ਕਿਹਾ, ਮੈਂ ਛੋਟੀ ਹੁੰਦੇ ਤੋਂ ਹੀ ਖ਼ੁਦ ਨੂੰ ਮਰਦ ਸਮਝਦੀ ਸੀ, ਹੁਣ ਮੈਨੂੰ ਸੁਚੇਤਨ ਕਹੋ
ਕੋਲਕਾਤਾ, 23 ਜੂਨ: ਪਛਮੀ ਬੰਗਾਲ ਦੇ ਸਾਬਕਾ ਮੁੱਖ ਮੰਤਰੀ ਬੁਧਦੇਵ ਭੱਟਾਚਾਰੀਆ ਦੀ ਬੇਟੀ ਸੁਚੇਤਨਾ ਭੱਟਾਚਾਰੀਆ ਨੇ ਕਿਹਾ ਹੈ ਕਿ ਉਹ ਮਰਦ ਬਣਨ ਲਈ ਛੇਤੀ ਹੀ ਲਿੰਗ ਬਦਲਵਾਉਣ ਵਾਲੀ ਸਰਜਰੀ ਕਰਵਾਏਗੀ। ਪਿੱਛੇ ਜਿਹੇ ਐਲ.ਜੀ.ਬੀ.ਟੀ.ਕਿਊ. ਭਾਈਚਾਰੇ ਦੇ ਇਕ ਸੰਮੇਲਨ ’ਚ ਹਿੱਸਾ ਲੈਣ ਵਾਲੀ 41 ਵਰ੍ਹਿਆਂ ਦੀ ਸੁਚੇਤਨਾ ਨੇ ਬੁਧਵਾਰ ਨੂੰ ਕਿਹਾ ਕਿ ਉਹ ਸੁਚੇਤਨ ਕਹਾਉਣਾ ਪਸੰਦ ਕਰੇਗੀ।
ਉਨ੍ਹਾਂ ਕਿਹਾ, ‘‘ਮੈਨੂੰ ਅਕਸਰ ਬੇਇੱਜ਼ਤ ਕੀਤਾ ਗਿਆ ਹੈ ਕਿਉਂਕਿ ਮੈਂ ਛੋਟੀ ਉਮਰ ਤੋਂ ਹੀ ਖ਼ੁਦ ਨੂੰ ਔਰਤ ਨਹੀਂ ਬਲਕਿ ਮਰਦ ਵਜੋਂ ਵੇਖਦੀ ਸੀ। ਮੈਨੂੰ ਲਗਦਾ ਹੈ ਕਿ ਹੁਣ ਮੈਂ ਇਸ ਲੜਾਈ ਲਈ ਤਿਆਰ ਹਾਂ।’’ ਸੁਚੇਤਨਾ ਨੇ ਕਿਹਾ ਕਿ ਉਸ ਦੇ ਪਿਤਾ ਬੁੱਧਦੇਵ ਭੱਟਾਚਾਰੀਆ ਹਮੇਸ਼ਾ ਉਨ੍ਹਾਂ ਦੇ ਫੈਸਲੇ ਦੇ ਹਮਾਇਤੀ ਰਹੇ ਹਨ, ਜਦਕਿ ਮਾਂ ਮੀਰਾ ਨੇ ਵੀ ਇਸ ਦਾ ਵਿਰੋਧ ਨਹੀਂ ਕੀਤਾ, ਭਾਵੇਂ ਉਨ੍ਹਾਂ ਨੂੰ ਇਤਰਾਜ਼ ਸੀ।
ਇਹ ਵੀ ਪੜ੍ਹੋ: ਤੁਸੀਂ ਵਿਆਹ ਕਰੋ, ਅਸੀਂ ਬਰਾਤ ਚਲੀਏ : ਲਾਲੂ ਪ੍ਰਸਾਦ ਯਾਦਵ
ਸੁਚੇਤਨਾ ਨੇ ਕਿਹਾ ਕਿ ਐਲ.ਜੀ.ਬੀ.ਟੀ.ਕਿਊ. ਦੇ ਪਿੱਛੇ ਜਿਹੇ ਹੋਏ ਸੰਮੇਲਨ ’ਚ ਉਨ੍ਹਾਂ ਨੇ ਅਪਣੀ ਪਛਾਣ ਇਕ ਸਮਾਜਕ ਕਾਰਕੁਨ ਅਤੇ ‘ਫ੍ਰੀਲਾਂਸ ਗ੍ਰਾਫ਼ਿਕ ਡਿਜ਼ਾਈਨਰ’ ਸੁਚੇਤਨ ਵਜੋਂ ਦਿਤੀ ਸੀ।ਉਨ੍ਹਾਂ ਕਿਹਾ ਕਿ ਲਿੰਗ ਤਬਦੀਲੀ ਲਈ ਛੇਤੀ ਹੀ ਉਨ੍ਹਾਂ ਦੀ ਸਰਜਰੀ ਹੋਵੇਗੀ। ਉਨ੍ਹਾਂ ਨੇ ਸੋਸ਼ਲ ਮੀਡੀਆ ’ਤੇ ਅਪਣੀ ਹਮਾਇਤ ਕਰਨ ਵਾਲਿਆਂ ਦਾ ਧਨਵਾਦ ਵੀ ਕੀਤਾ। ਉਨ੍ਹਾਂ ਕਿਹਾ ਕਿ ਪਛਾਣ ਪੱਤਰ ’ਚ ਨਾਂ ਅਤੇ ਲਿੰਗ ਬਦਲਵਾਉਣ ਦੀ ਕਾਨੂੰਨੀ ਪ੍ਰਕਿਰਿਆ ਸਰਜਰੀ ਤੋਂ ਪਹਿਲਾਂ ਹੋਵੇਗੀ।
ਇਸ ਮਾਮਲੇ ’ਚ ਸਾਬਕਾ ਮੁੱਖ ਮੰਤਰੀ ਭੱਟਾਚਾਰੀਆ ਅਤੇ ਉਨ੍ਹਾਂ ਦੀ ਪਤਨਂ ਦੀ ਕੋਈ ਪ੍ਰਤੀਕਿਰਿਆ ਸਾਹਮਣੇ ਨਹੀਂ ਆਈ ਹੈ।
