ਗੁਜਰਾਤ ਤੋਂ ਅਸਮ ਤੱਕ ਤੈਅ ਕੀਤੀ ਲੰਬੀ ਦੂਰੀ, ਰਾਸਤੇ ਵਿਚ ਲੁੱਟ ਦਾ ਹੋਇਆ ਸ਼ਿਕਾਰ
ਗੁਜਰਾਤ: ਅਸਮ ਦੇ ਨੌਗਾਂਵ ਜ਼ਿਲ੍ਹੇ ਦੇ ਰਹਿਣ ਵਾਲੇ 46 ਸਾਲ ਦੇ ਜਾਧਵ ਗੋਗੋਈ ਕੰਮ ਦੀ ਭਾਲ ਵਿਚ ਗੁਜਰਾਤ ਪਹੁੰਚੇ ਸੀ। ਉਥੇ ਉਹ ਗੁਜਰਾਤ ਦੇ ਉਦਯੋਗਿਕ ਸ਼ਹਿਰ ਵਾਪੀ ਵਿਚ ਮਜ਼ਦੂਰ ਵਜੋਂ ਕੰਮ ਕਰਦੇ ਸੀ। ਜਦੋਂ 25 ਮਾਰਚ ਤੋਂ ਤਾਲਾਬੰਦੀ ਦਾ ਐਲਾਨ ਕੀਤਾ ਗਿਆ ਤਾਂ ਉਹਨਾਂ ਨੂੰ ਵੀ ਕੰਮ ਤੋਂ ਕੱਢ ਦਿੱਤਾ ਗਿਆ।
ਫਿਰ ਉਹਨਾਂ ਕੋਲ ਆਪਣੇ ਘਰ ਨੂੰ ਵਾਪਸ ਪਰਤਣ ਤੋਂ ਇਲਾਵਾ ਕੋਈ ਚਾਰਾ ਨਹੀਂ ਸੀ। 27 ਮਾਰਚ ਨੂੰ ਜਾਧਵ ਨੇ ਵਾਪੀ ਤੋਂ ਪੈਦਲ ਚੱਲਣਾ ਸ਼ੁਰੂ ਕੀਤਾ। ਰਸਤੇ ਵਿਚ ਜੇਕਰ ਉਹਨਾਂ ਨੂੰ ਕੋਈ ਐਮਰਜੈਂਸੀ ਵਾਹਨ ਮਿਲਦਾ ਤਾਂ ਉਹ ਉਸ ਨੂੰ ਬਿਠਾ ਲੈਂਦੇ ਸੀ, ਇਸ ਤਰ੍ਹਾਂ ਉਹ ਕੁਝ ਦੂਰੀ ਤੈਅ ਕਰ ਲੈਂਦੇ ਸੀ।
ਅਜਿਹਾ ਕਰਦਿਆਂ ਜਾਧਵ 25 ਦਿਨਾਂ ਵਿਚ ਨੌਗਾਂਵ ਜ਼ਿਲੇ ਦੇ ਰਾਹਾ ਖੇਤਰ ਵਿਚ ਆਪਣੇ ਘਰ ਦੇ ਨੇੜੇ ਪਹੁੰਚ ਗਏ। ਉਹ ਐਤਵਾਰ ਰਾਤ ਨੂੰ ਇਥੇ ਪਹੁੰਚੇ ਸੀ। ਜਦੋਂ ਜਾਧਵ ਨੇ ਵਾਪੀ ਤੋਂ ਪੈਦਲ ਚੱਲਣਾ ਸ਼ੁਰੂ ਕੀਤਾ ਤਾਂ ਉਹਨਾਂ ਦੀ ਜੇਬ ਵਿਚ ਸਿਰਫ 4 ਹਜ਼ਾਰ ਰੁਪਏ ਸਨ। ਘਰ ਪਹੁੰਚਣ ਦੌਰਾਨ ਉਹਨਾਂ ਨੇ ਟਰੱਕ ਵਾਲਿਆਂ ਦੀ ਮਦਦ ਲਈ, ਜੋ ਦੇਸ਼ ਵਿਚ ਜ਼ਰੂਰੀ ਸਮਾਨ ਸਪਲਾਈ ਕਰਨ ਲਈ ਸੜਕਾਂ 'ਤੇ ਦੌੜ ਰਹੇ ਸਨ।
ਇਸ ਯਾਤਰਾ ਦੌਰਾਨ ਉਹਨਾਂ ਦੇ ਪੈਸੇ, ਮੋਬਾਈਲ ਅਤੇ ਹੋਰ ਸਾਮਾਨ ਵੀ ਲੁੱਟ ਲਿਆ ਗਿਆ। ਜਦੋਂ ਉਹ ਰਾਹਾ ਪਹੁੰਚੇ ਅਤੇ ਸੜਕ ਦੇ ਕਿਨਾਰੇ ਅਰਾਮ ਕਰ ਰਹੇ ਸੀ, ਤਾਂ ਸਥਾਨਕ ਲੋਕਾਂ ਨੇ ਪੁਲਿਸ ਨੂੰ ਬੁਲਾਇਆ। ਜਾਧਵ ਨੇ ਦੱਸਿਆ ਕਿ ਉਹ ਗਧਾਰੀਆ ਕਰੌਨੀ ਪਿੰਡ ਦੇ ਰਹਿਣ ਵਾਲੇ ਹਨ ਅਤੇ ਬਿਹਾਰ, ਬੰਗਾਲ ਤੋਂ ਹੁੰਦੇ ਹੋਏ ਇੱਥੇ ਪਹੁੰਚੇ ਹਨ।
ਗੁਜਰਾਤ ਤੋਂ ਅਸਮ ਜਾਣ ਲਈ ਉਹਨਾਂ ਨੇ ਪੁਲਿਸ ਅਤੇ ਸਰਕਾਰੀ ਮਹਿਕਮੇ ਤੋਂ ਮਦਦ ਮੰਗੀ ਪਰ ਉਹਨਾਂ ਨੂੰ ਮਨਾ ਕਰ ਦਿੱਤਾ ਗਿਆ। ਇਸ ਤੋਂ ਬਾਅਦ ਉਹਨਾਂ ਨੇ ਪੈਦਲ ਜਾਣ ਦਾ ਫੈਸਲਾ ਕੀਤਾ। ਰਾਹਾ ਦੀ ਸਥਾਨਕ ਪੁਲਿਸ ਦੀ ਮਦਦ ਨਾਲ ਨੌਗਾਂਵ ਸਿਵਲ ਹਸਪਤਾਲ ਵਿਚ ਉਹਨਾਂ ਦਾ ਚੈੱਕਅਪ ਕਰਵਾਇਆ ਗਿਆ। ਉਹਨਾਂ ਦੀ ਹਾਲਤ ਠੀਕ ਹੈ ਪਰ ਦੂਜੇ ਰਾਜ ਤੋਂ ਆਉਣ ਕਾਰਨ ਉਹਨਾਂ ਨੂੰ 14 ਦਿਨ ਲਈ ਕੁਆਰੰਟੀਨ ਕਰ ਦਿੱਤਾ ਗਿਆ ਹੈ।