ਕੇਂਦਰ ਸਰਕਾਰ ਨੇ ਕੀਤੀ ਨਿਯਕਤੀ
ਨਵੀਂ ਦਿੱਲੀ : ਦੇਸ਼ ਅੰਦਰ ਪਹਿਲੇ ਚੀਫ਼ ਆਫ ਡਿਫੈਂਸ ਸਟਾਫ਼ (ਸੀਡੀਐਸ) ਦੀ ਨਿਯੁਕਤੀ ਕਰ ਦਿਤੀ ਗਈ ਹੈ। ਕੇਂਦਰ ਸਰਕਾਰ ਨੇ ਫ਼ੌਜ ਮੁਖੀ ਜਨਰਲ ਬਿਪਿਨ ਰਾਵਤ ਨੂੰ ਦੇਸ਼ ਦਾ ਪਹਿਲਾ ਚੀਫ਼ ਆੱਫ਼ ਡਿਫ਼ੈਂਸ ਸਟਾਫ਼ (ਸੀਡੀਐਸ) ਨਿਯੁਕਤ ਕਰ ਦਿਤਾ ਹੈ। ਉਨ੍ਹਾਂ ਦੀ ਨਿਯੁਕਤੀ ਬਾਰੇ ਕੈਬਨਟਿ ਕਮੇਟੀ ਆਨ ਸਕਿਓਰਿਟੀ ਨੂੰ ਪਹਿਲਾਂ ਹੀ ਹਰੀ ਝੰਡੀ ਮਿਲ ਚੁੱਕੀ ਸੀ।
Photo
ਦੱਸ ਦਈਏ ਕਿ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਇਸੇ ਸਾਲ ਲਾਲ ਕਿਲੇ ਤੇ ਸਮਾਗਮ ਦੌਰਾਨ ਸੀਡੀਐੱਸ ਦੀ ਨਿਯੁਕਤੀ ਦਾ ਐਲਾਨ ਕੀਤਾ ਸੀ। ਸਤੰਬਰ 2016 'ਚ ਦੇਸ਼ ਦੇ 27ਵੇਂ ਥਲ ਸੈਨਾ ਮੁਖੀ ਭਾਰਤੀ ਫ਼ੌਜ ਦੇ ਵਾਈਸ ਚੀਫ਼ ਬਣੇ ਸਨ। ਜਨਰਲ ਦਲਬੀਰ ਸਿੰਘ ਸੁਹਾਗ ਦੇ ਰਿਟਾਇਰ ਹੋਣ ਤੋਂ ਬਾਅਦ ਜਨਰਲ ਬਿਪਿਨ ਰਾਵਤ ਨੇ 31 ਦਸੰਬਰ, 2016 ਨੂੰ ਭਾਰਤੀ ਫ਼ੌਜ ਦੀ ਕਮਾਂਡ ਸੰਭਾਲੀ ਸੀ।
Photo
ਜਨਰਲ ਰਾਵਤ ਦਾ ਪਿਛੋਕੜ ਵੀ ਫ਼ੌਜੀ ਪਰਿਵਾਰ ਵਿਚੋਂ ਹੈ। ਉਨ੍ਹਾਂ ਦਾ ਪਰਵਾਰ ਕਈ ਪੀੜ੍ਹੀਆਂ ਤੋਂ ਫ਼ੌਜੀ ਸੇਵਾਵਾਂ ਨਿਭਾਅ ਰਿਹਾ ਹੈ। ਜਨਰਲ ਰਾਵਤ ਦੇ ਪਿਤਾ ਲੈਫ਼ਟੀਨੈਂਟ ਜਨਰਲ ਲਕਸ਼ਮਣ ਸਿੰਘ ਰਾਵਤ ਕਈ ਸਾਲਾਂ ਤਕ ਭਾਰਤੀ ਫ਼ੌਜ ਵਿਚ ਰਹੇ ਸਨ।
Photo
ਜਨਰਲ ਬਿਪਿਨ ਰਾਵਤ ਇੰਡੀਅਨ ਮਿਲਟਰੀ ਅਕੈਡਮੀ ਤੇ ਡਿਫ਼ੈਂਸ ਸਰਵਿਸਜ਼ ਸਟਾਫ ਕਾਲਜ ਵਿਚ ਪੜ੍ਹ ਚੁੱਕੇ ਹਨ। ਉਨ੍ਹਾਂ ਮਦਰਾਸ ਯੂਨੀਵਰਸਿਟੀ ਤੋਂ ਡਿਫ਼ੈਂਸ ਸਰਵਿਸੇਜ਼ ਵਿਚ ਐੱਮ.ਫ਼ਿਲ. ਕੀਤੀ ਹੈ।
Photo
ਜਨਰਲ ਬਿਪਿਨ ਰਾਵਤ ਦਾ ਜਨਮ ਉਤਰਾਖੰਡ ਦੇ ਪੌੜੀ (ਗੜ੍ਹਵਾਲ) ਵਿਖੇ ਹੋਇਆ ਸੀ। ਉਨ੍ਹਾਂ ਦੇਹਰਾਦੂਨ ਦੇ ਕੈਂਬਰੀਅਨ ਹਾਲ ਸਕੂਲ, ਸੇਂਟ ਐਡਵਰਡਜ਼ ਸਕੂਲ ਸ਼ਿਮਲਾ, ਨੈਸ਼ਨਲ ਡਿਫ਼ੈਂਸ ਅਕੈਡਮੀ ਖੜਕਵਾਲਾ ਤੇ ਦੇਹਰਾਦੂਨ ਸਥਿਤ ਇੰਡੀਅਨ ਮਿਲਟਰੀ ਅਕੈਡਮੀ ਤੋਂ ਅਕਾਦਮਿਕ ਡਿਗਰੀਆਂ ਹਾਸਲ ਕੀਤੀਆਂ ਹੋਈਆਂ ਹਨ।
Photo
ਦੇਹਰਾਦੂਨ ਦੀ ਅਕੈਡਮੀ 'ਚ ਜਨਰਲ ਰਾਵਤ ਨੂੰ 'ਸਵੋਰਡ ਆੱਫ਼ ਆੱਨਰ' ਲੈਣ ਦਾ ਮਾਣ ਵੀ ਹਾਸਲ ਹੋਇਆ ਸੀ। ਉਹ ਵੇਲਿੰਗਟਨ ਦੇ ਡਿਫ਼ੈਂਸ ਸਰਵਿਸੇਜ਼ ਸਟਾਫ਼ ਕਾਲਜ ਅਤੇ ਫ਼ੋਰਟ ਲੀਵਨਵਰਥ–ਕਾਨਸਾਸ ਸਥਿਤ ਯੂਨਾਈਟਿਡ ਸਟੇਟਸ ਆਰਮੀ ਕਮਾਂਡ ਐਂਡ ਜਨਰਲ ਸਟਾਫ਼ ਕਾਲਜ ਦੇ ਵੀ ਗ੍ਰੈਜੂਏਟ ਹਨ।
Photo
ਕਾਬਲੇਗੌਰ ਹੈ ਕਿ ਦੇਸ਼ ਅੰਦਰ ਸੀਡੀਐਸ ਦੇ ਅਹੁਦੇ ਦੀ ਸਭ ਤੋਂ ਪਹਿਲਾਂ ਜ਼ਰੂਰਤ 1999 'ਚ ਵਾਜਪਾਈ ਸਰਕਾਰ ਵੇਲੇ ਪਾਕਿਸਤਾਨ ਨਾਲ ਲੜੀ ਗਈ ਕਾਰਗਿਲ ਜੰਗ ਦੌਰਾਨ ਮਹਿਸੂਸ ਹੋਈ ਸੀ। ਇਹ ਨਿਯੁਕਤੀ ਦੇਸ਼ ਦੀਆਂ ਤਿੰਨੋਂ ਸੈਨਾਵਾਂ ਹਵਾਈ ਸੈਨਾ, ਜਲ ਸੈਨਾ ਤੇ ਥਲ ਸੈਨਾ ਵਿਚਾਲੇ ਬਿਹਤਰ ਤਾਲਮੇਲ ਬਿਠਾਉਣ ਖਾਤਰ ਕੀਤੀ ਗਈ ਹੈ। ਮੋਦੀ ਸਰਕਾਰ ਨੇ ਦੇਸ਼ ਦੀ ਇਸ ਚਰੌਕਣੀ ਜ਼ਰੂਰਤ ਨੂੰ ਅੰਜ਼ਾਮ ਤਕ ਪਹੁੰਚਾ ਕੇ ਵਾਜਪਾਈ ਸਰਕਾਰ ਦੇ ਅਧੂਰੇ ਸੁਪਨੇ ਨੂੰ ਪੂਰਾ ਕੀਤਾ ਹੈ।
