3 ਜਨਵਰੀ ਦੀ ਪ੍ਰਧਾਨ ਮੰਤਰੀ ਨਰੇਂਦਰ ਮੋਦੀ ਦੀ ਰੈਲੀ ਨੂੰ ਲੈ ਕੇ ਭਾਜਪਾ ਦੀ ਅੰਦਰੂਨੀ ਕਲੇਸ਼ਬਾਜ਼ੀ ਜੱਗ-ਜ਼ਾਹਰ ਹੁੰਦੀ ਜਾ ਰਹੀ ਹੈ.......
ਗੁਰਦਾਸਪੁਰ : 3 ਜਨਵਰੀ ਦੀ ਪ੍ਰਧਾਨ ਮੰਤਰੀ ਨਰੇਂਦਰ ਮੋਦੀ ਦੀ ਰੈਲੀ ਨੂੰ ਲੈ ਕੇ ਭਾਜਪਾ ਦੀ ਅੰਦਰੂਨੀ ਕਲੇਸ਼ਬਾਜ਼ੀ ਜੱਗ-ਜ਼ਾਹਰ ਹੁੰਦੀ ਜਾ ਰਹੀ ਹੈ। ਮਿਲੀ ਜਾਣਕਾਰੀ ਅਨੁਸਾਰ ਇਸ ਲੋਕ ਸਭਾ ਹਲਕੇ ਤੋਂ ਕਰੀਬ ਦੋ ਲੱਖ ਵੋਟਾਂ ਦੇ ਫ਼ਰਕ ਨਾਲ ਚੋਣ ਹਾਰਨ ਵਾਲੇ ਭਾਜਪਾ ਆਗੂ ਸਵਰਨ ਸਲਾਰੀਆ ਵਲੋਂ ਪਾਰਟੀ ਤੋਂ ਬਾਗੀ ਹੁੰਦਿਆਂ ਰੈਲੀ ਦੀ ਕਮਾਂਡ ਅਪਣੇ ਹੱਥਾਂ ਵਿਚ ਲੈਣ ਦੇ ਅਸਫ਼ਲ ਯਤਨਾਂ ਕਾਰਨ ਪੰਜਾਬ ਭਾਜਪਾ ਦੇ ਪ੍ਰਧਾਨ ਸ਼ਵੇਤ ਮਲਿਕ ਤੇ ਹੋਰ ਕੇਂਦਰੀ ਆਗੂ ਨਿਰਾਸ਼ ਹਨ। ਪੰਜਾਬ ਬੀਜੇਪੀ ਹਾਈਕਮਾਂਡ ਨੇ ਰੈਲੀ ਦੀ ਜ਼ਿੰਮੇਵਾਰੀ ਅਪਣੇ ਮੋਢਿਆਂ ਉਤੇ ਚੁੱਕੀ ਹੋਈ ਹੈ।
Shwait Malik
ਜ਼ਿਲ੍ਹਾ ਭਾਜਪਾ ਪ੍ਰਧਾਨ ਬਾਲਕਿਸ਼ਨ ਮਿੱਤਲ ਵੀ ਮੋਦੀ ਦੀ ਰੈਲੀ ਨੂੰ ਲੈ ਕੇ ਨਿਰਾਸ਼ ਹਨ ਕਿਉਂਕਿ ਜ਼ਿਲ੍ਹਾ ਪ੍ਰਧਾਨ ਹੋਣ ਦੇ ਬਾਵਜੂਦ ਮਿੱਤਲ ਨੂੰ ਰੈਲੀ ਸਬੰਧੀ ਤਿਆਰੀਆਂ ਵਿਚ ਬੁਲਾਇਆ ਤਕ ਨਹੀਂ ਗਿਆ। ਇਹੀ ਨਹੀਂ ਉਹਨਾਂ ਦੀਆਂ ਤਸਵੀਰਾਂ ਵੀ ਪਾਰਟੀ ਦੇ ਫਲੈਕਸਾਂ ਤੋਂ ਗਾਇਬ ਹਨ। ਇਸ ਸਬੰਧੀ ਕਈ ਵਾਰ ਮਿੱਤਲ ਦਾ ਪੱਖ ਜਾਨਣ ਲਈ ਉਹਨਾਂ ਦੇ ਮੋਬਾਈਲ ਫੋਨ ਉਤੇ ਸੰਪਰਕ ਕਰਨ ਦੀ ਕੋਸ਼ਿਸ਼ ਕੀਤੀ ਗਈ ਪਰ ਉਹਨਾਂ ਦਾ ਫੋਨ ਪਿਛਲੇ ਤਿੰਨ ਚਾਰ ਦਿਨਾਂ ਤੋਂ ਬੰਦ ਆ ਰਿਹਾ ਹੈ।
Bal Kishan Mittal
ਗੁਰਦਾਸਪੁਰ ਰੈਲੀ ਦੀਆਂ ਤਿਆਰੀਆਂ ਨੂੰ ਲੈ ਕੇ ਲਾਏ ਗਏ ਸਾਰੇ ਫਲੈਕਸਾਂ ਵਿਚ ਮਿੱਤਲ ਦੀ ਤਸਵੀਰ ਦਾ ਗਾਇਬ ਹੋਣਾ ਭਾਜਪਾ ਦੀ ਅੰਦਰੂਨੀ ਧੜੇਬਾਜ਼ੀ ਦੇ ਹੀ ਸੰਕੇਤ ਹਨ। ਇਹ ਵੀ ਪਤਾ ਲੱਗਾ ਹੈ ਕਿ ਸਲਾਰੀਆ ਵਲੋਂ ਫਲੈਕਸਾਂ ਵਿਚੋਂ ਮਿੱਤਲ ਦਾ ਨਾਂਅ ਗਾਇਬ ਕਰਨ ਨੂੰ ਪੰਜਾਬ ਭਾਜਪਾ ਨੇ ਹੁਣ ਪੂਰੀ ਸੰਜੀਦਗੀ ਨਾਲ ਲਿਆ ਹੈ। ਇਕ ਹੋਰ ਹੈਰਾਨੀਜਨਕ ਪੱਖ ਇਹ ਵੀ ਸਾਹਮਣੇ ਆ ਰਿਹਾ ਹੈ ਕਿ ਸਲਾਰੀਆ ਵਲੋਂ ਵੀ ਮਿੱਤਲ ਦੀ ਤਰਾਂ ਪਿਛਲੇ ਕਰੀਬ ਹਫ਼ਤੇ ਤੋਂ ਕਿਸੇ ਵੀ ਪੱਤਰਕਾਰ ਦਾ ਫੋਨ ਨਹੀਂ ਉਠਾਇਆ ਜਾ ਰਿਹਾ।
