3 ਸਤੰਬਰ ਤੋਂ ਗਾਹਕ 12 ਨਵੰਬਰ ਨੂੰ ਜਾਂ ਉਸ ਤੋਂ ਬਾਅਦ ਯਾਤਰਾ ਲਈ ਵਿਸਤਾਰਾ ਦੀ ਉਡਾਣ ਬੁੱਕ ਨਹੀਂ ਕਰ ਸਕਣਗੇ

Vistara-Air India Merger :  ਸਰਕਾਰ ਨੇ ਏਅਰ ਇੰਡੀਆ ਸਮੂਹ ’ਚ ਸਿੰਗਾਪੁਰ ਏਅਰਲਾਈਨਜ਼ (ਐੱਸ.ਆਈ.ਏ.) ਦੇ 2,058.5 ਕਰੋੜ ਰੁਪਏ ਦੇ ਸਿੱਧੇ ਵਿਦੇਸ਼ੀ ਨਿਵੇਸ਼ (ਐੱਫ.ਡੀ.ਆਈ.) ਨੂੰ ਮਨਜ਼ੂਰੀ ਦੇ ਦਿਤੀ।

ਇਹ ਮਨਜ਼ੂਰੀ ਵਿਸਤਾਰਾ ਦੇ ਏਅਰ ਇੰਡੀਆ ਨਾਲ ਰਲੇਵੇਂ ਤਹਿਤ ਦਿਤੀ ਗਈ ਹੈ। ਇਹ ਸੌਦਾ ਦੁਨੀਆਂ ਦੇ ਸੱਭ ਤੋਂ ਵੱਡੇ ਏਅਰਲਾਈਨ ਸਮੂਹਾਂ ਵਿਚੋਂ ਇਕ ਬਣਾਏਗਾ।

ਟਾਟਾ ਸਮੂਹ ਅਤੇ ਸਿੰਗਾਪੁਰ ਏਅਰਲਾਈਨਜ਼ ਵਿਚਾਲੇ ਸੰਯੁਕਤ ਉੱਦਮ (ਜੇ.ਵੀ.) ਵਿਸਤਾਰਾ ਰਲੇਵੇਂ ਦੇ ਸੌਦੇ ਤਹਿਤ 11 ਨਵੰਬਰ ਨੂੰ ਬੰਦ ਹੋ ਜਾਵੇਗਾ। ਇਸ ਰਲੇਵੇਂ ਤੋਂ ਬਾਅਦ ਸਿੰਗਾਪੁਰ ਦੀ ਏਅਰਲਾਈਨ ਦੀ ਏਅਰ ਇੰਡੀਆ ਸਮੂਹ ’ਚ 25.1 ਫੀ ਸਦੀ ਹਿੱਸੇਦਾਰੀ ਹੋਵੇਗੀ।

ਐਸ.ਆਈ.ਏ. ਨੇ ਇਕ ਬਿਆਨ ਵਿਚ ਕਿਹਾ ਕਿ ਇਹ ਮਨਜ਼ੂਰੀ ਰਲੇਵੇਂ ਦੀ ਦਿਸ਼ਾ ਵਿਚ ਇਕ ਮਹੱਤਵਪੂਰਣ ਪ੍ਰਗਤੀ ਹੈ। ਇਹ ਰਲੇਵਾਂ ਇਸ ਸਾਲ ਦੇ ਅੰਤ ਤਕ ਪੂਰਾ ਹੋਣ ਦੀ ਉਮੀਦ ਹੈ।

ਏਅਰ ਇੰਡੀਆ ਦੇ ਸੀ.ਈ.ਓ. ਅਤੇ ਮੈਨੇਜਿੰਗ ਡਾਇਰੈਕਟਰ ਕੈਂਪਬੈਲ ਵਿਲਸਨ ਨੇ ਸ਼ੁਕਰਵਾਰ ਨੂੰ ਕਰਮਚਾਰੀਆਂ ਨੂੰ ਦਸਿਆ ਕਿ ਵਿਸਤਾਰਾ ਦੇ ਜਹਾਜ਼ਾਂ ਅਤੇ ਚਾਲਕ ਦਲ ਨੂੰ ਏਅਰ ਇੰਡੀਆ ਵਿਚ ਸ਼ਾਮਲ ਕਰਨ ਦੀ ਤਰੀਕ 12 ਨਵੰਬਰ ਤੈਅ ਕੀਤੀ ਗਈ ਹੈ।

ਵਿਸਤਾਰਾ ਇਸ ਸਮੇਂ ਘਾਟੇ ’ਚ ਹੈ ਅਤੇ ਉਸ ਕੋਲ 70 ਜਹਾਜ਼ਾਂ ਦਾ ਬੇੜਾ ਹੈ। ਇਹ 50 ਮੰਜ਼ਿਲਾਂ ਵਲ ਉਡਾਣ ਭਰਦਾ ਹੈ। ਕੰਪਨੀ 11 ਨਵੰਬਰ ਨੂੰ ਅਪਣੇ ਬ੍ਰਾਂਡ ਦੇ ਤਹਿਤ ਅਪਣੀ ਆਖਰੀ ਉਡਾਣ ਭਰੇਗੀ। ਜੁਲਾਈ ’ਚ ਇਸ ਦੀ ਘਰੇਲੂ ਬਾਜ਼ਾਰ ਹਿੱਸੇਦਾਰੀ 10 ਫੀ ਸਦੀ ਸੀ।

ਵਿਸਤਾਰਾ ਨੇ ਇਕ ਬਿਆਨ ’ਚ ਕਿਹਾ, ‘‘3 ਸਤੰਬਰ, 2024 ਤੋਂ ਗਾਹਕ 12 ਨਵੰਬਰ, 2024 ਨੂੰ ਜਾਂ ਉਸ ਤੋਂ ਬਾਅਦ ਯਾਤਰਾ ਲਈ ਵਿਸਤਾਰਾ ਦੀ ਉਡਾਣ ਬੁੱਕ ਨਹੀਂ ਕਰ ਸਕਣਗੇ।’’

ਇਸ ਤੋਂ ਬਾਅਦ ਵਿਸਤਾਰਾ ਦੀਆਂ ਉਡਾਣਾਂ ਏਅਰ ਇੰਡੀਆ ਵਲੋਂ ਚਲਾਈਆਂ ਜਾਣਗੀਆਂ ਅਤੇ ਇਨ੍ਹਾਂ ਜਹਾਜ਼ਾਂ ਵਲੋਂ ਸੰਚਾਲਿਤ ਰੂਟਾਂ ਦੀ ਬੁਕਿੰਗ ਏਅਰ ਇੰਡੀਆ ਦੀ ਵੈੱਬਸਾਈਟ ’ਤੇ ਰੀਡਾਇਰੈਕਟ ਕੀਤੀ ਜਾਵੇਗੀ।