ਮੰਦਰ 'ਚ ਸ਼ਰਧਾਲੂਆਂ ਦੀ ਵਧਦੀ ਗਿਣਤੀ ਨੂੰ ਦੇਖਦੇ ਹੋਏ ਟਿਕਟਾਂ ਦੀਆਂ ਕੀਮਤਾਂ 'ਚ ਵਾਧਾ ਕਰਨ ਦਾ ਟਰੱਸਟ ਨੇ ਫ਼ੈਸਲਾ ਕੀਤਾ ਹੈ।

ਕਾਸ਼ੀ : ਵਾਰਾਣਸੀ ਦੇ ਕਾਸ਼ੀ ਵਿਸ਼ਵਨਾਥ ਮੰਦਰ 'ਚ ਬਾਬਾ ਦੀ ਆਰਤੀ ਮਹਿੰਗੀ ਹੋ ਗਈ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਹੁਣ ਮੰਗਲਾ ਆਰਤੀ ਲਈ ਸ਼ਰਧਾਲੂਆਂ ਨੂੰ 150 ਰੁਪਏ ਜ਼ਿਆਦਾ ਦੇਣੇ ਪੈਣਗੇ। ਯਾਨੀ ਹੁਣ 350 ਦੀ ਬਜਾਏ 500 ਰੁਪਏ ਦੇਣੇ ਪੈਣਗੇ। ਇਸ ਦੇ ਨਾਲ ਹੀ ਸਪਤ ਰਿਸ਼ੀ ਆਰਤੀ, ਸ਼ਿੰਗਾਰ ਭੋਗ ਆਰਤੀ ਅਤੇ ਦੁਪਹਿਰ ਭੋਗ ਆਰਤੀ ਦੀਆਂ ਟਿਕਟਾਂ ਵਿੱਚ 120 ਰੁਪਏ ਦਾ ਵਾਧਾ ਕੀਤਾ ਗਿਆ ਹੈ। ਇਨ੍ਹਾਂ ਆਰਤੀਆਂ ਲਈ 180 ਦੀ ਬਜਾਏ 300 ਰੁਪਏ ਦੇਣੇ ਪੈਣਗੇ। ਨਵੀਂ ਦਰ 1 ਮਾਰਚ ਤੋਂ ਲਾਗੂ ਹੋਵੇਗੀ।
ਇਹ ਫੈਸਲਾ ਬੁੱਧਵਾਰ ਨੂੰ ਸ਼੍ਰੀਕਾਸ਼ੀ ਵਿਸ਼ਵਨਾਥ ਮੰਦਰ ਟਰੱਸਟ ਦੀ 104ਵੀਂ ਬੋਰਡ ਮੀਟਿੰਗ ਵਿੱਚ ਲਿਆ ਗਿਆ।  ਇਸ ਤੋਂ ਪਹਿਲਾਂ 2018 'ਚ ਭਾਵ 5 ਸਾਲ ਪਹਿਲਾਂ ਮੰਗਲਾ ਆਰਤੀ ਦੀ ਟਿਕਟ 100 ਰੁਪਏ ਵਧਾਈ ਗਈ ਸੀ।  ਉਦੋਂ ਟਿਕਟ 250 ਰੁਪਏ ਸੀ। ਮੰਦਰ 'ਚ ਸ਼ਰਧਾਲੂਆਂ ਦੀ ਵਧਦੀ ਗਿਣਤੀ ਨੂੰ ਦੇਖਦੇ ਹੋਏ ਟਿਕਟਾਂ ਦੀਆਂ ਕੀਮਤਾਂ 'ਚ ਵਾਧਾ ਕਰਨ ਦਾ ਟਰੱਸਟ ਨੇ ਫ਼ੈਸਲਾ ਕੀਤਾ ਹੈ।
ਸੀਈਓ ਸੁਨੀਲ ਕੁਮਾਰ ਵਰਮਾ ਨੇ ਦੱਸਿਆ ਕਿ ਸਿਰਫ਼ ਆਰਤੀ ਦੇ ਰੇਟ ਵਿੱਚ ਵਾਧਾ ਕੀਤਾ ਗਿਆ ਹੈ। ਇਸ ਤੋਂ ਇਲਾਵਾ ਰੁਦਰਾਭਿਸ਼ੇਕ ਅਤੇ ਪ੍ਰਸਾਦ ਵਿਚ ਕੋਈ ਵਾਧਾ ਨਹੀਂ ਕੀਤਾ ਜਾਂਦਾ। ਮਹੱਤਵਪੂਰਨ ਗੱਲ ਇਹ ਹੈ ਕਿ ਮੰਦਰ ਦੇ ਲਾਂਘੇ ਦੇ ਨਿਰਮਾਣ ਤੋਂ ਬਾਅਦ ਸ਼ਰਧਾਲੂਆਂ ਦੀ ਗਿਣਤੀ ਲਗਭਗ 8 ਗੁਣਾ ਵੱਧ ਕੇ 8 ਕਰੋੜ ਹੋ ਗਈ ਹੈ। ਇਸ ਦੇ ਨਾਲ ਹੀ ਮੰਦਰ ਨੂੰ 8 ਤੋਂ 10 ਕਰੋੜ ਦਾ ਸਾਲਾਨਾ ਚੜ੍ਹਾਵਾ ਹੁਣ 10 ਗੁਣਾ ਵਧ ਕੇ 105 ਕਰੋੜ ਹੋ ਗਿਆ ਹੈ।