ਨਵੀਂ ਦਿੱਲੀ : ਏ.ਆਈ.ਸੀ.ਟੀ.ਈ ਦੀ ਵੈੱਬਸਾਈਟ ਅਨੁਸਾਰ ਸਾਲ 2014-15 ਤੋਂ 2017-18 ਦੇ ਵਿਚਕਾਰ ਦੇਸ਼ ‘ਚ 410 ਤੋਂ ਜ਼ਿਆਦਾ ਕਾਲਜਾਂ ਨੂੰ ਬੰਦ ਕਰਨ ਦੀ ਮਨਜ਼ੂਰੀ ਦਿੱਤੀ ਗਈ ਹੈ। ਜੇਕਰ ਅਜਿਹਾ ਹੁੰਦਾ ਹੈ ਤਾਂ ਦੇਸ਼ ਦੇ ਕਈ ਸੂਬਿਆਂ ‘ਚ ਕਾਲਜਾਂ ਨੂੰ ਬੰਦ ਕਰਨਾ ਪਵੇਗਾ ਜਾਂ ਫਿਰ ਇੰਜੀਨੀਅਰਿੰਗ ਕਾਲਜਾਂ ਨੂੰ ਆਰਟਸ ਕਾਲਜਾਂ ‘ਚ ਬਦਲਨਾ ਹੋਵੇਗਾ।
‘ਆਲ ਇੰਡੀਆ ਕਾਉਂਸਿਲ ਫਾਰ ਤਕਨੀਕੀ ਸਿੱਖਿਆ’ ਦੇਸ਼ ਦੇ 800 ਇੰਜੀਨੀਅਰਿੰਗ ਕਾਲਜਾਂ ਨੂੰ ਬੰਦ ਕਰਨ ਲਈ ਯੋਜਨਾ ਬਣਾ ਰਹੀ ਹੈ। ਇਸ ਦੇ ਪਿੱਛੇ ਇਹ ਕਾਰਨ ਦੱਸਿਆ ਜਾ ਰਿਹਾ ਹੈ ਕਿ ਇਨ੍ਹਾਂ ਕਾਲਜਾਂ ‘ਚ ਸੀਟਾਂ ਦੇ ਦਾਅਵੇਦਾਰ ਨਹੀਂ ਹੁੰਦੇ ਤੇ ਨਾ ਹੀ ਇਨ੍ਹਾਂ ਕਾਲਜਾਂ ਦੀ ਪੜਾਈ ਦੀ ਗੁਣਵੱਤਾ ਠੀਕ ਹੈ। ਏ.ਆਈ.ਸੀ.ਟੀ.ਈ ਦੇ ਚੇਅਰਮੈਨ ਅਨਿਲ ਦੱਤਾਤ੍ਰੇ ਸਹਸਤ੍ਰਬੁਧੇ ਨੇ ਦੱਸਿਆ ਹੈ ਕਿ, "ਕਾਲਜਾਂ ਦੀਆਂ ਕਾਫ਼ੀ ਸੀਟਾਂ ਖਾਲੀ ਜਾ ਰਹੀਆਂ ਹਨ, ਇਹੀ ਕਾਰਨ ਹੈ ਕਿ ਇਨਾਂ ਨੂੰ ਬੰਦ ਕੀਤਾ ਜਾ ਸਕਦਾ ਹੈ। ਦੇਸ਼ ‘ਚ ਕਰੀਬ 150 ਕਾਲਜ ਅਜਿਹੇ ਹਨ, ਜੋ ਹਰ ਸਾਲ ਬੰਦ ਹੋ ਜਾਂਦੇ ਹਨ।”
ਏ.ਆਈ.ਸੀ.ਟੀ.ਈ ਦੇ ਨਿਯਮ ਕਹਿੰਦੇ ਹਨ ਕਿ ਜਿਨ੍ਹਾਂ ਕਾਲਜਾਂ ਦੇ ਨੇੜੇ ਸਹੀ ਬੁਨਿਆਦੀ ਢਾਂਚਾ ਮੌਜੂਦ ਨਹੀਂ ਜਾਂ ਫਿਰ ਜਿਨ੍ਹਾਂ ਕਾਲਜਾਂ ‘ਚ ਲਗਾਤਾਰ ਪੰਜ ਸਾਲਾਂ ਤੋਂ 30 ਫ਼ੀਸਦੀ ਤੋਂ ਘੱਟ ਦਾਖਲਾ ਹੋਇਆ ਹੈ, ਉਨ੍ਹਾਂ ਨੂੰ ਬੰਦ ਕਰ ਦਿੱਤਾ ਜਾਵੇਗਾ।
