ਯੂਪੀ ਦੇ ਬਰੇਲੀ ਜ਼ਿਲ੍ਹੇ ਵਿਚ ਦੋ ਔਰਤਾਂ ਨੇ ਅਪਣੇ ਪਤੀਆਂ ਨੂੰ ਤਲਾਕ-ਏ-ਤਫ਼ਵੀਜ਼ ਦੇ ਕੇ ਨੂੰ ਉਨ੍ਹਾਂ ਤੋਂ ਨਿਜਾਤ ਹਾਸਲ ਕੀਤੀ ਹੈ। ਨਿਸ਼ਾ ਹਾਮਿਦ ਨਾਮਕ ਔਰਤ.....
ਬਰੇਲੀ : ਯੂਪੀ ਦੇ ਬਰੇਲੀ ਜ਼ਿਲ੍ਹੇ ਵਿਚ ਦੋ ਔਰਤਾਂ ਨੇ ਅਪਣੇ ਪਤੀਆਂ ਨੂੰ ਤਲਾਕ-ਏ-ਤਫ਼ਵੀਜ਼ ਦੇ ਕੇ ਨੂੰ ਉਨ੍ਹਾਂ ਤੋਂ ਨਿਜਾਤ ਹਾਸਲ ਕੀਤੀ ਹੈ। ਨਿਸ਼ਾ ਹਾਮਿਦ ਨਾਮਕ ਔਰਤ ਨੇ ਕਲ ਕਚਹਿਰੀ ਪਹੁੰਚ ਕੇ ਦੋ ਗਵਾਹਾਂ ਦੀ ਮੌਜੂਦਗੀ ਵਿਚ ਅਪਣੇ ਸ਼ੌਹਰ ਜਾਵੇਦ ਨੂੰ ਉਸ ਦੇ ਸਾਹਮਣੇ ਤਲਾਕ ਦੇ ਦਿਤਾ। ਨਿਸ਼ਾ ਦਾ ਕਹਿਣਾ ਹੈ ਕਿ ਸਾਲ 2005 ਵਿਚ ਉਸ ਦਾ ਨਿਕਾਹ ਬਰੇਲੀ ਜ਼ਿਲ੍ਹੇ ਦੇ ਫ਼ਰੀਦਪੁਰ ਕਸਬੇ ਦੇ ਵਾਸੀ ਜਾਵੇਦ ਅੰਸਾਰੀ ਨਾਲ ਹੋਇਆ ਸੀ। ਤਲਾਕ ਕਰਾਉਣ ਵਾਲੇ ਵਕੀਲ ਕਾਜ਼ੀ ਜੁਬੇਰ ਅਹਿਮਦ ਮੁਤਾਬਕ ਨਿਸ਼ਾ ਦਾ ਦੋਸ਼ ਹੈ ਕਿ ਸਹੁਰਾ ਘਰ ਵਿਚ ਉਸ ਨਾਲ ਮਾੜਾ ਸਲੂਕ ਕੀਤਾ ਜਾਂਦਾ ਸੀ ਜਿਸ ਕਾਰਨ ਉਸ ਨੇ ਮੁਕੱਦਮਾ ਵੀ ਪਾਇਆ ਹੋਇਆ ਸੀ।
ਉਸ ਦਾ ਕਹਿਣਾ ਹੈ ਕਿ ਜਾਵੇਦ ਨਾ ਤਾਂ ਉਸ ਨੂੰ ਤਲਾਕ ਦੇ ਰਿਹਾ ਸੀ ਤੇ ਨਾ ਹੀ ਸੁਲ੍ਹਾ ਕਰਨਾ ਚਾਹੁੰਦਾ ਸੀ ਸਗੋਂ ਉਸ ਦੀ ਜ਼ਿੰਦਗੀ ਬਰਬਾਦ ਕਰਨ ਦੀ ਧਮਕੀ ਦੇ ਰਿਹਾ ਸੀ। ਇਸੇ ਕਾਰਨ ਉਸ ਨੇ ਕਲ ਕਚਹਿਰੀ ਵਿਚ ਅਪਣੇ ਸ਼ਰਈ ਹੱਕ ਦੀ ਵਰਤੋਂ ਕੀਤੀ। ਅਹਿਮਦ ਨੇ ਦਸਿਆ ਕਿ ਅਜਿਹਾ ਹੀ ਦੂਜਾ ਮਾਮਲਾ ਯਾਸਮੀਨ ਦਾ ਹੈ ਜਿਸ ਨੇ ਅਪਣੇ ਪਤੀ ਤੋਂ ਛੁਟਕਾਰਾ ਹਾਸਲ ਕੀਤਾ। ਤਲਾਕ-ਏ-ਤਫ਼ਵੀਜ਼ ਸ਼ਰੀਅਤ ਦੀ ਵਿਵਸਥਾ ਹੈ। ਤਫ਼ਵੀਜ਼ ਦਾ ਅਰਥ ਅਪਣਾ ਅਧਿਕਾਰ ਦੂਜੇ ਨੂੰ ਦੇਣਾ ਹੈ। ਇਸ ਪ੍ਰਾਵਧਾਨ ਤਹਿਤ ਪਤੀ ਅਪਣੀ ਪਤੀ ਨੂੰ ਇਕੋ ਵਾਰ ਤਿੰਨ ਤਲਾਕ ਨਹੀਂ ਦੇ ਸਕਦਾ। ਜੇ ਉਹ ਤਿੰਨ ਤਲਾਕ ਦੇ ਵੀ ਦੇਵੇਗਾ ਤਾਂ ਉਹ ਮੰਨਿਆ ਨਹੀਂ ਜਾਵੇਗਾ।
ਨਾਲ ਹੀ ਜੇ ਮਰਦ ਨੇ ਦੂਜਾ ਵਿਆਹ ਕਰ ਲਿਆ ਤਾਂ ਵੀ ਪਹਿਲਾ ਵਿਆਹ ਟੁੱਟ ਜਾਵੇਗਾ। ਜੇ ਮਰਦ ਔਰਤ ਵਿਚਕਾਰ ਕਿਸੇ ਗੱਲ ਕਾਰਨ ਵੱਖ ਹੋਣ ਦੀ ਨੌਬਤ ਆ ਜਾਵੇ ਤਾਂ ਔਰਤ ਖ਼ੁਦ ਵੀ ਪਤੀ ਨੂੰ ਤਲਾਕ ਦੇ ਸਕਦੀ ਹੈ। ਇਹ ਜ਼ਰੂਰੀ ਨਹੀਂ ਕਿ ਮਰਦ ਵੀ ਤਲਾਕ ਦੇਵੇ। ਹੋ ਸਕਦਾ ਹੈ ਕਿ ਇਨ੍ਹਾਂ ਦੋਹਾਂ ਮਾਮਲਿਆਂ ਵਿਚ ਨਿਕਾਹ ਸਮੇਂ ਤਲਾਕ-ਏ-ਤਫ਼ਵੀਜ਼ ਦਾ ਪ੍ਰਾਵਧਾਨ ਕੀਤਾ ਗਿਆ ਹੋਵੇ। (ਏਜੰਸੀ)
