ਵੇਲੋਸਿਟੀ ਐਮਆਰ ਰਿਸਰਚ ਕੰਪਨੀ ਨੇ ਮੁੰਬਈ, ਦਿੱਲੀ, ਬੇਂਗਲੁਰੂ ਸਮੇਤ ਦੇਸ਼ ਦੇ 6 ਵੱਡੇ ਸ਼ਹਿਰਾਂ ਦੇ 2500 ਲੋਕਾਂ ਨਾਲ ਮੀ ਟੂ ਮੁਹਿੰਮ ਦੇ ਅਸਰ ਬਾਰੇ ਗੱਲਬਾਤ ਕੀਤੀ।
ਮੁੰਬਈ, ( ਭਾਸ਼ਾ ) : ਇਕ ਸਰਵੇਖਣ ਵਿਚ ਇਹ ਪਤਾ ਲਗਾ ਹੈ ਕਿ ਮੀ ਟੂ ਮੁਹਿੰਮ ਤੋਂ ਬਾਅਦ ਦਫਤਰਾਂ ਵਿਚ ਕੰਮ ਕਰਨ ਵਾਲੇ ਪੁਰਸ਼ਾਂ ਦੇ ਔਰਤਾਂ ਪ੍ਰਤੀ ਰੱਵਈਏ ਵਿਚ ਬਦਲਾਅ ਆਇਆ ਹੈ ਅਤੇ ਉਹ ਹੁਣ ਇਸ ਮਾਮਲੇ ਵਿਚ ਸਾਵਧਾਨੀ ਵਰਤ ਰਹੇ ਹਨ। ਸਰਵੇਖਣ ਦੌਰਾਨ 10 ਵਿਚੋਂ 8 ਪੁਰਸ਼ਾਂ ਨੇ ਕਿਹਾ ਕਿ ਇਸ ਮੁਹਿੰਮ ਤੋਂ ਬਾਅਦ ਦਫਤਰਾਂ ਵਿਚ ਔਰਤਾਂ ਦੇ ਨਾਲ ਵਤੀਰੇ 'ਤੇ ਬਹੁਤ ਜਿਆਦਾ ਅਸਰ ਪਿਆ ਹੈ। ਵੇਲੋਸਿਟੀ ਐਮਆਰ ਰਿਸਰਚ ਕੰਪਨੀ ਨੇ ਮੁੰਬਈ, ਦਿੱਲੀ, ਬੇਂਗਲੁਰੂ ਸਮੇਤ ਦੇਸ਼ ਦੇ 6 ਵੱਡੇ ਸ਼ਹਿਰਾਂ ਦੇ 2500 ਲੋਕਾਂ ਨਾਲ ਮੀ ਟੂ ਮੁਹਿੰਮ ਦੇ ਅਸਰ ਬਾਰੇ ਗੱਲਬਾਤ ਕੀਤੀ।
ਲਗਭਗ 80 ਫ਼ੀ ਸਦੀ ਲੋਕਾਂ ਨੇ ਕਿਹਾ ਕਿ ਪੀੜਤ ਔਰਤਾਂ ਘਟਨਾ ਬਾਰੇ ਪਹਿਲਾਂ ਸ਼ਿਕਾਇਤ ਨਹੀਂ ਕਰਦੀਆਂ। ਕਰੀਅਰ, ਫੈਮਿਲੀ ਸਟੇਟਸ ਅਤੇ ਸਮਾਜਿਕ ਕਲੰਕ ਜਿਹੇ ਕਾਰਨਾਂ ਨਾਲ ਉਨ੍ਹਾਂ ਅੰਦਰ ਡਰ ਬਣਿਆ ਰਹਿੰਦਾ ਹੈ। 70 ਫ਼ੀ ਸਦੀ ਲੋਕਾਂ ਨੇ ਮੰਨਿਆ ਕਿ ਮਾਮਲੇ ਦੀ ਸ਼ਿਕਾਇਤ ਕਰਨ ਦੇ ਬਾਵਜੂਦ ਵੀ ਪੀੜਤਾਂ ਨੂੰ ਖ਼ਤਰਿਆਂ ਅਤੇ ਧਮਕੀਆਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। 50 ਫ਼ੀ ਸਦੀ ਲੋਕਾਂ ਨੇ ਪੀੜਤਾਂ ਵੱਲੋਂ ਘਟਨਾ ਤੋਂ ਬਹੁਤ ਸਮਾਂ ਬਾਅਦ ਸ਼ਿਕਾਇਤ ਕਰਨ ਦਾ ਵਿਰੋਧ ਕੀਤਾ, ਜਦਕਿ 5 ਵਿਚੋਂ ਸਿਰਫ 2 ਪੁਰਸ਼ਾਂ ਨੇ ਕਿਹਾ ਕਿ ਅਜਿਹੀ ਕਰਨਾ ਸਹੀ ਹੈ।
ਸਰਵੇਖਣ ਵਿਚ 10 ਵਿਚੋਂ 7 ਪੁਰਸ਼ਾਂ ਨੇ ਕਿਹਾ ਕਿ ਪੀੜਤ ਔਰਤਾਂ ਨੂੰ ਸੁਤੰਤਰਤਾ ਦੇ ਲਈ ਪ੍ਰੇਰਿਤ ਕਰਨ ਨਾਲ ਉਨ੍ਹਾਂ ਨੂੰ ਅਪਣੇ ਨਾਲ ਹੋਏ ਸ਼ੋਸ਼ਣ ਬਾਰੇ ਗੱਲ ਕਰਨ ਵਿਚ ਮਦਦ ਮਿਲ ਸਕਦੀ ਹੈ। ਮੀ ਟੂ ਦੇ ਵਧ ਮਾਮਲੇ ਫਿਲਮੀ ਦੁਨੀਆਂ ਤੋਂ ਆਉਣ ਦੇ ਬਾਵਜੂਦ 77 ਫ਼ੀ ਸਦੀ ਦਾ ਮੰਨਣਾ ਹੈ ਕਿ ਦੂਜੇ ਖੇਤਰ ਵੀ ਔਰਤਾਂ ਲਈ ਸੁਰੱਖਿਅਤ ਨਹੀਂ ਮੰਨੇ ਜਾ ਸਕਦੇ। 83 ਫ਼ੀ ਸਦੀ ਲੋਕਾਂ ਦਾ ਮੰਨਣਾ ਹੈ ਕਿ ਮੀ ਟੂ ਅਧੀਨ ਕੁਝ ਮਾਮਲੇ ਝੂਠੇ ਦੋਸ਼ਾਂ ਦੇ ਵੀ ਹਨ। ਹਾਲਾਂਕਿ 5 ਵਿਚੋਂ ਸਿਰਫ 4 ਲੋਕਾਂ ਦਾ ਇਹ ਮੱਤ ਸੀ ਕਿ ਇਹ ਮੁਹਿੰਮ ਚੰਗਾ ਬਦਲਾਅ ਲਿਆਏਗੀ।