ਐਤਵਾਰ ਦੇਰ ਰਾਤ ਡੂੰਘੇ ਦਬਾਅ ਵਿਚ ਕਮਜ਼ੋਰ ਹੋਣ ਦੀ ਸੰਭਾਵਨਾ : ਮੌਸਮ ਵਿਭਾਗ
ਚੇਨਈ : ਤਾਮਿਲਨਾਡੂ ਦੇ ਕਈ ਹਿੱਸਿਆਂ ’ਚ ਚੱਕਰਵਾਤੀ ਤੂਫਾਨ ਦਿਤਵਾਹ ਕਾਰਨ ਤੇਜ਼ ਮੀਂਹ ਪਿਆ। ਤੂਫ਼ਾਨ ਨਾਲ ਸਬੰਧਤ ਘਟਨਾਵਾਂ ਕਾਰਨ ਸੂਬੇ ਵਿਚ ਤਿੰਨ ਵਿਅਕੀਤਆਂ ਦੀ ਮੌਤ ਹੋ ਗਈ। ਸੂਬੇ ਰਾਜ ਦੇ ਕਾਵੇਰੀ ਡੈਲਟਾ ਜ਼ਿਲ੍ਹਿਆਂ ਵਿਚ ਭਾਰੀ ਮੀਂਹ ਨਾਲ, ਰਾਮਨਾਥਪੁਰਮ ਅਤੇ ਨਾਗਪੱਟੀਨਮ ਜ਼ਿਲ੍ਹਿਆਂ ਨੂੰ ਨੁਕਸਾਨ ਝੱਲਣਾ ਪਿਆ। ਭਾਰੀ ਮੀਂਹ ਕਾਰਨ ਕਈ ਨੀਵੇਂ ਇਲਾਕਿਆਂ ’ਚ ਪਾਣੀ ਭਰ ਜਾਣ ਕਾਰਨ ਰਾਮੇਸ਼ਵਰਮ ਅਤੇ ਨਾਗਪੱਟੀਨਮ ਦੇ ਤੱਟਵਰਤੀ ਕਸਬਿਆਂ ’ਚ ਆਮ ਜਨਜੀਵਨ ਪ੍ਰਭਾਵਤ ਰਿਹਾ।
ਹਾਲਾਂਕਿ ਚੱਕਰਵਾਤੀ ਤੂਫਾਨ ਦਿਤਵਾਹ ਦੇ ਡੂੰਘੇ ਦਬਾਅ ’ਚ ਕਮਜ਼ੋਰ ਹੋਣ ਦੀ ਸੰਭਾਵਨਾ ਹੈ ਅਤੇ ਐਤਵਾਰ ਅੱਧੀ ਰਾਤ ਤਕ ਮੌਸਮ ਪ੍ਰਣਾਲੀ ਉੱਤਰੀ ਤਾਮਿਲਨਾਡੂ ਅਤੇ ਪੁਡੂਚੇਰੀ ਦੇ ਤੱਟਾਂ ਤੋਂ ਘੱਟੋ-ਘੱਟ 30 ਕਿਲੋਮੀਟਰ ਦੀ ਦੂਰੀ ਉਤੇ ਦੱਖਣ-ਪਛਮੀ ਬੰਗਾਲ ਦੀ ਖਾੜੀ ਉਤੇ ਕੇਂਦਰਿਤ ਹੋ ਗਈ। ਚੱਕਰਵਾਤੀ ਤੂਫਾਨ 5 ਕਿਲੋਮੀਟਰ ਪ੍ਰਤੀ ਘੰਟਾ ਦੀ ਰਫਤਾਰ ਨਾਲ ਅੱਗੇ ਵਧ ਰਿਹਾ ਹੈ।
ਰਾਜ ਦੇ ਮਾਲ ਅਤੇ ਆਫ਼ਤ ਪ੍ਰਬੰਧਨ ਮੰਤਰੀ ਕੇ.ਕੇ.ਐਸ.ਐਸ.ਆਰ. ਰਾਮਚੰਦਰਨ ਨੇ ਦਸਿਆ ਕਿ ਤੁਤੀਕੋਰਿਨ ਅਤੇ ਤੰਜਾਵੁਰ ’ਚ ਕੰਧ ਡਿੱਗਣ ਕਾਰਨ ਦੋ ਲੋਕਾਂ ਦੀ ਮੌਤ ਹੋ ਗਈ, ਜਦਕਿ ਮਯਿਲਾਦੁਥੁਰਾਈ ’ਚ ਬਿਜਲੀ ਦੇ ਝਟਕੇ ਕਾਰਨ ਇਕ 20 ਸਾਲਾ ਨੌਜੁਆਨ ਦੀ ਮੌਤ ਹੋ ਗਈ। ਉਨ੍ਹਾਂ ਕਿਹਾ ਕਿ ਡੈਲਟਾ ਜ਼ਿਲ੍ਹਿਆਂ ਵਿਚ 149 ਪਸ਼ੂਆਂ ਦੀ ਮੌਤ ਹੋ ਗਈ ਹੈ ਅਤੇ 57,000 ਹੈਕਟੇਅਰ ਖੇਤ ਪ੍ਰਭਾਵਤ ਹੋਈ ਹੈ।
ਪੁਡੂਚੇਰੀ ’ਚ ਸਰਕਾਰੀ ਅਤੇ ਸਰਕਾਰੀ ਸਹਾਇਤਾ ਪ੍ਰਾਪਤ ਸਕੂਲ ਭਲਕੇ 1 ਦਸੰਬਰ ਨੂੰ ਬੰਦ
ਪੁਡੂਚੇਰੀ ’ਚ ਭਾਰੀ ਬਾਰਿਸ਼ ਕਾਰਨ ਸਰਕਾਰੀ ਅਤੇ ਸਰਕਾਰੀ ਸਹਾਇਤਾ ਪ੍ਰਾਪਤ ਸਕੂਲ ਭਲਕੇ 1 ਦਸੰਬਰ ਨੂੰ ਬੰਦ ਰਹਿਣਗੇ। ਪੁਡੂਚੇਰੀ ਦੇ ਗ੍ਰਹਿ ਮੰਤਰੀ ਏ. ਨਮਾਸਿਵਯਮ ਨੇ ਇਸ ਬਾਰੇ ਜਾਣਕਾਰੀ ਦਿੱਤੀ।
