ਲੀਹ ਤੋਂ ਉੱਤਰੇ 53 ਡੱਬੇ, ਰੇਲ ਮਾਰਗ 'ਤੇ ਆਵਾਜਾਈ ਠੱਪ
ਪਟਨਾ - ਬਿਹਾਰ ’ਚ ਪੂਰਬ ਮੱਧ ਰੇਲਵੇ ਅਧੀਨ ਆਉਣ ਵਾਲੇ ਧਨਬਾਦ ਡਵੀਜ਼ਨ ਦੇ ਕੋਡਰਮਾ ਅਤੇ ਮਾਨਪੁਰ ਰੇਲ ਡਿਵੀਜ਼ਨ ਵਿਚਾਲੇ ਗੁਰਪਾ ਸਟੇਸ਼ਨ ’ਤੇ ਬੁੱਧਵਾਰ 26 ਅਕਤੂਬਰ ਦੀ ਸਵੇਰ, ਕੋਲੇ ਨਾਲ ਲੱਦੀ ਇੱਕ ਮਾਲਗੱਡੀ ਦੇ 53 ਡੱਬੇ ਪਟੜੀ ਤੋਂ ਉਤਰ ਗਏ, ਜਿਸ ਕਾਰਨ ਇਸ ਰੇਲ ਮਾਰਗ ’ਤੇ ਆਵਾਜਾਈ ਠੱਪ ਹੋ ਗਈ। ਦੁਰਘਟਨਾ ਤੋਂ ਬਾਅਦ ਮਾਲਗੱਡੀ ਦੋ ਹਿੱਸਿਆਂ ’ਚ ਵੰਡੀ ਗਈ। ਦੱਸਿਆ ਗਿਆ ਹੈ ਕਿ ਲੋਕੋ ਪਾਇਲਟ ਅਤੇ ਗਾਰਡ ਸੁਰੱਖਿਅਤ ਹਨ।
ਪੂਰਬ ਮੱਧ ਰੇਲਵੇ ਦੇ ਮੁੱਖ ਜਨਸੰਪਰਕ ਅਧਿਕਾਰੀ ਵੀਰੇਂਦਰ ਕੁਮਾਰ ਨੇ ਦੱਸਿਆ ਕਿ ਇਹ ਹਾਦਸਾ ਸਵੇਰੇ 6 ਵੱਜ ਕੇ 24 ਮਿੰਟ ’ਤੇ ਵਾਪਰਿਆ। ਗ਼ਨੀਮਤ ਇਹ ਰਹੀ ਕਿ ਇਸ ਹਾਦਸੇ ’ਚ ਕੋਈ ਜਾਨੀ ਨੁਕਸਾਨ ਨਹੀਂ ਹੋਇਆ। ਕੁਮਾਰ ਨੇ ਨੇ ਦੱਸਿਆ ਕਿ ਬਰਵਾਹੀਡ, ਗਯਾ, ਨੇਸੁਚਬੋ ਗੋਮੋ ਅਤੇ ਧਨਬਾਦ ਤੋਂ ਬਚਾਅ ਦਲ ਅਤੇ ਅਧਿਕਾਰੀਆਂ ਦੀ ਟੀਮ ਨੂੰ ਘਟਨਾ ਵਾਲੀ ਥਾਂ ਭੇਜ ਦਿੱਤਾ ਗਿਆ ਹੈ।
ਦੱਸਿਆ ਗਿਆ ਹੈ ਕਿ ਬਰੇਕ ਫੇਲ੍ਹ ਹੋਣ ਕਾਰਨ ਮਾਲਗੱਡੀ ਹਾਦਸੇ ਦਾ ਸ਼ਿਕਾਰ ਹੋਈ। ਡੱਬਿਆਂ ਦੇ ਟਕਰਾਉਣ ਦੀ ਆਵਾਜ਼ ਕਈ ਕਿਲੋਮੀਟਰ ਦੂਰ ਤੱਕ ਸੁਣਾਈ ਦਿੱਤੀ। ਇਸ ਰੂਟ ’ਤੇ ਟਰੇਨਾਂ ਦਾ ਪਰਿਚਾਲਨ ਪੂਰੀ ਤਰ੍ਹਾਂ ਠੱਪ ਹੋ ਗਿਆ। ਯਾਤਰੀ ਟਰੇਨਾਂ ਨੂੰ ਸਟੇਸ਼ਨਾਂ ’ਤੇ ਹੀ ਰੋਕ ਦਿੱਤਾ ਗਿਆ ਹੈ। ਹਾਦਸੇ ਤੋਂ ਬਾਅਦ ਮੌਕੇ 'ਤੇ ਸੈਂਕੜੇ ਲੋਕਾਂ ਦੀ ਭੀੜ ਇਕੱਠੀ ਹੋ ਗਈ। ਰੇਲ ਅਧਿਕਾਰੀਆਂ ਵੱਲੋਂ ਮੌਕੇ 'ਤੇ ਪਹੁੰਚ ਕੇ ਹਾਲਾਤਾਂ ਦਾ ਜਾਇਜ਼ਾ ਲਿਆ ਜਾ ਰਿਹਾ ਹੈ, ਅਤੇ ਟਰੈਕ 'ਤੇ ਰੇਲ ਆਵਾਜਾਈ ਮੁੜ ਬਹਾਲ ਕਰਨ ਵਾਸਤੇ ਕਾਰਜ ਚਲਾਏ ਜਾ ਰਹੇ ਹਨ।
