ਇਸ ਮਾਮਲੇ ਵਿਚ ਸੁਸਾਇਟੀ ਵੱਲੋਂ ਵੀ ਕਾਰਵਾਈ ਕੀਤੀ ਜਾਵੇਗੀ। ਔਰਤ ਨੂੰ ਘਰ ਖਾਲੀ ਕਰਨ ਲਈ ਵੀ ਕਿਹਾ ਜਾ ਸਕਦਾ ਹੈ।
ਨਵੀਂ ਦਿੱਲੀ - ਨੋਇਡਾ ਦੇ ਸੈਕਟਰ-126 ਸਥਿਤ ਜੇਪੀ ਸੁਸਾਇਟੀ 'ਚ ਗਾਰਡ ਨਾਲ ਬਦਸਲੂਕੀ ਕਰਨ ਵਾਲੀ ਔਰਤ ਨੂੰ ਅਦਾਲਤ ਨੇ 14 ਦਿਨਾਂ ਦੀ ਨਿਆਂਇਕ ਹਿਰਾਸਤ 'ਚ ਭੇਜ ਦਿੱਤਾ ਹੈ। ਭਵਿਆ ਰਾਏ ਨਾਮ ਦੀ ਇਸ ਔਰਤ ਨੂੰ ਐਤਵਾਰ ਸਵੇਰੇ ਗ੍ਰਿਫ਼ਤਾਰ ਕਰ ਲਿਆ ਗਿਆ ਸੀ। ਔਰਤ ਦਾ ਇੱਕ ਵੀਡੀਓ ਸੋਸ਼ਲ ਮੀਡੀਆ 'ਤੇ ਵਾਇਰਲ ਹੋ ਰਿਹਾ ਸੀ, ਜਿਸ ਵਿਚ ਉਹ ਗਾਰਡ ਨੂੰ ਗਾਲ੍ਹਾਂ ਕੱਢਦੀ ਹੋਈ ਨਜ਼ਰ ਆ ਰਹੀ ਸੀ ਅਤੇ ਉਸ ਨੂੰ ਕਾਲਰ ਨਾਲ ਘਸੀਟਦੀ ਹੋਈ ਨਜ਼ਰ ਆ ਰਹੀ ਸੀ।
ਦਰਅਸਲ, ਸੁਸਾਇਟੀ ਦੇ ਸੁਰੱਖਿਆ ਗਾਰਡ ਨੇ ਗੇਟ ਖੋਲ੍ਹਣ ਵਿਚ ਦੇਰੀ ਕੀਤੀ ਸੀ।
ਇਸ 'ਤੇ ਔਰਤ ਨੇ ਗਾਰਡ ਨੂੰ ਗਾਲ੍ਹਾਂ ਕੱਢਣੀਆਂ ਸ਼ੁਰੂ ਕਰ ਦਿੱਤੀਆਂ। ਉਸ ਨੇ ਡੇਢ ਮਿੰਟ 'ਚ 9 ਵਾਰ ਉਸ ਨਾਲ ਬਦਸਲੂਕੀ ਕੀਤੀ ਅਤੇ ਕਾਲਰ ਫੜ ਕੇ ਉਸ ਨੂੰ ਘਸੀਟਿਆ। ਗਾਰਡ ਦੇ ਸਾਥੀ ਉਸ ਨੂੰ ਚਲੇ ਜਾਣ ਲਈ ਤਰਲੇ ਕਰਦੇ ਰਹੇ ਪਰ ਉਹ ਗਾਲ੍ਹਾਂ ਕੱਢਣ ਤੋਂ ਨਹੀਂ ਹਟੀ। ਪੁਲਿਸ ਨੇ ਔਰਤ ਖਿਲਾਫ਼ ਮਾਮਲਾ ਦਰਜ ਕਰ ਲਿਆ ਹੈ। ਉਹ ਪੇਸ਼ੇ ਤੋਂ ਵਕੀਲ ਹੈ।
ਮਾਮਲਾ ਸ਼ਨੀਵਾਰ ਦਾ ਹੈ।ਇਕ ਵੀਡੀਓ ਕਾਫ਼ੀ ਵਾਇਰਲ ਹੋ ਰਹੀ ਹੈ। ਵੀਡੀਓ 'ਚ ਸਾਫ ਦਿਖਾਈ ਦੇ ਰਿਹਾ ਹੈ ਕਿ ਔਰਤ ਗਾਰਡਾਂ ਨੂੰ ਅਪਸ਼ਬਦ ਬੋਲ ਰਹੀ ਹੈ। ਇਸ ਦੌਰਾਨ ਗਾਰਡ ਉਸ ਤੋਂ ਬਚ ਕੇ ਜਾ ਰਹੇ ਹਨ ਪਰ ਇਸ ਦੇ ਬਾਵਜੂਦ ਔਰਤ ਉਹਨਾਂ ਕੋਲ ਜਾ ਕੇ ਗਾਰਡ ਨੂੰ ਫੜ ਕੇ ਉਸ ਨਾਲ ਧੱਕਾ-ਮੁੱਕੀ ਕਰ ਰਹੀ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਉਹ ਸ਼ਰਾਬ ਦੇ ਨਸ਼ੇ 'ਚ ਸੀ।
ਹੈਰਾਨ ਕਰਨ ਵਾਲੀ ਗੱਲ ਇਹ ਹੈ ਕਿ ਜਦੋਂ ਔਰਤ ਨੂੰ ਪੁਲਿਸ ਨੇ ਹਿਰਾਸਤ ਵਿਚ ਲਿਆ ਤਾਂ ਉਹ ਆਪਣੀ ਕਾਰ ਰਾਂਹੀ ਹੀ ਪੁਲਿਸ ਨਾਲ ਗਈ ਅਤੇ ਕਾਰ ਵੀ ਖ਼ੁਦ ਹੀ ਚਲਾ ਰਹੀ ਸੀ। ਇਸ ਤੋਂ ਪਹਿਲਾਂ ਨੋਇਡਾ ਦੀ ਗ੍ਰੈਂਡ ਓਮੈਕਸ ਸੋਸਾਇਟੀ 'ਚ ਸ਼੍ਰੀਕਾਂਤ ਤਿਆਗੀ ਦਾ ਇਕ ਔਰਤ ਨਾਲ ਬਦਸਲੂਕੀ ਕਰਨ ਦਾ ਵੀਡੀਓ ਸਾਹਮਣੇ ਆਇਆ ਸੀ। ਸ਼੍ਰੀਕਾਂਤ ਫਿਲਹਾਲ ਜੇਲ੍ਹ 'ਚ ਹੈ।
ਬੇਇੱਜ਼ਤੀ ਤੋਂ ਨਾਰਾਜ਼ ਹੋ ਕੇ ਗਾਰਡ ਨੇ ਨੌਕਰੀ ਛੱਡਣ ਦੀ ਗੱਲ ਵੀ ਕਹੀ। ਉਸ ਨੇ ਕਿਹਾ, 'ਬਹੁਤ ਹੋ ਗਿਆ ਬੇਇੱਜ਼ਤੀ ਸਹਿੰਦੇ-ਸਹਿੰਦੇ। ਅਸੀਂ ਵੀ ਪਰਿਵਾਰ ਹਾਂ। ਹੁਣ ਮੈਂ ਕੰਮ ਨਹੀਂ ਕਰਨਾ ਚਾਹੁੰਦਾ। ਅਸੀਂ ਆਪਣੀ ਪੂਰੀ ਜ਼ਿੰਮੇਵਾਰੀ ਨਾਲ ਕੰਮ ਕਰਦੇ ਹਾਂ। ਔਰਤ ਨੂੰ ਹਰ ਕੋਈ ਆਪਣੀ ਭੈਣ, ਮਾਂ ਸਮਝਦਾ ਹੈ, ਪਰ ਪੜ੍ਹੀ-ਲਿਖੀ ਹੋਣ ਦੇ ਬਾਵਜੂਦ ਔਰਤ ਵਿਚ ਕੋਈ ਨੇਕੀ ਨਹੀਂ ਹੈ। ਔਰਤ ਪਹਿਲਾਂ ਵੀ ਦੁਰਵਿਵਹਾਰ ਕਰ ਚੁੱਕੀ ਹੈ।
ਇਸ ਘਟਨਾ ਤੋਂ ਬਾਅਦ ਜੇਪੀ ਸੁਸਾਇਟੀ ਦੇ ਅਹੁਦੇਦਾਰਾਂ ਨੇ ਦੱਸਿਆ ਕਿ ਔਰਤ ਕਿਰਾਏ 'ਤੇ ਰਹਿੰਦੀ ਹੈ। ਉਸ ਦੇ ਮਕਾਨ ਮਾਲਕ ਨਾਲ ਵੀ ਚਰਚਾ ਕੀਤੀ ਗਈ ਹੈ। ਇਸ ਮਾਮਲੇ ਵਿਚ ਸੁਸਾਇਟੀ ਵੱਲੋਂ ਵੀ ਕਾਰਵਾਈ ਕੀਤੀ ਜਾਵੇਗੀ। ਔਰਤ ਨੂੰ ਘਰ ਖਾਲੀ ਕਰਨ ਲਈ ਵੀ ਕਿਹਾ ਜਾ ਸਕਦਾ ਹੈ।