ਮੂਰਤੀ ਨੂੰ ਇਸ਼ਨਾਨ ਕਰਵਾਉਣ ਲਈ 50 ਲੋਕਾਂ ਦੇ ਇਕੱਠ ਨਾਲ ਆਏ ਸਨ ਬਿਆਸ ਨਦੀ ’ਚ
Jalandhar News : ਬਿਆਸ ਨਦੀ ’ਚ ਨਹਾਉਣ ਲਈ ਉਤਰੇ 4 ਨੌਜਵਾਨ ਪਾਣੀ ’ਚ ਵਹਿ ਗਏ ਹਨ। ਇਹ ਚਾਰੇ ਨੌਜਵਾਨ ਅਪਣੇ ਰਿਸ਼ਤੇਦਾਰਾਂ ਨਾਲ ਜਨਮਅਸ਼ਟਮੀ ਸਮੇਂ ਘਰ ’ਚ ਰੱਖੀ ਕ੍ਰਿਸ਼ਨ ਦੀ ਪਿੱਤਲ ਦੀ ਮੂਰਤੀ ਨੂੰ ਇਸ਼ਨਾਨ ਕਰਵਾਉਣ ਲਈ ਬਿਆਸ ਨਦੀ ’ਤੇ ਆਏ ਸਨ। ਇਸ ਦੌਰਾਨ ਚਾਰੇ ਨੌਜੁਆਨ ਡੂੰਘੇ ਪਾਣੀ ’ਚ ਚਲੇ ਗਏ ਅਤੇ ਤੇਜ਼ ਪਾਣੀ ਦੇ ਵਹਾਅ ’ਚ ਵਹਿ ਗਏ। ਜਲੰਧਰ ਤੋਂ ਲਗਭਗ 50 ਲੋਕ ਬਿਆਸ ਨਦੀ ’ਚ ਮੂਰਤੀ ਇਸ਼ਨਾਨ ਲਈ ਗਏ ਸਨ।
ਡੁੱਬਣ ਵਾਲੇ ਨੌਜਵਾਨਾਂ ਦੀ ਪਛਾਣ ਅੰਕਿਤ, ਧੀਰਜ, ਗੋਲੂ ਅਤੇ ਰਣਜੀਤ ਵਜੋਂ ਹੋਈ ਹੈ ਜੋ ਉੱਤਰ ਪ੍ਰਦੇਸ਼ ਦੇ ਜ਼ਿਲ੍ਹਾ ਸੀਤਾਪੁਰ ਦੇ ਪਿੰਡ ਖਰਾਰਾ ਮੂਲ ਦੇ ਹਨ। ਜਲੰਧਰ ’ਚ ਇਹ ਅਰਬਨ ਅਸਟੇਟ ਫ਼ੇਜ਼ 1 ’ਚ ਰਹਿੰਦੇ ਸਨ। ਇਕ ਪੁਲਿਸ ਅਧਿਕਾਰੀ ਨੇ ਦਸਿਆ ਕਿ ਮ੍ਰਿਤਕਾਂ ਦੀ ਉਮਰ 17 ਤੋਂ 22 ਸਾਲ ਵਿਚਕਾਰ ਹੈ।
ਮੌਕੇ ’ਤੇ ਮੌਜੂਦ ਮ੍ਰਿਤਕਾਂ ਦੇ ਰਿਸ਼ਤੇਦਾਰ ਅੰਕੁਰ ਨੇ ਕਿਹਾ, ‘‘ਧੀਰਜ ਮੇਰੀ ਮਾਸੀ ਦਾ ਮੁੰਡਾ ਸੀ, ਰਣਜੀਤ ਅਤੇ ਗੋਲੂ ਮੇਰੇ ਸਕੇ ਭਰਾ ਸਨ ਅਤੇ ਅੰਕਿਤ ਸਾਡੇ ਪਿੰਡ ਦਾ ਹੀ ਹੈ।’’ ਉਸ ਨੇ ਕਿਹਾ ਕਿ ਧੀਰਜ ਦਾ ਵਿਆਹ ਤਿੰਨ ਸਾਲ ਪਹਿਲਾਂ ਹੀ ਹੋਇਆ ਸੀ, ਬਾਕੀ ਸਾਰੇ ਅਜੇ ਕੁਆਰੇ ਸਨ। ਖ਼ਬਰ ਲਿਖੇ ਜਾਣ ਤਕ ਗੋਤਾਖੋਰਾਂ ਦੀ ਮਦਦ ਨਾਲ ਚਾਰਾਂ ਦੀ ਭਾਲ ਕੀਤੀ ਜਾ ਰਹੀ ਸੀ। ਪਰਿਵਾਰਿਕ ਮੈਂਬਰਾਂ ਦਾ ਰੋ ਰੋ ਕੇ ਬੁਰਾ ਹਾਲ ਹੈ।
