾਲਗ਼ ਵਿਦਿਆਰਥਣ
ਦੇਹਰਾਦੂਨ, 19 ਸਤੰਬਰ: ਉਤਰਾਖੰਡ ਦੇ ਇਸ ਜ਼ਿਲ੍ਹੇ ਦੇ ਸਹਸਪੁਰ ਇਲਾਕੇ ਵਿਚ ਨਿਜੀ ਰੈਜ਼ੀਡੈਂਸ਼ਲ ਸਕੂਲ ਵਿਚ ਚਾਰ ਵਿਦਿਆਰਥੀਆਂ ਦੁਆਰਾ ਨਾਬਾਲਗ਼ ਵਿਦਿਆਰਥਣ ਨਾਲ ਕਥਿਤ ਰੂਪ ਵਿਚ ਸਮੂਹਕ ਬਲਾਤਕਾਰ ਕੀਤਾ ਗਿਆ। ਪੁਲਿਸ ਨੇ ਮੁਲਜ਼ਮ ਵਿਦਿਆਰਥੀਆਂ ਸਮੇਤ ਨੌਂ ਜਣਿਆਂ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ।
ਪੁਲਿਸ ਅਧਿਕਾਰੀ ਅਸ਼ੋਕ ਕੁਮਾਰ ਨੇ ਦਸਿਆ ਕਿ ਇਕ ਮਹੀਨੇ ਪਹਿਲਾਂ ਵਾਪਰੀ ਇਸ ਘਟਨਾ ਦੇ ਸਾਹਮਣੇ ਆਉਣ ਮਗਰੋਂ ਪੁਲਿਸ ਨੇ ਕਾਰਵਾਈ ਕਰਦਿਆਂ ਮੁਲਜ਼ਮ ਵਿਦਿਆਰਥੀਆਂ, ਇਕ ਆਇਆ, ਸਕੂਲ ਦੇ ਕਰਮਚਾਰੀਆਂ ਸਮੇਤ ਨੌਂ ਜਣਿਆਂ ਨੂੰ ਗ੍ਰਿਫ਼ਤਾਰ ਕੀਤਾ ਹੈ।
10ਵੀਂ ਅਤੇ 12ਵੀਂ ਵਿਚ ਪੜ੍ਹਨ ਵਾਲੇ ਚਾਰੇ ਵਿਦਿਆਰਥੀ ਵੀ ਨਾਬਾਲਗ਼ ਹਨ। ਉਨ੍ਹਾਂ ਦੀ ਉਮਰ 16-18 ਸਾਲ ਦੀ ਹੈ। ਸਕੂਲ ਦੀ ਨਿਰਦੇਸ਼ਕ ਲਤਾ ਗੁਪਤਾ, ਪ੍ਰਧਾਨ ਜਿਤੇਂਦਰ ਸ਼ਰਮਾ ਵੀ ਗ੍ਰਿਫ਼ਤਾਰ ਮੁਲਜ਼ਮਾਂ ਵਿਚ ਸ਼ਾਮਲ ਹਨ। 16 ਸਾਲਾ ਪੀੜਤਾ ਦਸਵੀਂ ਦੀ ਵਿਦਿਆਰਥਣ ਹੈ। ਉਸ ਦੇ ਗਰਭਵਤੀ ਹੋਣ ਦਾ ਪਤਾ ਲੱਗਣ 'ਤੇ ਉਸ ਨਾਲ ਬਲਾਤਕਾਰ ਦੀ ਗੱਲ ਸਾਹਮਣੇ ਆਈ। ਉਸ ਦੇ ਘਰ ਵਾਲਿਆਂ ਨੇ ਪੁਲਿਸ ਕੋਲ ਸ਼ਿਕਾਇਤ ਕੀਤੀ।
ਘਟਨਾ ਪਿਛਲੇ ਮਹੀਨੇ 14 ਅਗੱਸਤ ਦੀ ਹੈ। ਪੀੜਤਾ ਦਾ ਜਮਾਤੀ ਉਸ ਨੂੰ ਝਾਂਸਾ ਦੇ ਕੇ ਅਪਣੇ ਨਾਲ ਲੈ ਗਿਆ ਸੀ ਅਤੇ ਉਥੇ ਉਸ ਦੇ ਸਾਥੀ ਪਹਿਲਾਂ ਹੀ ਸਨ। ਇਹ ਸਾਰੇ ਕੁੜੀ ਨੂੰ ਝਾੜੀਆਂ ਵਿਚ ਲੈ ਗਏ ਜਿਥੇ ਉਸ ਨਾਲ ਸਮੂਹਕ ਬਲਾਤਕਾਰ ਕੀਤਾ ਗਿਆ। ਜਦ ਕੁੜੀ ਦੇ ਘਰ ਵਾਲਿਆਂ ਨੇ ਸਕੂਲ ਪ੍ਰਬੰਧਕਾਂ ਨੂੰ ਘਟਨਾ ਬਾਰੇ ਦਸਿਆ ਤਾਂ ਉਨ੍ਹਾਂ ਮੂੰਹ ਬੰਦ ਰੱਖਣ ਲਈ ਕਿਹਾ।